Na o tla Sepela le Modimo?

“Sepela le Modimo w’axo Ò n’e boipoetšô.”—MIKA 6:8.

1, 2. Tsela yeo Jehofa a ikwago ka yona ka rena e ka bapišwa bjang le ya motswadi yo a rutago ngwana go sepela?

NGWANA o thekesela a le gare a obelela go swara matsogo ao a phurolotšwego a motswadi wa gagwe yo a mmitšago gomme o gata megato e sego kae ya mathomo. Se se ka bonagala e le selo se senyenyane, eupša go tate le mma, ke tiragalo e kgolo, nako yeo e holofetšago kudu ya bokamoso. Batswadi ba fagahlela go sepela le ngwana wa bona ba mo swere ka seatla, dikgweding le nywageng e tlago. Ka ditsela tše dintši, ba holofela go nea ngwana wa bona tlhahlo le thekgo go ya go ile.

² Jehofa Modimo o ikwa ka tsela e swanago ka bana ba gagwe ba lefaseng. O ile a bolela mabapi le batho ba gagwe ba Isiraele, goba ba Efuraimi, gore: “Mola è le Nna ke bexo ke tataidiša Efuraimi, kè mo swere ka diatla, . . . Ka mo xoxa ka manti a setho, ka lerala la leratô.” (Hosea 11:3, 4) Jehofa mo o itlhalosa e le motswadi yo lerato yo ka go se fele pelo a rutago ngwana go sepela, mohlomongwe le go mo swara ge a e-wa. Jehofa, yo e lego Motswadi gare ga batswadi o fagahletše go re ruta kamoo re swanetšego go sepelago ka gona. Le gona o thabela go sepela le rena ge re dutše re dira tšwelopele. Go etša ge lengwalo la rena la sehlogo le bontšha, re ka sepela le Modimo! (Mika 6:8) Eupša go sepela le Modimo go bolela’ng? Ke ka baka la’ng re swanetše go dira bjalo? Go kgonega bjang? Le gona go sepela le Modimo go tliša ditšhegofatšo dife? Anke re ahla-ahleng dipotšišo tše tše nne ka e tee ka e tee.

Go Sepela le Modimo go Bolela’ng?

3, 4. (a) Ke’ng se se kgahlišago mabapi le tlhaloso ya go sepela le Modimo? (b) Go sepela le Modimo go bolela’ng?

³ Ke therešo gore motho wa nama le madi a ka se sepele ka tsela ya kgonthe le Jehofa yo e lego motho wa moya. (Ekisodo 33:20; Johane 4:24) Ka gona ge Beibele e bolela ka batho e le bao ba sepelago le Modimo, e diriša polelwana ya seswantšhetšo. E nea tlhaloso e kgahlišago, yeo e šomago go ditšhaba ka moka le ditšo ka moka le yeo e šomago ka mehla. Ge e le gabotse, ke kae goba ke neng moo batho ba ka se kgonego go kwešiša taba ya motho yo a sepelago le motho yo mongwe? Tlhaloso ye e tšweletša bogwera le go batamelana, na ga go bjalo? Maikwelo a bjalo a re nea temogo e oketšegilego mabapi le seo se bolelwago ke go sepela le Modimo. Lega go le bjalo, a re tseneng tabeng.

⁴ Nagana ka banna bao ba botegago e lego Henoge le Noage. Ke ka baka la’ng ba hlaloswa e le bao ba sepelago le Modimo? (Genesi 5:24; 6;9) Ka Beibeleng, polelwana “xo sepela” gantši e  bolela go latela tsela e itšego ya go dira dilo. Henoge le Noage ba kgethile tsela ya bophelo yeo e bego e dumelelana le thato ya Jehofa Modimo. Ka go se swane le batho bao ba bego ba phela le bona, ba be ba lebelela go Jehofa bakeng sa tlhahlo gomme ba e-kwa taelo ya gagwe. Ba be ba mmota. Na se se bolela gore Jehofa o ba diretše diphetho? Aowa. Jehofa o neile batho tokologo ya boikgethelo, gomme o nyaka gore re diriše mpho yeo gotee le ‘matla a rena a go nagana.’ (Ba-Roma 12:1, bapiša le NW) Lega go le bjalo, ge re dutše re dira diphetho, ka boikokobetšo re dumelela matla a rena a go nagana gore a hlahlwe ke monagano wa Jehofa wo o phagamego ka mo go sa bapišwego. (Diema 3:5, 6; Jesaya 55:8, 9) Ge e le gabotse, ge re dutše re sepela leeto la bophelo, re sepela le Jehofa leetong leo.

5. Ke ka baka la’ng Jesu a boletše ka go oketša bophelo bja motho ka kubiti e tee?

⁵ Gantši Beibele e bapiša bophelo le leeto goba mosepelo. Maemong a mangwe, papišo ye ke e lebanyago, eupša maemong a mangwe ga se e lebanyago. Ka mohlala, Jesu o itše: “Ke mang go lena yo ka baka la go belaela a ka oketšago kubiti e tee tekanyong ya bophelo bja gagwe?” (Mateo 6:27; NW) Go ka ba le se se go tlabago mantšung ao. Ke ka baka la’ng Jesu a bolela ka go oketša “bophelo” bja motho, bjo bo lekanywago ka nako, ka “kubiti e tee,” yeo e dirišwago go ela monabo? * Go bonagala Jesu a be a lebelela bophelo bo swana le leeto. Ge e le gabotse, o be a ruta gore go belaela go ka se go thuše go tšwetša pele leeto la bophelo bja gago gaešita le ka mogato o monyenyane. Lega go le bjalo, na re swanetše go phetha ka gore ga go na selo seo re ka se dirago mabapi le monabo wo re nyakago go o sepela? Ruri ga go bjalo! Seo se re tliša potšišong ya rena ya bobedi, Ke ka baka la’ng re swanetše go sepela le Modimo?

Ke ka Baka La’ng re Swanetše go Sepela le Modimo?

6, 7. Ke’ng seo se tlogago se nyakwa ke batho bao ba sa phethagalago, gomme ke ka baka la’ng re swanetše go retologela go Jehofa bakeng sa go kgotsofatša senyakwa seo?

⁶ Lebaka le lengwe leo ka lona re swanetšego go sepela le Jehofa Modimo le hlaloswa go Jeremia 10:23 e rego: “Morêna, ke a tseba; motho tsela y’axwe xa’ e buše [“ga e matleng a gagwe,” PK]; le monna mo a yaxo xa’ ikiše, le xe a xata a tiiša.” Ka baka leo rena batho ga re na tshwanelo goba bokgoni bja go laola tsela ya rena ya bophelo. Re tloga re nyaka tlhahlo. Bao ba phegelelago go sepela ka tsela ya bona ka noši, ba sa ithekga ka Modimo, ba dira phošo e swanago le yeo e dirilwego ke Adama le Efa. Banyalani ba ba pele ba ile ba itirela phetho ya go kgetha se sebotse go se sebe. (Genesi 3:1-6) Tshwanelo yeo e fo ba ‘e se matleng’ a rena.

⁷ Na ga o ikwe o nyaka go hlahlwa leetong la bophelo? Re lebeletšana le go dira diphetho tše dikgolo le tše dinyenyane letšatši le letšatši. Tše dingwe tša tšona di thata le gona di ka kgoma bokamoso bja rena—gotee le bja bao re ba ratago. Lega go le bjalo, nagana feela gore motho yo a re fetago ka mo go sa bapišegego le yo bohlale go re feta o thabela go re nea tlhahlo e lerato ge re dira diphetho tšeo! Ka manyami, batho ba bantši lehono ba kgetha go bota tsela yeo ba naganago ka yona le go hlahla dikgato tša bona. Ba hlokomologa therešo e boletšwego go Diema 28:26 e rego: “Moipoti ké setlatla; xo phônyôkxa a yaxo ka bohlale.” Jehofa o nyaka gore re phonyokge dikotsi tšeo di tlišwago ke go bota pelo yeo e lego mmata-maano-mabe. (Jeremia 17:9) O nyaka gore re sepele ka bohlale, gore re mmote bjalo ka Mohlahli le Molai wa rena yo bohlale. Ge re dira bjalo, tsela ya rena bophelong e a šireletšega, e a kgotsofatša le go ba e thabišago.

8. Ka tlwaelo, sebe le go se phethagale di lebiša batho kae, lega go le bjalo, ke’ng seo Jehofa a re nyakelago sona?

⁸ Lebaka le lengwe leo ka lona re swanetšego go sepela le Modimo le akaretša monabo wo re nyakago go o sepela. Beibele e bolela ka therešo e nyamišago ya gore batho ka moka bao ba sa phethagalago ba sepela ba lebile lefelong le le  swanago. Ge e hlalosa diteko tšeo di tlišwago ke botšofadi, Mmoledi 12:5 e re: “Motho à e-ya ngwakong wa xaxwe e lexo wa neng le neng; baledi ba šetše ba potoloxa le mekxôba.” ‘Ngwako wo wa neng le neng’ ke’ng? Ke lebitla, moo ka tlwaelo sebe le go se phethagale di re išago gona. (Ba-Roma 6:23) Lega go le bjalo, Jehofa o re nyakela mo go oketšegilego go feta go fo sepela leeto le lekopana le leo le nago le mathata go tloga ge re belegwa go fihlela ge re e-hwa. (Jobo 14:1) Ke feela ge re sepela le Modimo mo re ka holofelago go sepela leeto le letelele la ka mo go sa felego—ka ge a be a rulagantše bjalo. Na seo ga se se o se nyakago? Ka gona, go molaleng gore o swanetše go sepela le Tatago wa legodimong.

Re ka Sepela Bjang le Modimo?

9. Ke ka baka la’ng Jehofa a be a iphihlela batho ba gagwe ka dinako tše dingwe, eupša ke kgonthišetšo efe yeo go ya ka Jesaya 30:20 a ilego a e nea?

⁹ Potšišo ya boraro yeo re tlago go e ahla-ahla e nyaka šedi ya rena e kgolo. Ke ya gore, Re ka sepela bjang le Modimo? Re hwetša karabo go Jesaya 30:20, 21 e rego: “Molai wa lena a ka se hlwê à iphihla; mahlô a lena a tlo mmôna, Molai wa lena. Ditsêbê tša lena di tlo kwa ka nthaxo xa lena xe xo thwe: Tsela šé! Tšeang ka yôna! Le se fapoxêlê ka xo le letona le xe e le xo la ntsôxôšô!” Karolong ye e kgothatšago, mantšu a Jehofa ao a begilwego go temana 20 a ka ba a ile a gopotša batho ba gagwe gore ge ba rabela go yena, gona o be a tla iphihlela bona. (Jesaya 1:15; 59:2) Lega go le bjalo, mo Jehofa ga a bolelwe e le yo a iphihlilego, eupša o bolelwa e le yo a emego phatlalatša pele ga batho ba gagwe bao ba botegago. Re ka nagana ka mohlahli yo a emego pele ga barutwana ba gagwe, a ba bontšha seo a nyakago ba ithuta sona.

10. Ke ka kgopolo efe o ka ‘kwago lentšu ka morago ga gago’ go tšwa go Mohlahli yo Mogolo?

¹⁰ Go temana 21, go newa tlhaloso e fapanego. Jehofa o bolelwa e le yo a sepelago ka morago ga batho ba gagwe, a ba nea ditaelo mabapi le tsela yeo ba swanetšego go sepela go yona. Diithuti tša Beibele di lemogile gore polelwana ye e ka ba e theilwe tseleng yeo ka dinako tše dingwe modiši a gapago dinku tša gagwe ka yona, a goeletša bakeng sa go di hlahla le go dira gore di se ke tša leba tseleng e fošagetšego. Tlhaloso ye e šoma bjang go rena? Ge re retologela Lentšung la Modimo bakeng sa tlhahlo, gona re bala mantšu ao a ngwadilwego nywageng e dikete e fetilego. Ka ge a ngwadilwe kgale, a kwagala eka a tšwa ka morago ga rena. Lega go le bjalo, a sa dutše a šoma le lehono go swana le nakong ya ge a be a ngwalwa. Keletšo ya Beibele e ka re hlahla diphethong tša rena tša letšatši le letšatši, le gona e ka re thuša go rulaganya tsela ya rena ya bophelo bakeng sa nako e tlago. (Psalme 119:105) Ge re katanela go hwetša tlhahlo e bjalo le go e diriša, gona Jehofa ke Mohlahli wa rena. Re sepela le Modimo.

11. Go ya ka Jeremia 6:16, Jehofa o ile a botša batho ba gagwe mantšu afe a kgothatšago, eupša ba ile ba arabela bjang?

¹¹ Na ruri re dumelela Lentšu la Modimo go re hlahla ka tsela e bjalo e kgaufsi kudu? Go bohlokwa gore re keng re eme ganyenyane ka dinako  tše dingwe gomme re itlhahlobe ka potego. Ela hloko temana yeo e tlago go re thuša go dira bjalo, e rego: “Morêna ó boletše a re: Êmang ditseleng Le lebêlêlê, Le botšišê ditsela tša boxolo-xolo; Le bônê ye e lexo tsela e botse, Le kxônê xo tšea ka yôna. Ké mo Le tl’o xo hwetša bokhutšô bya meôya ya lena!” (Jeremia 6:16) Mantšu a a ka re gopotša ka mosepedi yo a emago magahlanong a ditsela bakeng sa go kgopela tlhahlo. Ka kgopolo ya moya, batho ba Jehofa ba marabele kua Isiraele ba be ba swanetše go dira selo se se swanago le seo. Ba be ba swanetše go hwetša tsela ya go boela go “ditsela tša boxolo-xolo.” ‘Tsela yeo e botse’ e be e le tsela ye bo-rakgolokhukhu ba bona bao ba botegago ba ilego ba sepela ka yona, tsela yeo setšhaba ka bošilo se ilego sa aroga go yona. Ka manyami, setšhaba sa Isiraele se ile sa ngangabala ge Jehofa ka lerato a be a se gopotša dilo tše. Temana yona ye e tšwela pele ka gore: “’Me bóná ba re: Xa re ye!” Lega go le bjalo, batho ba Modimo mehleng yeno ba arabetše keletšong e bjalo ka mo go fapanego.

12, 13. (a) Balatedi bao ba tloditšwego ba Kriste ba arabetše bjang keletšong yeo e lego go Jeremia 6:16? (b) Re ka itlhahloba bjang mabapi le tsela yeo re sepelago ka yona lehono?

¹² Go ya bofelong bja lekgolo la bo-19 la nywaga, balatedi ba Kriste bao ba tloditšwego ba ile ba diriša keletšo ya Jeremia 6:16. E le sehlopha, ba ile ba etelela pele ka pelo e tšhweu gomme ba boela ‘tseleng ya bogologolo.’ Ka go se swane le Bojakane bja bohlanogi, ba kgomaretše ka potego “mantšu ao a se naxo senyalô” ao a thomilwego ke Jesu Kriste le go thekgwa ke balatedi ba gagwe bao ba botegago morago kua lekgolong la pele la nywaga C.E. (2 Timotheo 1:13) Go ba go fihla lehono, batlotšwa ba a thušana le go thuša bagwera ba bona ba “dinku tše dingwê” go phegelela tsela ya bophelo e holago le e thabišago yeo Bojakane bo e tlogetšego.—Johane 10:16.

¹³ Ka go nea dijo tša moya ka lebaka la gona, sehlopha sa molaki yo a botegago se thušitše batho ba dimilione go hwetša “ditsela tša boxolo-xolo” e le gore ba sepele le Modimo. (Mateo 24:45-47) Na o gare ga batho ba bjalo ba dimilione? Ge e ba go le bjalo, o ka dira’ng go phema taba ya go fapoga, e lego go aroga gomme wa ikgethela tsela ya gago? Ke gabohlale go ema nako le nako gomme wa hlahloba tsela yeo o sepelago ka yona bophelong. Ge e ba ka potego o bala Beibele le dipuku tšeo di theilwego Beibeleng gotee le go ba gona mananeong a thuto ao a newago ke batlotšwa lehono, gona o tlwaeletšwa go sepela le Modimo. Le gona ge ka boikokobetšo o diriša keletšo yeo o e newago, ruri o sepela le Modimo, gomme o latela “ditsela tša boxolo-xolo.”

Sepela Bjalo ka ge Eka ‘o Bona e a sa Bonwego’

14. Ge e ba Jehofa e le motho wa kgonthe go rena, seo se tla bonagatšwa bjang diphethong tšeo re di dirago?

¹⁴ Jehofa e swanetše go ba motho wa kgonthe go rena e le gore re sepele le yena. Gopola gore Jehofa o ile a kgonthišetša batho bao ba botegago ba Isiraele ya bogologolo gore o be a sa iphihlela bona. Lehono, o ikutolla go batho ba gagwe ka mo go swanago e le Molai yo Mogolo. Na Jehofa ke wa kgonthe ka tsela e bjalo go wena, go le bjalo ka ge eka o eme pele ga gago go go nea ditaelo? Re swanetše go ba le tumelo e bjalo ge e ba re nyaka go sepela le Modimo. Moše o be a e-na le tumelo e bjalo, “a xomarêla Eo a sa bonwexo byalo ka e ke ó a mmôna.” (Ba-Hebere 11:27) Ge e ba Jehofa e le wa kgonthe go rena, gona re tla ela hloko tsela yeo a ikwago ka yona ge re dira diphetho. Ka mohlala, re be re ka se nagane gaešita le ka go dira selo se se fošagetšego gomme ra leka go uta dibe tša rena go bagolo ba Bakriste goba ditho tša lapa. Go e na le moo, re katanela go sepela le Modimo gaešita le ge go se na motho yo a re bonago. Go swana le Kgoši Dafida wa bogologolo, re ikana ka gore: “Ngwakong  wa-ka ke ithsepelêla kè le wa pelo e se naxo bosodi.”—Psalme 101:2.

15. Go kopanela le bana babo rena le dikgaetšedi ba Bakriste go tla re thuša bjang go bona Jehofa e le motho wa kgonthe?

¹⁵ Jehofa o a kwešiša gore ga ra phethagala, gore re dibopiwa tša nama le gore go ka ba thata ka dinako tše dingwe gore re dumele selo seo re sa se bonego. (Psalme 103:14) O dira mo gontši go re thuša go fenya mafokodi a bjalo. Ka mohlala, o kopantšhitše “batho . . . ba Leina la xaxwe” go tšwa ditšhabeng ka moka tša lefase. (Ditiro 15:14) Ge re dutše re hlankela gotee ka kwano, re a matlafatšana. Go kwa kamoo Jehofa a ilego a thuša ngwanabo rena goba kgaetšedi ya moya gore e fenye bofokodi bjo itšego goba go fenya teko e itšego e thata go dira gore Modimo wa rena e be wa kgonthe go rena le go feta.—1 Petro 5:9.

16. Go ithuta ka Jesu go tla re thuša bjang go sepela le Modimo?

¹⁶ Go feta tšohle, Jehofa o re neile mohlala wa Morwa wa gagwe. Jesu o itše: “Tsela ké Nna, le therešô le bophelô. Xa xo e a tlaxo xo Tate xe e se ka Nna.” (Johane 14:6) Go ithuta ka bophelo bja Jesu bja lefaseng ke e nngwe ya ditsela tše kaone kudu tša go dira gore Jehofa e be motho wa kgonthe go rena. Dilo ka moka tšeo Jesu a di boletšego goba go di dira e be e le ponagatšo e phethagetšego ya semelo le ditsela tša Tatagwe wa legodimong. (Johane 14:9) Ge re dutše re dira diphetho, re swanetše go naganišiša ka kelohloko mabapi le kamoo Jesu a ka bago a ile a swaragana le ditaba. Ge e ba re naganišiša ka kelohloko le ka thapelo pele re dira diphetho, gona re latela dikgato tša Kriste. (1 Petro 2:21) Ka go dira bjalo, re sepela le Modimo.

Go Tliša Ditšhegofatšo Dife?

17. Ge re sepela tseleng ya Jehofa, ke “bokhutšô” bofe bjo re tla bo hweletšago meoya ya rena?

¹⁷ Go sepela le Jehofa Modimo go bolela gore re phela bophelo bjo bo kgotsofatšago. Gopola seo Jehofa a se holofeditšego batho ba gagwe mabapi le go tsoma “tsela e botse.” O itše: “Le kxônê xo tšea ka yôna. Ké mo Le tl’o xo hwetša bokhutšô bya meôya ya lena!” (Jeremia 6:16) “Bokhutšô” bjoo bo bolela’ng? Na bo bolela bophelo bjo bonolo bjo bo tletšego ka maipshino le matsaka? Aowa. Jehofa o nea selo se sengwe se sekaone kudu, selo seo batho bao ba humilego le dinala ba se hwetšago ka sewelo. Go hwetša bokhutšo bja moya wa gago ke go hwetša khutšo ya monagano, lethabo, kgotsofalo le go ba le boemo bjo bo kgotsofatšago bja moya. Bokhutšo bjo bjalo bo bolela gore o ka kgodišega gore o kgethile tsela e di phalago tšohle bophelong. Khutšo e bjalo ya monagano ke tšhegofatšo e sa hwetšagalego gabonolo lefaseng le la mathata!

18. Jehofa o nyaka go go šegofatša ka’ng, gomme ke’ng seo o ikemišeditšego go se dira?

¹⁸ Ke therešo gore bophelo ka bobjona ke tšhegofatšo e kgolo. Gaešita le go sepela leeto le lekopana la bophelo go kaone go feta go se le sepele le gatee. Lega go le bjalo, Jehofa o be a sa rera gore o sepele leeto le lekopana go tloga nywageng ya bofsa go fihla bohlokong bja botšofadi. Aowa, Jehofa o nyaka gore o be le tšhegofatšo e di phalago tšohle. O nyaka gore o sepele le yena ka mo go sa felego! Se se bontšhwa gabotse go Mika 4:5 e rego: “Byale xe sethšaba se sengwê le se sengwê sè e-ya ka tsela ya modimo wa sôna, rena re tlo fêla rè e-ya ka tsela ya Morêna Modimo wa rena ka mehla le xo ya xo ile.” Na o nyaka go šegofatšwa ka tsela e bjalo? Na o nyaka go phela bophelo bjo Jehofa ka mo go kgahlišago a bo bitšago “bophelô bya ruri”? (1 Timotheo 6:19) Ka gona, ikemišetše ka matla go sepela le Jehofa lehono, gosasa le letšatši le lengwe le le lengwe ka morago ga moo go iša ka mo go sa felego!

[Mongwalo wa ka tlase]

O be o tla Araba Bjang?

• Go sepela le Modimo go bolela’ng?

• Ke ka baka la’ng o nagana gore go sepela le Modimo go a nyakega?

• Ke’ng seo se tlago go go thuša go sepela le Modimo?

• Bao ba sepelago le Modimo ba hwetša ditšhegofatšo dife?

[Dipotšišo tša Thuto]

[Diswantšho go letlakala 23]

Ka Beibele, re kwa lentšu la Jehofa ka morago ga rena le re, “Tsela šé”

[Seswantšho go letlakala 25]

Re hwetša dijo tša moya ka nako e swanetšego dibokeng