‘Ditsela tša Jehofa di Lokile’

“Ditsela tša [Jehofa] di lokile. Baloki ba tšea tšôna.”—Hos 14:9, NW.

1, 2. Jehofa o thušitše ba-Isiraele gore ba thome bophelo bja mohuta ofe, eupša go diregile’ng ka bona?

JEHOFA o dirile gore ba-Isiraele ba thome bophelo ka tsela e lokilego mehleng ya moporofeta Moše. Lega go le bjalo, mathomong a lekgolo la seswai la nywaga B.C.E., boemo bja bona e be e le bjo bobe kudu mo Modimo a ilego a bona ba na le molato wa bobe bjo bogolo. Se se bonagala gabotse go Hosea dikgaolo 10 go ya go 14.

² Ba-Isiraele e be e šetše e le baikaketši. Batho ba mmušong woo wa meloko e lesome ba be ba “lema bosenyi” gomme ba buna go se loke. (Hosea 10:1, 13) Jehofa o itše: “Isiraele ke mo ratile mola a sa le ’soxana; morwa wa-ka ke mmiditše kua Egipita.” (Hosea 11:1) Le ge Modimo a ile a phološa ba-Isiraele bokgobeng bja Egipita, ba ile ba mo lefa ka go bolela maaka le ka bofora. (Hosea 12:1) Ka gona, Jehofa o ile a ba nea keletšo ye e rego: “Byale wene, boêla xo Modimo wa xaxo, O tiišê leratô le molaô.”—Hosea 12:7.

3. Go be go tla direga’ng ka Samaria ya lerabele, eupša ba-Isiraele ba be ba tla gaugelwa bjang?

³ Samaria ya lerabele gotee le kgoši ya yona di be di tla welwa ke ditla-morago tše di kwešago bohloko. (Hosea 13:11, 16) Eupša kgaolo ya mafelelo ya boporofeta bja Hosea e tšweletša kgopelo e rego: “Hee Isiraele! Boêla xo Morêna Modimo wa xaxo.” Ge e ba ba-Isiraele ka go itshola ba be ba ka kgopela tebalelo, Modimo o be a tla ba gaugela. Ke therešo gore ba be ba tla swanela go tseba gore “ditsela tša Morêna di lokile” gomme ba sepele ka tšona.—Hos 14:1-6, 9, NW.

4. Re tla ahla-ahla melao efe ya motheo go tšwa boporofeteng bja Hosea?

⁴ Karolo ye ya boporofeta bja Hosea e hupere melao ya motheo e mentši yeo e ka re thušago go sepela le Modimo. Re tla ahla-ahla ye: (1) Jehofa o nyaka borapedi bjo bo se nago boikaketši, (2) Modimo o rata batho ba gagwe ka lerato le le sa kwanantšhego, (3) re swanetše go bota Jehofa ka mehla, (4) ditsela tša Jehofa ka mehla di lokile le (5) badiradibe ba ka boela go Jehofa.

Jehofa o Nyaka Borapedi bjo bo se Nago Boikaketši

5. Ke tirelo ya mohuta ofe yeo Modimo a e letetšego go rena?

⁵ Jehofa o nyaka gore re mo direle tirelo e kgethwa ka tsela e hlwekilego le e se nago boikaketši. Lega go le bjalo, ba-Isiraele ba be ba fetogile “morara” wo o sa enywego. Badudi ba Isiraele ba be ba e-na le ‘dialetare tše dintši’ tšeo ba bego ba di diriša borapeding bja maaka. Bahlanogi ba ba be ba bile ba hlomile dikokwane—mohlomongwe dihlwa-dieme tše di hlametšwego go dirišwa borapeding bjo bo sa hlwekago. Jehofa o be a tlo phušola dialetare tše le go pšhatlaganya dikokwane tše bjalo.—Hosea 10:1, 2.

6. E le gore re sepele le Modimo, ga se ra swanela go ba le seka sefe?

⁶ Boikaketši ga bo nyakege go bahlanka ba Jehofa. Eupša go diregile’ng ka ba-Isiraele? Taba ke gore ‘dipelo tša bona di be di le gabedi’! Le ge ba kile ba ba le kgwerano le Jehofa e le batho ba ineetšego go yena, o ile a bona ba e-na le molato wa boikaketši. Re ka ithuta’ng go se? Ge e ba re ineetše go Modimo, ga se ra swanela go ba baikaketši. Diema 3:32 e lemoša gore: “Morêna ó hlaswa sehlôla, ó kwana le baloki.” E le gore re sepele le Modimo, re swanetše  go bontšha lerato “le le tšwaxo pelong-thsekexi, le letswalong le le sa imelwexo ke molato, le tumelong e se naxo boikaketši.”—1 Timotheo 1:5.

Modimo o Rata Batho ba Gagwe ka Lerato le le sa Kwanantšhego

7, 8. (a) Ke ka tlase ga maemo afe moo re ka thabelago lerato la Modimo le le sa kwanantšhego? (b) Re swanetše go dira’ng ge e ba re dirile sebe se segolo?

⁷ Ge e ba re rapela Jehofa ka tsela e sego ya boikaketši le e lokilego, o tla re bontšha botho bjo lerato, goba o tla re rata ka lerato le le sa kwanantšhego. Ba-Isiraele ba marabele ba ile ba botšwa gore: “Ipyaleleng tokô, Le bunê leratô; ikxatheleng lehwiti, è sa le lebaka la xo nyaka Morêna, xore a tlê a Le nešetše tokô bo-ka pula.”—Hosea 10:12.

⁸ Go ka ba go ile gwa ba kaone ge ba-Isiraele ka go itshola ba ka ba ba ile ba tsoma Jehofa! Ke moka ka lethabo ‘o be a tla ba nešetša toko bo-ka pula.’ Ge e ba re ile ra dira sebe se segolo, anke re tsomeng Jehofa, re mo rapele gore a re lebalele gomme re tsome thušo ya moya go bagolo ba Bakriste. (Jakobo 5:13-16) Anke gape re tsomeng tlhahlo ya moya o mokgethwa wa Modimo, ka gobane “e a byalaxo mo nameng ya xaxwe, se a tl’o xo se buna nameng ké thsenyêxô. E a byalaxo Moyeng, se a tl’o xo se buna Moyeng ké bophelô byo bo sa felexo.” (Ba-Galatia 6:7, 8) Ge e ba re ‘bjala moyeng,’ re tla tšwela pele re thabela lerato la Modimo le le sa kwanantšhego.

9, 10. Hosea 11:1-4 e šoma bjang go Isiraele?

⁹ Re ka kgodišega gore Jehofa ka mehla o dirišana le batho ba gagwe ka tsela e lerato. Bohlatse bja se bo hwetšwa go Hosea 11:1-4, mo re balago gore: “Isiraele ke mo ratile mola a sa le ’soxana; morwa wa-ka ke mmiditše kua Egipita. . . . Ba ya ba ipexa xo bô-Baali le medimo ya diswanthšô, ba iša diôrêlô, Mola è le Nna ke bexo ke tataidiša Efuraimi [ba-Isiraele], kè mo swere ka diatla, ’me bôná ba se tsebe xe ke le Moreku wa bôná. Ka mo xoxa ka manti a setho, ka lerala la leratô. Se ke ba dirilexo sôna e be e le xo ba rola yoko molaléng, ka inama ka ba nea dijô.”

¹⁰ Mo Isiraele e swantšhwa le ngwana yo monyenyane. Jehofa ka lerato o ile a ruta ba-Isiraele go sepela, a ba kuka ka matsogo a gagwe. Le gona o ile a dula a ba goga “ka lerala la leratô.” A seswantšho se se kgomago pelo gakaakang! Akanya o le motswadi o thuša ngwana wa gago yo monyenyane go ithuta go sepela. Matsogo a gago a otlologile. O ka ba o diriša marala bakeng sa gore ngwana wa gago yo monyenyane a swarelele ka ona e le gore a se ke a wa. Ka mo go swanago, Jehofa o go rata ka tsela e bjalo e borutho. O thabela go go hlahla “ka lerala la leratô.”

11. Ke ka tsela efe Modimo a ilego a ‘rola yoko molaleng’ wa Isiraele?

¹¹ Ge a dirišana le ba-Isiraele, Jehofa o ile a “ba rola yoko molaléng, [a] inama [a] ba nea dijô.” Modimo o ile a tloša joko goba a e iša morago ka mo go lekanego e le gore phoofolo e kgone go ja e iketlile. Ke feela ka morago ga ge ba-Isiraele ba robile joko ya bona ya go ikokobeletša Jehofa moo ba ilego ba ba ka tlase ga joko e gatelelago ya manaba a bona. (Doiteronomio 28:45, 48; Jeremia 28:14) Anke le ka mohla re se ke ra laolwa ke lenaba la rena le legolo, Sathane, gomme ra kwešwa bohloko ke joko ya gagwe e gatelelago. Go e na le moo, a re tšweleng pele re sepela ka potego le Modimo wa rena yo lerato.

 Botang Jehofa ka Mehla

12. Go ya ka Hosea 12:7, go nyakega’ng gore re tšwele pele re sepela le Modimo?

¹² E le gore re tšwele pele re sepela le Modimo, re swanetše go mmota ka mehla. Ba-Isiraele ba boditšwe gore: “Byale wene, boêla xo Modimo wa xaxo, O tiišê leratô le molaô, O dulê Ò botile Modimo wa xaxo.” (Hosea 12:7) Badudi ba Isiraele ba be ba ka ipontšha ba itshola gomme ba boela go Jehofa ka go ba le botho bjo lerato, ka go dira toka le ka go ‘dula ba botile Modimo.’ Go sa šetšwe gore re sepetše le Modimo ka nako e kaakang, re swanetše go ikemišetša go bontšha botho bjo lerato, go bontšha toka le go bota Modimo ka mehla.—Psalme 27:14.

13, 14. Paulo o diriša bjang Hosea 13:14, gomme o re nea lebaka lefe la go bota Jehofa?

¹³ Boporofeta bja Hosea mabapi le ba-Isiraele bo re nea lebaka le le kgethegilego la go bota Modimo. Jehofa o itše: “Ke tlo ba phološa kwa bo-dula-bahu; mo lehung ke tlo ba namolêla. Hee lehu! Mahloko a xaxo a kae? Hee bo-dula-bahu! Thsenyô ya xaxo e kae?” (Hosea 13:14) Jehofa o be a ka se phološe ba-Isiraele lehung la kgonthe ka nako yeo, eupša mafelelong o be a tla dira gore lehu le se sa ba gona gomme a fediša phenyo ya lona.

¹⁴ Ge a ngwalela Bakriste-gotee le yena ba tloditšwego, Paulo o ile a tsopola boporofeta bja Hosea gomme a ngwala gore: “Mohla tše di bôlaxo tšé xe di apešwa xo se bôle, xe di hwaxo tšé di apere xo se hwe, ké mo xo tl’o xo tšwêlêla se se boletšwexo ke lengwalô le le rexo: Lehu le meditšwe ya ba phenyô. Hee Lehu! Lebôla la xaxo le kae! Hee Bo-dula-bahu! Xo fenya xa xaxo xo kae! Xe e le lebôla la lehu ké sebe; ’me matla a sebe ké Molaô. Xomme a xo leboxwê Modimo e a re faxo xo fenya ka Mong wa rena Jesu Kriste.” (1 Ba-Korinthe 15:54-57) Jehofa o tsošitše Jesu bahung, ka go rialo a nea kgonthišetšo e homotšago kudu ya gore batho bao ba lego kgopolong ya Modimo ba tla tsošwa. (Johane 5:28, 29) A lebaka le le thabišago gakaakang la gore re bote Jehofa! Lega go le bjalo, go tlaleletša kholofelong ya tsogo go na le selo se sengwe seo se re tutueletšago go sepela le Modimo.

Ditsela tša Jehofa ka Mehla di Lokile

15, 16. Go boletšwe’ng e sa le pele mabapi le Samaria, gomme boporofeta bjoo bo ile bja phethagatšwa bjang?

¹⁵ Go kgolwa ga rena gore ‘ditsela tša Jehofa di lokile’ go re thuša gore re tšwele pele re sepela le Modimo. Badudi ba Samaria ba be ba sa sepele ditseleng tša Modimo tše di lokilego. Mafelelong, ba be ba tla swanelwa ke go buna ditla-morago tša dibe tša bona le go hloka tumelo ga bona go Jehofa. Go boletšwe e sa le pele gore: “Samaria ó tlo ôtlwa ka molato wa xe a tsoxetše Modimo wa xaxwe. Ba tlo fêla ka lerumô; bana ba bôná ba tlo phšatlaxanywa; baima ba bôná ba tlo fatolwa.” (Hosea 14:1) Dipego tša histori di bontšha gore ba-Asiria, bao ba fentšego Samaria, ba be ba e-na le bokgoni bja go ka dira bošoro bjo bjalo bjo bo šiišago.

¹⁶ Samaria e be e le motse-mošate wa mmušo wa meloko e lesome wa Isiraele. Lega go le bjalo, leina Samaria mo le ka ba le šupa go tikologo ka moka ya mmušo woo. (1 Dikxoši 21:1) Kgoši ya Asiria e lego Salamanasere V, e ile ya hlasela motse wa Samaria ka 742 B.C.E. Ge Samaria mafelelong e be e e-wa ka 740 B.C.E., badudi ba yona ba bantši ba tumilego ba ile ba išwa bothopša kua Mesopotamia le Meda. Taba ya ge e ba Samaria e ile ya thopša ke Salamanasere V goba mohlatlami wa gagwe Saragone II e  sa dutše e le taba e sa kgonthišetšwago. (2 Dikxoši 17:1-6, 22, 23; 18:9-12) Lega go le bjalo, pego ya Saragone e bolela ka go išwa ga ba-Isiraele ba 27 290 dinageng tše di lego tikologong ya ka Godimo ya Eforate le Meda.

17. Go e na le go nyatša ditekanyetšo tša Modimo, re swanetše go dira’ng?

¹⁷ Badudi ba Samaria ba ile ba buna ditla-morago tše šoro ka baka la go palelwa ga bona ke go sepela ka go dumelelana le ditsela tša Jehofa tša go loka. Ka ge re le Bakriste ba ineetšego, le rena re ka buna ditla-morago tše šoro ge e ba re thoma go itlwaetša go dira dibe e bile re nyatša ditekanyetšo tša Modimo tša go loka. Anke le ka mohla re se ke ra phegelela tsela e bjalo e kgopo! Go e na le moo, a re direng dilo ka go dumelelana le keletšo ya moapostola Petro e rego: “Mo xo lena xo se kê xwa ba le e a hlokofatšwaxo è le mmolai xoba lehodu, xoba sesenyi xoba sehwirihwiri. Xe motho a ka hlokofatšwa ka xore e le Mokriste, a se kê a kwa dihlong; a a retišê Modimo ka lôna ’ina leo.”—1 Petro 4:15, 16.

18. Re ka ‘tšwela pele bjang re reta Modimo’?

¹⁸ Re ‘tšwela pele re reta Modimo’ ka go sepela ditseleng tša gagwe tša go loka go e na le go dira dilo ka tsela ya rena. Kaine o ile a bolaya ka gobane a ile a dira dilo ka tsela ya gagwe gomme a palelwa ke go kwa temošo ya Jehofa ya gore sebe se be se le kgaufsi le go mo fenya. (Genesi 4:1-8) Bileama o ile a amogela tefo e tšwago go kgoši ya Moaba gomme a leka go rogaka Isiraele eupša a palelwa. (Numeri 24:10) Le gona, Modimo o ile a bolaya Kora wa mo-Lefi le ba bangwe ka baka la go rabela ga bona malebana le bolaodi bja Moše le Arone. (Numeri 16:1-3, 31-33) Ka kgonthe, ga re nyake go sepela ‘ka tsela ya Kaine ya polao,’ ra itahlela ‘tseleng e fošagetšego ya Bileama,’ goba ra bolawa ke ‘bonganga bja Kora.’ (Juda 11) Lega go le bjalo, ge e ba re ka dira sebe, boporofeta bja Hosea bo re nea khomotšo.

Badiradibe ba ka Boela go Jehofa

19, 20. Ba-Isiraele bao ba itsholago ba be ba kgona go nea Modimo dibego dife?

¹⁹ Gaešita le bao ba ilego ba kgopša ka go dira sebe se segolo ba ka boela go Jehofa. Go Hosea 14:2, 3, re hwetša kgopelo ye e rego: “Hee Isiraele! Boêla xo Morêna Modimo wa xaxo, xobane O ušitšwe ke dibe tša xaxo. Tlang le ditaba tša lena, Le boêlê xo Modimo Lè re: Re lebalêlê molato ka moka, O re dirê ka botho; re tlê re Xo leboxê ka dibexô tša molomo.”

²⁰ Ba-Isiraele bao ba itsholago ba be ba kgona go nea Modimo ‘dibego tša melomo ya bona.’ Dibego tše e be e le theto e tšwago pelong. Paulo o ile a lebiša tlhokomelo boporofeteng bjo ge a be a kgothaletša Bakriste gore ba “[ipege] xo Modimo ka sedimo sa thêtô, e lexo sôna seenywa sa melomo ye e ipolêlaxo ka Leina la xaxwe.” (Ba-Hebere 13:15) Re na le tokelo e kgolo gakaakang ya go sepela le Modimo le go mo nea dibego tše bjalo lehono!

21, 22. Ba-Isiraele bao ba itsholago ba be ba tla tsošološwa ka tsela efe?

²¹ Ba-Isiraele bao ba tlogetšego tsela ya bona ya borabele gomme ba boela go Modimo ba ile ba mo leboga ‘ka dibego tša melomo ya bona.’ Ka baka leo, ba ile ba tsošološwa moyeng, go etša ge Modimo a be a holofeditše. Hosea 14:5-8 e re: “Thlanoxô ya bôná [nna Jehofa] ke tlo e alafa; ke tlo ba rata ka xo ithapa, xobane pefêlô ya-ka e ba xometše. Xo Isiraele ke tlo etša pula; ó tlo taxa byalo ka letšoba; ó tlo nama medu bo-ka Libanoni. Mahloxedi a xaxwe a tlo tlala, a taxa wa mohlware, monkô wa xaxwe wa tlo ka wa Libanoni. Xo tlo boa ba xo dula moriting wa  xaxwe; ba tlo lema mabêlêʹ; ba tlo bea matšobana wa morara, ba tlo rêtwa wa morara wa Libanoni.”

²² Ba-Isiraele ba itsholago ba be ba tla fodišwa moyeng gomme ba be ba tla thabela lerato la Modimo gape. Jehofa o be a tla ba bjalo ka phoka e lapološago go bona ka kgopolo ya gore o be a tla ba šegofatša ka mo go feletšego. Batho ba gagwe ba ba tsošološitšwego ba be ba tla ‘taga bjalo ka mohlware,’ gomme ba be ba tla sepela ditseleng tša Modimo. Ka ge re ikemišeditše go sepela le Jehofa Modimo, ke’ng seo se nyakegago go rena?

Tšwelang Pele le Sepela Ditseleng tša Jehofa tša go Loka

23, 24. Puku ya Hosea e phetha ka boporofeta bofe bjo bo kgothatšago, gomme bo re kgoma bjang?

²³ E le gore re tšwele pele re sepela le Modimo, re swanetše go bontšha “bohlale bjo bo tšwaxo xodimo” gomme ka dinako tšohle re dire dilo ka go dumelelana le ditsela tša gagwe tša go loka. (Jakobo 3:17, 18) Temana ya mafelelo ya boporofeta bja Hosea e balega ka gore: “Yo bohlale ké mang a kaxo hlaloxanya dilô tšé? Yo a naxo le temoxô a di tseba? Xobane ditsela tša Morêna di lokile. Baloki ba tšea tšôna; basenyi bôná ba tlo kxopya mo xo tšôna.”—Hos 14:9, NW.

²⁴ Go e na le go hlahlwa ke bohlale le ditekanyetšo tša lefase le, anke re ikemišetšeng go sepela ditseleng tša Modimo tša go loka. (Doiteronomio 32:4) Hosea o dirile seo ka nywaga e 59 goba go feta moo. O ile a fetiša melaetša ya Modimo ka potego, a tseba gore ba bohlale le ba nago le temogo ba be ba tla kwešiša mantšu a bjalo. Go thwe’ng ka rena? Ge feela Jehofa a sa re dumeletše gore re nee bohlatse, re tla tšwela pele re tsoma bao ka bohlale ba tla amogelago botho bja gagwe bjo bo sa swanelago. Le gona, re thabela go dira se re dirišana ka mo go feletšego le “molaki e a bôtêxaxo yo bohlale.”—Mateo 24:45-47.

25. Go hlahloba ga rena boporofeta bja Hosea go swanetše go re thuša gore re dire’ng?

²⁵ Go hlahloba ga rena boporofeta bja Hosea go swanetše go re thuša gore re tšwele pele re sepela le Modimo re lebeletše pele bophelong bjo bo sa felego lefaseng la gagwe le lefsa leo a le holofeditšego. (2 Petro 3:13; Juda 20, 21) A kholofelo e kgahlišago gakaakang! Kholofelo yeo e tla phethagala go rena ge e ba re tšwela pele re bontšha ka mantšu le ka ditiro gore re tloga re tiišitše ge re re: ‘Ditsela tša Jehofa di lokile.’

O tla Araba Bjang?

• Jehofa o tla dirišana le rena bjang ge e ba re mo rapela ka tsela e hlwekilego?

• Ke ka baka la’ng re swanetše go bota Jehofa ka mehla?

• Ke ka baka la’ng o kgodišegile gore ditsela tša Jehofa di lokile?

• Re ka tšwela pele bjang re sepela ditseleng tša Jehofa tša go loka?

[Dipotšišo tša Thuto]

[Seswantšho go letlakala 28]

Amogela thušo ya moya e tšwago go bagolo ba Bakriste

[Seswantšho go letlakala 29]

Boporofeta bja Hosea bo re nea lebaka la go bota dikholofetšo tša Jehofa tša tsogo

[Diswantšho go letlakala 31]

Tšwela pele o sepela le Modimo o lebeletše pele bophelong bjo bo sa felego