Hlokomela Gore o se be le Boikgodišo
Hlokomela Gore o se be le Boikgodišo
“Modimo ó lwa le baikxodiši.”—JAKOBO 4:6.
1. Nea mohlala wa go ikgantšha ka tsela e swanetšego.
NA GO na le tiragalo yeo e kilego ya dira gore o ikgantšhe? Bontši bja rena re ile ra ikwa ka tsela yeo ye e kgahlišago. Go ikgantšha ga rena ka tekanyo e itšego ga go a fošagala. Ka mohlala, ge banyalani ba Bakriste ba bala pego ya sekolo mabapi le boitshwaro bjo bobotse bja morwedi wa bona le go šoma ga gagwe ka thata, mohlomongwe ba ka ikwa ba kgotsofaditšwe kudu ke seo a se fihleletšego. Moapostola Paulo le badirišani-gotee le yena ba ile ba ikgantšha ka phuthego e mpsha yeo ba thušitšego go e hloma, ka gobane bana babo rena ba moo ba ile ba kgotlelela tlaišo ka potego.—1 Ba-Thesalonika 1:1, 6; 2:19, 20; 2 Ba-Thesalonika 1:1, 4.
2. Ke ka baka la’ng gantši go ikgantšha go sa ratege?
2 Go tšwa mehlaleng yeo e lego ka mo godimo, re ka bona gore go ikgantšha go ka bolela go ikwa o thabišwa ke tiro e itšego goba selo se itšego seo o nago le sona. Lega go le bjalo, gantši boikgantšho bo bonagatša moya wa go itšeela godimo ka tsela e fošagetšego, go ikwa o phagametše ba bangwe ka baka la bokgoni bja gago, ponagalo, mahumo goba maemo. Gantši bo bonagatšwa ka tsela ya makoko goba ya boikgodišo. Boikgantšho bjo bo bjalo ka kgonthe ke selo seo rena Bakriste re swanetšego go hlokomela gore re se be le sona. Ka baka la’ng? Ka gobane re na le tshekamelo ya tlhago ya boithati yeo re e abetšego go rakgolokhukhu wa rena e lego Adama. (Genesi 8:21) Ka baka leo, dipelo tša rena di ka re aroša gabonolo gomme tša dira gore re ikgantšhe ka mabaka a fošagetšego. Ka mohlala, Bakriste ba swanetše go katanela gore ba se ikgantšhe ka morafo, mahumo, thuto, bokgoni bja tlhago goba gore ba se ikgantšhe ka go bapetša mošomo wa bona le wa ba bangwe. Go ikgantšha ka dilo tše bjalo go fošagetše e bile ga go thabiše Jehofa.—Jeremia 9:23; Ditiro 10:34, 35; 1 Ba-Korinthe 4:7; Ba-Galatia 5:26; 6:3, 4.
3. Boikgodišo ke’ng, gomme Jesu o itše’ng mabapi le bjona?
3 Go na le lebaka le lengwe la go lwantšha boikgantšho bjo bo fošagetšego. Ge e ba re dumelela boikgantšho bjo bo bjalo gore bo gole ka dipelong tša rena, bo ka fetoga mohuta wo o nyatšegago kudu wa boikgantšho wo o bitšwago boikgodišo. Boikgodišo ke’ng? Motho yo a ikgodišago o ikwa a phagametše ba bangwe e bile o nyatša bao a ba lebelelago ba le maemong a tlasana. (Luka 18:9; Johane 7:47-49) Jesu o lokeleditše “boikxodišô” gare ga dika tše dingwe tše mpe tšeo di tšwago “pelong” le tšeo di ‘šilafatšago motho.’ (Mareka 7:20-23) Ka gona, Bakriste ba ka bona kamoo go lego bohlokwa ka gona go phema go ba le boikgodišo.
4. Go ela hloko mehlala ya Beibele ya boikgodišo go ka re thuša bjang?
4 O ka thušwa go phema boikgodišo ka go ela hloko dipego tše dingwe tša Beibele tša mabapi le baikgodiši. Ka gona, o tla kgona go lemoga boikgantšho bjo bo fošagetšego bjo o ka bago o e-na le bjona goba bjo o ka bago le bjona ge nako e dutše e e-ya. Se se tla go thuša go lwantšha dikgopolo goba maikwelo ao a ka dirago gore o ikgodiše. Ka baka leo, o ka se be kotsing ge Modimo a dira dilo ka go dumelelana le temošo ya gagwe e rego: “Mo xo wene ke tlo tloša ba ba bexo ba Xo kwêra, ba ikxoxomoša, ’me O ka se hlwê O ikxodiša ka thaba-kxêthwa ya-ka.”—Tsefanya 3:11.
Modimo o Gata Mogato Malebana le Baikgodiši
5, 6. Farao o ile a bontšha bjang boikgodišo, gomme ka mafelelo afe?
5 Le gona, o ka kgona go bona pono ya Jehofa mabapi le boikgodišo tseleng yeo a ilego a gata mogato ka yona malebana le babuši ba matla ba bjalo ka Farao. Ga go pelaelo gore Farao o be a ikgodiša. Ka ge a be a itebelela e le modimo yo a swanetšego go rapelwa, o be a nyatša makgoba a gagwe, e lego ba-Isiraele. Ela hloko tsela yeo a ilego a arabela ka yona ge ba-Isiraele ba be ba kgopela gore a ba dumelele go ya lešokeng gore ba yo direla Jehofa “monyanya.” Karabelo ya Farao ya boikgodišo e be e le e rego: “[Jehofa] ké mang yo nkaxo kwa lentšu la xaxwe, ka lesa Ba-Isiraele ba sepela?”—Ekisodo 5:1, 2.
6 Ka morago ga gore Farao a lebeletšane le dikotlo tše tshela, Jehofa o ile a botša Moše gore a yo kgopela mmuši wa Egipita gore: “O sa fêla O thibêla [“ikgodišetša,” NW] sethšaba sa-ka, Ò sa se lese sa sepela.” (Ekisodo 9:17) Ke moka Moše o ile a tsebatša kotlo ya bošupa—sefako seo se ilego sa senya naga. Gatee-tee ka morago ga kotlo ya lesome ba-Isiraele ba ile ba lokollwa gore ba sepele, eupša Farao o ile a fetoša kgopolo ya gagwe gomme a ba hlomara. Mafelelong, Farao le madira a gagwe ba ile ba kgakgelwa ka Lewatleng le Lehwibidu. Akanya seo ba swanetšego go ba ba ile ba se nagana ge meetse a be a ba khupetša! Mafelelo a boikgodišo bja Farao e bile afe? Madira a gagwe a kaone-kaone a ile a re: “A re thšabeng Ba-Isiraele, ka xobane ba hlabanêlwa ke Morêna; ó lwa le Ba-Egipita.”—Ekisodo 14:25.
7. Babuši ba Babele ba ile ba bontšha bjang boikgodišo?
7 Babuši ba bangwe ba baikgodiši le bona ba ile ba kokobetšwa ke Jehofa. Yo mongwe e be e le Sanheribe, kgoši ya Asiria. (Jesaya 36:1-4, 20; 37:36-38) Mafelelong, Asiria e ile ya fenywa ke ba-Babele, eupša dikgoši tše pedi tša baikgodiši tša Babele le tšona di ile tša kokobetšwa. Gopola monyanya woo Kgoši Belesatsara a bego a o dirile woo go ona yena le baeng ba gagwe ba bego ba e-nwa beine ka dibjana tšeo di tšerwego tempeleng ya Jehofa, gomme ba tumiša medimo ya Babele. Seatla sa motho se ile sa tšwelela gomme sa ngwala molaetša lebotong go sa letelwa. Ge Belesatsara a kgopela gore a hlalosetšwe mabapi le mongwalo wo o sa tlwaelegago, moporofeta Daniele o ile a mo gopotša gore: “Modimo yo xodimo-dimo ó be a neetše tat’axo Nebukadinetsara mmušô, . . . fêla, ya re mola pelo ya xaxwe e ipotile, . . . a tlošwa mo sedulong sa xaxwe sa boxoši, a amoxwa borêna, byale wene Belesatsara morwa wa xaxwe, xa wa ka wa boetša pelo ya xaxo, le xe ditaba tšeo Ò di tsebile tšohle.” (Daniele 5:3, 18, 20, 22) Bošegong bjona bjoo, madira a ba-Meda le ba-Peresia a ile a fenya Babele, gomme Belesatsara o ile a bolawa.—Daniele 5:30, 31.
8. Jehofa o ile a gata mogato bjang malebana le baikgodiši ba fapa-fapanego?
8 Nagana gape ka banna ba bangwe bao ka boikgodišo ba ilego ba nyatša batho ba Jehofa: senatla sa ba-Filisita e lego Goliata, Tona-kgolo ya Peresia e lego Hamane le Kgoši Heroda Agaripa, yo a bego a buša profense ya Judea. Ka baka la boikgodišo bja bona, Modimo o ile a dira gore banna bao ba bararo ba hwe lehu le le nyatšegago. (1 Samuele 17:42-51; Esitere 3:5, 6; 7:10; Ditiro 12:1-3, 21-23) Tsela yeo Jehofa a ilego a gata mogato ka yona malebana le banna bao ba baikgodiši e gatelela therešo ye e rego: “Mafadi a latêlwa ke thôbêxô; xo wa xo etilwe pele ke boipoti.” (Diema 16:18) Ka kgonthe, ga go pelaelo gore “Modimo ó lwa le baikxodiši.”—Jakobo 4:6.
9. Dikgoši tša Tiro di ile tša ipontšha bjang e le baeki?
9 Ka go se swane le babuši ba baikgodiši ba Egipita, Asiria le Babele, kgoši ya Tiro ka nako e nngwe e ile ya thuša batho ba Modimo. Nakong ya ge go buša Kgoši Dafida le Kgoši Salomo, kgoši ya Tiro e ile ya romela banna bao e lego ditsebi tša mediro ya diatla gomme ya romela le ditlabakelo bakeng sa go aga meago ya ka bogošing le bakeng sa go aga tempele ya Modimo. (2 Samuele 5:11; 2 Koronika 2:11-16) Ka manyami, ge nako e dutše e e-ya, dikgoši tša Tiro di ile tša hlanogela batho ba Jehofa. Ke ka baka la’ng di ile tša dira bjalo?—Psalme 83:3-7; Joele 3:4-6; Amosi 1:9, 10.
‘Pelo ya Gago e a Ikgodiša’
10, 11. (a) Ke mang yo a ka bapetšwago le dikgoši tša Tiro? (b) Ke’ng se se fetotšego boemo bja kgopolo bja dikgoši tša Tiro malebana le Isiraele?
10 Jehofa o ile a budulela moporofeta wa gagwe Hesekiele gore a pepentšhe a be a sole dikgoši tša Tiro. Molaetša woo wo o lebišitšwego go “kxoši ya Tiro” o na le dipolelo tšeo di swanelago mmušo wa Tiro le moeki wa mathomo, e lego Sathane, yoo go yena ‘go se nago therešo.’ (Hesekiele 28:12; Johane 8:44) Sathane e kile ya ba sebopiwa sa moya se se botegago ka go se kwanantšhe mokgatlong wa Jehofa wa barwa ba legodimong. Jehofa Modimo o ile a nea temošo ka Hesekiele mabapi le selo sa motheo se se bakilego go hlanoga ga mmušo wa Tiro le go hlanoga ga Sathane ya gore:
11 “O be O dutše Edene thšemong ya Modimo, Ò apere ditalama tša mehuta-huta, . . . O be O le Mokerubi wa xo bewa kxoši, . . . E sa le mola Ò hlôlêxa O be O se molato ditseleng tša xaxo. Byale xôna O bônala Ò na le makxôpô. Pelo ya xaxo e tletše sehloxo ka xo xolêlwa ke papatšô, ’me wa dira dibe. Byale xe O xoboxile, . . . wêna Mokerubi wa monamoledi ke [tlo] Xo tloša . . . Pelo ya xaxo e kxanthša botse [“e ikgodiša ka baka la botse bja gago,” PK], wa senya bohlale bya xaxo Ò nyaka matsaka.” (Hesekiele 28:13-17) Ee, boikgodišo bo ile bja tutueletša dikgoši tša Tiro gore di dire dilo tše šoro go batho ba Jehofa. Ka ge Tiro e be e le motse wa tša kgwebo, e ile ya huma ka go fetišiša gomme ya tuma ka ditšweletšwa tša yona tše dibotse. (Jesaya 23:8, 9) Dikgoši tša Tiro di ile tša thoma go ikgodiša kudu, gomme tša thoma go gatelela batho ba Modimo.
12. Ke’ng seo se ilego sa dira gore Sathane e be moradia, gomme o tšwela pele a dira’ng?
12 Ka mo go swanago, sebopiwa sa moya seo se ilego sa fetoga Sathane se kile sa ba bohlale ka mo go lekanego e le gore se phethe kabelo le ge e le efe yeo Modimo a bego a se abela yona. Go e na le go leboga, se ile sa “ikxoxomoša” gomme sa thoma go nyatša tsela ya Modimo ya go buša. (1 Timotheo 3:6) Se be se ikgodiša kudu moo se ilego sa thoma go kganyoga gore se rapelwe ke Adama le Efa. Kganyogo ye e kgopo e ile ya gola gomme ya feleletša ka sebe. (Jakobo 1:14, 15) Sathane o ile a goketša Efa gore a je seenywa sa sehlare se nnoši seo Modimo a bego a se ileditše. Ke moka, Sathane o ile a mo diriša gore a nee Adama seenywa se se ileditšwego gore a je. (Genesi 3:1-6) Ge e le gabotse batho ba babedi ba pele ba ile ba gana tshwanelo ya Modimo ya go ba buša gomme ba fetoga barapedi ba Sathane. Boikgodišo bja gagwe bo be bo se na mellwane. O ile a leka go goketša dibopiwa ka moka tše bohlale tša legodimong le tša lefaseng, go akaretša le Jesu Kriste, gore di mo rapele gomme di gane go bušwa ke Jehofa.—Mateo 4:8-10; Kutollo 12:3, 4, 9.
13. Ke ditla-morago dife tšeo di bakwago ke boikgodišo?
13 Ka gona, o ka bona gore boikgodišo bo thomilwe ke Sathane; ke selo sa motheo seo se bakago sebe, tlaišego le kgobogo lefaseng lehono. Ka ge e le “modimo wa lefase lé,” Sathane o tšwela pele a kgothaletša batho gore ba be le maikwelo a fošagetšego a boikgantšho le a boikgodišo. (2 Ba-Korinthe 4:4) O a tseba gore nako ya gagwe ke e kopana, ka gona o tsoša ntwa malebana le Bakriste ba therešo. Pakane ya gagwe ke go ba dira gore ba furalele Modimo, gomme e be baithati, baikgantšhi le baikgodiši. Beibele e boletše e sa le pele mabapi le dika tše bjalo tša boithati gore e be e tla ba tše di tlwaelegilego ‘mehleng ye ya bofelo.’—2 Timotheo 3:1, 2; Kutollo 12:12, 17.
14. Jehofa o dirišana le dibopiwa tša gagwe tše bohlale ka go dumelelana le molao ofe?
14 Jesu Kriste o ile a pepentšha ka sebete ditla-morago tšeo di bakwago ke boikgodišo bja Sathane. Bonyenyane mabakeng a ka bago a mararo ge a be a e-na le manaba ao a itirago baloki, Jesu o ile a hloma molao woo Jehofa a dirišanago le batho ka wona ge a be a re: “Bohle ba ba ikxodišaxo ba tlo kokobetšwa; e a ikokobetšaxo ó tlo xodišwa.”—Luka 14:11; 18:14; Mateo 23:12.
Hlokomela Gore o se be le Boikgodišo
15, 16. Ke’ng seo se ilego sa dira gore Hagara a ikgodiše?
15 O ka ba o lemogile gore mehlala ya boikgodišo yeo go boletšwego ka yona ka mo godimo e akaretša batho ba tumilego. Na seo se bolela gore bao e lego batho feela ga ba na tshekamelo ya go ikgodiša? Ruri ba na le yona. Ela hloko tiragalo yeo e diregilego lapeng la Aborahama. Mopatriareka o be a se na morwa yo e bego e tla ba mojabohwa wa gagwe, gomme mosadi wa gagwe e lego Sara, o be a šetše a fetile nywaga ya go belega. E be e le mo go tlwaelegilego gore monna yo a lego boemong bja Aborahama a nyale mosadi wa bobedi gore a be le bana. Modimo o be a dumelela manyalo a bjalo ka gobane e be e se ya tšwa e e-ba nako ya go tsošološa molao wa gagwe wa motheo wa mathomong wa lenyalo barapeding ba gagwe ba therešo.—Mateo 19:3-9.
16 A tutuetšwa ke mosadi wa gagwe, Aborahama o ile a dumela go tšweletša yo e bego e tla ba mojabohwa ka molata wa Sara wa mo-Egipita, e lego Hagara. E le mosadi wa bobedi wa Aborahama, Hagara o ile a ima. O be a swanetše go tšeela godimo kudu boemo bja gagwe bjo bo hlomphegago. Go e na le moo, o ile a dumelela pelo ya gagwe gore e ikgodiše. Beibele e anega ka gore: “Xe a bôna à imile, a lebêlêla mong wa xaxwe ka xo mo nyatša.” Boemo bjoo bja kgopolo bo ile bja baka ntwa e kgolo ka lapeng la Aborahama moo Sara a ilego a raka Hagara. Eupša bothata bjo bo be bo ka rarollwa. Morongwa wa Modimo o ile a eletša Hagara ka gore: “Boêla xó mong wa xaxo, O ikokobetšê ka tlase xa diatla tša xaxwe.” (Genesi 16:4, 9) Go molaleng gore Hagara o ile a latela keletšo ye, a fetola tsela yeo a bego a lebelela Sara ka yona, gomme a ba makgolokhukhu wa mašaba a batho.
17, 18. Ke ka baka la’ng ka moka ga rena re swanetše go hlokomela gore re se be le boikgodišo?
17 Taba ya Hagara e bontšha gore ge boemo bja motho bo kaonefala, a ka ikgodiša. Seo re ithutago sona ke gore gaešita le Mokriste yo a ipontšhitšego a hlankela Modimo ka pelo e botse, a ka ba le boikgodišo ge a hwetša mahumo goba matla a taolo. Boemo bjoo bja kgopolo bo ka ba gona ge e ba ba bangwe ba mo reta ka baka la katlego ya gagwe, bohlale goba bokgoni. Ee, Mokriste o swanetše go hlokomela gore a se be le boikgodišo. Seo ke sa therešo kudu ge e ba a atlega goba a newa boikarabelo bjo bo oketšegilego.
18 Lebaka le legolo kudu la go phema boikgodišo ke pono ya Modimo malebana le seka se. Lentšu la gagwe le re: “Mahlô a xo ikxodiša le pelo ya boipoti ké ’bônê la babe, ké sebe.” (Diema 21:4) Ke mo go kgahlišago gore Beibele ka mo go kgethegilego e lemoša Bakriste ba “bahumi ba mehleng ya byale” gore “ba se ikxodišê.” (1 Timotheo 6:17; Doiteronomio 8:11-17) Bakriste bao e sego bahumi ba swanetše go phema go ‘ba le mona,’ ba swanetše go gopola gore boikgodišo bo ka ba gona go mang le mang—mohumi goba modiidi.—Mareka 7:21-23; Jakobo 4:5.
19. Ke ka tsela efe Usia a ilego a senya botumo bja gagwe bjo bobotse?
19 Boikgodišo gotee le dika tše dingwe tše mpe bo ka senya tswalano e botse yeo re nago le yona le Jehofa. Ka mohlala, ela hloko karolo ya mathomo ya pušo ya Kgoši Usia: “Ó dirile tše di bexo di kxahla Morêna, . . . E be e le motho e a nyakaxo Morêna . . . Xomme mehleng yeo xe a sa nyaka Morêna, Modimo ó be a mo atla.” (2 Koronika 26:4, 5) Lega go le bjalo, ka manyami Kgoši Usia o ile a senya botumo bja gagwe bjo bobotse, ka gobane “pelo ya xaxwe [e ile] ya ikxoxomoša ya mo iša thsenyexong.” O ile a thoma go ikgogomoša goba go ikgodiša kudu moo a ilego a tsena ka tempeleng gore a thuntšhe diorelo. Ge baperisita ba be ba mo lemoša gore a se ke a dira tiro e bjalo ya boikgodišo, ‘Usia o ile a befelwa.’ Ka baka leo, Jehofa o ile a mo otla ka lephera, gomme a hwa a sa ratwe ke Modimo.—2 Koronika 26:16-21.
20. (a) Botumo bjo bobotse bja Kgoši Hiskia bo ile bja ba kotsing ka tsela efe? (b) Re tla ahla-ahla’ng sehlogong se se latelago?
20 O ka bapetša mohlala woo le wa Kgoši Hiskia. Tiragalong e nngwe, botumo bjo bobotse bja kgoši yeo bo ile bja ba kotsing ya go senyega ka gobane “pelo ya xaxwe e ikxoxomošitše.” Se se thabišago ke gore “Hiskia [o ile] a ikokobetša, a lahla boikxoxomošô bya pelo ya xaxwe,” gomme a amogelwa ke Modimo gape. (2 Koronika 32:25, 26) Ela hloko gore seo se thušitšego Hiskia gore a lahle boikgogomošo goba boikgodišo e be e le boikokobetšo. Ee, boikokobetšo ke lelatodi la boikgodišo. Ka gona, sehlogong se se latelago, re tla ahla-ahla kamoo re ka hlagolelago boikokobetšo bja Bokriste le go bo kgomarela.
21. Ke’ng seo Bakriste ba ikokobeditšego ba ka se fagahlelago?
21 Lega go le bjalo, anke re se ke ra lebala ditla-morago ka moka tšeo di bakilwego ke boikgodišo. Ka ge ‘Modimo a e-lwa le baikgodiši,’ anke re ikemišetšeng ka go tia go lwantšha maikwelo a sa swanelago a boikgantšho. Ge re dutše re katanela go ba Bakriste ba ikokobeditšego, re ka fagahlela go phologa letšatši le legolo la Modimo, ge baikgodiši le ditla-morago tša ditiro tša bona di tla ba di fedišitšwe lefaseng. Ke moka “xwa tlo kokobetšwa boipoti bya batho, xwa tlo nyatšêxa boxolo bya banna; xomme e Moxolo mohla woo e tlo ba yêna Morêna à nnoši.”—Jesaya 2:17.
Dintlha tše di ka Naganišišwago
• O ka hlalosa bjang motho yo a ikgodišago?
• Boikgodišo bo thomile kae?
• Ke’ng se se ka dirago gore motho a ikgodiše?
• Ke ka baka la’ng re swanetše go hlokomela gore re se be le boikgodišo?
[Dipotšišo tša Thuto]
[Seswantšho go letlakala 23]
Boikgodišo bja Farao bo ile bja dira gore a kokobetšwe
[Seswantšho go letlakala 24]
Go kaonefala ga boemo bja Hagara go ile gwa dira gore a ikgodiše
[Seswantšho go letlakala 25]
Hiskia o ile a ikokobetša gomme a amogelwa ke Modimo