Batswadi—Le Nyakela Bana ba Lena Bokamoso bja Mohuta Ofe?
Batswadi—Le Nyakela Bana ba Lena Bokamoso bja Mohuta Ofe?
“Lena masoxana le lena basetsana, . . . bohle a ba rêtê ’ina la Morêna.”—PSALME 148:12, 13.
1. Ke dilo dife tšeo batswadi ba tshwenyegago ka tšona mabapi le bana ba bona?
KE BATSWADI bafe bao ba sa tshwenyegego mabapi le bokamoso bja bana ba bona? Go tloga nakong ya go belegwa ga ngwana—goba gaešita le pele ga moo—batswadi ba thoma go tshwenyega ka boiketlo bja gagwe. Na o tla phela gabotse? Na o tla gola ka tsela ya tlhago? Ge ngwana a dutše a gola, ba tshwenyega ka mo go oketšegilego. Ka kakaretšo, batswadi ba nyaka feela selo se sekaone kudu bakeng sa ngwana wa bona.—1 Samuele 1:11, 27, 28; Psalme 127:3-5.
2. Ke ka baka la’ng batswadi ba bantši lehono ba kganyoga kudu gore bana ba bona ba thabele bophelo bjo bo kgotsofatšago ge ba gola?
2 Lega go le bjalo, lefaseng la lehono, go thata gore batswadi ba nee bana ba bona dilo tše kaone kudu. Batswadi ba bantši ba ile ba lebeletšana le maemo a thata—dintwa, meferefere ya dipolitiki, mathata a tša boiphedišo, kgateletšego mmeleng goba maikwelong le tše dingwe. Ka tlhago, kganyogo ya bona e tšwago pelong ke ya gore bana ba bona ba se ke ba lebeletšana le dilo tše di swanago. Dinageng tše di humilego, batswadi ba ka bona barwa le barwedi ba bagwera ba bona le bana ba metswalo ya bona ba atlega mešomong yeo ba ithutetšego yona e bile ba phela maphelo ao a bonagalago e le ao a atlegilego. Ka gona, ba ikwa ba gapeletšega go dira sohle seo ba ka se kgonago go kgonthišetša gore bana ba bona le bona ge ba gola, ba kgone go thabela bophelo bja boiketlo le bjo bo šireletšegilego ka mo go leka-lekanego—bophelo bjo bo kgotsofatšago.—Mmoledi 3:13.
Go Kgetha Bophelo bjo bo Kgotsofatšago
3. Bakriste ba dirile kgetho efe?
3 Bjalo ka balatedi ba Jesu Kriste, Bakriste ba kgethile go neela maphelo a bona go Jehofa. Ba tšeetše mantšu a Jesu godimo, a rego: “Xe motho a rata xo nthšala moraxo, a ikxafê, a rwalê [kota ya gagwe ya tlhokofatšo, NW] ka mehla, ’me a ntatêlê.” (Luka 9:23; 14:27) Ee, ruri bophelo bja Mokriste bo akaretša boikgafo. Lega go le bjalo, ga se bophelo bja bodiidi le bja manyami. Ka go fapana le seo, ke bophelo bjo bo thabišago le bjo bo kgotsofatšago—bophelo bjo bobotse—ka gobane bo akaretša go nea, gomme go etša ge Jesu a boletše, “lešexo la monei le phala la monewa.”—Ditiro 20:35.
4. Ke’ng seo Jesu a ilego a kgothaletša balatedi ba gagwe gore ba se phegelele?
4 Batho mehleng ya Jesu ba be ba phela ka tlase ga maemo a thata kudu. Go oketša tabeng ya go ikhweletša sa go iphediša, ba be ba swanetše go kgotlelela pušo e šoro ya ba-Roma le go imetšwa ke badumedi ba fišegago ba bodumedi bjo bo rulagantšwego bja mehleng yeo. (Mateo 23:2-4) Lega go le bjalo, ba bantši bao ba ilego ba kwa ka Jesu, ka lethabo ba ile ba phaela ka thoko dilo tšeo ba di phegelelago—gaešita le mediro ya boiphedišo—gomme ya ba balatedi ba gagwe. (Mateo 4:18-22; 9:9; Ba-Kolose 4:14) Na barutiwa bao ba be ba lekela hlogong le go bea bokamoso bja bona kotsing? Ela hloko mantšu a Jesu a rego: “Mang le mang a tloxetšexo lapa labô, xoba bana babô, xoba dikxaetšedi, xoba tat’axwe le mm’axwe, xoba bana, xoba mašemo è le ka ’baka la leina la-ka, ó tlo hwetša tše di fetišaxo tšeo kxolê-kxolê, le byôna bophelô byo bo sa felexo e tlo ba kabêlô ya xaxwe.” (Mateo 19:29) Jesu o ile a kgonthišetša balatedi ba gagwe gore Tate wa legodimong o be a tseba dinyakwa tša bona. Ka baka leo, o ile a ba kgothatša ka gore: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.”—Mateo 6:31-33.
5. Batswadi ba bangwe ba ikwa bjang mabapi le kgonthišetšo ya Jesu ya gore Modimo o tla hlokomela bahlanka ba gagwe?
5 Dilo ga di fapane gakaalo le lehono. Jehofa o tseba dinyakwa tša rena, gomme bao ba etišago mediro ya Mmušo pele maphelong a bona, kudu-kudu bao ba phegelelago bodiredi bja nako e tletšego, ba na le kgonthišetšo e swanago ya gore o tla ba hlokomela. (Maleaki 3:6, 16; 1 Petro 5:7) Lega go le bjalo, batswadi ba bangwe ga ba kgonthišege mabapi le taba ye. Ka lehlakoreng le lengwe, ba ka rata go bona bana ba bona ba tšwela pele tirelong ya Jehofa, mohlomongwe ba feleletša ba tsenetše bodiredi bja nako e tletšego. Ka go le lengwe lehlakore, ge ba lebelela maemo a tša boiphedišo le a mošomo lefaseng lehono, ba nagana gore go bohlokwa gore bafsa ba thome ka go hwetša thuto e botse, e le gore ba ka ba le ditshwanelego tše di nyakegago bakeng sa mošomo wo ba o ratago goba bonyenyane ba be le seo ba ka iphedišago ka sona ge go nyakega. Go batswadi ba bjalo, gantši thuto e botse e bolela thuto e phagamego.
Go Lokišeletša Bokamoso
6. Polelwana e rego “thuto e phagamego” e dirišitšwe ka tsela efe sehlogong se?
6 Tshepedišo ya tša thuto e fapana go ya ka dinaga. Ka mohlala, kua United States, dikolo tša mmušo di nea bana thuto ya motheo ka nywaga e 12. Ka morago ga moo, barutwana ba ka kgetha go ya yunibesithing goba kholetšheng ka nywaga e mene goba go feta moo, gore ba hwetše bachelor’s degree goba go tšwetša pele dithuto ka morago ga moo bakeng sa mešomo ya tša kalafo, ya tša molao, ya boentšineare le mešomo e mengwe. Sehlogong se ge go dirišwa “thuto e phagamego,” go bolelwa ka thuto e bjalo ya yunibesithi. Ka lehlakoreng le lengwe, go na le dikolo tša thekhinikhale le tša go tlwaeletšwa mošomo, tšeo di neago dithuto tše tšeago lebaka le lekopana tšeo di feleletšago ka gore motho a hwetše lengwalo la bohlatse goba diploma ya mošomo goba tirelo e itšego.
7. Ke dikgateletšo dife tšeo barutwana ba lebeletšanego le tšona dikolong tše di phagamego?
7 Dikolo tše di phagamego lehono di sekametše tabeng ya go hlama barutwana ba tšona bakeng sa thuto e phagamego. E le go fihlelela seo, dikolo tše dintši tše di phagamego di lebiša tlhokomelo tabeng ya go ruta dithuto tša ka klaseng, tšeo di thušago barutwana gore ba hwetše dintlha tša godimo ditlhahlobong e le gore ba kgone go ya yunibesithing, go e na le go hwetša dintlha tša godimo dithutong tšeo di tla hlamelago barutwana go hwetša mošomo. Barutwana bao ba lego dikolong tše di phagamego lehono ba gatelelwa kudu ke barutiši ba bona, baeletši le barutwana-gotee le bona gore ba ipeele pakane ya go ingwadiša diyunibesithing tše kaone-kaone, moo go holofelwago gore ba tla hwetša di-degree tšeo di tla ba thušago go hwetša mešomo e holofetšago le e lefago gabotse.
8. Batswadi ba Bakriste ba lebeletšane le go dira dikgetho dife?
8 Ka gona, batswadi ba Bakriste ba swanetše go dira’ng? Ke therešo gore ba nyaka gore bana ba bona ba atlege sekolong gomme ba ithute bokgoni bjo bo nyakegago bakeng sa gore ba tle ba kgone go itlhokomela ka moso. (Diema 22:29) Eupša na ba swanetše go fo dumelela bana ba bona go fekeetšwa ke moya wa go phadišana ka katlego le tšwelopele ya bona dilong tše di bonagalago? Ke dipakane tša mohuta ofe tšeo ba di beelago bana ba bona ka mantšu goba ka mohlala wa bona? Batswadi ba bangwe ba šoma ka thata kudu le go boloka tšhelete e le gore ba kgone go iša bana ba bona diyunibesithing goba dikholetšheng ge nako e fihla. Ba bangwe ba ikemišeditše go tsena dikolotong ka morero o swanago. Lega go le bjalo, phetho e bjalo ga e akaretše feela ditshenyagalelo tša tša ditšhelete. Go phegelela thuto e phagamego lehono go bitša kudu gakaaka’ng?—Luka 14:28-33.
Ditshenyagalelo tša go Phegelela Thuto e Phagamego
9. Go ka thwe’ng ka ditshenyagalelo tša tša ditšhelete tša thuto e phagamego lehono?
9 Ge re nagana ka ditshenyagalelo, gantši re nagana ka ditshenyagalelo tša tša ditšhelete. Dinageng tše dingwe, thuto e phagamego e thekgwa ke mmušo ka tša ditšhelete gomme ga go nyakege gore barutwana bao ba swanelegago ba lefelele thuto ya bona. Lega go le bjalo, dinageng tše dintši thuto e phagamego e bitša kudu gomme e tšwela pele e bitša kudu le go feta. Sehlogo se sengwe sa papatšo sa go bapa le sa barulaganyi ka go New York Times se bolela gore: “Thuto e phagamego e be e lebelelwa e le selo seo se bulago dibaka. Lehono, e dira gore go be le phapano e kgolo kudu magareng ga bao ba nago le sa bona le bao ba se nago sa bona.” Ka mantšu a mangwe, thuto ya kgonthe e phagamego e thoma go ba selo seo se ratwago ke bahumi le bao ba nago le tutuetšo, bao ba dirago gore bana ba bona ba e hwetše e le go kgonthišetša gore le bona ba a huma le go ba le tutuetšo lefaseng le. Na batswadi ba Bakriste ba swanetše go beela bana ba bona pakane e bjalo?—Ba-Filipi 3:7, 8; Jakobo 4:4.
10. Thuto e phagamego e tswalanywa kudu bjang le go tšwetša pele tshepedišo ya gona bjale?
10 Gaešita le moo thuto e phagamego e fiwago ka ntle le tefo, go ka ba le dinyakwa tše itšego tše di utegilego. Ka mohlala, The Wall Street Journal e bega gore nageng e nngwe ya ka Borwa-bohlabela bja Asia, mmušo o na le “tshepedišo ya sekolo ya phiramiti yeo ka boikemišetšo e phagamišetšago bana bao ba nago le mabjoko maemong a godimo.” “Maemo a godimo” a feleletša a bolela go išwa dikolong tše kaone-kaone tša lefase—Yunibesithi ya Oxford le ya Cambridge kua Engelane, dikolo tša Ivy League kua United States le tše dingwe. Ke ka baka la’ng mmušo o nea lenaneo le bjalo le le tšeago lebaka le letelele? Pego e re: “Bakeng sa go kaonefatša boemo bja tša boiphedišo bja setšhaba.” Thuto e ka ba e sa lefelelwe ka tšhelete, eupša tefo yeo barutwana ba e lefago ke bophelo bjo bo nweletšego tabeng ya go kaonefatša tshepedišo ye ya dilo. Gaešita le ge tsela e bjalo ya bophelo e tsongwa kudu lefaseng, na ke seo batswadi ba Bakriste ba se nyakelago bana ba bona?—Johane 15:19; 1 Johane 2:15-17.
11. Dipego di bontšha’ng mabapi le go dirišwa gampe ga dino-tagi le go itshwara ka tsela e gobogilego ya tša botona le botshadi go barutwana ba yunibesithing?
11 Taba e nngwe e swanetšego go elwa hloko ke tikologo. Mafelo a diyunibesithi le dikholetšhe a tumile gampe ka boitshwaro bjo bobe—go dirišwa gampe ga dihlare-tagi le dino-tagi, boitshwaro bjo bo gobogilego, go hlalefetša, go tlaiša ba ba sa tšwago go fihla le mekgwa e mengwe e mentši e swanago. Ela hloko taba ya go diriša dino-tagi gampe. Makasine wa New Scientist ge o bolela ka go nwa kudu, e lego go nwela feela go tagwa, o re: “Mo e ka bago 44 lekgolong ya [barutwana ba yunibesithing kua United States] ba nwa kudu, bonyenyane gatee lebakeng le le tlwaelegilego la dibeke tše pedi.” Bothata bjo bo swanago bo tlwaelegile magareng ga bafsa kua Australia, Brithania, Russia le mafelong a mangwe. Ge go tliwa tabeng ya boitshwaro bjo bo gobogilego bja tša botona le botshadi, selo seo barutwana ba bolelago ka sona lehono ke “go fo ikutswa,” e lego seo go ya ka pego ya Newsweek “se hlaloswago e le go kgotsofatšana ka tša botona le botshadi gatee feela—selo le ge e le sefe go tloga tabeng ya go atlana go fihla tabeng ya go ba le dikopano tša botona le botshadi—gare ga batho bao ba tlwaelanego bao ba sa ikemišetšago gaešita le go boledišana ka morago ga moo.” Dinyakišišo di bontšha gore go tloga go 60 go ya go 80 lekgolong ya barutwana ba dira tiro ya mohuta wo. Monyakišiši yo mongwe o bolela gore: “Ge e ba o le morutwana yo a tlwaelegilego wa kholetšheng, o dira seo.”—1 Ba-Korinthe 5:11; 6:9, 10.
12. Barutwana ba kholetšheng ba lebeletšane le dikgateletšo dife?
12 Go oketša tabeng ya tikologo e mpe, go na le kgateletšo ya mošomo wa sekolo le ditlhahlobo. Ka tlwaelo, barutwana ba swanetše go ithuta le go dira mošomo wa sekolo woo o dirwago gae e le gore ba tle ba atlege ditlhahlobong. Le gona ba bangwe ba ka nyaka le go šoma mošomo wa nakwana ge ba le gare ba tsena sekolo. Tše ka moka di ba feletša nako le matla. Ka gona, go tla šala’ng bakeng sa mediro ya moya? Ge dikgateletšo di gola, ke’ng seo ba tlago go tlogela go se dira? Na mediro ya Mmušo e sa tlo etišwa pele, goba na e tla beelwa ka thoko? (Mateo 6:33) Beibele e kgothatša Bakriste ka gore: “Phakxamêlang xo swara tsela ka xo itôta; Le se etšê mašilo, Le etšê bahlale. Le thakanêlê sebaka se botse; xobane mehla yeno ké e mebe.” (Ba-Efeso 5:15, 16) Ruri go a nyamiša gore ba bangwe ba ile ba aroga tumelong ka baka la go ineela dilong tšeo di nyakago nako ya bona e ntši le matla goba go tanywa boitshwarong bjo bo thulanago le Mangwalo kholetšheng!
13. Ke dipotšišo dife tšeo batswadi ba Bakriste ba swanetšego go naganišiša ka tšona?
13 Ke therešo gore boitshwaro bjo bo gobogilego, boitshwaro bjo bobe le dikgateletšo ga di direge dikholetšheng le diyunibesithing feela. Lega go le bjalo, bafsa ba bantši ba lefase ba lebelela dilo tšeo ka moka e le feela karolo ya thuto, gomme ga ba na bothata le tšona le gatee. Na batswadi ba Bakriste ba swanetše go bea bana ba bona ka boomo tikologong e bjalo ka nywaga e mene goba mohlomongwe le go feta? (Diema 22:3; 2 Timotheo 2:22) Na bafsa ba swanetše go lebeletšana le kotsi e bjalo ka baka la mehola le ge e le efe yeo mohlomongwe ba ka e hwetšago? Le gona, sa bohlokwa kudu ke gore bafsa ba ithuta’ng mabapi le dilo tšeo di swanetšego go tla pele maphelong a bona? * (Ba-Filipi 1:10; 1 Ba-Thesalonika 5:21) Batswadi ba swanetše go naganišiša ka mo go tseneletšego ka dipotšišo tše le go rapela mabapi le tšona, gaešita le go naganišiša ka kotsi ya go iša bana ba bona sekolong motseng goba nageng e nngwe.
Ke Dilo Dife tše Dingwe Tšeo o ka Ithutelago Tšona?
14, 15. (a) Go sa šetšwe pono e tumilego, ke keletšo efe ya Beibele yeo e šomago lehono? (b) Ke dipotšišo dife tšeo bafsa ba ka ipotšišago tšona?
14 Lehono, kgopolo e tumilego ke ya gore bakeng sa gore bafsa ba atlege, tsela e nnoši ke go ba le thuto ya yunibesithi. Lega go le bjalo, go e na le go latela seo se tumilego, Bakriste ba kwa keletšo ya Beibele ya gore: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.” (Ba-Roma 12:2) Thato ya Modimo ke efe ka batho ba gagwe ba bagolo le ba banyenyane karolong ye ya mafelelo ya mehla ya bofelo? Paulo o kgothaditše Timotheo ka gore: “Phafoxêla tšohle; kxôtlêlêla mabothata, O dirê modirô wa sexoeledi, O bê mohlanka ka botlalô [“o phethe bodiredi bja gago ka botlalo,” NW].” Mantšu ao ka ntle le pelaelo a šoma go rena ka moka lehono.—2 Timotheo 4:5.
15 Go e na le go tanywa ke moya wa go rata dilo tše di bonagalago wa lefase le, ka moka ga rena re swanetše go ‘dula re phafogile’—re lebišitše tlhokomelo ya rena ya moya mo e swanetšego. Ge e ba o le mofsa, ipotšiše gore: ‘Na ke leka kamoo nka kgonago ka gona go “phetha bodiredi bja-ka,” e le gore ke be modiredi yo a swanelegago wa Lentšu la Modimo? Dithulaganyo tša-ka ke dife mabapi le go phegelela bodiredi bja-ka “ka botlalô”? Na ke ile ka nagana ka go tsenela tirelo ya nako e tletšego e le modiro wa-ka?’ Tše ke dipotšišo tše thata, kudu-kudu ge o bona bafsa ba bangwe ba nwelela medirong ya boithati, ba “inyakêla tše kxolo” tšeo ba naganago gore di tla ba lebiša bokamosong bjo bo phadimago. (Jeremia 45:5) Ka baka leo, batswadi ba Bakriste ka bohlale ba nea bana ba bona boemo bjo bo swanetšego bja go sekamela dilong tša moya le tlwaetšo e swanetšego go tloga bjaneng.—Diema 22:6; Mmoledi 12:1; 2 Timotheo 3:14, 15.
16. Ke bjang batswadi ba Bakriste ka bohlale ba ka neago bana ba bona boemo bjo bo swanetšego bja go sekamela dilong tša moya?
16 Lapeng le lengwe, mma wa moo e bile modiredi wa nako e tletšego ka nywaga e mentši. Mošemane yo mogolo go bašemane ba bararo lapeng leo, o elelwa ka gore: “Mma o be a lebeledišiša batho bao re gweranago le bona. Re be re sa gwerane le bao re tsenago le bona sekolo eupša re be re gwerana feela le bao ba lego ka phuthegong bao ba bego ba e-na le mekgwa e mebotse ya moya. Le gona ka mehla o be a laletša bao ba lego tirelong ya nako e tletšego—baromiwa, balebeledi ba basepedi, ditho tša lapa la Bethele le babulamadibogo—lapeng la gešo bakeng sa bogwera. Go theetša diphihlelo tša bona le go bona tsela yeo ba thabilego ka yona go ile gwa thuša go bjala ka dipelong tša rena kganyogo ya go nyaka go tsenela tirelo ya nako e tletšego.” Go thabiša gakaakang lehono go bona barwa ka boraro bja bona ba le bodireding bja nako e tletšego—yo mongwe a hlankela Bethele, yo mongwe a e-tšwa Sekolong sa Tlwaetšo ya Bodiredi gomme yo mongwe e le mmulamadibogo!
17. Ke tlhahlo efe yeo batswadi ba ka e neago bana ba bona kgethong ya bona ya dithuto tša sekolo le dipakane tša mošomo? (Bona lepokisi le le lego go letlakala 29.)
17 Ka ntle le go nea boemo bjo bo swanetšego bja go sekamela dilong tša moya, batswadi ba nea bana ba bona tlhahlo e swanetšego kgethong ya bona ya dithuto tša sekolo le dipakane tša mediro ya boiphedišo, e sa le ka pela ka mo go ka kgonegago. Lesogana le lengwe, leo ga bjale le lego tirelong ya Bethele le re: “Batswadi ba-ka ka bobedi ba ile ba bula madibogo pele le ka morago ga ge ba nyalane gomme ba ile ba dira seo ba ka se kgonago go tsenya moya wa bobulamadibogo lapeng ka moka. Nako le nako ge re be re kgetha dithuto sekolong goba re dira diphetho tšeo di tlago go kgoma bokamoso bja rena, ka mehla ba be ba re kgothaletša go dira phetho yeo e bego e tla re nea sebaka se sekaone kudu sa go hwetša mošomo wa nakwana le go bula madibogo.” Go e na le go kgetha dithuto tša sekolo tšeo di rulagantšwego gore di lebiše thutong ya yunibesithi, batswadi le bana ba swanetše go naganela dithuto tšeo di ka thušago tabeng ya go phegelela dipakane tša pušo ya Modimo. *
18. Bafsa ba ka naganela dibaka dife tša mošomo?
18 Dinyakišišo di bontšha gore dinageng tše dintši, go na le go nyakega mo go akgofilego ga batho bao ba šomago mešomo ya diatla le bao ba dirago ditirelo tše holago, e sego ga dialoga tša yunibesithi. USA Today e bega gore “nywaga-someng e tlago, go ka se nyakege gore 70% ya bašomi ba be le degree ya nywaga e mene ya kholetšhe, eupša go e na le moo go tla nyakega gore ba be le degree ya nywaga e mebedi go tšwa kholetšheng ya mmušo goba mohuta o itšego wa lengwalo la botsebi la thekhinikhale.” Dikolo tše bjalo tše dintši di nea dithuto tša nako e kopana medirong ya ofisi, medirong ya go lokiša dikoloi, go lokiša di-computer, modiro wa go lokiša dipompi, go lokiša meriri le mediro e mengwe e mentši. Na ye ke mešomo e bohlokwa? Ruri go bjalo! Mohlomongwe ga e kgahliše go ya kamoo ba bangwe ba ka bago ba nagana ka gona, eupša e thuša ka tšhelete ya go iphediša le bokgoni bja go feto-fetola lenaneo la go šoma, e lego tšeo di nyakwago ke bao mošomo wa bona wa kgonthe e lego tirelo ya bona go Jehofa.—2 Ba-Thesalonika 3:8.
19. Tsela e kgonthišeditšwego go di feta tšohle e išago bophelong bjo bo nago le lethabo le kgotsofalo ke efe?
19 Beibele e kgothatša ka gore: “Lena masoxana le lena basetsana, . . . bohle a ba rêtê ’ina la Morêna xobane ’ina la xaxwe ké lôna ’ina-lephaxami lè le nnoši; letaxô la xaxwe le ukametše ’fase lé le maxodimo.” (Psalme 148:12, 13) Ge go bapišwa le maemo le meputso yeo lefase le e neago, go hlankela Jehofa ka nako e tletšego ka ntle le pelaelo ke tsela e kgonthišeditšwego go di feta tšohle e išago bophelong bja lethabo le kgotsofalo. Nagana ka kgonthišetšo ya Beibele e rego: “Khumišô ké dithšexofatšô tša Morêna; xa e tlale ka xo itapiša.”—Diema 10:22.
[Mengwalo ya ka tlase]
^ ser. 13 Bakeng sa diphihlelo tša bao ba ilego ba tšea thuto ya pušo ya Modimo e le bohlokwa go feta thuto ya yunibesithi, bona ditokollo (tša Seisemane) tša Morokami wa May 1, 1982, matlakala 3-6; wa April 15, 1979, matlakala 5-10; ditokollo (tša Seisemane) tša Phafoga! ya June 8, 1978, letlakala 15; le ya August 8, 1974, matlakala 3-7.
^ ser. 17 Bona Phafoga! ya October 8, 1998, “Go Tsoma Bophelo bjo bo Bolokegilego,” matlakala 4-6, le puku ya Dipotšišo tša Bafsa le Dikarabo tše Šomago, “Ke Mošomo Ofe Woo ke Swanetšego go o Kgetha?,” matlakala 174-9, yeo e gatišitšwego ke Dihlatse tša Jehofa.
Na o ka Hlalosa?
• Ke’ng seo Bakriste ba se botago bakeng sa bokamoso bjo bo šireletšegilego?
• Batswadi ba Bakriste ba lebeletšana le ditlhohlo dife mabapi le bokamoso bja bana ba bona?
• Ke’ng seo se swanetšego go naganelwa ge go balwa ditshenyagalelo tša go phegelela thuto e phagamego?
• Batswadi ba ka thuša bana ba bona bjang go phegelela go šoma tirelong ya Jehofa?
[Dipotšišo tša Thuto]
[Lepokisi go letlakala 29]
Mohola wa Thuto e Phagamego ke Ofe?
Batho ba bantši bao ba ingwadišago yunibesithing ba holofela go hwetša degree yeo e tlago go ba bulela dibaka tša go hwetša mešomo e lefago gabotse le e šireletšegilego. Lega go le bjalo, dipego tša mmušo di bontšha gore ke mo e ka bago kotara feela ya bao ba yago kholetšheng bao ba hwetšago degree lebakeng la nywaga e tshela—e lego tekanyo e nyamišago ya katlego. Lega go le bjalo, na degree yeo e kgonthišetša gore motho o tla hwetša mošomo o mobotse? Ela hloko seo nyakišišo ya morago bjale e se bolelago.
“Go ya [yunibesithing] ya Harvard goba ya Duke go ka se fo tšweletša mošomo o kaone le mogolo wa godimo. . . . Dikhamphani ga di tsebe mo gontši mabapi le bafsa bao ba ithutelago mošomo. Lengwalwana le le bogegago la bohlatse (degree ya Ivy League) e ka ba le le kgahlišago. Eupša ka morago ga moo, selo sa bohlokwa kudu ke seo batho ba kgonago go se dira goba ba palelwago ke go se dira.”—Newsweek, November 1, 1999.
“Gaešita le ge mešomo e tlwaelegilego ya lehono e nyaka bokgoni bja maemo a godimo go feta nakong e fetilego . . . , bokgoni bjo bo nyakegago bakeng sa mešomo ye ke bokgoni bjo matla bja maemo a sekolo se se phagamego—dipalo, go bala le go ngwala ge motho a le go grade 9 . . . , e sego bokgoni bja kholetšheng. . . . Barutwana ga se ba swanela go ya kholetšheng e le gore ba hwetše mošomo o mobotse, eupša ba swanetše go ba le bokgoni ge ba sa le sekolong se se phagamego.”—American Educator, Seruthwane sa 2004.
“Dikholetšhe tše dintši ga di gate ka mošito o tee le lefase tabeng ya go hlama barutwana gore ba kgone go atlega lefaseng la mošomo ka morago ga ge ba alogile kholetšheng. Dikolo tša go tlwaeletša batho mošomo . . . di thoma go tuma. Go ingwadiša go tšona go ile gwa gola ka 48% go tloga ka 1996 go fihla ka 2000. . . . Go sa dutše go le bjalo, di-diploma tšeo tša kholetšhe tše bitšago kudu le tše jago nako, ga di sa na mohola gakaalo go feta le ge e le neng pele.”—Time, January 24, 2005.
“Dikakanyetšo tša nakong e tlago go tšwa Lefapheng la tša Mošomo la United States ngwageng wa 2005, di utolla kgonagalo e tšhošago ya gore bonyenyane tee-tharong ya dialoga ka moka tšeo di feditšego nywaga e mene kholetšheng di ka se hwetše mošomo wo o sepedišanago le di-degree tša tšona.”—The Futurist, July/August 2000.
Ka baka la dilo tše ka moka, barutiši ba oketšegago ba tloga ba belaela mohola wa thuto e phagamego lehono. Pego ya Futurist e lla ka gore: “Re ruta batho bakeng sa dipakane tše di sa swanelago.” Ka mo go fapanego, ela hloko seo Beibele e se bolelago mabapi le Modimo ge e re: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara. Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.”—Jesaya 48:17, 18.
[Seswantšho go letlakala 26]
Ba ile ba phaela ka thoko mediro ya bona ka noši gomme ba latela Jesu
[Seswantšho go letlakala 31]
Batswadi ba Bakriste ka bohlale ba nea bana ba bona boemo bjo bo swanetšego bja go sekamela dilong tša moya go tloga bjaneng