“Dulang le Phakgame”—Nako ya Kahlolo e Fihlile!
“Dulang le Phakgame”—Nako ya Kahlolo e Fihlile!
Tsebišo e lego sehlogong se seo se ithutwago e theilwe poroutšheng ya Dulang le Phakgame! yeo e lokolotšwego dikopanong tša selete tšeo di bego di swerwe lefaseng ka bophara ka 2004/05.
‘Dulang le phakgame, gobane nako ya go tla ga Morena wa lena ga le e tsebe.’—MATEO 24:42.
1, 2. Ke’ng seo Jesu ka mo go swanetšego a ilego a se swantšha le go tla ga gagwe?
OBE o tla dira’ng ge nkabe o be o tseba gore lehodu le a khukhuna e bile le nyaka go utswa magaeng a baagišani ba gago? E le gore o šireletše bao o ba ratago le dilo tša gago tša bohlokwa, o be o tla dula o phakgame, o ntšhitše mahlo dinameng. Go oketša moo, lehodu ga le romele lengwalo la go tsebiša gore le tla tla neng. Go e na le moo, le tla ka setu e bile le sa letelwa.
2 Ka makga a mmalwa, Jesu o dirišitše ditsela tšeo lehodu le dirago dilo ka tšona e le mohlala. (Luka 10:30; Johane 10:10) Mabapi le ditiragalo tšeo di bego di tla direga mehleng ya bofelo le tšeo di bego di tla lebiša tabeng ya go tla ga gagwe bakeng sa go phetha kahlolo, Jesu o neile temošo ye: “Ké xôna phakxamang, xobane nakô ya xo tla xa Morêna wa lena xa Le e tsebe. Se Le se tsebaxo sé-sé: Xe mong wa ngwakô a ka tseba nakô ya bošexo yeo lehodu le tl’o xo tla ka yôna, a ka phakxama a se dumêle xe ngwakô wa xaxwe o ka tsênwa.” (Mateo 24:42, 43) Ka baka leo, Jesu o ile a swantšha go tla ga gagwe le go tla ga lehodu—go sa letelwa.
3, 4. (a) Go kwa temošo ya Jesu mabapi le go tla ga gagwe go akaretša’ng? (b) Go rotoga dipotšišo dife?
3 Seswantšho se e be e le se se swanetšego, ka gobane letšatši-kgwedi le le lebanyago la go tla ga Jesu le be le ka se tsebje. Pejana, boporofeteng bjo bo swanago, Jesu o itše: “Xe e le letšatši leo, le nakô ya tšôna, xa xo e a di tsebaxo. Le Barongwa ba maxodimong, le Yêna Morwa, xa ba di tsebe. Xo tseba Tate a nnoši.” (Mateo 24:36) Ka gona, Jesu o ile a kgothaletša batheetši ba gagwe gore: “Dulang Lè itokišitše.” (Mateo 24:44) Bao ba bego ba theeditše keletšo ya Jesu ba be ba tla itokiša, ba itshwara ka tsela e swanetšego, go sa šetšwe nako yeo a tlago ka yona e le Moemedi wa Jehofa wa Moahlodi.
4 Go rotoga dipotšišo tše dingwe tša bohlokwa: Na temošo ya Jesu e lebišitšwe feela go batho ba lefase, goba na Bakriste ba therešo le bona ba swanetše go ‘dula ba phakgame’? Ke ka baka la’ng go akgofile gore re ‘dule re phakgame,’ gomme se se akaretša’ng?
Ke Temošo go Bomang?
5. Re tseba bjang gore temošo ya gore ‘dulang le phakgame’ e šoma go Bakriste ba therešo?
5 E tloga e le therešo gore go tla ga Morena go tla ba bjalo ka go tla ga lehodu go batho ba lefase, bao ba sa nyakego go kwa temošo mabapi le masetla-pelo ao a tlago. (2 Petro 3:3-7) Lega go le bjalo, go thwe’ng ka Bakriste ba therešo? Moapostola Paulo o ngwaletše badumedi-gotee le yena gore: “Lena beng Le tseba xabotse xore letšatši leo la Morêna le tlo tla boka lehodu xe le tla bošexo.” (1 Ba-Thesalonika 5:2) Ga re na pelaelo ka menaganong ya rena gore ‘letšatši la Jehofa le a tla.’ Eupša na seo se nyenyefatša go nyakega ga gore re dule re phakgame? Ela hloko gore Jesu o be a botša barutiwa ba gagwe ge a be a re: “Morwa-motho ó tlo tla ka nakô ye Le sa e xopolexo.” (Mateo 24:44, mongwalo o sekamego ke wa rena.) Pejana, ge a be a kgothaletša barutiwa ba gagwe gore ba tšwele pele ba tsoma Mmušo, Jesu o ba lemošitše ka gore: “Dulang Lè itokišitše, xobane Morwa-motho ó tlo tla ka lebaka le Le sa le xopolexo.” (Luka 12:31, 40, mongwalo o sekamego ke wa rena.) Na ga go molaleng gore Jesu o be a naganne ka balatedi ba gagwe ge a be a lemoša gore: ‘Dulang le phakgame’?
6. Ke ka baka la’ng re swanetše go ‘dula re phakgame’?
6 Ke ka baka la’ng re swanetše go ‘phakgama’ le go ‘itokiša’? Jesu o hlalositše gore: “Ba babedi ba tlo ba ba le naxeng; e mongwê a tlo amoxêlwa, e mongwê a tlo tloxêlwa. Ba babedi ba tlo ba ba šila lwaleng; e mongwê a tlo amoxêlwa, e mongwê a tloxêlwa.” (Mateo 24:40, 41) Bao ba itlhatselago ba itokišitše ba tla “amoxêlwa,” goba go phološwa, ge lefase la batho bao ba sa boifego Modimo le fedišwa. Ba bangwe ba tla “tloxêlwa” e le gore ba fedišwe ka gobane ba be ba phegelela tsela ya bona ka noši ya boithati ya bophelo. Ba ba ka akaretša batho bao lebakeng le lengwe ba ilego ba hlabišetšwa seetša eupša ba se dule ba phakgame.
7. Go se tsebe gore bofelo bo tla neng go re dumelela go dira’ng?
7 Go se tsebe letšatši ka go lebanya la go fedišwa ga tshepedišo ye ya kgale go re nea sebaka sa go bontšha gore re hlankela Modimo ka maikemišetšo a mabotse. Go bjalo bjang? E ka ba taba ya gore bofelo bo bonagala bo tšea nako e telele bo sa fihle. Ka manyami, Bakriste ba bangwe bao ba ikwago ka tsela ye ba dumeletše go ba mafolofolo ga bona tirelong ya Jehofa gore go fokole. Lega go le bjalo, ka boineelo bja rena, re itlišitše go Jehofa ka mo go feletšego gore re mo hlankele. Bao ba tsebago Jehofa ba lemoga gore go ba mafolofolo ka motsotso wa mafelelo go ka se mo kgahliše. O bona seo se lego ka pelong.—1 Samuele 16:7.
8. Go rata Jehofa go re tutueletša bjang gore re dule re phakgame?
8 Ka baka la gore re rata Jehofa e le ka kgonthe, re hwetša lethabo le legolo ka go dira thato ya gagwe. (Psalme 40:8; Mateo 26:39) Le gona re nyaka go hlankela Jehofa ka mo go sa felego. Ga se gore tebelelo yeo ga se ya bohlokwa gakaalo feela ka gobane re swanetše go ema lebaka le leteletšana go feta kamoo re ka bago re be re lebeletše ka gona. Go feta tšohle, re dula re phakgame ka gobane re fagahletše go bona seo letšatši la Jehofa le tlago go se bolela go phethagatšweng ga morero wa gagwe. Kganyogo ya rena e tseneletšego ya go nyaka go kgahliša Modimo e re tutueletša go diriša keletšo ya Lentšu la gagwe le go etiša Mmušo wa gagwe pele maphelong a rena. (Mateo 6:33; 1 Johane 5:3) Anke re eleng hloko kamoo go dula re phakgame go swanetšego go tutuetša diphetho tšeo re di dirago le tsela yeo re phelago maphelo a rena letšatši le letšatši.
Bophelo bja Gago bo Lebile Kae?
9. Ke ka baka la’ng e le mo go akgofilego gore batho ba lefase ba lemoge seo se bolelwago ke mehla ya rena?
9 Batho ba bantši lehono ba a lemoga gore mathata a magolo le ditiragalo tše di tšhošago ke dilo tše di diregago letšatši le lengwe le le lengwe, gomme ba ka ba ba sa thabišwe ke mo maphelo a bona a lebilego gona. Lega go le bjalo, na ge e le gabotse ba tseba seo se bolelwago ke maemo a lefase? Na ba a lemoga gore re phela “bofelong bja tshepedišo ya dilo”? (Mateo 24:3, NW) Na ba a lemoga gore go ata ga mekgwa ya boithati, ya bošoro gaešita le ya go se boife Modimo go swaya dinako tše e le ‘mehla ya bofelo’? (2 Timotheo 3:1-5) Ke mo go akgofilego gore ba lemoge seo se bolelwago ke tše ka moka le go ela hloko moo maphelo a bona a lebilego gona.
10. Re swanetše go dira’ng go kgonthišetša gore re dula re phakgame?
10 Go thwe’ng ka rena? Letšatši le letšatši re lebeletšana le diphetho tšeo di akaretšago mošomo wa rena, boemo bja rena bja tša maphelo, malapa a rena le borapedi bja rena. Re tseba seo Beibele e se bolelago, gomme re katanela go se diriša. Ka gona, re dira gabotse go ipotšiša gore: ‘Na ke dumeletše dipelaelo tša bophelo gore di ntebiše go šele? Na ke dumelela difilosofi tša lefase, e lego tsela ya lona ya go nagana, gore di laole dikgetho tšeo ke di dirago?’ (Luka 21:34-36; Ba-Kolose 2:8) Re swanetše go tšwela pele re bontšha gore re bota Jehofa ka dipelo tša rena ka moka gomme re se ke ra ithekga ka tlhaologanyo ya rena. (Diema 3:5) Ka tsela yeo, re tla ‘fihlelela bophelo bja ruri’—bophelo bjo bo sa felego lefaseng le lefsa la Modimo.—1 Timotheo 6:12, 19.
11-13. Re ka ithuta’ng mehlaleng ya seo se diregilego (a) mehleng ya Noage? (b) mehleng ya Lota?
11 Beibele e na le mehlala e mentši ya temošo yeo e ka re thušago go dula re phakgame. Ela hloko seo se diregilego mehleng ya Noage. Nako e telele pele ga ge Modimo a ka tšea kgato, o ile a bona go swanetše gore go newe temošo. Eupša ka ntle le Noage le lapa la gagwe, batho ga se ba ka ba ela hloko temošo. (2 Petro 2:5) Jesu o boletše mabapi le se gore: “Maboong a Morwa-motho xo tlo ba byalo ka mehleng ya Noaxe. Ba tlo dira tše ba di dirilexo mola meetse-fula à sešo a tla, xe ba-e-ja, bà e-nwa, bà nyala, bà nyadiša, xwa bá xwa tla ’tšatši le Noaxe a tsenexo polokelong ka lôna. Ba be ba sa šetše selô; meetse-fula a bá a tla, a ba tšea ka moka. Le maboong a Morwa-motho xo tlo ba byalo.” (Mateo 24:37-39) Re ka ithuta’ng go seo? Ge e ba motho le ge e le ofe wa rena a dumelela dipelaelo tše di tlwaelegilego—gaešita le mediro e tlwaelegilego ya bophelo—gore di khupetše mediro ya moya yeo Modimo a re kgothaletšago gore re e etiše pele, re swanetše go naganišiša ka mo go tseneletšego ka boemo bja rena.—Ba-Roma 14:17.
12 Le gona, nagana ka mehla ya Lota. Motse wa Sodoma, moo Lota le ba lapa la gagwe ba bego ba dula gona, o be o humile ka dilo tše di bonagalago eupša o gobogile boitshwarong. Jehofa o ile a romela barongwa ba gagwe gore ba fediše motse woo. Barongwa ba ile ba kgothaletša Lota le ba lapa la gagwe gore ba tšhabe Sodoma gomme ba se ke ba lebelela morago. Ka tlhohleletšo ya barongwa, ba ile ba tloga motseng. Lega go le bjalo, go bonagala mosadi wa Lota a ile a tšwela pele a nagana ka legae la gagwe kua Sodoma. Ka go se kwe, o ile a lebelela morago, gomme o ile a lahlegelwa ke bophelo bja gagwe ka baka la se. (Genesi 19:15-26) Ka tsela ya boporofeta, Jesu o lemošitše ka gore: “Xopolang mosadi wa Loto.” Na re dira ka go dumelelana le temošo yeo?—Luka 17:32.
13 Bao ba ilego ba kwa ditemošo tša Modimo ba ile ba phološwa. Seo e bile therešo ka Noage le ba lapa la gagwe le ka Lota le barwedi ba gagwe. (2 Petro 2:9) Ge re dutše re naganišiša ka temošo e hwetšwago mehlaleng ye, re kgothatšwa gape ke molaetša wa phološo wo o lego go yona bakeng sa barati ba se se lokilego. Seo se tlatša dipelo tša rena ka tebelelo e kgonthišeditšwego ya go phethagatšwa ga kholofetšo ya Modimo ya “maxodimo a mafsa le lefase le lefsa, moo xo axilexo tokô.”—2 Petro 3:13.
‘Nako ya Kahlolo e Tlile’!
14, 15. (a) “Nakô” ya kahlolo e akaretša’ng? (b) Go ‘boifa Modimo le go mo reta’ go akaretša’ng?
14 Ge re tšwela pele re phakgame, re ka letela’ng? Puku ya Kutollo e bolela ka megato e tšwelago pele ya go phethagatšwa ga morero wa Modimo. Go phela ka go dumelelana le seo e se bolelago go bohlokwa ge e ba re nyaka go ipontšha re itokišitše. Boporofeta bo hlalosa ka mo go kwagalago ditiragalo tšeo di tlago go direga ka “letšatši la Morêna,” leo le thomilego nakong ya ge Kriste a be a bewa setulong sa bogoši legodimong ka 1914. (Kutollo 1:10) Kutollo e re lemoša ka morongwa yo a neilwego “ebangedi ya neng le neng ya xo tsebišwa.” O goeletša ka lentšu le legolo gore: “Boifang Modimo Le rêtê Yêna, xobane nakô ya kahlolô ya xaxwe e tlile.” (Kutollo 14:6, 7) “Nakô” yeo ya kahlolo ke nako e kopana; e akaretša go bolelwa ga dikahlolo tšeo di lego boporofeteng bjoo le go phethagatšwa ga tšona. Ga bjale re phela nakong yeo.
15 Ga bjale, pele ga ge nako ya kahlolo e fela, re kgothaletšwa gore: “Boifang Modimo Le rêtê Yêna.” Se se akaretša’ng? Go boifa Modimo ka tsela e nepagetšego go swanetše go re dira gore re furalele bobe. (Diema 8:13) Ge e ba re hlompha Modimo, re tla mo theetša ka tlhompho e tseneletšego. Re ka se be bao ba swaregilego kudu moo e lego gore re palelwa ke go bala Lentšu la gagwe e lego Beibele ka mehla. Re ka se tšeele fase keletšo ya gagwe ya gore re be gona dibokeng tša Bokriste. (Ba-Hebere 10:24, 25) Re tla tšeela godimo tokelo ya go tsebatša ditaba tše dibotse tša Mmušo wa Modimo ka Mesia gomme re tla dira bjalo ka mafolofolo. Re tla bota Jehofa ka dinako tšohle le ka dipelo tša rena ka moka. (Psalme 62:8) Ka ge re lemoga gore Jehofa ke Mmuši wa Legohle, re mo hlompha ka go ikokobeletša yena ka go rata e le Mmuši wa maphelo a rena. Na ruri o boifa Modimo le go mo nea letago ka ditsela tše bjalo ka moka?
16. Ke ka baka la’ng re ka bolela gore kahlolo yeo e boletšwego go Kutollo 14:8 malebana le Babele o Mogolo e šetše e phethagaditšwe?
16 Kutollo kgaolo 14 e tšwela pele e hlalosa ditiragalo tše dingwe tšeo di swanetšego go direga ka nako ya kahlolo. Go bolelwa pele ka Babele o Mogolo, e lego mmušo wa lefase wa bodumedi bja maaka, gore: “Xwa latêla Morongwa e mongwê wa bobedi, a re: O wile! O wile! motse o moxolo wa Babele!” (Kutollo 14:8) Ee, Babele o Mogolo e be e šetše e wele go ya ka pono ya Modimo. Ka 1919, bahlanka ba Jehofa bao ba tloditšwego ba ile ba lokollwa bokgobeng bja dithuto le ditiro tša Babele, tšeo di ilego tša laola batho le ditšhaba ka nywaga-kete e mentši. (Kutollo 17:1, 15) Ka baka leo, ba be ba tla ineela tabeng ya go tšwetša pele borapedi bja therešo. Go bolelwa ga ditaba tše dibotse tša Mmušo wa Modimo lefaseng ka bophara go thomile ka nako yeo.—Mateo 24:14, NW.
17. Go khuduga go Babele o Mogolo go akaretša’ng?
17 Kahlolo ya Modimo malebana le Babele o Mogolo ga e felele moo. Kgaufsinyane, go tla tla phedišo ya yona ya mafelelo. (Kutollo 18:21) Ka lebaka le le kwagalago, Beibele e kgothaletša batho kae le kae gore: “Khuduxang! [go Babele o Mogolo] . . . xore Le se tlo xwêrana le dibe tša motse woo.” (Kutollo 18:4, 5) Re khuduga bjang go Babele o Mogolo? Se se akaretša se se fetago go fo ikgaoganya le bodumedi bja maaka. Tutuetšo ya Babele e gona menyanyeng le metlwaeng e mentši e tumilego, boemong bja kgopolo bja lefase bja go tlogelela dilo ditabeng tša dikopano tša botona le botshadi, go kgothaletšeng boithabišo bjo bo akaretšago go dirišana le meoya le tše dingwe tše dintši. Gore re dule re phakgame, go bohlokwa gore ka ditiro tša rena le ka dikganyogo tša dipelo tša rena, re nee bohlatse bja gore ka kgonthe re arogile go Babele o Mogolo ka ditsela ka moka.
18. Ka go dumelelana le seo se hlalositšwego go Kutollo 14:9, 10, ke’ng seo Bakriste bao ba phakgamego ba elago hloko go se phema?
18 Go Kutollo 14:9, 10, go hlaloswa karolo e nngwe ya “nakô ya kahlolô.” Morongwa yo mongwe o re: “Motho e a kaxo lothša Sebata le seswanthšô sa sôna, a dumêla xo swaiwa phatleng ya xaxwe le seatleng sa xaxwe, yêna ó tlo nošwa sebelá sa kxalefô ya Modimo.” Ka baka la’ng? Ka gobane “sebata le seswanthšô sa sôna” ke dika tša bobuši bja batho, bjoo bo sa amogelego bogoši bja Jehofa. Bakriste bao ba phakgamego ba ela hloko gore ba se itumelele go tutuetšwa goba go swaiwa, e ka ba ka mokgwa goba ka tiro, e le bao ba hlankelago bao ba ganago go amogela bogoši bja legohle bja Modimo wa therešo, Jehofa. Bakriste ba a tseba gore Mmušo wa Modimo o šetše o hlomilwe legodimong, gore o tla fediša mebušo ka moka ya batho le gore o tla ema ka mo go sa felego.—Daniele 2:44.
Dula o Gopola Gore Nako e Ile!
19, 20. (a) Ge re dutše re batamela bofelong bja mehla ya bofelo, ke’ng seo re ka kgonthišegago gore Sathane o tla leka go se dira? (b) Re swanetše go ikemišetša go dira’ng?
19 Ge re dutše re batamela bofelong bja mehla ya bofelo, dikgateletšo le diteko di tla fo gakala. Ge feela re phela tshepedišong ye ya kgale gomme re tshwenywa ke go se phethagale ga rena ka noši, re kgongwa ke dilo tše bjalo ka boemo bjo bo fokolago bja maphelo, botšofadi, go lahlegelwa ke baratiwa, go kwešwa bohloko maikwelong, go nyamišwa ke go se kgahlegelwe ga maiteko a rena a go bolela ka Lentšu la Modimo le tše dingwe tše dintši. O se ke wa lebala gore Sathane o tloga a nyaka go ikhola ka dikgateletšo tše re lebeletšanago le tšona bakeng sa go re dira gore re nyeme moko—re kgaotše go bolela ditaba tše dibotse goba re tlogele go phela ka go dumelelana le ditekanyetšo tša Modimo. (Ba-Efeso 6:11-13) Ye ga se nako ya go lebala gore mehla ye re phelago go yona e kgaufsi le go fela!
20 Jesu o be a tseba gore re be re tla ba ka tlase ga kgateletšo e kgolo ya gore re lahlele toulo, ka baka leo, o ile a re eletša ka gore: “Phakxamang, xobane nakô ya xo tla xa Morêna wa lena xa Le e tsebe.” (Mateo 24:42) Ka gona, anke re duleng re phakgame go feta le ge e le neng pele nakong ye re lego go yona. Anke re itšhireletšeng malebana le maano-mabe a Sathane ao a ka dirago gore re fokotše lebelo goba go tlogela. Anke re ikemišetšeng go tsebatša ditaba tše dibotse tša Mmušo wa Modimo ka mafolofolo a magolo kudu le ka boikemišetšo. Ka kgonthe, anke re duleng re gopola gore nako e ile ge re dutše re e-kwa temošo ya Jesu e rego: ‘Dulang le phakgame.’ Ka go dira bjalo, re tla tliša tumišo go Jehofa gomme re tla ba gare ga bao ba tlago go hwetša ditšhegofatšo tša gagwe tša ka mo go sa felego.
O be o tla Araba Bjang?
• Re tseba bjang gore temošo ya Jesu mabapi le go ‘phakgama’ e šoma go Bakriste ba therešo?
• Ke mehlala efe ya temošo ka Beibeleng yeo e ka re thušago gore re ‘dule re phakgame’?
• Nako ya kahlolo ke’ng, gomme re kgothaletšwa go dira’ng pele ga ge e ka fela?
[Dipotšišo tša Thuto]
[Seswantšho go letlakala 23]
Jesu o swantšhitše go tla ga gagwe le go tla ga lehodu
[Seswantšho go letlakala 24]
Go fedišwa ga Babele o Mogolo go kgaufsi
[Diswantšho go letlakala 25]
Anke re ikemišetšeng go dira boboledi ka mafolofolo a magolo kudu le boikemišetšo