“Thušo Ya-ka E Tšwa Go Jehofa”

Mašaba a Batho a Amogela Borapedi bja Jehofa

DIPOROFETO tša Beibele tšeo di šupago mehla ya rena, di boletše e sa le pele gore batho bao ba tšwago ditšhabeng ka moka ba be ba tla kgeregela borapeding bja Jehofa bjo bo phagamego. Ka mohlala, Jehofa Modimo o boletše ka moporofeta Hagai gore: “Dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.” (Hagai 2:7) Bobedi Jesaya le Mika ba porofetile gore mehleng ya rena—“bofelong bya mabaka”—ditšhaba gotee le batho ba be ba tla rapela Jehofa ka tsela yeo e amogelegago.—Jesaya 2:2-4; Mika 4:1-4.

Na lehono diporofeto tše bjalo di tloga di phethagala? A re boneng seo ditiragalo di re bontšhago sona. Batho ba bafsa bao ba fetago 3 110 000 dinageng tše fetago 230, ba ineetše go Jehofa nywageng e lesome feela e fetilego. Therešo ke gore Dihlatse tša Jehofa tše 6 go tše dingwe le tše dingwe tše 10 tšeo ga bjale di hlankelago lefaseng ka bophara di kolobeditšwe ngwaga-someng o fetilego. Ka 2004, go ya ka palogare, metsotsong e mengwe le e mengwe e mebedi mohlanka wa Jehofa yo a sa tšwago go ineela o be a tsena ka phuthegong ya Bokriste! *

Go swana le lekgolong la pele la nywaga, lehono ‘ba bantši ba dumetše gomme ba sokologetše go Morena.’ Gaešita le ge koketšego ya dipalo-palo ka boyona e se pontšho ya tšhegofatšo ya Modimo, e hlatsela gore “seatla sa Morêna” se na le batho ba gagwe. (Ditiro 11:21) Ke eng seo se lebišago dimilione borapeding bja Jehofa? Le gona kgolo ye e go kgoma bjang ka noši?

Go Gogwa Batho ba Dipelo tše di Lokilego

Jesu o boletše ka mantšu a lebanyago kudu gore: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo.” (Johane 6:44) Ka gona, mafelelong Jehofa ke yena a ikarabelago ka go goga batho bao “ba hlaoletšwexo bophelô byo bo sa felexo.” (Ditiro 13:48) Moya wa Modimo o ka dira gore batho ba phafogele dinyakwa tša bona tša moya. (Mateo 5:3) Letswalo le tshwenyegilego, go tsoma kholofelo ka tlalelo goba mathata a sa fetogego di ka lebiša ba bangwe go tsomeng Modimo gomme ba ithuta ka morero wa gagwe ka batho.—Mareka 7:26-30; Luka 19:2-10.

Batho ba bantši ba gogelwa borapeding bja Jehofa ka gobane lenaneo la phuthego ya Bokriste la thuto ya Beibele le ba thuša go hwetša dikarabo tša dipotšišo tšeo di ba gakantšhago.

“Ge e ba Modimo a le gona, ke ka baka la’ng batho ba tšwela pele ba tlaišwa ke go hloka toka?” Yeo ke potšišo ye e bego e tshwenya Davide, mogwebi wa dihlare-tagi wa Italy. O be a tloga a se na kgahlego ditabeng tša bodumedi, ka gona o be a fo botšiša potšišo ye e thata go tsoša ngangišano. O re: “Ke be ke sa nagane gore ke tla hwetša karabo e kwagalago le ye e kgodišago. Eupša Hlatse ye e bego e bolela le nna e be e tloga e sa fele pelo, e bile e thekga ka ditemana tša Beibele se e bego e se bolela. Poledišano yeo e ile  ya nkgoma ka mo go tseneletšego.” Lehono Davide o lokišitše bophelo bja gagwe e bile o hlankela Jehofa.

Go tsoma ga ba bangwe tlhaloso le morero go lebiša mokgatlong wa Jehofa wa lefaseng. Setsebi sa tša monagano sa Zagreb, Croatia, se ile sa etela mošomi-gotee le sona yo a tumilego e le ge se nyaka kalafo maikwelong a sona. Seo se ilego sa tlaba setsebi ke gore ngaka e ile ya se fa dinomoro tša mogala tša ofisi ya lekala ya Dihlatse tša Jehofa ya Zagreb, gotee le leina la Hlatse yeo ngaka e bego e e tseba. Ngaka e itše: “Bona, ke nagana gore batho ba ba ka go thuša. Ge nka go romela kerekeng o tla hwetša feela diswantšho tšeo di sa phelego, ga go yo a bolelago gomme tšohle di lefsifsing. Ga ke nagane gore kereke e ka kgona go go thuša. Ke rometše ba bangwe ba balwetši ba-ka go Dihlatse tša Jehofa, gomme ke nagana gore se e tla ba selo se sekaone-kaone le go wena.” Dihlatse di ile tša se etela ka pelo e tšhweu gomme go se go ye kae tša thoma thuto ya Beibele le sona. Ka dibeke tše sego kae, setsebi seo sa tša monagano se ile sa tsebatša ka lethabo gore tsebo ya go tseba morero wa Modimo e dirile gore bophelo bja sona bo be le morero.—Mmoledi 12:13.

Ge motho a hlaselwa ke mathata, ba bantši ba ile ba hwetša gore ke therešo ya Beibele feela yeo e ka neago khomotšo ya kgonthe. Kua Gerika, mošemanyana wa nywaga e šupago o ile a wa marulelong a sekolo seo a tsenago go sona gomme a hwa. Dikgwedi tše sego kae ka morago Dihlatse tše pedi di ile tša kopana le mmagwe gomme tša leka go mo homotša ka go ahla-ahla kholofelo ya tsogo. (Johane 5:28, 29) Mosadi o ile a llišwa ke seo. Dikgaetšedi di ile tša botšiša gore: “Ge e ba o rata go tseba mo go oketšegilego ka Beibele, re ka go etela neng?” O ile a fetola ka gore: “Gona bjale.” Mosadi o ile a di iša ga gagwe gomme gwa thongwa thuto ya Beibele. Lehono lapa la gagwe ka moka le hlankela Jehofa.

Na o Tšea Karolo?

Diphihlelo tše bjalo di tlwaelegile lefaseng ka bophara. Jehofa o kgoboketša le go tlwaetša lešaba la batho ba ditšhaba-tšhaba la barapedi ba therešo. Sehlopha se sa ditšhaba-tšhaba se na le kholofelo e thabišago ya go phologa bofelo bjo bo batamelago bja tshepedišo ye e mpe ya dilo le go phela lefaseng le lefsa la khutšo.—2 Petro 3:13.

Ka ge Jehofa a o šegofatša, modiro wo wo o sa kago wa ba le o swanago le wona wa go kgoboketša o tšwela pele o lebile go phethweng ka katlego ka go se thibelege. (Jesaya 55:10, 11; Mateo 24:3, 14) Na o bolela ka Mmušo ka mafolofolo? Ge e ba o dira bjalo, o ka kgodišega ka thekgo ya Modimo, gape o ka boeletša mantšu a mopsalme a rego: “Thušo ya-ka e tšwa go Jehofa.”—Psalme 121:2, NW.

[Mongwalo wa ka tlase]

[Ntlhakgolo go letlakala 9]

“Xa xo motho e a kxônaxo xo tla xo Nna, xe a sa xôxwe ke Tate e a nthomilexo.”—JOHANE 6:44

[Lepokisi go letlakala 8]

KE MANG YO A IKARABELAGO KA KOKETŠEGO YE?

“Mo Jehofa a sa agego ngwako, baagi ba ona ba itapiša ka lefeela.”—Psalme 127:1, PK.

“Modimo ké Yêna a medišitšexo. Mobyadi le monošetši xa se selô; Yo e lexo selô ké Mmediši, ké Modimo.”—1 Ba-Korinthe 3:6, 7.