Holwa ke Thuto e Kaone-kaone Yeo e Hwetšagalago!

BEIBELE e šupa Jehofa Modimo e le Mmopi wa dilo ka moka, go akaretša le batho. (Genesi 1:27; Kutollo 4:11) Bjalo ka Mohlahli yo Mogolo, o ile a ruta batho ba babedi ba pele, Adama le Efa, gomme a ba hlamela gore ba kgone go phela tšhemong e botse ya Edene. E be e le morero wa gagwe go tšwela pele a ba ruta gotee le go ba hlokomela ka mo go sa felego. (Genesi 1:28, 29; 2:15-17; Jesaya 30:20, 21) E fo nagana ka tebelelo yeo!

Lega go le bjalo, ka manyami batho ba pele ba babedi ba lahlile tšohle. Go se kwe ga bona go ile gwa baka go phuhlama ga boitshwaro gotee le go fokola mmeleng ga batho. (Genesi 3:17-19; Ba-Roma 5:12) Ge e bolela ka bao ba phetšego melokong e sego kae ka morago ga ge batho ba bopilwe, Beibele e re: “Morêna a bôna bokxôpô bya batho bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla.”—Genesi 6:5.

Go šetše go fetile nywaga e nyakilego go ba 4 500 go tloga mola Jehofa a phethago gore batho ba dula ba sekametše bobeng, gomme boemo bja batho ga bjale bo mpefetše go feta le ge e le neng pele. Ba bantši ga ba na dihlong tša go bolela maaka, go utswa goba go hlasela ba bangwe. Mathata a oketšega letšatši le lengwe le le lengwe, mola go tshwenyega ka ba bangwe go fokotšega. Na ditswalano tša batho, go akaretša le tša ka malapeng, ga di bothateng bjo bogolo? Lega go le bjalo, Modimo ga a na molato maemong a gona bjale, e bile ga a kgaotša go tshwenyega ka mathata a lehono. Jehofa ka mehla o be a dutše a kgahlegela katlego ya batho gomme o ikemišeditše go ruta bao ba lebelelago go yena bakeng sa tlhahlo gore ba hwetše bophelo bja lethabo. Nywageng e ka bago e 2 000 e fetilego o ile a romela Morwa wa gagwe, Jesu Kriste, lefaseng gomme a bontšha go kgahlegela ga Gagwe go ruta batho bao ba nyakago go atlegiša bophelo bja bona. Jesu o šiile mohlala wa thuto yeo e phethagetšego ka gobane o be a rutilwe ke Mohlahli yo Mogolo ka nywaga e dimilione tše sa balegego.

Bokriste bja Therešo—Thuto

Jesu Kriste o hlomile Bokriste bja therešo, e lego tsela ya bophelo yeo e theilwego leratong. Go bjona, dikgopolo ka moka le ditiro di swanetše go dumelelana le thato ya Modimo, morero e le go godiša le go tagafatša leina la gagwe. (Mateo 22:37-39; Ba-Hebere 10:7) Mothekgi wa dithuto tša Jesu tša mabapi le tsela ye ya bophelo e be e le Tatagwe, Jehofa. Re bala go Johane 8:29, (PK) mabapi le thekgo yeo Jesu a e amogetšego go Modimo gore: “Yo a nthomilego o na le nna; Tate ga a ešo a ntlogela ke nnoši, gobane ke dira ka mehla tše di mo kgahlago.” Ee, Jesu o thekgilwe le go hlahlwa ke Tatagwe bodireding bja gagwe ka moka. Balatedi ba Jesu ba pele ga ba ka ba swanelwa ke go lebeletšana le ditlhohlo tša bophelo ntle le tlhahlo. Jehofa o ile a ba ruta a diriša Morwa wa gagwe. Go latela ga bona dithuto tša Jesu gotee le mohlala wa gagwe go ba dirile batho ba kaone. Se ke sa therešo ka barutiwa ba gagwe lehono.—Bona lepokisi le le rego, “Tutuetšo ya Jesu le Dithuto tša Gagwe,” go letlakala 6.

Sebopego seo se hlaolago Bokriste bja therešo ke gore bo akaretša thuto yeo e kgomago monagano gotee le pelo e le gore motho a fetoše semelo sa gagwe. (Ba-Efeso 4:23, 24) Go tsopola mohlala o tee feela, ela hloko seo Jesu a se rutilego mabapi le go botegela ga motho molekane wa gagwe: “Le kwele ba boxolo-xolo bà boditšwe  xwa thwe: O se kê wa otswa! Xe e le nna ke Le botša ke re: Mang le mang e a lebêlêlaxo mosadi à mo kxanyoxa, ó šetše a otswitše pelong ya xaxwe.” (Mateo 5:27, 28) Ka mantšu a, Jesu o be a ruta barutiwa ba gagwe gore pelo e swanetše go bolokwa e hlwekile le gore dikgopolo le dikganyogo tše di fošagetšego, gaešita le ge di se tša hlwa di phethagatšwa, di ka ba le ditla-morago tše šoro. Na ga se therešo gore dikgopolo tše sa lokago di ka lebiša ditirong tše kgopišago Modimo le tše kwešago ba bangwe bohloko?

Ka gona, Beibele e nea keletšo ye: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.” (Ba-Roma 12:2) O ka botšiša gore, ‘Na ruri go a kgonega gore thuto e mpshafatše kgopolo ya motho?’ Go mpshafatša kgopolo go akaretša go e tutueletša lehlakoreng le le fapanego ka go e tlatša ka melao ya motheo gotee le thuto yeo e newago ka Lentšung la Modimo. Se se ka fihlelelwa ka go amogela thuto yeo Modimo a e neago ka Lentšu la gagwe.

Ba Tutueleditšwe go Fetoga

“Lentšu la Modimo ké le le phelaxo, ké le matla.” (Ba-Hebere 4:12) Le sa dutše le e-na le tutuetšo e matla bathong, ka go rialo le hlatsela gore ga se leo le fetwago ke nako. Le ka tutueletša motho go fetoša tsela ya gagwe, a amogela Bokriste bja therešo, gomme a ba motho yo mokaone. Mehlala e latelago e bontšha mohola wa thuto ya Beibele.

Emilia, yo go boletšwego ka yena sehlogong se se fetilego, o bolela gore: “Go fo dira boiteko ka bo-nna e be e se mo go lekanego go ka kaonefatša boemo ka lapeng la-ka. Ge ke thoma go ithuta Beibele le Dihlatse tša Jehofa, ke ile ka lemoga gore go be go na le kholofelo gomme ka thoma go fetoša boemo bja-ka bja kgopolo. Ke ithutile go ba yo a sa felego pelo ka mo go oketšegilego le go se laolwe ke bogale. Ge nako e dutše e e-ya, monna wa-ka o ile a kopanela le nna thutong. Go be go se bonolo go yena go tlogela go nwa bjala, eupša o ile a kgona go bo tlogela. Se se ile sa tsošološa lenyalo la rena. Gona bjale re Bakriste bao ba thabilego e bile re tiišetša melao ya motheo e mebotse ya Beibele baneng ba rena.”—Doiteronomio 6:7.

Thuto yeo Bokriste bja therešo bo e neago e ka lokolla motho mekgweng e mebe gotee le tseleng ya go phela ya boitshwaro bjo bo gobogilego. Manuel * o bone therešo ya se. O ile a tšhaba gae a e-na le nywaga e 13 gomme a thoma go kgoga patše. Ge nako e dutše e e-ya, o ile a thoma go diriša sehlare-tagi sa heroin. O ile a ba le dikopano tša botona le botshadi le banna gotee le basadi bakeng sa go hwetša madulo le tšhelete. Ka dinako tše dingwe, Manuel o ile a ba mohlakodi e le gore a kgone go iphediša. O be a phela a tagilwe ke dihlare-tagi mo e nyakilego go ba ka mehla. Boitshwaro bja gagwe bjo bošoro bo ile bja mo dira gore a ye kgolegong gantši. O kile a  fetša nywaga e mene a le kgolegong, gomme a gweba ka dibetša gona moo. Ka morago ga ge a nyetše, tsela ya Manuel ya bophelo e ile ya tšwela pele e mo lobiša kudu. O re: “Re ile ra feleletša re dula ka ntlwaneng yeo e kilego ya ba ya dikgogo. Ke sa gopola mosadi wa-ka a apeela godimo ga ditena. Maemo a rena a be a befile mo e lego gore ba leloko la gešo ba ile ba kgothaletša mosadi wa-ka gore a ntlogele.”

Ke eng seo se fetošitšego bophelo bja gagwe? Manuel o araba ka gore: “Motho yo re mo tlwaetšego o ile a tla legaeng la rena a bolela ka Beibele. Ke ile ka amogela diketelo tša gagwe feela bakeng sa go mmontšha gore Modimo yo a bego a kgahlegela batho o be a se gona. Ke be ke bona bophelo bja-ka bo hlatsela seo. Ke ile ka makatšwa ke gore Hlatse e be e sa fele pelo e bile e le botho, ka gona ke ile ka dumela go ya dibokeng Holong ya Mmušo. Gaešita le ge ba bangwe moo ba be ba tseba mekgwa ya-ka, ba ile ba ntumediša ka tsela ya go bontšha bogwera. Ba ile ba ntira gore ke ikwe bjalo ka yo mongwe wa bona. Se e be e le khomotšo e kgolo kudu. Ke ile ka tutueletšega go fihla bokgoleng bja gore ke tlogele go diriša dihlare-tagi gore ke hwetše mošomo o hlomphegago. Dikgweding tše nne ka morago ga go thoma thuto ya-ka ya Beibele, ke ile ka swanelegela go kopanela modirong wa boboledi gomme lebaka la dikgwedi tše nne ka morago ga moo ka kolobetšwa ka ba yo mongwe wa Dihlatse tša Jehofa.”

Ke eng seo Bokriste bja therešo bo se diretšego Manuel le lapa la gagwe? “Ntle le thuto ya Beibele ruri nkabe ke hwile kgale. Tsela ya bophelo yeo Jesu a e rutilego e mpušeditše lapa la-ka. Bana ba-ka ba babedi ga ba swanelwe ke go phela bophelo bjoo ke ilego ka bo phela bjalo ka mofsa. Ke kwa ke ikgantšha gotee le go leboga Jehofa kudu bakeng sa tswalano e botse yeo ke nago le yona gona bjale le mosadi wa-ka. Ba bangwe ba bao ke bego ke tlwaelane le bona nakong e fetilego ba ile ba ntebogiša gomme ba mpotša gore ba nagana gore tsela yeo ke phelago ka yona gona bjale ke e kaone-kaone.”

Tseleng ya bophelo bja Bokriste, boitshwaro bjo bo hlwekilego bo sepedišana le bohlweki  bja mmele. John yo a dulago nageng yeo e hlasetšwego ke bodiidi ya Afrika Borwa o ile a fihlelela kwešišo ya seo. O hlalosa gore: “Morwedi wa rena ka dinako tše dingwe o be a fetša beke a sa hlape gomme ga go le o tee wa rena yo a bego a bonala a tshwenyega.” Mosadi wa gagwe o dumela gore legae la bona le be le sa lebelelege. Eupša ka baka la thuto ya Bokriste, maemo a ile a fetoga. John o ile a kgaotša go gwerana le sehlopha sa mahodu a dikoloi gomme a thoma go lebiša tlhokomelo e oketšegilego lapeng la gagwe. “Re ithutile gore bjalo ka Bakriste, re swanetše go boloka mebele gotee le diaparo tša rena di hlwekile. Ke rata mantšu a lego go 1 Petro 1:16, ao a re kgothaletšago go ba ba bakgethwa ka gobane Jehofa Modimo ke yo mokgethwa. Gona bjale re leka go dira gore legae la rena le lenyenyane le lebelelege.

O ka Hwetša Thuto e Kaone-kaone

Diphihlelo tše go boletšwego ka tšona ka mo godimo ga se ditiragalo tšeo di sa tlwaelegago. Ka baka la thuto yeo e theilwego Beibeleng, batho ba dikete ba ithutile go phela maphelo a kaone. Ka go ba bao ba botegago gotee le go šoma ka thata, bathwadi ba bona ba ba tšeela godimo. Ba fetogile baagišani gotee le bagwera ba kaone, bao ba kgahlegelago katlego ya magagabo bona. Ba ikemišeditše go phema mekgwa e mebe le ditshekamelo tša nama, ka gona ba hlokomela gakaone boemo bja bona bja tša maphelo bja mmele, bja monagano gotee le bja maikwelo. Go e na le go senya matlotlo a bona mekgweng e mebe, ba a dirišetša go hola bona ka noši gotee le go hola malapa a bona. (1 Ba-Korinthe 6:9-11; Ba-Kolose 3:18-23) Ka ntle le pelaelo, mafelelo a go diriša seo Jehofa a se bolokilego ka Beibeleng a bontšha gore go phela ka Bokriste bja therešo ke tsela e kaone-kaone bophelong, yeo e neago thuto e kaone-kaone yeo e hwetšagalago. Beibele e bega mabapi le motho yo a phelago ka go dumelelana le melao ya Modimo gore: “Tšohle tše a di diraxo di a lêtlêxa.”—Psalme 1:3.

Ke mo go kgothatšago go tseba gore Modimo yo Matla-ohle, Jehofa, o ikemišeditše go re ruta. O ipolela ka gore: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” (Jesaya 48:17) Ee, Jehofa o bontšhitše tsela a diriša mohlala gotee le dithuto tša Morwa wa gagwe, Jesu Kriste. Dithuto tša gagwe di ile tša dira diphetogo maphelong a ba bantši bao ba bego ba mo tseba ge a be a sa le mo lefaseng, gomme go direga se se swanago ka ba bantši bao ba phelago ka dithuto tša gagwe lehono. Ke ka baka la’ng o sa iphe nako ya go ithuta mo go oketšegilego ka dithuto tše? Dihlatse tša Jehofa tša lefelong la geno di tla thabela go go thuša go amogela thuto e bjalo ya bohlokwa kudu.

[Mongwalo wa ka tlase]

[Lepokisi/Seswantšho go letlakala 6]

Tutuetšo ya Jesu le Dithuto tša Gagwe

A diriša boemo bja gagwe bja go ba molekgetho yo mogolo, Sakeo o ile a huma ka go amoga batho tšhelete ka kgapeletšo le go ba utswetša. Eupša o ile a fetoša tsela ya gagwe ya bophelo ka go diriša dithuto tša Jesu.—Luka 19:1-10.

Saulo wa Tareso o ile a kgaotša go tlaiša Bakriste, a sokologela Bokristeng gomme a ba moapostola Paulo.—Ditiro 22:6-21; Ba-Filipi 3:4-9.

Ba bangwe ba Bakriste ba Korinthe ba be ba kile ba ba ‘diotswa, ba medimo e šele, dihlotlolo, ba go dira ditšhila le banna ka bona, mahodu, ba megabaru, matagwa, ba maroga le bahlakodi.’ Lega go le bjalo, ka go ithuta Bokriste bja therešo, ba ile ‘ba hlatswiwa, ba kgethagatšwa gomme ba lokafatšwa ka leina la Morena Jesu Kriste.’—1 Ba-Korinthe 6:9-11.

[Seswantšho go letlakala 7]

Beibele e ka go bontšha kamoo o ka atlegago ka gona