Jehofa ke Modiši wa Rena

“Morêna ké modiši wa-ka; nka se hlôke selô.”—PSALME 23:1.

1-3. Ke ka baka la’ng go sa makatše gore Dafida o ile a bapiša Jehofa le modiši?

GE O be o ka kgopelwa gore o hlalose tsela yeo Jehofa a hlokomelago batho ba gagwe ka yona, o be o tla re’ng? Ke’ng seo o bego o tla se bapiša le tlhokomelo e lerato yeo a e neago bahlanka ba gagwe bao ba botegago? Nywageng e fetago 3 000 e fetilego, mopsalme Dafida yo e lego kgoši o ngwadile tlhaloso e botse ka dika tša Jehofa, a di bapiša le dika tšeo yena a bego a swanetše go di bontšha modirong wa gagwe ge e be e sa le yo monyenyane.

² Dafida e bile modiši ge e be e sa le lesogana, ka gona o be a kgona go hlokomela dinku. O be a tseba gabotse gore ge e ba dinku di sa hlokomelwe, di ka timela gabonolo le go hlaselwa ke bahlakodi goba dibata. (1 Samuele 17:34-36) Ge di se na modiši yo a di hlokomelago, di ka no se hwetše mo di ka fulago gona. Nywageng ya gagwe ya ka morago, Dafida ka ntle le pelaelo o bile le dilo tše dintši tše di kgahlišago tšeo a ilego a di gopola mabapi le diiri tše dintši tšeo a di feditšego a etelela pele, a šireletša le go fepa dinku tša gagwe.

³ Ga go makatše gore Dafida o be a naganne ka modiro wa modiši ge a be a budulelwa go hlalosa tsela yeo Jehofa a hlokomelago batho ba gagwe ka yona. Psalme ya bo-23 yeo e ngwadilwego ke Dafida e thoma ka mantšu a rego: “Morêna ké modiši wa-ka; nka se hlôke selô.” Anke re eleng hloko lebaka leo ka lona mantšu a e lego ao a swanetšego. Ke moka ka thušo ya Psalme 23, re tla bona ditsela tšeo ka tšona Jehofa a hlokomelago barapedi ba gagwe go swana le kamoo modiši a hlokomelago dinku tša gagwe.—1 Petro 2:25.

Papišo e Swanetšego

4, 5. Beibele e hlalosa bjang ditsela tšeo dinku di phelago ka yona?

⁴ Jehofa o na le direto tše dintši ka Mangwalong, eupša leina “Modiši” le bontšha gore ke yo bonolo kudu. (Psalme 80:1) E le gore re kwešiše gakaone lebaka leo ka lona e lego mo go swanetšego gore Jehofa a bitšwe Modiši, go bohlokwa gore re tsebe dilo tše pedi: sa pele, tsela yeo dinku di phelago ka yona gomme sa bobedi, mediro le dika tša modiši yo botse.

⁵ Gantši Beibele e bolela ka tsela yeo dinku di phelago ka yona, e di hlalosa e le tšeo di arabelago ka pela leratong la modiši (2 Samuele 12:3), tše di sego bogale (Jesaya 53:7) le tše di sa kgonego go iphemela. (Mika 5:8) Mongwadi yo mongwe yo a hlokometšego dinku ka nywaga e mentši o boletše gore: “Dinku ga di ‘fo itlhokomela’ go etša ge ba bangwe ba ka ba ba nagana. Di nyaka gore di dule di beilwe  leihlo le gore di newe tlhokomelo e kgethegilego go feta diruiwa le ge e le dife tše dingwe.” E le gore di tšwele pele di phela, dibopiwa tše tše di sa kgonego go itirela di nyaka modiši yo a hlokomelago.—Hesekiele 34:5.

6. Pukuntšu e nngwe ya Beibele e hlalosa bjang seo modiši wa mehleng ya bogologolo a bego a se dira letšatši le letšatši?

⁶ Modiši wa mehleng ya bogologolo o be a dira’ng letšatši le letšatši? Pukuntšu e nngwe ya Beibele e hlalosa gore: “Mesong, o be a etelela pele mohlape go tšwa lešakeng, a o iša mafulong. Gona mo o be a o leta letšatši ka moka, a kgonthišetša gore ga go le e tee ya dinku tše yeo e fapogago, gomme ge go ka direga gore e nngwe e fapoge mohlapeng a sa lemoge, o be a tla e tsoma ka mafolofolo go fihlela a e hwetša gomme a e buše. . . . Bošego o be a bušetša dinku ka lešakeng, a di bala ge di dutše di feta ka tlase ga lepheko seferong go kgonthišetša gore ga go le e tee yeo e lahlegilego. . . . Gantši o be a swanetše go leta dinku bošego gore di se ke tša hlaselwa ke dibata goba gore mahodu a se ke a leka go di utswa.” *

7. Ke ka baka la’ng modiši ka dinako tše dingwe a be a swanetše go se fele pelo le go ba bonolo?

⁷ Go be go e-na le dinako tšeo ka tšona dinku, kudu-kudu tše di bapolago le tše dinyenyane, di bego di nyaka go se felelwe pelo le go swarwa ka tsela e bonolo. (Genesi 33:13) Nyakišišo e nngwe ya Beibele e bolela gore: “Gantši kwana ge e tswalwa, e tswalelwa kgole kudu thabeng. Modiši ka kelohloko o leta nku ya tshadi dinakong tša ge e sa kgone go itirela gomme o kuka kwana ke moka a e iša mohlapeng. Ka matšatši a mmalwa, go fihlela e kgona go sepela, a ka e kuka goba a e phuthela ka seaparo sa gagwe.” (Jesaya 40:10, 11) Go molaleng gore modiši yo botse o be a swanetše go ba yo matla le yo bonolo.

8. Dafida o nea mabaka afe ao a mo dirago gore a holofele Jehofa?

⁸ “Morêna ké modiši wa-ka”—na yeo ga se tlhaloso e swanetšego bakeng sa Tatawešo wa legodimong? Ge re dutše re hlahloba Psalme 23, re tla bona kamoo Modimo a re hlokomelago ka gona a diriša matla le bonolo go swana le modiši. Go temana 1, Dafida o bontšha kholofelo ya gagwe ya gore Modimo o tla dira ditokišetšo ka moka tša bohlokwa bakeng sa dinku tša Gagwe gore di “se hlôke selô.” Ditemaneng tše di latelago, Dafida o nea mabaka a mararo a go ba le kholofelo ye: Jehofa o etelela pele, o šireletša le go fepa dinku tša Gagwe. Anke re a ahla-ahleng ka letee ka letee.

“O Nketelela Pele”

9. Ke boemo bofe bja khutšo bjo Dafida a bo hlalosago, le gona dinku di ka ba boemong bjoo ka tsela efe?

⁹ Sa pele, Jehofa o etelela pele batho ba gagwe. Dafida o ngwala gore: “Ó nkhutamiša mafulong a matalá; ó nkiša meetseng a makhutšô. Ó lapološa môya wa-ka, ó nthsepediša [“o nketelela pele,” NW] mmileng wa xo loka ka ’baka la leina la xaxwe.” (Psalme 23:2, 3) Mohlape wo o robetšego ka khutšo mafulong a matala—mo Dafida o hlalosa taba ya kgotsofalo, tapologo le tšhireletšego. Lentšu la Sehebere bakeng sa “mafulo” le ka bolela “lefelo le le thabišago.” Mohlomongwe dinku ka botšona di ka se kgone go hwetša lefelo le le lapološago leo di ka ithobalelago go lona ka khutšo. Modiši wa tšona o swanetše go di hlahla go ya ‘lefelong leo le le thabišago.’

10. Modimo o bontšha bjang gore o a re bota?

¹⁰ Jehofa o re etelela pele bjang lehono? Tsela e nngwe yeo a dirago bjalo ka yona ke ka go bea mohlala. Lentšu la gagwe le re kgothaletša go ba “baetši ba Modimo.” (Ba-Efeso 5:1) Moko wa taba e dikologilego mantšu ao o bontšha kwelobohloko, tebalelo le lerato. (Ba-Efeso 4:32; 5:2) Ka kgonthe, Jehofa o bea mohlala o mobotse kudu ka go bonagatša dika tše bjalo tše di rategago. Na o feteletša dilo ge a re kgopela gore re mo ekiše? Aowa. Ge e le gabotse, keletšo yeo e buduletšwego e bontšha gabotse kudu gore o a re bota. Ka tsela efe? Re bopilwe ka seswantšho sa Modimo, seo se rago gore re filwe dika tša boitshwaro le bokgoni dilong tša moya. (Genesi 1:26) Ka gona, Jehofa o a tseba gore go sa šetšwe go se phethagale ga rena, re na le bokgoni bja  go hlagolela dika tše di swanago le tšeo a di bonagatšago. Nagana feela—Modimo wa rena yo lerato o kgodišegile gore re ka swana le yena. Ge e ba re latela mohlala wa gagwe, o tla re hlahla, gomme ka tsela ya seswantšhetšo a re iša ‘lefelong la makhutšo.’ Lefaseng le leo le nago le bošoro, re tla “iketla,” ra hwetša khutšo yeo e tlišwago ke go tseba gore re amogelwa ke Modimo.—Psalme 4:8; 29:11.

11. Ge a etelela pele dinku tša gagwe, ke’ng seo Jehofa a se lemogago, gomme se se bonagatšwa bjang go seo a se nyakago go rena?

¹¹ Ge a re etelela pele, Jehofa ke yo bonolo le yo a sa felego pelo. Modiši o lemoga mafokodi a dinku tša gagwe, gomme o etelela pele ‘a gata ka mošito o tee le diruiwa tša gagwe.’ (Genesi 33:14, bapiša le NW) Jehofa le yena o etelela dinku tša gagwe pele ‘a gata ka mošito o tee le tšona.’ O lemoga bokgoni le mafokodi a rena. Ge e le gabotse, o gata ka mošito o tee le rena, gomme ga a nyake se se fetago seo re ka kgonago go se nea. Seo a se kgopelago ke gore re dire dilo ka moya ka moka. (Ba-Kolose 3:23) Eupša go thwe’ng ge e ba o tšofetše gomme o sa kgone go dira seo o bego o tlwaetše go se dira? Goba go thwe’ng ge e ba o swerwe ke bolwetši bjo šoro gomme bo go palediša go dira dilo tše itšego? Ke moo senyakwa sa gore re šome ka moya ka moka e tlogago e le sa bohlokwa. Ga go na batho ba babedi bao ba swanago tlwaa. Go hlankela ka moya ka moka go bolela go diriša matla a gago ka moka kamoo wena o ka kgonago ka gona tirelong ya Modimo. Go sa šetšwe mafokodi ao a ka šitišago tsela yeo re sepelago ka yona, Jehofa o tšeela godimo borapedi bja rena bja pelo ka moka.—Mareka 12:29, 30.

12. Ke mohlala ofe go tšwa Molaong wa Moše wo o bontšhago gore Jehofa o etelela pele ‘a gata ka mošito o tee le dinku tša gagwe’?

¹² Go bontšha gore Jehofa o etelela pele ‘a gata ka mošito o tee le dinku tša gagwe,’ ela hloko seo se bolelwago mabapi le dihlabelo tša dilefa Molaong wa Moše. Jehofa o be a nyaka dihlabelo tše dibotse tšeo di bego di tutuetšwa ke dipelo tše di lebogago. Ka nako e swanago, dihlabelo di be di arolwa go ya ka bokgoni bja motho yo a di neago. Molao o be o re: “Xe a ka hlaêlêlwa ke se se lekanaxo nku, xôna a [tliše] mekurwanyane e mebedi.” Go thwe’ng ge e-ba a be a se na gaešita le mekurwanyane e mebedi? Gona o be a ka tliša “bupi byo bo tokilwexo.” (Lefitiko 5:7, 11) Se se bontšha gore Modimo o be a sa nyake se se lego ka godimo ga matla a motho yo a neago sehlabelo. Ka ge Modimo a sa fetoge, re ka homotšwa ke go tseba gore a ka se tsoge a re kgopetše se se fetago seo re ka kgonago go se nea; go e na le moo, o thabela go amogela seo re ka kgonago go mo nea sona. (Maleaki 3:6) Ruri go a thabiša go etelelwa pele ke Modiši yo bjalo yo a kwešišago!

“Nka se Boife Bobe, Gobane o na le Nna”

13. Go Psalme 23:4, Dafida o bolela bjang bjalo ka ge e ka o bolela le mogwera wa gagwe, gomme ke ka baka la’ng se se sa makatše?

¹³ Dafida o nea lebaka la bobedi la go ba ga gagwe le kholofelo: Jehofa o šireletša dinku tša gagwe. Re bala gore: “Le ge nka sepela ka molapong wa moriti wa lehu, nka se boife bobe, gobane o na le nna, molamo wa gago le lepara la gago, tšona di a nkhomotša.” (Psalme 23:4; PK) Ga bjale Dafida o bolela le Jehofa bjalo ka ge e ka o bolela le mogwera wa gagwe, a diriša lešala “o”  [Seisemane, “you.”] Se ga se makatše, ka gobane Dafida o bolela kamoo Modimo a mo thušitšego ka gona go kgotlelela mathata. Dafida o be a kile a ba melapong e mentši ya moriti wa lehu—dinako tšeo ka tšona bophelo bja gagwe bo bego bo le kotsing. Eupša ga se a ka a boifa, ka gobane o be a lemoga gore Modimo—ka “molamo” wa Gagwe le ka “lepara” la Gagwe tše di lego kgaufsi—o na le yena. Go tseba ga Dafida gore o šireleditšwe go ile gwa mo homotša gomme ka ntle le pelaelo gwa mmatametša go Jehofa. *

14. Beibele e re nea kgonthišetšo efe mabapi le tšhireletšo ya Jehofa, eupša se ga se bolele’ng?

¹⁴ Jehofa o šireletša dinku tša gagwe bjang lehono? Beibele e re kgonthišetša gore ga go na baganetši—batemona goba batho—bao ba ka tsogago ba kgonne go fediša dinku tša gagwe lefaseng. Jehofa a ka se ke a dumelela seo. (Jesaya 54:17; 2 Petro 2:9) Lega go le bjalo, seo ga se bolele gore Modiši wa rena o tla re šireletša mathateng ka moka. Re lebeletšana le diteko tšeo di tlwaelegilego bathong, le gona re lebeletšana le kganetšo yeo e tlelago Bakriste ka moka ba therešo. (2 Timotheo 3:12; Jakobo 1:2) Go na le dinako tšeo ka tšona re ka rego re ‘sepela molapong wa moriti wa lehu.’ Ka mohlala, re ka ba kotsing ya lehu ka baka la tlaišo goba mathata a mangwe a tša maphelo. Goba e ka ba taba ya gore yo mongwe yo re mo ratago o ba kotsing ya lehu goba o a hwa. Dinakong tšeo di bonagalago e le tša lefsifsi, Modiši wa rena o na le rena, gomme o tla re šireletša. Bjang?

15, 16. (a) Jehofa o re thuša bjang go swaragana le mapheko ao re ka lebeletšanago le ona? (b) Laodiša phihlelo yeo e bontšhago kamoo Jehofa a re thušago ka gona dinakong tša diteko.

¹⁵ Jehofa ga a holofetše gore o tla tsena ditaba gare ka tsela ya mohlolo. * Eupša re ka kgonthišega ka se: Jehofa o tla re thuša go fenya mapheko le ge e le afe ao re ka lebeletšanago le ona. A ka re nea bohlale bja gore re lebeletšane le ‘meleko ya mehuta-huta.’ (Jakobo 1:2-5) Modiši o diriša molamo wa gagwe goba lepara e sego feela bakeng sa go raka dibata eupša gape bakeng sa go hlahla dinku tša gagwe ka tsela e bonolo go ya mo go swanetšego. Jehofa a ka re “hlahla,” mohlomongwe a diriša modumedi-gotee le rena, gore re diriše keletšo e theilwego Beibeleng yeo e ka dirago phetogo e kgolo boemong bja rena. Go oketša moo, Jehofa a ka re nea matla a go kgotlelela. (Ba-Filipi 4:13) Ka moya wa gagwe o mokgethwa, a ka re nea “matla a maxolo.” (2 Ba-Korinthe 4:7) Moya wa Modimo o ka re thuša go kgotlelela teko le ge e le efe yeo Sathane a ka re tlišetšago yona. (1 Ba-Korinthe 10:13) Na ga go homotše go tseba gore Jehofa o dula a ikemišeditše go re thuša?

¹⁶ Ee, go sa šetšwe molapo wa moriti wa lehu wo re ka ikhwetšago re le go ona, ga re sepele go ona re le noši. Modiši wa rena o na le rena, o re thuša ka ditsela tšeo mathomong re ka no se di lemogego. Ela hloko phihlelo ya mogolo wa Mokriste yo a bego a e-na le bolwetši bjo šoro bja go ruruga disele tša bjoko (brain tumor). O re: “Ke therešo gore mathomong ke be ke ipotšiša ge e ba Jehofa a nkgalefetše goba ge e ba a sa nthata. Eupša ke be ke ikemišeditše gore ke se ke ka tlogela Jehofa. Go e na le moo, ke ile ka mmotša dipelaelo tša-ka. Le gona Jehofa o ile a nthuša, gantši a nkgothatša ka bana bešo le dikgaetšedi ba moya. Ba bantši ba ile ba mpotša dintlha tše di holago go nthuša go lebeletšana le bolwetši bjo bjo šoro. Dilo tše di kwagalago tšeo ba bego ba di bolela di ile tša nkgopotša gore e be e se nna feela yo a bego a lebeletšana le maemo a. Thušo e šomago, go akaretša le botho bjo ba mpontšhitšego bjona di ile tša nkgonthišetša gore ke be ke se ka nyamiša Jehofa. Ke therešo gore ke swanetše go tšwela pele ke katana le bolwetši bja-ka, le gona ga ke tsebe gore ke tla felela kae. Eupša ke kgodišegile gore Jehofa o na le nna le gore o tla tšwela pele a nthuša tekong ye.”

 “O Nkabêla Dijô”

17. Dafida o hlalosa Jehofa bjang go Psalme 23:5, gomme ke ka baka la’ng se se sa thulane le papišo ya modiši?

¹⁷ Ga bjale Dafida o nea lebaka la boraro leo le dirago gore a holofele Modiši wa gagwe: Jehofa o fepa dinku tša gagwe, le gona o di nea ka boati. Dafida o ngwala gore: “O nkabêla dijô, manaba a-ka à ntebeletše; O ntlotša hlôxô makhura; senwêlô sa-ka se tletše wa xo falala.” (Psalme 23:5) Temaneng ye, Dafida o hlalosa Modiši wa gagwe e le mong-gae yo a neago motlalo wa dijo le dino ka seatla se se bulegilego. Dipapišo tše tše pedi—ya modiši yo lerato le ya mong-gae yo a neago ka seatla se se bulegilego—ga di thulane. Go ba gona, modiši yo botse o swanetše go tseba moo a ka hwetšago mafulo a matala le meetse a go nwa ao a lekanego e le gore mohlape wa gagwe o “se hlôke selô.”—Psalme 23:1, 2.

18. Ke’ng se se bontšhago gore Jehofa ke mong-gae yo a neago ka seatla se se bulegilego?

¹⁸ Na Modiši wa rena le yena ke mong-gae yo a neago ka seatla se se bulegilego? Ruri go bjalo! Anke o nagane ka phepo, bontši le mehuta-huta ya dijo tša moya tšeo re di thabelago ga bjale. Jehofa ka sehlopha sa molaki yo a botegago le yo bohlale o re neile dikgatišo tše di thušago le mananeo ao a rutago dibokeng, dikopanong tše dinyenyane le tše dikgolo—tšeo ka moka ga tšona di kgotsofatšago dinyakwa tša rena tša moya. (Mateo 24:45-47) Ruri dijo tša moya ga di hlaele. “Molaki e a bôtêxaxo yo bohlale” o tšweleditše Dibeibele tše dimilione le dithušo tša go ithuta Beibele, gomme dikgatišo tše bjalo di a hwetšagala ga bjale ka maleme a 413. Jehofa o re neile dijo tše tša moya ka mehuta-huta ya tšona—go tloga go “lebese,” e lego dithuto tša Beibele tša motheo, go ya go “dijô tše di tiilexo,” e lego dithuto tše di tseneletšego tša moya. (Ba-Hebere 5:11-14) Ka baka leo, ge re lebeletšana le mathata goba go dira diphetho, gantši re ka hwetša selo seo re tlogago re se nyaka. Re be re tla ba kae ka ntle le dijo tša moya? Ruri Modiši wa rena o nea ka seatla se se bulegilego!—Jesaya 25:6; 65:13.

‘Ke tla Dula Ngwakong wa Jehofa’

19, 20. (a) Go Psalme 23:6, Dafida o bontšha kholofelo efe, gomme ke bjang re ka bago le kholofelo e bjalo? (b) Ke’ng seo se tlago go ahla-ahlwa sehlogong se se latelago?

¹⁹ Ka morago ga go naganišiša ka ditsela tša Modiši wa gagwe le Monei, Dafida o phetha ka gore: “Tše botse fêla le kxauxêlô di tlo ntatêla mehla yohle kè sa phela. Xomme ke tlo fetša bontši bya matšatši, kè dutše Ngwakong wa Morêna.” (Psalme 23:6) Dafida o bolela go tšwa pelong e tletšego tebogo le tumelo—go leboga dilo tšeo a di gopolago tša nakong e fetilego le tumelo ya go lebelela bokamosong. Motho yo yo e kilego ya ba modiši o šireletšegile, gomme o a tseba gore ge feela a dula a le kgaufsi le Modiši wa gagwe wa legodimong go le bjalo ka ge eka o dula ka ntlong ya Gagwe, Jehofa o tla dula a mo hlokomela ka tsela e lerato.

²⁰ Ruri re tloga re leboga mantšu a mabotse ao a begilwego go Psalme ya bo-23! Dafida o hweditše tsela e swanetšego kudu ya go hlalosa kamoo Jehofa a etelelago pele, a šireletšago le kamoo a fepago dinku tša gagwe ka gona. Dipolelo tša Dafida tše kgahlišago di bolokilwe ka Beibeleng bakeng sa go re nea kholofelo ya gore le rena re ka lebelela go Jehofa e le Modiši wa rena. Ee, ge feela re dula re le kgaufsi le Jehofa, o tla re hlokomela bjalo ka Modiši yo lerato “bontši bya matšatši,” go iša le ka mo go sa felego. Lega go le bjalo, re le dinku tša gagwe, re na le boikarabelo bja go sepela le Modiši wa rena yo mogolo, Jehofa. Sehlogo se se latelago se tla hlalosa seo se akaretšwago ke go dira bjalo.

[Mengwalo ya ka tlase]

Na o a Gopola?

• Ke ka baka la’ng e be e le mo go swanetšego gore Dafida a bapiše Jehofa le modiši?

• Jehofa o re hlahla bjang ka tsela ya go re kwešiša?

• Jehofa o re thuša ka tsela efe go kgotlelela diteko?

• Ke’ng se se bontšhago gore Jehofa ke mong-gae yo a neago ka seatla se se bulegilego?

[Dipotšišo tša Thuto]

[Seswantšho go letlakala 18]

Go swana le modiši kua Isiraele, Jehofa o etelela dinku tša Gagwe pele