Boitshwaro bjo Bobotse bo Enywa Dienywa

SEHLAKAHLAKENG se senyenyane seo se lego kgaufsi le lebopo la ka borwa bja Japane, mma gotee le bana ba gagwe ba bararo ba banyenyane ba ile ba thoma go ithuta Beibele le Dihlatse tša Jehofa. Ka go lemoga se, baagišani ba bona ba lefelong leo le lego lekatana le leo le nweletšego setšong ba ile ba thoma go hlokomologa mma yo ka mehla ge ba mmona. O anega gore: “Se bohloko go feta go ntlhokomologa e be e le gore ba be ba sa bontšhe bogwera go monna wa-ka gotee le bana ba-ka.” Lega go le bjalo, o ile a botša bana ba gagwe gore: “Re swanetše go tšwela pele re dumediša baagišani ba rena ka baka la Jehofa.”—Matthew 5:47, 48.

Ge ba le ka gae, o be a ruta bana ba gagwe go ba ba botho go sa šetšwe go hlokomologwa. Bana ba be ba itlwaetša ditumedišo tša bona ka koloing ge ba be ba le tseleng ba dira maeto a bona a ka mehla a go ya matangwaneng a meetse a go fiša a lefelong leo. Ge ba tsena ka moagong, ka mehla bana ba be ba goeletša ka lethabo ba re: “Konnichiwa!”—“Thobela!” Lapa le ile la tšwela pele le dumediša bohle bao le kopanago le bona ka go se fele pelo gaešita le ge karabelo ya baagišani e be e sa bontšhe bogwera. Lega go le bjalo, batho ba ile ba kgona go lemoga mekgwa e mebotse ya bana bao.

Mafelelong, baagišani ba sa swanego ba ile ba araba ka gore “Konnichiwa.” Ka morago ga nywaga e mebedi, moo e nyakilego go ba batho ka moka ba lefelong leo ba be ba arabela ditumedišong tša lapa leo. Gape ba be ba thomile go dumedišana seng sa bona gotee le go ba bao ba nago le bogwera kutšwanyana. Motlatša-ramotse o be a tsoma go reta bana bakeng sa tema yeo ba e kgathilego phetogong ye. Eupša mmago bona o ile a mo kgonthišetša gore ba be ba fo ba ba dira seo Bakriste ba swanetšego go se dira. Ka morago phadišanong ya go nea dipolelo ya sehlakahlaka ka moka, morwa yo mongwe o ile a anega kamoo mmagwe a tlwaeditšwego lapa go dumediša batho ba bangwe ka botho go sa šetšwe gore ba arabela bjang. Polelo ya gagwe e ile ya thopa sefoka gomme ya ngwalwa kuranteng ya lefelong leo. Lehono, lapa le thabetše kudu gore go latela melao ya motheo ya Bokriste go bile le mafelelo ao a mabotse. Go abelana ditaba tše dibotse le ba bangwe go bonolo kudu ge e ba batho ba e-na le bogwera.