‘Go Boifa Jehofa—Ke Bjona Bohlale’

“A RE kweng phêthêxô ya ditaba tšohle: Boifa Modimo, O lôtê taêlô tša xaxwe. Ké se se swanetšexo batho bohle.” (Mmoledi 12:13) Ruri ke phetho e bohlale gakaakang yeo Kgoši Salomo wa Isiraele ya bogologolo a e fihleletšego a le ka tlase ga pudulelo ya Modimo! Mopatriareka Jobo le yena o be a kwešiša bohlokwa bja go boifa Modimo, ka gobane o itše: “Xo boifa Mong’a bohle ké byôna bohlale; xo tloxêla bobe ké thlaoloxanyô.”—Jobo 28:28.

Beibele e lebelela go boifa Jehofa e le gabohlokwa kudu. Ke ka baka la’ng go hlagolela ga rena poifo ya borapedi ya go boifa Modimo e le gabohlale? Go boifa Modimo go re hola ka tsela efe—re le motho ka o tee ka o tee e bile re le sehlopha sa barapedi ba therešo? Ditemana 26 go ya go 35 tša Diema kgaolo 14 di araba dipotšišo tše. *

Mothopo wa “Kgodišego e Tiilego”

Salomo o re: “X’O šia Morêna O tlo iketla ruri [“o tlo ba le kgodišego e tiilego,” NW]; le bana b’axo ba tlo ba le sethšabêlô.” (Diema 14:26) Motho yo a boifago Modimo o bota feela Modimo yo a botegago ka go se kwanantšhe le yo Matla ohle, Jehofa. Ga go makatše ge motho yo bjalo a lebeletšana le bokamoso ka kgodišego e tiilego! Bokamoso bja gagwe ke bjo botelele le bjo bo kgotsofatšago.

Lega go le bjalo, go ka thwe’ng ka bokamoso bja bao kholofelo ya bona e lego lefaseng le—dithulaganyo tša lona, mekgatlo ya lona, dikgopolo tša lona le dithoto tša lona? Bokamoso le ge e le bofe bjo ba holofetšego go ba le bjona ke bja nakwana, ka gobane Beibele e re: “Lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:17) Ka gona, na re na le lebaka le ge e le lefe la go “rata lefase le tše lefaseng”?—1 Johane 2:15.

Ke megato efe yeo batswadi bao ba boifago Modimo ba ka e gatago bakeng sa go kgonthišetša gore bana ba bona “ba tlo ba le sethšabêlô”? Mopsalme o opetše ka gore: “Tlang lena Bana Le nkweng, ke Le rutê xo boifa Morêna.” (Psalme 34:11) Ge bana ba rutwa go boifa Modimo ka mohlala wa batswadi le tlhahlo, go na le kgonagalo e kgolo ya gore ba tla gola gore e be banna le basadi bao ba botago Jehofa ka mo go tiilego.—Diema 22:6.

Salomo o tšwela pele ka gore: “Xo šia Morêna ké mothôpô wa bophelô; O efoxa merêô ya lehu.” (Diema 14:27) Go boifa Jehofa ke “mothôpô wa bophelô” ka gobane Modimo wa therešo ke “sediba sa meetse a phelaxo.” (Jeremia 2:13) Go monya tsebo ka Jehofa le ka Jesu Kriste go ka bolela bophelo bjo bo sa felego go rena. (Johane 17:3) Le gona go boifa Modimo go re efoša mereo ya lehu. Bjang? Diema 13:14 e re: “Thutô ya mohlale ké mothôpô wa bophelô; e Xo efoša morêô wa lehu.” Ge re boifa Jehofa, re e-kwa molao wa gagwe gomme re dumelela Lentšu la gagwe gore le hlahle megato ya rena, na ga re šireletšwe ditirong tše kotsi le maikwelong ao a ka re dirago gore re hwe go sa letelwa?

 “Bokwala bya Kxoši”

Nakong e ntši ya pušo ya gagwe, Salomo e be e le kgoši e boifago Modimo yeo e bego e e-kwa Jehofa. Se se ile sa dira gore a buše ka katlego. Ke’ng seo se bontšhago gore kgoši e buša gabotse? Diema 14:28 e araba ka gore: “Bokwala bya kxoši ké boxolo bya sethšaba; xe se nôtlêxa xo senyêxa mmuši.” Go atlega ga kgoši go bontšhwa ke lethabo la balata ba yona. Ge e ba batho ba bantši kudu ba kganyoga go dula ba bušwa ke yona, seo se bontšha gore e buša gabotse. Salomo “mmušô wa xaxwe o [be o] xóma ka lewatlê [go tloga lewatleng le Lehwibidu go ya lewatleng la Mediterranean] thokô tšohle, xo tloxa nokeng [ya Eforate] xo fihla mafêlêlong a lefase.” (Psalme 72:6-8) Pušo ya gagwe e be e bonagatšwa ke khutšo le katlego tšeo di sa bapišwego le selo. (1 Dikxoši 4:24, 25) Pušo ya Salomo e ile ya atlega. Ka lehlakoreng le lengwe, go se amogelwe ga yona ke batho ka kakaretšo go bontšha go nyatša ga bona mohlankedi yo a phagamego.

Tabeng ye, go ka thwe’ng ka letago la Salomo yo Mogolo, Kgoši Mesia, e lego Jesu Kriste? Nagana ka balata bao a nago le bona gaešita le lehono. Go dikologa lefase, banna le basadi ba boifago Modimo ba ka godimo ga dimilione tše tshela ba šetše ba kgethile go phela ka tlase ga pušo ya Kriste. Ba bontšha tumelo go Jesu gomme ba kopane gotee borapeding bja therešo bja Modimo yo a phelago. (Johane 14:1) Mafelelong a Pušo ya Nywaga e Sekete, batho ka moka bao ba lego kgopolong ya Modimo ba tla ba ba tsošitšwe. Lefase la paradeise ka nako yeo le tla ba le tletše ka batho ba thabilego le ba lokilego bao ba ipontšhitšego ba leboga Kgoši ya bona. Ruri bjoo e tla ba bohlatse bja go atlega ga pušo ya Kriste! Anke re kgomareleng ka go tia kholofelong ya rena e kgahlišago ya Mmušo.

Mehola ya Moya le ya Nama

Poifo ya borapedi ya go boifa Modimo e ka re nea khutšo ya pelo le ya moya. Go bjalo ka gobane dibopego tše dintši tša bohlale di akaretša kahlolo e botse le temogo. Diema 14:29 e re: “Mo-se-fele-pelo ó n’e thlaloxanyô-kxolo; wa sebefedi ó runya bošilo.” Tlhaologanyo goba temogo e re thuša go lemoga gore bogale bjo bo sa laolegego bo na le mafelelo a gobatšago boemong bja rena bja moya. “Thlôyanô, le dintwa, le pefêlô, le boxale, le dithsêlê” di lokeleditšwe gare ga mediro yeo e ka re thibelago gore re “se jé bohwa mmušong wa Modimo.” (Ba-Galatia 5:19-21) Re eletšwa gore re se galefe gaešita le ge re e-na le mabaka a kwagalago. (Ba-Efeso 4:26, 27) Le gona, go fela pelo go ka re lebiša dipolelong tša bošilo le ditirong tšeo re tlago go itsholela tšona ka morago.

Ge e šupa go mafelelo a gobatšago nameng ao a bakwago ke kgalefo, kgoši ya Isiraele e re: “Pelo-thšweu ké ’phelô bya mmele; lehufa ké bolwetši mašapong.” (Diema 14:30) Malwetši ao a bakwago ke kgalefo le pefelo a akaretša mathata a go hema, kgateletšo ya godimo ya madi, tšharakano ya sebete le mafelelo a gobatšago go pancreas. Le gona, dingaka di lokeletša kgalefo le pefelo e le maikwelo ao a mpefatšago maemo, goba gaešita le go baka malwetši a bjalo ka dišo tša ka teng (ulcer), lekhwekhwe, asthma, malwetši a letlalo le mathata a tšhilego ya dijo. Ka lehlakoreng le lengwe, “pelo e lego khutšong e phediša mmele.” (Diema 14:30, New International Version) Ka gona, re ba bohlale ge re ‘phegelela dilo tšeo e lego tša khutšo le tšeo re kago agana ka tšona.’—Ba-Roma 14:19.

Go Boifa Modimo go re Thuša Gore re se Bebe Sefahlego

Salomo o re: “Mo-hlakiša-babôtlana ó xoboša Mmopi wabô; Yêna-eo ó xodišwa ke thsetša-bahloki.” (Diema 14:31) Motho yo a boifago Modimo o lemoga gore batho ka moka ba na le Mmopi o tee, e lego Jehofa Modimo. Ka gona, mmotlana ke mogagabo rena, gomme tsela yeo a swarwago ka yona e bonwa ke Mmopi wa batho. E le gore re tumiše Modimo, re swanetše go swara ba bangwe ka tsela e lokilego le ya go se bebe sefahlego. Mokriste  yo a se nago sa gagwe o swanetše go amogela tlhokomelo ya moya ka ntle le go kgethollwa. Re swanetše go išetša badiidi le bahumi ditaba tše dibotse tša Mmušo wa Modimo.

Ge e bolela ka mohola o mongwe wa go boifa Modimo, kgoši e bohlale e re: “Yo kxôpô ó ušwa ke bobe bya xaxwe; yo boló ó holofêla le lehung [“o šireletšwa ke potego ya gagwe,” NW].” (Diema 14:32) Yo mobe o wišwa bjang? Go boletšwe gore se se ra gore ga go na kgonagalo le ge e le efe ya gore a boele sekeng ge a welwa ke masetla-pelo. Ka lehlakoreng le lengwe, ge a hlagelwa ke mathata, motho yo a boifago Modimo o šireletšwa ke potego ya gagwe go Modimo. Ka ge a bota Jehofa ka mo go feletšego go fihla lehung, o bontšha boikemišetšo bjo bo swanago le bjoo Jobo a ilego a bo bontšha, ge a be a re: “Ke tlo hwa kè sešo ka re: Ke molato.”—Jobo 27:5.

Go kgomarela potego go nyaka poifo ya go boifa Modimo le bohlale. Le gona, bohlale bo ka hwetšwa kae? Diema 14:33 e araba ka gore: “Bohlale bo axile mo pelong ya wa thlaloxanyô; le letswalô la lešilo le tla bo lemoxa.” Ee, bohlale bo ka hwetšwa pelong ya motho wa tlhaologanyo. Lega go le bjalo, ke ka tsela efe bo lemogwago ke wa lešilo? Go ya ka puku e nngwe ya ditšhupetšo, “lešilo le fišegela gore le bonagale le le bohlale, gomme le bolela tšeo le naganago gore ke bohlale eupša ge nako e dutše e e-ya di bonagala e le bošilo.”

“E Thêkxa Sethšaba”

Ge e tloša tlhokomelo ya rena tseleng yeo ka yona motho a kgongwago ke poifo ya go boifa Modimo le tseleng yeo ka yona e kgomago setšhaba ka moka, kgoši ya Isiraele e re: “Tokô e thêkxa sethšaba; sebe ké kxoboxô ya dilete.” (Diema 14:34) Ruri molao wo wa motheo o swantšheditšwe ka tsela e kwagalago boemong bja setšhaba sa Isiraele! Go kgomarela ditekanyetšong tša Modimo tše di phagamego go ile gwa feleletša ka gore ba-Isiraele ba godišwe ditšhabeng tšeo di bego di ba dikologile. Lega go le bjalo, ditiro tše di sa kgaotšego tša go se kwe di ile tša dira gore Isiraele mafelelong e nyatšwe e be e lahlwe ke Jehofa. Molao wo wa motheo o šoma bathong ba Modimo lehono. Phuthego ya Bokriste e fapane le lefase ka gobane e kgomarela melao ya Modimo ya motheo ya go loka. Lega go le bjalo, e le gore re dule re le boemong bjoo bjo bo phagamego, re swanetše go phela bophelo bjo bo hlwekilego re le motho ka o tee ka o tee. Go dira sebe go fo re tlišetša lenyatšo gotee le thogako phuthegong le go Modimo.

Ge a hlalosa seo se thabišago kgoši, Salomo o re: “Kxoši e kxahlwa ke ’lata le bohlale; e tlo xalefêla wa xo leša batho ’hlong.” (Diema 14:35) Le gona Diema 16:13 e re: “Melomo e boló e kxahla dikxoši; di rata mmoledi wa tša xo loka.” Ee, Moetapele wa rena le Kgoši, e lego Jesu Kriste, o thabišwa kudu ke ge re dira dilo tše di lokilego e bile re di dira ka temogo gomme re diriša melomo ya rena modirong wa go bolela ka Mmušo le wa go dira barutiwa. Ka gona, a re direng sohle seo re ka se kgonago gore re tšwele pele re swaregile modirong woo ge re dutše re thabela ditšhegofatšo tšeo di tlišwago ke go boifa Modimo wa therešo.

[Mongwalo wa ka tlase]

[Seswantšho go letlakala 15]

Motho a ka rutwa go boifa Modimo