Ke Thuto ya Mohuta Mang Yeo e ka Atlegišago Bophelo bja Gago?

NA O kile wa imelwa ke mathata moo o ilego wa ikwa eka o kgangwa ke meetse ao a bilogago? E fo akanya ka tlaišego yeo e ka bakwago ke go dira phošo ge o leka go rarolla bjo tee goba a mangwe a mathata ao! Ga go na yo a belegwego a e-na le bokgoni bja go rarolla mathata ka moka ka katlego gomme a dira diphetho tše dibotse ka mehla. Mo ke moo thuto e nyakegago. Ke kae moo o ka hwetšago thuto bakeng sa go itokišeletša go lebeletšana le mathata a bophelo?

Batho ba bantši, ba banyenyane le ba bagolo, ba lebelela thuto ya sekolo e le bohlokwa. Ditsebi tše dingwe di bile di bolela gore di “tloga di dumela gore le ka mohla o ka se kgone go hwetša mošomo [o mobotse] ge o se na degree ya kholetšheng.” Lega go le bjalo, go na le dinyakwa tše dintši tša batho tšeo di fetago kgole dilo tše di bonagalago tšeo ba nago natšo. Ka mohlala, na thuto yeo e phagamego e go thuša go ba motswadi, molekane goba mogwera yo botse? Ka kgonthe, batho bao ba hlompšhago ka baka la dithuto tšeo ba di fihleletšego ba ka thoma go ba le mekgwa yeo e sa kgahlišego, ba palelwa bophelong bja lapa goba gaešita le go feleletša ba ipolaile.

Ba bangwe ba lebelela bodumedi e le mothopo wa thuto yeo e tlago go ba hlahla, eupša ba nyamišwa ke go se hwetše thušo yeo e šomago e le gore ba lebeletšane le mathata a bophelo. Ka mohlala, Emilia * wa Mexico o re: “Nywageng e 15 e fetilego, ke ile ka ikwa eka nna le monna wa-ka re ka se sa dula gotee. Re be re ngangišana ka mehla. Ke be ke sa kgone go mo tlogediša go nwa bjala. Gantši ke be ke tlogela bana ba rena ba banyenyane ba nnoši e le ge ke yo tsoma monna wa-ka. Ke be ke šetše ke tennwe. Ke ile kerekeng ka makga a mmalwa ke yo tsoma seo se ka nthušago go hwetša tharollo. Gaešita le ge Beibele e be e fela e dirišwa, le ka mohla ga se ka ka ka kwa keletšo le ge e le efe yeo e šomago ka go lebanya mathateng a-ka; e bile ga go yo a ilego a mpatamela go mpotša seo nka se dirago. Go dula ka kerekeng lebakanyana le go boeletša tše dingwe tša dithapelo ga gwa ka gwa nkgotsofatša.” Ba bangwe ba ka nolega moko ge ba lemoga gore baetapele ba bona ba moya ba tloga ba sa phele bophelo bjo bo beago mohlala. Ka baka leo, ba bantši ba lahlegelwa ke kgodišego ya gore bodumedi ke mothopo wa tlhahlo goba thuto bakeng sa bophelo bjo bo atlegago.

Ka gona o ka ipotšiša gore, ‘Ke thuto ya mohuta mang yeo ke swanetšego go e hwetša gore ke atlegiše bophelo bja-ka?’ Na Bokriste bja therešo bo na le karabo ya potšišo ye e bohlokwa? Se se tla ahla-ahlwa sehlogong se se latelago.

[Mongwalo wa ka tlase]