Na ke Modimo Goba ke Motho?

“KÉ NNA seetša sa lefase. E a ntatêlaxo a ka se kê a sepela lefsifsing; ó tlo ba le seetša sa bophelô.” (Johane 8:12) Mantšu a a ile a bolelwa ke Jesu Kriste. Monna yo a rutegilego wa lekgolong la pele la nywaga o ngwadile mabapi le yena gore: “Yo mahumô ka moka a bohlale le a tsebô a fihlilwexo mo xo Yêna.” (Ba-Kolose 2:3) Go feta moo, Beibele e re: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Go bohlokwa go ba le tsebo e nepagetšego ka Jesu e le gore re kgotsofatše senyakwa sa rena sa moya.

Batho ba bantši lefaseng ka bophara ba kwele ka Jesu Kriste. Tutuetšo yeo a bilego le yona historing ya batho ga e belaetše. Ge e le gabotse, almanaka yeo e dirišitšwego dikarolong tše dintši tša lefase e theilwe ngwageng wo go naganwago gore o belegwe ka wona. The World Book Encyclopedia e hlalosa gore: “Batho ba bantši ba bolela ka matšatši-kgwedi a pele ga ngwaga woo e le B.C., goba before Christ (pele ga Kriste). Ba diriša A.D., goba anno Domini (ngwageng wa Morena wa rena), bakeng sa matšatši-kgwedi a ka morago ga ngwaga woo.”

Lega go le bjalo, go na le dikgopolo tše di thulanago mabapi le motho yo Jesu e bego e le yena. Go ba bangwe, e be e le feela motho yo a tumilego yo a bilego le pego e lemogegago historing. Lega go le bjalo, ba bangwe ba mo rapela e le Modimo yo Matla ohle. Ba bangwe bao ba lego bodumeding bja bo-Hindu ba swantšhitše Jesu Kriste le modimo wa ma-Hindu e lego Krishna, yo ba bantši ba mmolelago e le modimo-motho. Na Jesu e be e le motho feela, goba na e be e le motho yo a swanetšego go rapelwa? Ge e le gabotse, e be e le mang? O be a e-tšwa kae? E be e le motho wa mohuta ofe? Le gona o kae gona bjale? Go etša ge re tla bona sehlogong se se latelago, puku ye e ka bolelago mo gontši ka Jesu e re nea dikarabo tša therešo dipotšišong tše.