Bokgoni bja go Theetša ka Lerato

“KE LEBOGA ge o ile wa ipha nako ya go ntheetša.” Na go na le motho yo a sa tšwago go go botša mantšu ao? Ruri yeo ke theto! Motheetši yo botse o ratwa ke mo e nyakilego go ba batho ka moka. Ka go theetša ka kelohloko, re ka lapološa batho bao ba gateletšegilego goba bao ba imelwago ke mathata. Le gona na go ba motheetši yo botse ga go re thuše go thabela batho? Ka phuthegong ya Bokriste, go theetša ka lerato ke karolo ya bohlokwa ya go ‘hlokomelana seng sa rena, ra išana leratong le medirong e mebotse.’—Ba-Hebere 10:24.

Lega go le bjalo, batho ba bantši ga se batheetši ba babotse. Ba rata go eletša, go anega diphihlelo tša bona goba go tšweletša dipono tša bona go e na le go theetša seo ba bangwe ba nyakago go se bolela. Ruri go theetša go nyaka bokgoni. Re ka ithuta bjang go theetša ka lerato?

Senotlelo sa Bohlokwa

Jehofa ke ‘Molai wa rena yo Mogolo.’ (Jesaya 30:20) A ka re ruta mo gontši mabapi le go theetša. Ela hloko kamoo Jehofa a thušitšego moporofeta Eliya. A tšhošitšwe ke ditšhošetšo tša Kgošigadi Isebele, Eliya o ile a tšhabela lešokeng gomme a bolela gore o duma eka a ka hwa. Morongwa wa Modimo o ile a bolela le yena gona moo. Ge moporofeta a be a dutše a hlalosa dilo tše a di boifago, Jehofa o ile a theetša gomme a bonagatša matla a Gagwe a magolo. Mafelelo e bile afe? Eliya o ile a boela kabelong ya gagwe a se sa boifa. (1 Dikxoši 19:2-15) Ke ka baka la’ng Jehofa a ipha nako ya go theetša dilo tšeo di tshwenyago bahlanka ba gagwe? Ke ka gobane o tshwenyega ka bona. (1 Petro 5:7) Senotlelo seo se tla go thušago gore o be motheetši yo botse se se: Kgomega ka ba bangwe, gomme o bontšhe gore o tshwenyega ka bona e le ka kgonthe.

Ge monna wa kua Bolivia a be a dirile sebe se segolo, o ile a thabela go hwetša tlhokomelo e bjalo ya modumedi-gotee le yena. Monna yo o hlalosa gore: “Ke be ke nyamile kudu bophelong ka nako yeo. Nkabe ke ile ka tlogela gabonolo go dira maiteko a go hlankela Jehofa ge nkabe e be e se ka ngwanabo rena yo a ilego a ipha nako ya go ntheetša. Ga se a ka a bolela mo gontši, eupša go tseba gore o be a kgomega ka mo go lekanego gore a ka theetša go ile gwa mmatlafatša e le ruri. Ke be ke sa nyake gore a nnee tharollo; ke be ke tseba seo ke bego ke swanetše go se dira. Ke be ke fo nyaka go tseba gore go na le motho yo a kgomegago ka maikwelo a-ka. Go theetša ga gagwe go mphološitše gore ke se ke ka metšwa ke manyami.”

Mohlala o mogolo tabeng ya go ba le bokgoni bja go theetša ka lerato ke Jesu Kriste. Nakwana ka morago ga lehu la Jesu, barutiwa ba gagwe ba babedi ba be ba tšere leeto la go tloga Jerusalema go ya motsaneng wo o lego bokgoleng bja dikhilomithara tše 11. Go molaleng gore ba be ba nyamile. Ke moka Jesu Kriste yo a tsošitšwego o ile a thoma go sepela le bona. O ile a ba botšiša dipotšišo tšeo di naganišišitšwego ka kelohloko e le gore ba ntšhe sa mafahleng, gomme barutiwa ba gagwe ba ile ba araba. Ba ile ba bolela ka dikholofelo tšeo ba bego ba e-na le tšona gotee le manyami le kgakanego tšeo ga bjale ba bego ba lebeletšane le tšona. Jesu o be a tshwenyega ka bona, gomme go theetša ga gagwe ka lerato go ile gwa dira gore barutiwa bao ba babedi ba tle ba kgone  go mo theetša. Ke moka Jesu o ile “a ba hlathollêla tša mo mangwalong ka moka, tše a boletšwexo ka tšôna.”—Luka 24:13-27.

Go thoma ka go theetša batho ke tsela e lerato ya gore le bona ba re theetše. Mosadi wa kua Bolivia o re: “Batswadi ba-ka gotee le ba ka bogadi ba ile ba thoma go ganetša tsela yeo ke bego ke godiša bana ba-ka ka yona. Ke be ke kgopišwa ke seo ba bego ba se bolela, eupša ke be ke sa tsebe mo ke emego gona bjalo ka motswadi. Mo e nyakilego go ba ka nako yona yeo, yo mongwe wa Dihlatse tša Jehofa o ile a nketela. O boletše le nna mabapi le dikholofetšo tša Modimo. Lega go le bjalo, tsela yeo a ilego a mpotšiša kamoo ke bonago ditaba ka gona e ile ya dira gore ke nagane gore motho yo o be a ikemišeditše go theetša. Ke ile ka mo kgopela go tsena ka ngwakong, gomme go se go ye kae ka mo hlalosetša bothata bja-ka. O ile a theetša ka go se fele pelo. O ile a mpotšiša gore ke nyakela bana ba-ka eng le gore monna wa-ka o be a ikwa bjang ka seo. Ke be ke imologile go ba le motho yo a bego a ikemišeditše go leka go nkwešiša. Ge a be a thoma go mpontšha seo Beibele e se bolelago mabapi le bophelo bja lapa, ke ile ka lemoga gore ke boledišana le motho yo a tshwenyegago ka boemo bja-ka.”

Beibele e re: “Leratô . . . xa le tsome xo ikhola.” (1 Ba-Korinthe 13:4, 5) Ka gona, go theetša ka lerato go bolela go beela dikgahlego tša rena ka thoko. Se se ka nyaka gore re time thelebišene, re beele kuranta ka thoko goba re time mogala wa cellular ge ba bangwe ba boledišana le rena ka taba e bohlokwa. Go theetša ka lerato go bolela go ba le kgahlego e tseneletšego dikgopolong tša motho yo mongwe. Go nyaka gore re pheme go thoma go bolela ka rena ka go bolela selo se bjalo ka gore, “Seo se nkgopotša se se ntiragaletšego nakong e fetilego.” Gaešita le ge go bolela ka tsela e bjalo e le mo go swanetšego ge o boledišana le motho ka tsela ya bogwera, re swanetše go beela dikgahlego tša rena ka thoko ge motho a bolela le rena ka bothata bjo bogolo. Go na le tsela e nngwe gape yeo go kgahlegela ba bangwe e le ka kgonthe go ka bontšhwago ka yona.

Theetša Gore o Kgone go Kwešiša Maikwelo a Motho

Bagwera ba monna yo a bitšwago Jobo ba kwele bonyenyane ge a bolela le bona ga lesome. Lega go le bjalo, Jobo o boletše gore: “A mola nkabe ke na le a nkwaxo!” (Jobo 31:35) Ka baka la’ng? Ka gobane go mo theetša ga bona ga se gwa ka gwa mo homotša. Ba be ba se na taba le Jobo e bile ba sa nyake go kwešiša maikwelo a gagwe. Ruri ba be ba se na kwelobohloko yeo e bontšhwago ke batheetši bao ba nago le kwelobohloko. Eupša moapostola Petro o eletša ka gore: “Bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô le ba botho.” (1 Petro 3:8) Re ka bontšha kwelobohloko bjang? Tsela e nngwe ke ka go bontšha go tshwenyega ka maikwelo a motho yo mongwe le go leka go a kwešiša. Go bolela mantšu a kwelobohloko a bjalo ka gore “seo e swanetše go ba e be e le se se nyamišago” goba “o swanetše go ba o ile wa ikwa o sa kwešišwe” ke tsela e nngwe yeo e bontšhago gore re tshwenyegile. Tsela e nngwe ke go bušeletša ka mantšu a rena seo motho yoo a se bolelago, ka go rialo re bontšha gore re kwešišitše seo a se boletšego. Go theetša ka lerato go bolela go theetša e sego mantšu feela eupša gape le maikwelo ao a sa bontšhwego.

Robert * ke modiredi wa nako e tletšego yo e lego Hlatse ya Jehofa yeo e nago le phihlelo. O a laodiša: “Go kile gwa ba le nako yeo nkilego ka nyamišwa ke bodiredi bja-ka. Ka baka leo ke ile ka kgopela go boledišana le molebeledi wa mosepedi.  O ile a tloga a theetša gomme a leka go kwešiša tsela yeo ke bego ke ikwa ka yona. O ile a ba a bonagala a kwešiša poifo yeo ke bego ke e-na le yona ya gore o tla ntshola mabapi le tsela yeo ke bego ke bona dilo ka yona. Ngwanabo rena yo o ile a nkgonthišetša gore tsela yeo ke bego ke ikwa ka yona e be e kwagala, ka gobane le yena o kile a ba le maikwelo a bjalo. Se ruri se ile sa nthuša go tšwela pele.”

Na re ka fo dumelelana le seo se bolelwago e le feela ka baka la gore re nyaka go theetša? Na re ka botša motho yo mongwe gore re leboga go botšwa tsela yeo a ikwago ka yona? Ee. Go thwe’ng ge e ba morwa yo monyenyane a lwele le motho yo mongwe sekolong goba morwedi yo a lego mahlalagading a fihla gae gomme a bolela gore o a ratana? Na ga go kaone gore motswadi a theetše gomme a leke go kwešiša seo mofsa yo a se naganago pele ga ge a ka hlalosa boitshwaro bjo bo nepagetšego le bjo bo fošagetšego?

Diema 20:5 e re: “Maanô pelong ya monna ké meetse a bodiba; a xiwa ke yo thlaloxanyô.” Ge e ba motho yo bohlale le yo a nago le phihlelo a sa rate go nea keletšo ge e se ya kgopelwa, re ka swanelwa ke go mo kgopela gore a e nee. Boemo bo a swana ge e ba re theetša ka lerato. Go nyakega temogo gore re anye motho ditaba. Go botšiša dipotšišo go a thuša, eupša re swanetše go ela hloko gore dipotšišo tša rena di se ke tša tsenelela le ditabeng tša motho ka noši. E ka ba mo go holago go šišinya gore motho yo a thomago go bolela a thome ka ditaba tšeo a ikwago a lokologile go ka di bolela. Ka mohlala, mosadi yo a nyakago go bolela ka mathata a lenyalo la gagwe a ka hwetša go le bonolo go thoma ka go bolela mabapi le kamoo yena le monna wa gagwe ba kopanego ka gona gomme ba nyalana. Motho yo a ilego a tapa bodireding bja Bokriste a ka hwetša go le bonolo go thoma ka go hlalosa kamoo a ilego a ithuta therešo.

Go Theetša ka Lerato ke Tlhohlo

Go theetša ge re kgopišitšwe ke motho yo mongwe e ka ba tlhohlo, ka gobane tshekamelo ya rena ya tlhago ke go nyaka go itšhireletša. Re ka lebeletšana le tlhohlo ye bjang? Diema 15:1 e re: “Phetolô e bolêta e phohliša dipêfêlô; lentšu la xo fêrêlêla le tsoša boxale.” Go kgopela motho ka botho gore a bolele gomme ra theetša ka go se fele pelo ge a dutše a ntšha sello sa gagwe ke tsela e nngwe ya go araba ka bonolo.

Moo go nago le ngangišano e šoro gantši o tla hwetša go e-na le batho ba babedi bao e lego gore ba fo boa-boeletša seo ba šetšego ba se boletše. Yo o nagana gore yola ga a theetše, yola le yena o nagana gore yo ga a theetše. E be e tla ba mo gobotse e le ruri ge nkabe yo mongwe wa bona a be a ka homola gomme a theetša e le ka kgonthe! Ke therešo gore go bohlokwa go bonagatša boitshwaro le go bolela tsela yeo re ikwago ka yona ka tsela e bohlale le e lerato. Beibele e re botša gore: “Matsebe ó swara molomo.”—Diema 10:19.

Bokgoni bja go theetša ka lerato ga bo fo itlela feela. Lega go le bjalo, ke bokgoni bjo bo ka ithutwago ka maiteko le boitayo. Ke bokgoni bjo ruri go holago go bo fihlelela. Go theetša e le ka kgonthe ge ba bangwe ba bolela ke tsela ya go bontšha lerato la rena. Le gona go a re thabiša. Ka gona, ke gabohlale go hlagolela bokgoni bja go theetša ka lerato!

[Mongwalo wa ka tlase]

[Seswantšho go letlakala 11]

Ge re theetša, re swanetše go beela dikgahlego tša rena ka thoko

[Seswantšho go letlakala 12]

Go theetša ge yo mongwe a kgopišegile e ka ba tlhohlo