Na o ‘Ruetše Modimong’?

GARE ga diswantšho tše dintši tšeo di šišinyago kgopolo tše di neilwego ke Jesu Kriste, go na le se sengwe mabapi le mong wa naga yo a humilego. A leka go kgonthišetša gore bokamoso bja gagwe e ba bjo bo šireletšegilego, mong wa naga o ile a rulaganya go aga dipolokelo tše dikgolo. Lega go le bjalo, seswantšhong sa Jesu monna yo o bitšwa “motho yo a hlokago tlhaologanyo.” (Luka 12:16-21, NW) Diphetolelo tše mmalwa tša Beibele di bile di diriša lentšu “setlaêla.” Ke ka baka la’ng a ahlolwa o šoro gakaakaa?

Go molaleng gore dithulaganyo tša monna yo wa mohumi di be di sa akaretše Modimo; e bile o be a sa nee Modimo theto le ge e le efe bakeng sa tšhemo yeo e tšweletšago. (Mateo 5:45) Go e na le moo, o ile a ikgantšha ka gore: “Môya wa-ka, O na le dilô tše ntši tše di lekanetšexo nywaxa e mentši. Khutša-xê, O jê, O nwê, O iphsinê.” Ee, o be a akanya gore ditšweletšwa tša mošomo wa gagwe di tla mo šireletša bjalo ka “morakô o moxolo.”—Diema 18:11.

Ge a lemoša mabapi le moya o bjalo wa boikgogomošo, moapostola Jakobo o ngwadile gore: “Eriyeng, lena ba Le rexo: Lehono, le xe e le ka moswana, re tlo ya motseng wa bokêtê, ra y’o dula xôna ra fetša ngwaxa, ra šaba ra rua. Le r’yalo Lè sa tsebe tša ka moswana. Le xôna bophelô bya lena ké eng? E fo ba kxodi ye e bônalaxo lebakanyana fêla ya tloxa e široxa.”—Jakobo 4:13, 14.

Mantšu ao a be a rerešitše ka gobane monna wa mohumi seswantšhong sa Jesu o ile a botšwa gore: “O setlaêla! Ka byôna bošexo byó môya wa xaxo o tlo tlošwa xo wene; ’me tšeo O di bolokilexo e tlo ba tša mang?” Bjalo ka kgodi e phatlalalago, monna wa mohumi o be a tla hwa pele a ka bona ditoro tša gagwe di phethagala. Na re lemoga thuto tabeng ye? Jesu o boletše gore: “Ké tšôna tša e a ikxobêlaxo mahumô à sa ruele Modimong.” Na o ‘ruetše Modimong’?