‘Lerato la Lena Bohle le Fela le Gola’

DIKOTSI tša tlhago tše mmalwa di ile tša wela Japane ka 2004. Gare ga tšona e bile madimo, mafula le ditšhišinyego tša lefase. Di ile tša kgoma maphelo a ba bantši gabohloko, go akaretša le a Dihlatse tša Jehofa. (Mmoledi 9:11) Lega go le bjalo, mathata a a neile Dihlatse sebaka sa go bontšhana lerato la borwarre.—1 Petro 1:22.

Ka mohlala, noka ya kua bogareng bja Japane e ile ya tlala wa go falala ka lebaka la dipula tše dikgolo tša July. Meetse a ile a senya dintlo tše fetago 20 tša Dihlatse tša Jehofa. Ka Holong e nngwe ya Mmušo meetse a ile a tlala go fihla mo e ka bago mithara o tee go tloga lebatong. Dihlatse tša go tšwa diphuthegong tša kgaufsi di ile tša tla gatee-tee go tla go thuša. Baithapi ba makgolo ba ile ba hlwekiša dintlo tšeo di bego di tletše maraga. Holo ya Mmušo e ile ya hlwekišwa gabotse le go lokišwa ka dibeke tše pedi feela.

Ka di-23 tša October tšhišinyego ya lefase yeo e kalago 6,8 sekaleng sa Richter e ile ya senya lona lefelo leo. Bonyenyane batho ba 40 ba ile ba hlokofala gomme batho ba fetago 100 000 ba ile ba swanelwa ke go ntšhwa magaeng a bona. Meetse, peterole le mohlagase di ile tša se sa hwetšagala. Holo ya Mmušo yeo e mpshafaditšwego ga se ya senywa, gaešita le ge mothopo wa tšhišinyego o be o le bokgoleng bja dikhilomithara tše 50 go tloga go yona. Gatee-tee e ile ya fetoga lefelo la go nea thušo la nakwana. Ka go akgofa, balebeledi ba Bakriste ba ile ba nyakišiša ge e ba badumedi-gotee le bona ba bolokegile, gomme ba ile ba imologa ge ba hwetša gore ga go na yo a gobetšego goba yo a hwilego. Dihlatse tše tshela tšeo e kilego ya ba bahlaselwa ba mafula a July, ka phišego di ile tša ithapa gore letšatši le le latetšego ka mahwibi di iše dijo le meetse lefelong leo le kgomilwego ke tšhišinyego. Diiri tše sego kae ka morago ga tšhišinyego, thoto ya go thuša e ile ya hwetšagala.

Molebeledi yo mongwe o ile a hlalosa gore: “Bao e kilego ya ba bahlaselwa ba mafula ba ile ba lebelela modiro wa go thuša bao ba kgomilwego ke tšhišinyego ya lefase e le sebaka se sebotse sa go bontšha tebogo thušong yeo bona ka noši ba ilego ba e hwetša. Ba ile ba šoma ka thata go tloga ka mahwibi go fihla bošego. Difahlego tša bona di be di phadima ka lethabo gakaakang!”

Tlemo ya lerato yeo e tlemaganyago borwarre bja Bokriste bja Dihlatse tša Jehofa ga e tšhošetšwe ke mafula goba ditšhišinyego tša lefase. Go fapana le moo, ge dikotsi tše bjalo di tšwelela, Bakriste ba lemoga seo moapostola Paulo a ilego a se botša badumedi-gotee le yena ba Thesalonika ge a re: ‘Lerato la lena bohle le fela le gola.’—2 Ba-Thesalonika 1:3.