Tšwela Pele o Sepela Kamoo Jesu Kriste a Sepetšego ka Gona
Tšwela Pele o Sepela Kamoo Jesu Kriste a Sepetšego ka Gona
“E a rexo: Ke dutše kè le wa [Modimo], xo swanetše xe a tšea ka tsela ye Yêna [Jesu] a bexo a tšea ka yôna.”—1 JOHANE 2:6.
1, 2. Go akaretšwa’ng tabeng ya go iša mahlo go Jesu?
“RE KXÔTLÊLÊLÊ thlabanong [“lebelong,” NW] ye re lexo mo xo yôna, Re išê mahlô xo Mo-êta-pele [“Moemedi yo Mogolo,” NW] le Mophethi wa tumêlô, Yêna Jesu.” (Ba-Hebere 12:1, 2) Go latela tsela ya potego go nyaka gore re iše mahlo go Jesu Kriste.
2 Lentšu la leleme la mathomo bakeng sa ‘go iša mahlo,’ go etša ge le dirišitšwe Mangwalong a Bakriste a Segerika, le bolela “go lebiša tlhokomelo selong se itšego ka ntle le tšhitišo,” “go tlogela go lebelela selo se itšego e le gore o kgone go bona se sengwe,” “go tsepeletša mahlo selong.” Puku e nngwe ya ditšhupetšo e re: “Nakong ya ge ramabelo wa mo-Gerika yo a lego ka lepatlelong a tloša tlhokomelo ya gagwe lebelong le pakaneng yeo a e kitimelago, gomme a e lebiša go lešaba leo le bogetšego, lebelo la gagwe le a fokotšega. Go bjalo le ka Mokriste.” Ditšhitišo di ka thibela tšwelopele ya rena ya moya. Re swanetše go iša mahlo go Jesu Kriste. Ge e le gabotse, re lebelela’ng go Moemedi yo yo Mogolo? Lentšu la Segerika leo le fetoletšwego e le “moemedi yo mogolo” le bolela “moetapele yo mogolo, yoo a etelelago pele selong le ge e le sefe gomme ka go rialo a bea mohlala.” Go iša mahlo go Jesu go nyaka gore re latele mohlala wa gagwe.
3, 4. (a) Go sepela kamoo Jesu Kriste a sepetšego ka gona go nyaka gore re dire’ng? (b) Ke dipotšišo dife tšeo re swanetšego go di ela hloko?
3 Beibele e re: “E a rexo: Ke dutše kè le wa [Modimo], xo swanetše xe a tšea ka tsela ye Yêna [Jesu] a bexo a tšea ka yôna.” (1 Johane 2:6) Re swanetše go dula re le ba Modimo ka go kwa ditaelo tša Jesu ka ge le yena a be a e-kwa tša Tatagwe.—Johane 15:10.
4 Ka gona, go sepela kamoo Jesu a sepetšego ka gona go nyaka gore re tsepeletše mahlo a rena go yena bjalo ka Moetapele yo Mogolo gomme re latele dikgato tša gagwe kgaufsi-ufsi. Dipotšišo tša bohlokwa tšeo re swanetšego go nagana ka tšona tabeng ye ke tše: Kriste o re etelela pele bjang lehono? Go ekiša kamoo a sepetšego ka gona go swanetše go re kgoma bjang? Go kgomarela mohlala woo Jesu Kriste a o beilego go na le mehola efe?
Kamoo Kriste a Etelelago Balatedi ba Gagwe Pele
5. Pele a rotogela legodimong, ke kholofetšo efe yeo Jesu a ilego a e holofetša balatedi ba gagwe?
5 Pele a rotogela legodimong, Jesu Kriste yo a tsošitšwego o ile a tšwelela go barutiwa ba gagwe gomme a ba nea modiro wa bohlokwa. O itše: “Ké xôna yang Le dirê dithšaba ka moka barutiwa.” Ka nako yeo, Moetapele yo Mogolo o ile a holofetša gore o tla ba le bona ge ba phetha kabelo ye, ge a re: “Tsebang, ke na le lena ka mehla xo fihla bofelong bya lefase.” (Mateo 28:19, 20) Ke bjang Jesu Kriste a nago le balatedi ba gagwe mo nakong ye ya bofelo bja tshepedišo ya dilo?
6, 7. Jesu o re etelela pele bjang a diriša moya o mokgethwa?
6 Jesu o itše: “Molwedi [“Mothuši,” NW] Môya-mokxêthwa, wo Tate a tl’o xo o roma ka Leina la-ka, o tlo Le ruta tšohle, o tlo Le xakolla tšohle tše ke Le boditšexo tšôna.” (Johane 14:26) Moya o mokgethwa woo o rometšwego leineng la Jesu, o a re hlahla le go re matlafatša lehono. O re nea tshedimošo ya moya gomme o re thuša go kwešiša gaešita “le ôna madiba a diphiri tša Modimo.” (1 Ba-Korinthe 2:10) Ka godimo ga moo, dika tša Modimo e lego “leratô, le lethabô, le moláô; [le] xo se fêle pelo, le botho, le bonôlô, le pôtêxô le bolêta, le boithswarô” ke “dienywa tša Môya.” (Ba-Galatia 5:22, 23) Ka thušo ya moya o mokgethwa, re ka kgona go hlagolela dika tše.
7 Ge re dutše re ithuta Mangwalo gomme re leka go diriša seo re ithutago sona, moya wa Jehofa o re thuša gore re be le bohlale, temogo, kwešišo, tsebo, kahlolo le bokgoni bja go nagana. (Diema 2:1-11) Moya o mokgethwa o re thuša gape go kgotlelela diteko le mathata. (1 Ba-Korinthe 10:13; 2 Ba-Korinthe 4:7; Ba-Filipi 4:13) Bakriste ba kgothaletšwa gore ‘ba hlape ditšhila tšohle tša nama le tša moya, gomme e be ba phethagetšego.’ (2 Ba-Korinthe 7:1) Na ruri re ka phela ka go dumelelana le senyakwa sa Modimo sa gore re be ba phethagetšego, goba ba hlwekilego, ka ntle le thušo ya moya o mokgethwa? Se sengwe sa dilo tšeo Jesu a di dirišago bakeng sa go re etelela pele lehono ke moya o mokgethwa, woo Jehofa Modimo a dumeletšego Morwa wa gagwe gore a o diriše.—Mateo 28:18.
8, 9. Kriste o etelela pele bjang a diriša “molaki e a bôtêxaxo yo bohlale”?
8 Ela hloko selo se sengwe seo Kriste a se dirišago bakeng sa go etelela phuthego pele lehono. Ge a hlalosa mabapi le go ba gona ga gagwe le bofelo bja tshepedišo ya dilo, Jesu o itše: “Ké mang molaki e a bôtêxaxo yo bohlale, yo mong wa xaxwe a mmeilexo xo laka bahlanka ba xaxwe le xo ba fa dijô ka lebaka la xôna? Wa lehlôxônôlô e tlo ba molaki eo, mong wa xaxwe xe a e-tla, a mo hwetša a dira tšôna tšeo. Ruri, ke a Le botša, ó tlo mmea a laka dilô tša xaxwe ka moka.”—Mateo 24:3, 45-47.
9 “Mong” ke Jesu Kriste. “Molaki” ke sehlopha sa Bakriste ba tloditšwego ba lego lefaseng. Sehlopha se sa molaki se neilwe modiro wa go hlokomela mediro ka moka ya Jesu ya mo lefaseng le go aba dijo tša moya ka nako. Balebeledi ba sego kae ba swanelegago gare ga sehlopha se se bopaganego sa “molaki e a bôtêxaxo yo bohlale” ba bopa Sehlopha se Bušago, gomme ba hlankela e le baemedi ba sehlopha sa molaki. Ba etelela pele modiro wa lefase ka bophara wa go bolela ka Mmušo le go aba dijo tša moya tše di nago le phepo ka nako e swanetšego. Ka gona, Kriste o etelela phuthego pele a diriša “molaki e a bôtêxaxo yo bohlale” yo a tloditšwego ka moya le Sehlopha sa gagwe se Bušago.
10. Boemo bja rena bja kgopolo e swanetše go ba bofe mabapi le bagolo, gomme ka baka la’ng?
10 Le gona, ponagatšo e nngwe ya boetapele bja Kriste ke “dimpho tšeo e lego banna” (NW)—bagolo ba Bakriste, goba balebeledi. Ba kgethetšwe “xo hlamiša bakxêthwa xore ba kxônê xo dirêla phuthêxô, xore mmele wa Kriste o axišwê.” (Ba-Efeso 4:8, 11, 12) Ba-Hebere 13:7 e bolela mabapi le bona gore: “Xopolang baruti ba lena [“bao ba etelelago pele gare ga lena,” NW] ba ba Le boditšexo Lentšu la Modimo, Le bônê pheletšô ya tsela ya bôná, Le etšê bôná ka tumêlô.” Bagolo ba etelela pele ka phuthegong. Ka ge ba ekiša Kriste Jesu, tumelo ya bona e swanetše go ekišwa. (1 Ba-Korinthe 11:1) Re ka ipontšha re leboga tokišetšo ye ya go ba le bagolo ka gore re kwe re be re ikokobeletše ‘dimpho tše tšeo e lego banna.’—Ba-Hebere 13:17.
11. Kriste o diriša’ng bakeng sa go etelela balatedi ba gagwe pele lehono, gomme go sepela kamoo a sepetšego ka gona go akaretša’ng?
11 Ee, Jesu Kriste o etelela balatedi ba gagwe pele lehono ka moya o mokgethwa, ka “molaki e a bôtêxaxo yo bohlale” le ka bagolo ba phuthego. Go sepela ga rena kamoo Kriste a sepetšego ka gona go akaretša go kwešiša tsela yeo a etelelago pele ka yona le go ikokobeletša yona. Le gona, go nyaka gore re ekiše kamoo a sepetšego ka gona. Moapostola Petro o ngwadile gore: “Ké sôna se Le bileditšwexo sôna; xobane le Kriste ó tlaišitšwe ka ’baka la lena, a ba kêta-pele ya lena, xore Le tšeê ka mohlala wa xaxwe.” (1 Petro 2:21) Go latela mohlala wa Jesu o phethagetšego go swanetše go re kgoma ka tsela efe?
E-ba yo a Leka-lekanego ge o Diriša Matla a Bolaodi
12. Ke karolo efe ya mohlala wa Kriste yeo bagolo ka phuthegong ba e kgahlegelago ka mo go kgethegilego?
12 Gaešita le ge Jesu a be a neilwe ke Tatagwe matla a bolaodi a sa bapišwego le selo, o be a a diriša ka tsela e leka-lekanego. Batho ka moka ka phuthegong—balebeledi ka mo go kgethegilego—ba swanetše go dira gore ‘teka-tekano ya bona e tsebje bathong bohle.’ (Ba-Filipi 4:5, bapiša le NW; 1 Timotheo 3:2, 3.) Ka ge bagolo ba e-na le tekanyo e itšego ya bolaodi ka phuthegong, ke gabohlokwa gore ba latele dikgato tša Kriste ge ba bo diriša.
13, 14. Ke ka tsela efe bagolo ba ka ekišago Kriste ge ba dutše ba kgothaletša ba bangwe go hlankela Modimo?
13 Jesu o be a ela hloko mafokodi a barutiwa ba gagwe. O be a sa laele gore ba dire dilo tše di fetago tšeo ba bego ba ka kgona go di dira. (Johane 16:12) Ka ntle le go ba gapeletša, Jesu o ile a kgothaletša balatedi ba gagwe gore ba ‘katanele’ go dira thato ya Modimo. (Luka 13:24) O dirile se ka go ba etelela pele le ka go tutuetša dipelo tša bona. Ka mo go swanago, bagolo ba Bakriste lehono ga ba tšhošetše ba bangwe gore ba hlankele Modimo ka go ba dira gore ba lewe ke dihlong goba ba ikwe ba le molato. Go e na le moo, ba ba tutueletša gore ba hlankele Jehofa ka baka la lerato la bona go yena le go Jesu, gotee le lerato la bona go magagabo bona.—Mateo 22:37-39.
14 Jesu ga se a ka a diriša gampe bolaodi bja gagwe bjoo a bego a bo neilwe ka go laola maphelo a batho. Le gona, ga se a ka a bea ditekanyetšo tšeo di sa fihlelegego goba go bea melao e mentši. O be a tutuetša ba bangwe ka go fihlelela dipelo tša bona ka melao ya motheo yeo e bego e le melaong e neilwego ka Moše. (Mateo 5:27, 28) E le go ekiša Jesu Kriste, bagolo ba phema go bea melao ya boithatelo goba go gatelela dipono tša bona ka noši. Ditabeng tša moaparo le go itokiša goba boitapološo le boithabišo, bagolo ba leka go fihlelela dipelo ka go diriša melao ya Modimo ya motheo, e bjalo ka yeo e ngwadilwego go Mika 6:8; 1 Ba-Korinthe 10:31-33; le 1 Timotheo 2:9, 10.
E-ba le Kwelobohloko Gomme o Lebalele
15. Jesu o ile a arabela bjang diphošong tša barutiwa ba gagwe?
15 Kriste o re tlogeletše mohlala wo re swanetšego go o latela ka tsela yeo a bego a swaragana le diphošo le go palelwa ga barutiwa ba gagwe ka yona. Ela hloko ditiragalo tše pedi tša bošegong bja gagwe bja mafelelo lefaseng e le motho. Ka morago ga go fihla Getsemane, Jesu o ile “a tloxa le Petro le Jakobo le Johane” gomme a ba botša gore “dulang . . . Le phakxamê.” Ke moka “a fetêla pejana, a wêla fase, a rapêla.” Ge a boa, o ile “a ba hwetša bá robetše.” Jesu o ile a arabela bjang? O itše: “Môya o mafolofolo, ’me nama e a fôkôla.” (Mareka 14:32-38) Go e na le go sola Petro, Jakobo le Johane a galefile, o ile a ba kwela bohloko! Bošegong bjona bjoo, Petro o ile a latola Jesu gararo. (Mareka 14:66-72) Jesu o ile a swara Petro bjang ka morago ga moo? “Ruri, Morêna ó tsoxile; ó bonwe ke Simone [Petro].” (Luka 24:34) Beibele e re: “Ó bonwe ke Kefase, a tla a bônwa ke ba lesome le metšô e mebedi.” (1 Ba-Korinthe 15:5) Go e na le go mo hloya, Jesu o ile a lebalela moapostola yo a itsholago gomme a mo matlafatša. Ka morago, Jesu o ile a nea Petro boikarabelo bjo bogolo.—Ditiro 2:14; 8:14-17; 10:44, 45.
16. Re ka sepela bjang go swana le kamoo Jesu a sepetšego ka gona ge badumedi-gotee le rena ba re nyamiša goba ba re fošetša ka tsela e itšego?
16 Ge badumedi-gotee le rena ba re nyamiša goba ba re fošetša ka tsela e itšego ka baka la go se phethagale ga batho, na ga se ra swanela go ba kwela bohloko le go ba lebalela go etša ge Jesu a ile a dira bjalo? Petro o ile a kgothaletša badumedi-gotee le yena gore: “Bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô le ba botho. Le se kê la lefetša bobe ka bobe, le lehlapa ka lehlapa; wa lena mokxwa e bê xo šexofatša.” (1 Petro 3:8, 9) Go thwe’ng ge e ba motho yo mongwe a palelwa ke go re swara go swana le kamoo Jesu a ka bego a ile a re swara ka gona, gomme a gana go re kwela bohloko goba go re lebalela? Gaešita le ka nako yeo re swanetše go leka go ekiša Jesu le go arabela kamoo a bego a tla arabela ka gona.—1 Johane 3:16.
Etiša Mediro ya Mmušo Pele
17. Ke’ng se se bontšhago gore Jesu o ile a bea go dira thato ya Modimo maemong a pele bophelong bja gagwe?
17 Go sa na le tsela e nngwe yeo ka yona re swanetšego go sepela kamoo Jesu Kriste a sepetšego ka gona. Go tsebatša ditaba tše dibotse tša Mmušo wa Modimo e be e le selo sa bohlokwa kudu bophelong bja Jesu. Ka morago ga go dira boboledi go mosadi wa mo-Samaria kgaufsi le motse wa Sikara kua Samaria, Jesu o ile a botša barutiwa ba gagwe gore: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.” (Johane 4:34) Go dira ga Jesu thato ya Tatagwe go be go mo matlafatša; go mo fepa, go mo kgotsofatša e bile go mo lapološa go swana le dijo. Na go ekiša Jesu ka go tšwela pele re lebišitše tlhokomelo go direng thato ya Modimo go ka se lebiše bophelong bjo bo tlogago bo e-na le morero le bjo bo kgotsofatšago?
18. Ke ditšhegofatšo dife tše di tlišwago ke go kgothaletša bana go tsenela tirelo ya nako e tletšego?
18 Ge batswadi ba kgothaletša bana ba bona gore ba tsenele tirelo ya nako e tletšego, bona gotee le bana ba bona ba hwetša ditšhegofatšo tše dintši. Tatago barwa ba mafahla o ile a ba kgothaletša gore ba ipeele pakane ya tirelo ya bobulamadibogo go tloga e sa le ba banyenyane. Ka morago ga go fetša thuto ya ona ya lefase, mafahla a a ile a tšea bobulamadibogo. Ge a gopola lethabo leo a bilego le lona ka baka la se, tate yo o ngwala gore: “Barwa ba rena ga se ba re nyamiša. Re ka bolela ka tebogo gore, ‘Bana ba motho ké neô ya Morêna.’” (Psalme 127:3) Le gona, bana ba holwa bjang ke go phegelela tirelo ya nako e tletšego? Mmago bana ba bahlano o re: “Go bula madibogo go thušitše bana ba-ka ka moka go aga tswalano ya kgaufsi kudu le Jehofa, go kaonefaditše mekgwa ya bona ya thuto ya motho ka noši, go ba thušitše gore ba tsebe kamoo ba ka dirišago nako ya bona ka bohlale e bile go ba thušitše gore ba ithute go etiša dilo tša moya pele maphelong a bona. Gaešita le ge ka moka ga bona ba ile ba swanelwa ke go dira diphetogo tše dintši, ga go le o tee wa bona yo a itsholago ka baka la tsela yeo a e kgethilego.”
19. Ke maikemišetšo afe ka bokamoso ao bafsa ba swanetšego go a ela hloko ka bohlale?
19 Bafsa, maikemišetšo a lena ke afe ka bokamoso? Na le nyaka go atlega modirong o itšego wa boiphedišo? Goba na le phegelela go tsenela tirelo ya nako e tletšego? Paulo o lemošitše ka gore: “Phakxamêlang xo swara tsela ka xo itôta; Le se etšê mašilo, Le etšê bahlale.” O oketša ka gore: “Lesang-xê xo ba mašilo; sa lena e bê xo hlatha se Modimo a se rataxo.”—Ba-Efeso 5:15-17.
Botega ka go se Kwanantšhe
20, 21. Ke ka tsela efe Jesu a bego a botega ka go se kwanantšhe, gomme re ka ekiša potego ya gagwe e sa kwanantšhego bjang?
20 Go sepela kamoo Jesu a sepetšego ka gona go nyaka gore re ekiše go botega ga gagwe ka go se kwanantšhe. Beibele e bolela mabapi le go botega ga Jesu ka go se kwanantšhe gore: “Eo, à le ka lebopô le Modimo a lexo ka lôna, a se re: xo swana le Modimo xo mo ana hlôxô, A upya a ithlakola, a tšea lebopô la mohlanka, a ba e a swanaxo le batho, a hwetšwa è le motho ka sebele, A ikokobetša a ba e a kwaxo le xo iša lehung, lehung la [“koteng ya tlhokofatšo,” NW].” Jesu ka potego e sa kwanantšhego o ile a thekga bogoši bja Modimo ka go ikokobeletša seo Modimo a bego a nyaka gore a se dire. O ile a kwa go iša lehung koteng ya tlhokofatšo. Re swanetše go ‘ba le boemo bjo bja kgopolo’ gomme ka potego e sa kwanantšhego re ikokobeletše go dira thato ya Modimo.—Ba-Filipi 2:5-8.
21 Le gona, Jesu o ile a bontšha potego e sa kwanantšhego go baapostola ba gagwe ba botegago. Go sa šetšwe mafokodi a bona le go se phethagale ga bona, Jesu o ile a ba rata “xo fihla bofelong.” (Johane 13:1) Ka mo go swanago, ga se ra swanela go dumelela go se phethagale ga bana babo rena go re dira gore re be le boemo bja kgopolo bja go swaya diphošo.
Kgomarela Mohlaleng wo o Beilwego ke Jesu
22, 23. Go kgomarela mohlala wo o beilwego ke Jesu go na le mehola efe?
22 Ke therešo gore bjalo ka batho ba sa phethagalago re ka se kgone go sepela ka go lebanya dikgatong tša Mohlala wa rena o phethagetšego. Lega go le bjalo, re ka katanela go latela dikgato tša gagwe kgaufsi-ufsi. Go dira bjalo go nyaka gore re kwešiše re be re ikokobeletše tsela ya Kriste ya go etelela pele gomme re kgomarele mohlaleng wo a o beilego.
23 Go ba baekiši ba Kriste go tliša ditšhegofatšo tše dintši. Bophelo bja rena e ba bjo bo nago le morero kudu le bjo bo kgotsofatšago ka gobane re lebišitše tlhokomelo ya rena go direng thato ya Modimo go feta ya rena. (Johane 5:30; 6:38) Re na le letswalo le lebotse. Tsela yeo re sepelago ka yona e bea mohlala. Jesu o laleditše bohle bao ba bego ba lapile le bao ba bego ba imelwa gore ba tle go yena gomme o tla lapološa meoya ya bona. (Mateo 11:28-30) Ge re latela mohlala wa Jesu, le rena re ka lapološa ba bangwe ka segwera sa rena. Ka gona, anke re tšweleng pele re sepela kamoo Jesu a sepetšego ka gona.
Na o a Gopola?
• Kriste o etelela balatedi ba gagwe pele bjang lehono?
• Bagolo ba ka latela bjang boetapele bja Kriste ge ba diriša bolaodi bja bona bjo ba bo neilwego ke Modimo?
• Re ka latela mohlala wa Jesu bjang ge re swaragana le mafokodi a ba bangwe?
• Bafsa ba ka etiša mediro ya Mmušo pele bjang?
[Dipotšišo tša Thuto]
[Seswantšho go letlakala 23]
Bagolo ba Bakriste ba re thuša go latela boetapele bja Kriste
[Diswantšho go letlakala 24, 25]
Bafsa, ke maikemišetšo afe ao le nago le ona bakeng sa go phela bophelo bjo bo putsago bja Bokriste?