Topollo e Bonagatša Toka ya Modimo

KA MORAGO ga borabele bja Adama le Efa, Jehofa o ile a bolela ka morero wa gagwe wa go tšweletša Peu yeo e bego e tla longwa serethe. (Genesi 3:15) Se se ile sa phethagala ge manaba a Modimo a dira gore Jesu Kriste a bolaelwe koteng ya tlhokofatšo. (Ba-Galatia 3:13, 16) Jesu o be a se na sebe, ka ge ka mohlolo bophelo bja gagwe bo ile bja fetišetšwa ka popelong ya kgarebe ka matla a moya o mokgethwa. Ka baka leo, madi a gagwe ao a tšholotšwego a be a ka dirišwa e le selefa bakeng sa go lopolla batho bao ba abetšego sebe le lehu go Adama.—Ba-Roma 5:12, 19.

Ga go selo seo se ka thibelago Modimo yo matla ohle, Jehofa, go phethagatša merero ya gagwe. Ka gona, ka morago ga ge batho ba wetše sebeng, Jehofa o ile a dira tokišetšo ya topollo gomme o be a ka kgona go dirišana le bao ba bego ba dumela gore dikholofetšo tša gagwe di tla phethagala. Se se ile sa thuša ditlogolo tša Adama tša sebe, tše bjalo ka Henoge, Noage le Aborahama, gore di sepele le Modimo le go gwerana le yena ka ntle le go šilafatša bokgethwa bja Gagwe.—Genesi 5:24; 6:9; Jakobo 2:23.

Ba bangwe ba batho bao ba bego ba dumela go Jehofa ba ile ba dira dibe tše dikgolo. Yo mongwe wa bona ke Kgoši Dafida. O ka botšiša gore, ‘Jehofa o be a ka tšwela pele bjang a šegofatša Kgoši Dafida ka morago ga ge Dafida a dirile bohlotlolo le Batseba e bile a dirile gore monna wa gagwe, Uria, a bolawe?’ Selo sa bohlokwa e be e le boitsholo bja kgonthe bja Dafida le tumelo ya gagwe. (2 Samuele 11:1-17; 12:1-14) Motheong wa sehlabelo seo Jesu Kriste a bego a tla se dira, Modimo o be a ka lebalela Dafida yo a itsholago gomme a tšwela pele a phetha toka gotee le go bonagatša go loka. (Psalme 32:1, 2) Ge e hlatsela se, Beibele e hlalosa selo se sebotse kudu seo topollo e se fihleletšego, e lego “xo bônaxatša tokô ya Modimo, xe ka xo se fêle pelo xa xaxwe à hlôkômoloxile dibe tše di dirilwexo kxalê” le “tša mehla yeno.”—Ba-Roma 3:25, 26.

Ee, batho ba hwetša mehola yeo e megolo ka baka la bohlokwa bja madi a Jesu. Motheong wa topollo ye, batho ba badiradibe bao ba itsholago ba ka thabela bogwera bja kgaufsi le Modimo. Go oketša moo, topollo e dira gore bahu ba kgone go tsogela lefaseng le lefsa la Modimo. Bahu bao ba tla akaretša bahlanka ba Modimo ba botegago bao ba hwilego pele Jesu a lefelela topollo gotee le ba bantši bao ba hwilego ba sa tsebe selo e bile ba sa Mo rapele.  Beibele e re: “Bahu ba tlo tsoxa, bohle, baloki le ba s’a lokaxo.” (Ditiro 24:15) Ka nako yeo, motheong wa topollo, Jehofa o tla nea batho ka moka bao ba kwago bophelo bjo bo sa felego. (Johane 3:36) Jesu o hlalositše ka noši gore: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16, mongwalo o sekamego ke wa rena.) Batho ba tla hwetša mehola ye ka moka ka baka la tokišetšo ya Modimo ya sehlabelo sa topollo.

Lega go le bjalo, selo se segolo kudu ka topollo ga se mehola yeo re e amogelago. Sa bohlokwa kudu ke seo topollo ya Kriste e se direlago leina la Jehofa. E hlatsela gore Jehofa ke Modimo wa toka yeo e phethagetšego yo a kgonago go dirišana le batho ba sebe gomme a fo dula e le yo a sekilego le yo mokgethwa. Ge nkabe Modimo a se a ka a dira tokišetšo ya topollo, ga go le o tee wa ditlogolo tša Adama, go akaretšwa Henoge, Noage le Aborahama, yoo a ka bego a ile a sepela le Jehofa goba a ba mogwera wa gagwe. Mopsalme o ile a lemoga se gomme a ngwala gore: “Xe Wene Morêna Ò latiša molato, xôna xo ka êma mang?” (Psalme 130:3) Ruri re swanetše go bontšha tebogo kudu go Jehofa bakeng sa go romela Morwa wa gagwe yo a rategago lefaseng le go Jesu bakeng sa go neela bophelo bja gagwe ka go rata e le topollo bakeng sa rena!—Mareka 10:45.