Lentšu la Jehofa le a Phela

Dintlha tše Kgolo go tšwa Pukung ya Dikoronika tša Pele

GO FETILE nywaga e ka bago e 77 ga e sa le go tloga ge ba-Juda ba boetše nageng ya gabo bona go tšwa bothopša Babele. Tempele yeo e ilego ya agwa lefsa ke Mmušiši Serubabele ga bjale e bile gona ka nywaga e 55. Lebaka la bohlokwa kudu la gore ba-Juda ba boe e be e le bakeng sa go tsošološa borapedi bja therešo kua Jerusalema. Lega go le bjalo, batho ga ba fišegele borapedi bja Jehofa. Go nyakega gore ba newe kgothatšo ka mo go akgofilego, gomme seo e tloga e le se puku ya Beibele ya Dikoronika tša Pele e se neago.

Ge go sa balwe dipego tša lelokelelo la mašika, puku ya Dikoronika tša Pele e akaretša lebaka la nywaga e ka bago 40, go tloga ka lehu la Kgoši Saulo go fihla ka lehu la Kgoši Dafida. Go dumelwa gore moperisita Esera o ngwadile puku ye ka ngwaga wa 460 B.C.E. Puku ya Dikoronika tša Pele ke e kgahlišago go rena ka gobane e re nea temogo mabapi le borapedi bja tempeleng e bile e re nea ditaba ka botlalo mabapi le lešika la gabo Mesia. Ka ge e le karolo ya Lentšu la Modimo le le buduletšwego, molaetša wa yona o matlafatša tumelo ya rena e bile o oketša kwešišo ya rena ka Beibele.—Ba-Hebere 4:12.

PEGO YA BOHLOKWA YA MAINA

(1 Koronika 1:1–9:44)

Lelokelelo le le feletšego la mašika leo Esera a le kgoboketšago ke la bohlokwa bonyenyane ka mabaka a mararo: go kgonthišetša gore ke banna ba dumeletšwego feela bao ba hlankelago e le baperisita, go thuša go tseba bohwa bja moloko le go šireletša pego ya lešika leo le lebišago go Mesia. Pego e latišiša histori ya ba-Juda go ba go fihla go monna wa mathomo. Go na le meloko e lesome go tloga go Adama go ya go Noage le meloko e mengwe e lesome yeo e re lebišago go Aborahama. Ka morago ga go lokeletša barwa ba Išimaele, barwa ba mosadi wa Aborahama wa serethe e lego Ketura le barwa ba Esau, pego e lebiša tlhokomelo go lešika la barwa ba 12 ba Isiraele.—1 Koronika 2:1.

Go bolelwa kudu ka ditlogolo tša Juda ka gobane di tšweletša lešika la ka bogošing la Kgoši Dafida. Go na le meloko e 14 go tloga go Aborahama go ya go Dafida gomme go na le meloko e mengwe e 14 go fihla nakong ya ge di išwa bothopša Babele. (1 Koronika 1:27, 34; 2:1-15; 3:1-17; Mateo 1:17) Ke moka Esera o lokeletša ditlogolo tša meloko e lego tikologong ya ka bohlabela ya Jorodane, gomme gwa latela lešika la barwa ba Lefi. (1 Koronika 5:1-24; 6:1) Ka morago o nea kakaretšo e kopana ya meloko e mengwe yeo e lego ka bodikela bja Noka ya Jorodane le ditaba ka botlalo mabapi le lešika la Benjamini. (1 Koronika 8:1) Maina a badudi ba mathomo ba Jerusalema bao ba boilego bothopša Babele le ona a lokeleditšwe.—1 Koronika 9:1-16.

Dipotšišo tša Mangwalo di a Arabja:

1:18—Tatago Sela e be e le mang—Kenane goba Arapagasadi? (Luka 3:35, 36) Arapagasadi e be e le tatago Sela. (Genesi 10:24; 11:12) Leina “Kenane” go Luka 3:36 e ka ba e le go fetolelwa  ka tsela e fošagetšego ga leina “ba-Kaladea.” Ge e ba go le bjalo, mongwalo wa mathomo o ka ba o be o balega ka gore, “morwa wa Arapagasadi wa mo-Kaladea.” Goba mohlomongwe leina Kenane le leina Arapagasadi a ka ba a bolela ka motho o tee. Seo se sa swanelago go hlokomologwa ke taba ya gore polelwana “wa Kenane” ga e hwetšwe ka mengwalong e mengwe.—Luka 3:36.

2:15—Na Dafida e be e le morwa wa bošupa wa Isai? Aowa. Isai o be a e-na le barwa ba seswai, gomme Dafida e be e le phejane. (1 Samuele 16:10, 11; 17:12) Go bonagala yo mongwe wa barwa ba Isai a hwile a se na bana. Ka ge morwa yoo a be a ka se tsenywe dipegong tša lelokelelo la mašika, Esera ga se a ka a bolela leina la gagwe.

3:17—Ke ka baka la’ng Luka 3:27 e bolela ka morwa wa Joanane e lego Sealathiele e le morwa wa Neri? Joanane e be e le tatago Sealathiele. Lega go le bjalo, go bonagala Neri a ile a tšeiša Sealathiele morwedi wa gagwe. Luka o be a bolela ka mokgonyana wa Neri e le morwa wa Neri go etša ge go bile bjalo boemong bja Josefa, ka ge a mmitša morwa wa tatago Maria e lego Eli.—Luka 3:23.

3:17-19—Serubabele, Pedaya le Sealathiele ba be ba tswalana bjang? Serubabele e be e le morwa wa Pedaya, yo e bego e le morwarrago Sealathiele. Lega go le bjalo, Beibele ka dinako tše dingwe e bitša Serubabele gore ke morwa wa Sealathiele. (Mateo 1:12; Luka 3:27) Go ka ba bjalo ka gobane Pedaya o ile a hwa gomme Sealathiele a godiša Serubabele. Goba mohlomongwe ka ge Sealathiele a ile a hwa a se na bana, Pedaya o ile a nyala mohlologadi wa Sealathiele, gomme Serubabele ya ba morwa wa leitšibulo lenyalong leo.—Doiteronomio 25:5-10.

5:1, 2—Go amogela tshwanelo ya go ba leitšibulo go be go bolela’ng go Josefa? Go be go bolela gore Josefa o amogetše dikarolo tše pedi tša bohwa. (Doiteronomio 21:17) Ka gona o ile a ba tatago meloko e mebedi—wa Efuraimi le wa Manase. Yo mongwe le yo mongwe wa barwa ba bangwe ba Isiraele o ile a ba tatago moloko o tee feela.

Seo re Ithutago Sona:

1:1–9:44. Mašika a batho ba kgonthe a hlatsela gore tokišetšo ka moka ya borapedi bja therešo ga se ya thewa nonwaneng, eupša e theilwe dilong tša kgonthe.

4:9, 10. Jehofa o ile a araba Jabese ge a be a rapela ka go se kgaotše a kgopela gore naga ya gagwe e katološwe ka khutšo e le gore go yona go dule batho ba oketšegilego bao ba boifago Modimo. Le rena re swanetše go rapela go tšwa pelong re kgopela gore go be le koketšego ge re dutše re tšea karolo ka mafolofolo modirong wa go dira barutiwa.

5:10, 18-22. Mehleng ya Kgoši Saulo, meloko yeo e lego ka bohlabela bja Jorodane e ile ya fenya ba-Hagari gaešita le ge ba be ba feta meloko ye mo e ka bago gabedi ka palo. Go bile bjalo ka gobane banna ba sebete ba meloko ye ba be ba bota Jehofa gomme ba ile ba kgopela thušo go yena. Anke re boteng Jehofa ka mo go feletšego ge re dutše re e-lwa ntwa ya rena ya moya kgahlanong le manaba a mantši go re feta.—Ba-Efeso 6:10-17.

9:26, 27. Baleta-kgoro ba ba-Lefi ba be ba neilwe kabelo e nyakago boikarabelo bjo bogolo. Ba be ba neilwe senotlelo sa kgoro e yago dikarolong tše kgethwa tša tempele. Ba ile ba ipontšha e le ba ka botwago tabeng ya go bula dikgoro letšatši le letšatši. Re neilwe boikarabelo bja go hwetša batho tikologong ya rena le go ba thuša go rapela Jehofa. Na ga se ra swanela go ipontšha re le ba ka botwago le ba botegago go etša baleta-kgoro ba ba-Lefi?

 DAFIDA O BUŠA E LE KGOŠI

(1 Koronika 10:1–29:30)

Kanegelo e thoma ka pego ya ge Kgoši Saulo le barwa ba gagwe ba bararo ba e-hwa ntweng kgahlanong le ba-Filisita kua Thabeng ya Giliboa. Dafida, e lego morwa wa Isai, o bewa gore e be kgoši ya moloko wa Juda. Banna ba tšwago melokong ka moka ba tla Heburone gomme ba mmea gore e be kgoši ya Isiraele ka moka. (1 Koronika 11:1-3) Ka morago, ba-Isiraele ba tliša areka ya kgwerano Jerusalema “ka xo hlalala, xò letšwa diphalafala le . . . makope le diletšô.”—1 Koronika 15:28.

Dafida o bontšha kganyogo ya go nyaka go agela Modimo wa therešo ngwako. Jehofa o beela Salomo tokelo yeo, gomme o dira kgwerano ya Mmušo le Dafida. Ge Dafida a dutše a tšwetša pele lesolo la gagwe la go lwa kgahlanong le manaba a Isiraele, Jehofa o dira gore a a fenye ka go latelelana. Go balwa ga batho mo go sa dumelelwago go feleletša ka gore go hwe batho ba 70 000. Ka morago ga go amogela tlhahlo ka morongwa ya gore Jehofa a agelwe aletare, Dafida o reka lefelo go Oronani wa mo-Jebusi. Dafida o thoma go “lokišetša” go agela Jehofa ngwako “o moxolo wa thokamêla” lefelong leo. (1 Koronika 22:5) Dafida o rulaganya ditirelo tšeo di dirwago ke ba-Lefi, tšeo di hlaloswago mo ka botlalo kudu go feta lefelong le ge e le lefe ka Mangwalong. Kgoši le batho ba ntšha meneelo e mentši bakeng sa tempele. Ka morago ga nywaga e 40 ya pušo ya gagwe, Dafida o hwa “à atetšwe ke matšatši, le mahumô le xo rêtwa. Lexatong la xaxwe xwa [thoma go] buša Salomo morwa wa xaxwe.”—1 Koronika 29:28.

Dipotšišo tša Mangwalo di a Arabja:

11:11—Ke ka baka la’ng palo ya bao ba bolailwego e le 300 gomme e se 800 go ya ka pego e swanago le ye e lego go 2 Samuele 23:8? Moetapele wa banna ba bararo ba Dafida ba bogale kudu e be e le Jasobeama, goba Joseba-basebethe. Banna ba bangwe ba babedi ba matla e be e le Eleasara le Sama. (2 Samuele 23:8-11) Lebaka leo ka lona go nago le phapano dipegong tše tše pedi e ka ba e le gore di bolela ka ditiro tše di sa swanego tšeo di dirilwego ke monna o tee.

11:20, 21—Boemo bja Abisai e be e le bofe ge e le mabapi le baetapele ba Dafida ba bararo ba matla? Abisai e be e se yo mongwe wa banna ba ba bararo ba matla kudu bao ba bego ba hlankela Dafida. Lega go le bjalo, go etša ge go boletšwe go 2 Samuele 23:18, 19, e be e le moetapele wa bahlabani ba 30 gomme o be a tumile go feta le ge e le ofe wa baetapele bao. Botumo bja Abisai bo be bo feta bja baetapele ba bararo ba matla ka gobane o be a dirile tiro e kgolo e swanago le ya Jasobeama.

12:8—Ke ka tsela efe difahlego tša bahlabani ba ba-Gada di bego di swana le “difahloxô tša ditau”? Banna ba ba bogale ba be ba eme Dafida nokeng kua lešokeng. Meriri ya bona e be e le e metelele. Go ba ga bona le meriri e metelele go be go ba dira gore ba lebelelege e le ba šoro go swana le ditau.

13:5—“Noka ya . . . Egipita” ke’ng? Ba bangwe ba be ba nagana gore polelwana ye e bolela ka karolo ya Noka ya Nile. Lega go le bjalo, batho ka kakaretšo ba e kwešiša e šupa go “moedi wa Egipita” (NW)—moedi wo o šomago e le mollwane wa ka borwa-bodikela wa Naga ya Kholofetšo.—Numeri 34:2, 5; Genesi 15:18.

16:30—‘Go hlakasela’ pele ga Jehofa go bolela’ng? Polelwana ‘go hlakasela’ mo e dirišitšwe ka tsela ya seswantšhetšo go bontšha poifo ya borapedi ya go boifa Jehofa le go Mo hlompha ka mo go tseneletšego.

 16:1, 37-40; 21:29, 30; 22:19—Ke tokišetšo efe ya borapedi yeo e ilego ya tšwela pele e šoma Isiraeleng go tloga nakong ya ge Areka e tlišitšwe Jerusalema go fihla ge tempele e agilwe? Ge Dafida a be a tliša Areka Jerusalema gomme a e bea ka gare ga tente yeo a e dirilego, Areka e be e se ya ka ya ba ka tabarenakeleng ka nywaga e mentši. Ka morago ga go hudušwa, Areka e ile ya dula ka tenteng yeo kua Jerusalema. Tabarenakele e be e le kua Gibeoni, moo Moperisita yo Mogolo e lego Tsadoko le barwarragwe ba bego ba dira dihlabelo tšeo di bego di nyakwa ke Molao. Tokišetšo ye e ile ya tšwela pele go fihlela ge tempele ya Jerusalema e feditšwe go agwa. Ge tempele e be e feditšwe, tabarenakele e ile ya hudušwa Gibeoni ya išwa Jerusalema, gomme Areka e ile ya dula ka Sekgethwa-kgethweng sa tempele.—1 Dikxoši 8:4, 6.

Seo re Ithutago Sona:

13:11. Go e na le gore re galefe gomme re bee Jehofa molato ge maiteko a rena a palelwa, re swanetše go hlahloba boemo e le go leka go bona seo se dirilego gore re palelwe. Ga go belaetše gore Dafida o ile a dira bjalo. O ile a ithuta phošong ya gagwe gomme ka morago a tliša Areka Jerusalema ka katlego a diriša mokgwa o swanetšego. *

14:10, 13-16; 22:17-19. Re swanetše gore ka mehla re batamele Jehofa ka thapelo gomme re tsome tlhahlo ya gagwe pele ga ge re ka dira modiro le ge e le ofe wo o tlago go re kgoma moyeng.

16:23-29. Borapedi bja Jehofa e swanetše go ba selo sa pele seo re tshwenyegago ka sona bophelong.

18:3. Jehofa ke Mophethi wa dikholofetšo tša gagwe. Ka Dafida, o ile a phetha kholofetšo ya gagwe ya gore o tla nea peu ya Aborahama naga ka moka ya Kanana, yeo e nabago “xo tloxa ka noka ya Egipita, xo iša nokeng e kxolo, noka ya Forate.”—Genesi 15:18; 1 Koronika 13:5.

21:13-15. Jehofa o laetše morongwa gore a emiše kotlo ka gobane O kwela batho ba Gagwe bao ba tlaišegago bohloko. Ke therešo gore “kxauxêlô ya xaxwe ké e kxolo-kxolo.” *

22:5, 9; 29:3-5, 14-16. Gaešita le ge a be a sa laelwa go agela Jehofa tempele, Dafida o ile a bontšha moya wa go nea. Ka baka la’ng? Ka gobane o be a lemoga gore dilo ka moka tšeo a bego a e-na le tšona e be e le ka baka la botho bja Jehofa. Maikwelo a swanago a tebogo a swanetše go re tutueletša gore re be le moya wa go nea.

24:7-18. Tokišetšo ya dihlopha tše 24 tša baperisita yeo Dafida a e hlomilego e bile gona ge morongwa wa Jehofa a be a tšwelela go Sakaria, tatago Johane Mokolobetši, gomme a mo tsebiša ka ngwana yo a bego a tla belegwa e lego Johane. Ka ge e le setho sa “[sehlopha] sa Abia,” Sakaria ka nako yeo o be a hlankela tempeleng. (Luka 1:5, 8, 9) Borapedi bja therešo bo tswalana le batho ba histori—e sego ba nonwane. Ditšhegofatšo di tlišwa ke ge re dirišana ka potego le “molaki e a bôtêxaxo yo bohlale” ge e le mabapi le borapedi bjo bo rulagantšwego gabotse bja Jehofa lehono.—Mateo 24:45.

Hlankela Jehofa ka “Môya wa Mafolofolo”

Puku ya Dikoronika tša Pele ga se ya swara feela lelokelelo la mašika. E swere gape le pego ya go tliša ga Dafida areka ya kgwerano Jerusalema, diphenyo tša gagwe tše dikgolo, tokišetšo bakeng sa go agwa ga tempele le go hlongwa ga dihlopha tša baperisita ba ba-Lefi bakeng sa tirelo. Dilo ka moka tšeo Esera a anegago ka tšona ka pukung ya Dikoronika tša Pele di swanetše go ba di ile tša hola ba-Isiraele, tša ba thuša go tsošološa phišego ya bona bakeng sa borapedi bja Jehofa tempeleng.

Ruri Dafida o beile mohlala o mobotse ka go kgomarela borapedi bja Jehofa e le bjona bja bohlokwa kudu bophelong bja gagwe! Go e na le go inyakela ditokelo tše di kgethegilego, Dafida o be a nyaka go dira thato ya Modimo. Re kgothaletšwa gore re diriše keletšo ya gagwe ya gore re hlankele Jehofa “ka pelo yohle le ka môya wa mafolofolo.”—1 Koronika 28:9.

[Mengwalo ya ka tlase]

[Tšhate/Diswantšho go letlakala 8-11]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

4026 B.C.E. Adama Meloko ya go tloga go Adama

go ya go Noage (nywaga e 1 056)

Nywaga e 130 ⇩

 

Sethe

 

105 ⇩

 

Enose

 

90 ⇩

 

Kenane

 

70 ⇩

 

Mahalalele

 

65 ⇩

 

Jarede

 

162 ⇩

 

Henoge

 

65 ⇩

 

Methusela

 

187 ⇩

 

Lamege

 

182 ⇩

 

2970 B.C.E. Noage 2970 B.C.E. NOAGE o a belegwa

Meloko ya go tloga go Noage go ya

Nywaga e 502 ⇩ go Aborahama (nywaga e 952)

 

Seme

MEETSE-FULA 2370 B.C.E.

100 ⇩

 

Arapagasadi

 

35 ⇩

 

Sela

 

30 ⇩

 

Hebere

 

34 ⇩

 

Pelege

 

30 ⇩

 

Regu

 

32 ⇩

 

Seruge

 

30 ⇩

 

Nahoro

 

29 ⇩

 

Thara

 

130 ⇩

 

2018 B.C.E. Aborahama 2018 B.C.E. ABORAHAMA o a belegwa

Go tloga go Aborahama go ya go

Nywaga e 100. ⇩ Dafida: meloko e 14 (nywaga e 911)

 

Isaka

 

60 ⇩

 

Jakobo

 

c.88 ⇩

 

Juda

 

⇩

 

Pheretse

 

⇩

 

Hetsirone

 

⇩

 

Rama

 

⇩

 

Aminadaba

 

⇩

 

Nahasone

 

⇩

 

Salemone

 

⇩

 

Boase

 

⇩

 

Obede

 

⇩

 

Isai

 

⇩

 

1107 B.C.E. DAFIDA o a belegwa