Jesu Kriste ke Mang?

ANKE o nagane kamoo mo-Juda yo monyenyane yo a bitšwago Andrea a swanetšego go ba a ile a thaba ka gona ge a be a theeditše ka lekga la pele mantšu a Jesu wa Natsaretha! Beibele e bolela gore Andrea o ile a kitimela go morwarragwe gomme a re: “Re hweditše Mesia! [goba, Kriste].” (Johane 1:41) Lelemeng la Sehebere le la Segerika, mantšu ao gantši a fetolelwago e le “Mesia” le “Kriste” a bolela gore “Motlotšwa.” Jesu e be e le Motlotšwa, goba Mokgethwa wa Modimo—Moetapele yo a holofeditšwego. (Jesaya 55:4) Mangwalo a be a e-na le diporofeto tše di bego di bolela ka yena, le gona ba-Juda ka nako yeo ba be ba mo letetše.—Luka 3:15.

Re tseba bjang gore ruri Jesu e be e le Mokgethwa wa Modimo? Ge e le gabotse, ela hloko seo se diregilego ka ngwaga wa 29 C.E. ge Jesu a be a e-na le nywaga e 30. O ile a ya go Johane Mokolobetši e le gore a mo kolobetše meetseng a Noka ya Jorodane. Beibele e re: “Ya re xe Jesu a kolobeditšwe, à e-tšwa meetseng, xwa napa xwa bulêxa lexodimo, ’me a bôna Môya wa Modimo ò theoxa byalo ka leeba, ò e-tla xodimo xa xaxwe. Xwa tloxa xò kwala lentšu le le tšwaxo lexodimong lè re: Yêna-yo ké Yêna Morwa-moratwa wa-ka, yo ke kxahlwaxo ke Yêna.” (Mateo 3:16, 17) Ka morago ga go kwa mantšu ao a kamogelo, na Johane o be a ka ba le pelaelo le ge e le efe ya gore Jesu e be e le Mokgethwa wa Modimo? Ka go tšhollela moya wa Gagwe o mokgethwa go Jesu, Jehofa Modimo o ile a mo tlotša, goba a mo kgetha, gore e be Kgoši ya Mmušo wa Gagwe o tlago. Ka gona, Jesu e bile Jesu Kriste, goba Jesu Motlotšwa. Lega go le bjalo, Jesu e be e le Morwa wa Modimo ka tsela efe? O bile gona neng?

O Bile Gona Mehleng ya “Boxolo-xolo”

Tsela ya Jesu ya bophelo e ka arolwa ka dikarolo tše tharo. Ya pele e thomile kgale kudu pele a belegwa e le motho. Mika 5:1 e re o bile gona mehleng ya “boxolo-xolo bya neng le neng.” Jesu ka boyena o itše: “Nna ke wa xodimo”—seo se ra gore, legodimong. (Johane 8:23) O bile gona legodimong e le motho yo matla wa moya.

Ka ge dilo ka moka tše di bopilwego di bile le mathomo, go kile gwa ba le nako yeo ka yona Modimo a bego a le noši. Lega go le bjalo, nywageng e mentši kudu e fetilego, Modimo o ile a ba Mmopi. Tlholo ya gagwe ya pele e bile mang? Puku ya mafelelo ya Beibele e bolela ka Jesu e le “Mo-thôma-hlôlô-ya-Modimo.” (Kutollo 3:14) Jesu ke “tháka-letswálô yá dibopya tšohle.” Seo se bjalo “ka xobane tšohle tša kwa maxodimong le mo ’faseng di hlodilwe ka Yêna, tše di bônwaxo le tše di sa bonwexo.” (Ba-Kolose 1:15, 16) Ee, Jesu e be e le yena feela yo a bopilwego ke Modimo ka noši ka go lebanya. Ka baka leo, o bitšwa “Morwa [wa Modimo] e a tswetšwexo à nnoši.” (Johane 3:16) Le gona Morwa yo wa leitšibulo o bitšwa “LENTŠU.” (Johane 1:14) Ka baka la’ng? Ka gobane pele ga ge a ka belegwa e le motho, o hlanketše legodimong e le mmoleledi wa Modimo.

“LENTŠU” o be a e-na le Jehofa Modimo “mathomong,” ge go be go hlolwa “lexodimo le lefase.” E be e le yena yo Modimo a mmoditšego gore: “A re direng motho ka xo swanthša ka rena.” (Johane 1:1; Genesi 1:1, 26) Morwa yo wa Jehofa wa leitšibulo o be a e-na le Tatagwe, a šoma le yena ka mafolofolo. Go Diema 8:22-31, go bolelwa ka yena e le yo a rego: “Ké xe kè na naê’ [Mmopi] kè le mohlankana w’axwe, kè mo kxahla mehla yohle, kè bapala pele xa xaxwe ka mehla.”

Ruri Jehofa Modimo le Morwa wa gagwe yo a tswetšwego a nnoši ba swanetše go ba ba ile ba ba bagwera ba kgaufsi kudu ge ba be ba dutše ba šoma ba bapelane! Go gwerana le Jehofa ka  tsela e bjalo ya kgaufsi ka nywaga e mentši kudu go ile gwa kgoma Morwa wa Modimo ka mo go tseneletšego. Morwa yo yo a kwago o ile a ba bjalo ka Tatagwe, Jehofa. Ge e le gabotse, Ba-Kolose 1:15 e bitša Jesu gore ke “seswanthšô sa Modimo e a sa bonwexo.” Le ke lebaka le lengwe leo ka lona go ba le tsebo ka Jesu go lego bohlokwa e le gore re kgotsofatše senyakwa sa rena sa moya le kganyogo ya rena ya tlhago ya go nyaka go tseba Modimo. Selo se sengwe le se sengwe seo Jesu a se dirilego ge a be a le lefaseng e tloga e le sona seo Jehofa a bego a letetše gore a se dire. Ka baka leo, go tseba Jesu gape go bolela go oketša tsebo ya rena ka Jehofa. (Johane 8:28; 14:8-10) Eupša Jesu o tlile bjang lefaseng?

Bophelo bja Gagwe e le Motho

Karolo ya bobedi ya bophelo bja Jesu e thomile nakong ya ge Modimo a be a romela Morwa wa gagwe lefaseng. Jehofa o dirile se ka go fetišetša bophelo bja Jesu ka tsela ya mohlolo go tloga legodimong go ya ka popelong ya kgarebe e botegago ya mo-Juda e bitšwago Maria. Jesu ga se a ka a abela go se phethagale ka gobane o be a se na tate yo e lego motho. Moya o mokgethwa wa Jehofa, goba matla a šomago, o ile wa aparetša Maria, matla a gagwe a ile a mo “okamêla wa moriti,” gomme ka tsela ya mohlolo a mo dira gore a ime. (Luka 1:34, 35) Ka baka leo, Maria o ile a belega ngwana yo a phethagetšego. Bjalo ka morwa yo a thwetšwego wa Josefa wa mmetli, o ile a godišetšwa lapeng la tlasana gomme e be e le ngwana wa mathomo go bana ba mmalwa lapeng le.—Jesaya 7:14; Mateo 1:22, 23; Mareka 6:3.

Ga go tsebje mo gontši mabapi le nywaga ya Jesu ya bjaneng, eupša go na le tiragalo e tee e lemogegago. Ge Jesu a be a e-na le nywaga e 12, batswadi ba gagwe ba ile ba ya le yena leetong la bona la ngwaga le ngwaga la go ya Jerusalema bakeng sa Paseka. Ge a le moo, o ile a fetša nako e ntši a le tempeleng, “à dutše xare xa baruti, à ba theetša, à ba botšiša.” Go oketša moo, “ba ba mo kwaxo bohle ba kxotsa thlaoloxanyô ya xaxwe le diphetolô tša xaxwe.” Ee, ga se feela gore Jesu yo monyenyane o be a botšiša dipotšišo tše di šišinyago kgopolo le tša bodumedi eupša gape o be a nea dikarabo tše bohlale tše di ilego tša makatša ba bangwe. (Luka 2:41-50) Ka ge a goletše motseng wa Natsaretha, o ile a ithutela go ba mmetli, ka ntle le pelaelo, a rutwa ke tatagwe yo a mo thwetšego, e lego Josefa.—Mateo 13:55.

Jesu o phetše Natsaretha go fihlela a e-na le nywaga e 30. Ke moka o ile a ya go Johane gore a kolobetšwe. Ka morago ga go kolobetšwa, Jesu o ile a thoma bodiredi bja gagwe bjo mafolofolo. Ka nywaga e meraro le seripa, o sepetše go dikologa motse wa gabo a tsebatša ditaba tše dibotse tša Mmušo wa Modimo. O neile bohlatse bja gore o romilwe ke Modimo. Bjang? Ka go dira mehlolo e mentši—mediro e matla yeo e bego e ka se kgonwe ke motho.—Mateo 4:17; Luka 19:37, 38.

Le gona Jesu e be e le monna yo borutho le yo a nago le maikwelo a tseneletšego. Go ba ga gagwe yo borutho go ile gwa bonala ka mo go kgethegilego tseleng yeo a bego a lebelela ba bangwe le go ba swara ka yona. Ka baka la gore Jesu o be a batamelega e bile e le yo botho, batho ba be ba mo rata. Gaešita le bana ba be ba ikwa ba  iketlile ge ba e-na le yena. (Mareka 10:13-16) Jesu o be a swara basadi ka tlhompho, gaešita le ge batho ba bangwe mehleng ya gagwe ba be ba ba nyatša. (Johane 4:9, 27) O be a thuša badiidi le bao ba gateletšegilego gore ba ‘hwetše khutšo ya meoya ya bona.’ (Mateo 11:28-30) Tsela ya gagwe ya go ruta e be e kwagala, e le bonolo e bile e le e šomago. Le gona seo a bego a se ruta se be se bontšha kganyogo ya gagwe e tšwago pelong ya go nyaka go tlwaelanya batheetši ba gagwe le Modimo wa therešo, Jehofa.—Johane 17:6-8.

A diriša moya o mokgethwa wa Modimo bakeng sa go dira mehlolo, Jesu ka kwelobohloko o ile a fodiša bao ba babjago le bao ba tlaišegago. (Mateo 15:30, 31) Ka mohlala, motho yo a bego a swerwe ke lephera o ile a tla go yena gomme a re: “Xe O ka rata, O ka kxôna xo mphodiša!” Jesu o ile a dira’ng? O ile a otlolla letsogo la gagwe gomme a kgwatha monna yo, a re go yena: “Ke rata fao! fôla!” Ke moka monna yo a babjago o ile a fodišwa!—Mateo 8:2-4.

Le gona, ela hloko taba ya nakong ya ge lešaba leo le bego le tlile go Jesu le be le dutše le yena ka matšatši a mararo le se na sa go ja. O ile a kwela batho bao bohloko gomme ka mohlolo a fepa “banna ba dikete tše nnê, xò s’a balwa basadi le bana.” (Mateo 15:32-38) Tiragalong e nngwe, Jesu o ile a homotša ledimo leo le ilego la bea bagwera ba gagwe kotsing. (Mareka 4:37-39) O ile a tsoša, goba go bušetša bophelong, bao ba bego ba hwile. * (Luka 7:22; Johane 11:43, 44) Jesu ka go rata o ile a ba a neela bophelo bja gagwe bjo bo phethagetšego e le motho e le gore batho bao ba sa phethagalago ba ka ba le kholofelo ya bokamoso. A lerato le legolo gakaakang leo Jesu a ratilego batho ka lona!

Jesu o Kae Lehono?

Jesu o hwetše koteng ya tlhokofatšo a e-na le nywaga e 33 1/2 . * Eupša lehu e be e se mafelelo a bophelo bja gagwe. Karolo ya boraro ya bophelo bja gagwe e thomile mo e ka bago ka morago ga matšatši a mararo ge Jehofa Modimo a be a tsoša Morwa wa gagwe e le sebopiwa sa moya. Ka morago ga tsogo ya gagwe, Jesu o ile a tšwelela go batho ba makgolo bao ba bego ba phela lekgolong la pele la nywaga C.E. (1 Ba-Korinthe 15:3-8) Ka morago ga moo, o ile a “dula ka letsoxong le letona la Modimo” gomme a letela go hwetša matla a bogoši. (Ba-Hebere 10:12, 13) Ge nako yeo e be e fihla, Jesu o ile a thoma go buša e le Kgoši. Ka gona re swanetše go nagana bjang ka Jesu lehono? Na re swanetše go nagana ka yena e le monna yo a tlaišegago yo a bolawago? Goba na re swanetše go mo lebelela e le motho yo a swanetšego go rapelwa? Jesu lehono ga se motho goba Modimo yo Matla ohle. Go e na le moo, ke sebopiwa se matla sa moya, Kgoši e bušago. Kgaufsinyane gona bjale, o tla bonagatša bobuši bja gagwe lefaseng la rena le le tletšego mathata.

Ge e diriša polelo ya seswantšhetšo, Kutollo 19:11-16 e hlalosa Jesu Kriste e le kgoši e nametšego pere e tšhweu gomme a e-tla go ahlola le go lwa ntwa ka tsela ya toka. O na le “lerumô le le boxale, la xore a ôtlê dithšaba ka lôna.” Ee, Jesu o tla diriša matla a gagwe a magolo bakeng sa go fediša ba kgopo. Le gona go thwe’ng ka bao ba katanelago go latela mohlala wo a o beilego ge a be a le lefaseng? (1 Petro 2:21) Yena le Tatagwe ba tla ba phološa “ntweng [e tlago] ya mohla-moxolo wa Modimo Ra-matla-ohle”—yeo gantši e bitšwago Haramagedone—e le gore ba ka phela ka mo go sa felego e le balata ba lefaseng ba Mmušo wa Modimo wa legodimong.—Kutollo 7:9, 14; 16:14, 16; 21:3, 4.

Nakong ya pušo ya gagwe ya khutšo, ruri Jesu o tla dira mehlolo e mentši bakeng sa batho bohle! (Jesaya 9:6, 7; 11:1-10) O tla fodiša malwetši gomme a fediša lehu. Modimo o tla diriša Jesu go tsoša batho ba dikete tše dimilione, a ba nea sebaka sa go phela ka mo go sa felego lefaseng. (Johane 5:28, 29) Ga re kgone le go nagana kamoo maphelo a rena e tlago go ba e le a kgahlišago ka gona ka tlase ga pušo ya Mmušo. Ka gona, go bohlokwa gore re tšwele pele re monya tsebo ya Beibele gomme re tlwaelane gakaone le Jesu Kriste.

[Mengwalo ya ka tlase]

 [Lepokisi go letlakala 7]

Na Jesu Ke Modimo Yo Matla Ohle?

Batho ba bantši ba bodumedi ba bolela gore Jesu ke Modimo. Ba bangwe ba bolela gore Modimo ke Boraro botee. Go ya ka thuto ye, “Tate ke Modimo, Morwa ke Modimo le Moya o Mokgethwa ke Modimo, gomme lega go le bjalo ga go na Medimo e meraro eupša go na le Modimo o tee.” Go dumelwa gore boraro bjo “ke bja ka mo go sa felego e bile bo a lekana.” (The Catholic Encyclopedia) Na dipono tše bjalo di nepagetše?

Jehofa Modimo ke Mmopi. (Kutollo 4:11) Ga a na mathomo goba mafelelo, le gona ke yo matla ohle. (Psalme 90:2) Ka lehlakoreng le lengwe, Jesu o na le mathomo. (Ba-Kolose 1:15, 16) Ge a bolela ka Modimo e le Tatagwe, Jesu o itše: “Tate ó mpheta ka boxolo.” (Johane 14:28) Le gona Jesu o hlalositše gore go be go e-na le dilo tše dingwe tšeo yena goba barongwa ba bego ba sa di tsebe eupša di bego di tsebja ke Tatagwe a nnoši.—Mareka 13:32.

Go feta moo, Jesu o ile a rapela Tatagwe ka gore: “Xo se dirwê thatô ya-ka, xo dirwê ya xaxo.” (Luka 22:42) Na Jesu o be a rapela mang ge e ba a be a sa rapele Motho yo a phagamego kudu? Go feta moo, ke Modimo yo a tsošitšego Jesu bahung, Jesu ga se a ka a itsoša. (Ditiro 2:32) Go molaleng gore Tate le Morwa ba be ba sa lekane pele ga ge Jesu a ka tla lefaseng goba nakong ya ge a be a phela lefaseng. Go thwe’ng mabapi le ka morago ga ge Jesu a tsošeditšwe legodimong? Ba-Korinthe ba Pele 11:3 e re: “Hlôxô ya Kriste ké Modimo.” Ge e le gabotse, Morwa o tla dula a ikokobeletša Modimo. (1 Ba-Korinthe 15:28) Ka gona, Mangwalo a bontšha gore Jesu ga se Modimo yo Matla ohle. Go e na le moo, ke Morwa wa Modimo.

Seo go thwego ke motho wa boraro wa Boraro botee—moya o mokgethwa—ga se motho. Ge mopsalme a bolela le Modimo ka thapelo, o itše: “’Me xe O roma môya wa xaxo, di a bopêxa.” (Psalme 104:30) Moya wo ga se Modimo ka boyena; ke matla a šomago ao a a romago goba go a dirišetša go phethagatša selo le ge e le sefe seo a se ratago. Ka wona, Modimo o bopile magodimo, lefase le dilo ka moka tše di phelago. (Genesi 1:2; Psalme 33:6) Modimo o dirišitše moya wa gagwe o mokgethwa go budulela banna bao ba ngwadilego Beibele. (2 Petro 1:20, 21) Ka gona, Boraro botee ga se thuto ya Mangwalo. * Beibele e re: “Jehofa, Modimo wa rena, ke Jehofa a nnoši!”—Doiteronomio 6:4, PK.

[Mongwalo wa ka tlase]

[Seswantšho go letlakala 5]

Ge a be a kolobetšwa, Jesu o ile a ba Motlotšwa wa Modimo

[Seswantšho go letlakala 7]

Jesu o dirišitše matla a gagwe modirong wo a o abetšwego ke Modimo

[Seswantšho go letlakala 7]

Lehono, Jesu ke Kgoši e matla