Dihlatse di Boledišana le Difoa ka Ditaba tše Dibotse

“DIHLATSE di go tlišetša ditaba tša bodumedi!” Ke ka fao molaodi wa legae la batšofadi la Navalcarnero, Madrid kua Sepania, a ilego a hlalosa morago-rago bjale ka diketelo tša Dihlatse tša Jehofa legaeng leo la gagwe. Ke’ng seo se mo hlohleleditšego go bolela bjalo?

Badudi ba mmalwa ba legae leo le bitšwago Rosas del Camino ke difoa. Lega go le bjalo, go tloga mola Dihlatse di dirago boiteko bja go ithuta Polelo ya Diatla ya Sepania di kgona go boledišana le badudi bao. Molaodi o ile a reta Dihlatse ka go diriša nako ya tšona ka ntle le tefo bakeng sa go ruta ditekanyetšo tša Beibele go batho bao ba tlogago ba di nyaka. O ile a lemoga mafelelo a kgahlišago ao go rutwa ga ditaba tše dibotse tša Mmušo go bilego le wona go badudi bao. Le gona badudi bao—kudu-kudu bao ba sa bonego gabotse goba bao ba sa kwego gabotse—le bona ba tšeela godimo diketelo tša Dihlatse.

Eulogio, e lego yo mongwe wa badudi ba fao yoo e lego sefoa, ga bjale o ithuta Beibele le Dihlatse tša Jehofa. Ka letšatši le lengwe ge thuto e be e tšwela pele, mokgalabje yo mongwe o ile a ba batamela gomme a nea Hlatse sereto seo se ngwadilwego ke badudi bakeng sa go bontšha tebogo. Sereto se be se e-na le sehlogo seo se rego “Go ba Hlatse.” Ka boripana se be se re: “Dihlatse di phela bophelo bjo bobotse, bja boitayo, gomme Jehofa o di nea bohlale bjo bo di thabišago. Di boa-boa metseng ka gobane di botile Jehofa.”

Go bota Jehofa ka tsela ye ke gona go thušitšego e le ka kgonthe Dihlatse tše dintši lefaseng ka bophara go ithuta polelo ya diatla ya dinageng tša gabo tšona. Ka tsela ye di boledišana le batho ba bjalo ka molaetša o kgothatšago wa kholofelo woo o hwetšwago ka Beibeleng.