Go Kwešiša Dipontšho ke Taba ya Bohlokwa Kudu!

“Mathomong ke be ke nagana gore morwa wa rena Andreas o be a fo ba a opša ke hlogo. Eupša o be a se sa kganyoga dijo e bile a fiša mmele o šoro. Go opša ga gagwe ke hlogo go ile gwa mpefala, gomme ke ile ka thoma go tshwenyega. Ge monna wa-ka a boa gae, re ile ra iša Andreas ngakeng. E ile ya hlahloba ditšhupo gomme ya re re kitimišetše Andreas sepetlele. Bothata e be e le bjo bogolo go feta go opša ke hlogo. Andreas o be a swerwe ke themo (meningitis). O ile a alafša gomme go se go ye kae a fola.”—Gertrud, mma wa kua Jeremane.

PHIHLELO ya Getrud e ka ba e tlwaelegile go batswadi ba bantši. Ba lemoga dipontšho tšeo di bontšhago gore ngwana wa bona a ka ba a babja. Gaešita le ge e se malwetši ka moka ao a bolayago, batswadi ba ka se kgone go hlokomologa ditšhupo tša bolwetši baneng ba bona. Go lemoga dipontšho le go gata mogato o swanetšego go ka dira phapano e kgolo. Ke taba ya bohlokwa kudu.

Se ke sa therešo le ditabeng tšeo e sego tša maphelo. O mongwe wa mehlala e swanetšego ke kotsi ya tsunami yeo e diregilego ka December 2004 mafelong ao a dikologilego Lewatle la India. Mekgatlo ya mmušo yeo e lego mafelong a bjalo ka Australia le Hawaii e ile ya lemoga tšhišinyego e kgolo ya lefase ka leboa la Sumatra gomme ya bona e sa le pele gore go ka direga kotsi ka baka la yona. Lega go le bjalo, go be go se na seo se ka dirwago e le gore batho bao ba lego mafelong ao a lego kotsing ba amogele temošo le ge e le efe goba go arabela go yona. Ka baka leo, batho ba ka godimo ga 220 000 ba ile ba loba maphelo a bona.

Dipontšho tša Bohlokwa Kudu

Ge Jesu Kriste a be a le lefaseng, o ile a ruta batheetši ba gagwe thuto tabeng ya go lemoga dipontšho le go dira dilo ka go dumelelana le tšona. O be a bolela ka selo sa bohlokwa kudu. Beibele e bega gore: “Xwa tla bafarisei le basadutsei ba mo leka; ba mo kxopêla ba re a ba bonthšê mohlôlô o tšwaxo lexodimong. Jesu a fetola a re: Ka mantšibua Le re: Le tlo tsoxa xò sile, xobane le hubetše. E sa le bosasa Le re: Lehono e tlo duma, xobane lexodimo le hubetše, le xôna xo n’e maru.—Lena baikaketši, pônalô ya lexodimo Le tseba xo e hlaoloxanya,  ’me mahlolá a mabaka [“dipontšho tša mehla,” NW] Le re’ng Lè sa a kxône?”—Mateo 16:1-3.

Ge a bolela ka “dipontšho tša mehla,” Jesu o bontšhitše gore batheetši ba gagwe ba ba-Juda ba lekgolong la pele la nywaga ba be ba swanetše go ba ba ile ba lemoga go akgofa ga mehla yeo ba bego ba phela go yona. Tshepedišo ya se-Juda ya dilo e be e le kgaufsi le go hlagelwa ke kotsi yeo e bego e tla ba kgoma ka moka. Matšatšing a sego kae pele ga lehu la gagwe, Jesu o boletše le barutiwa ba gagwe mabapi le pontšho e nngwe—pontšho ya go ba gona ga gagwe. Seo a se boletšego ka nako yeo ke sa bohlokwa kudu go batho ka moka lehono.