Na o Lebelela Diabolo e le Motho wa Kgonthe?

MANGWALO a hlalosa Diabolo e le motho wa kgonthe. Batho ba ka se kgone go mmona go fo swana le ge ba ka se kgone go bona Modimo. Beibele e re: “Modimo ké Môya.” (Johane 4:24) Diabolo ke sebopiwa sa moya. Lega go le bjalo, ka go se swane le Mmopi, Diabolo o bile le mathomo.

Nako e telele pele ga ge Jehofa Modimo a ka bopa batho, o bopile dibopiwa tše dintši kudu tša moya. (Jobo 38:4, 7) Ka Beibeleng, meoya ye e bitšwa barongwa. (Ba-Hebere 1:13, 14) Ka moka ga bona ba bopilwe ke Modimo ba phethagetše—ga go le o tee wa bona yo e bego e le diabolo goba yo a bego a e-na le mekgwa e mebe. Bjale, Diabolo o bile gona bjang? Lentšu “diabolo” le bolela “mothomeletši” gomme ka go rialo le bolela ka motho yo a bolelago maaka a šoro ka ba bangwe. Leina “Sathane” le bolela “Moganetši,” goba lenaba. Go fo swana le ge monna yo a bego a botega a itira lehodu ka go utswa, yo mongwe wa bana ba moya ba Modimo bao ba phethagetšego o ile a dira dilo go ya ka kganyogo e mpe gomme a itira Sathane Diabolo. Beibele e hlalosa seo se dirago gore motho a goboge ge e re: “Mang le mang e a lekwaxo, ó xokwa à xôxwa ke tumô ya xaxwe. ’Me tumô xe e amere, e tswala sebe; sebe sôna xe se phethexile, se tswala lehu.”—Jakobo 1:14, 15.

Se ke seo ge e le gabotse se diregilego. Ge Jehofa Modimo a be a bopa banyalani ba pele ba batho e lego Adama le Efa, morongwa yo a bego a le kgaufsi le go rabela malebana le Modimo o be a lebeletše ka kgahlego. O tsebile gore Jehofa o laetše Adama le Efa gore ba tlatše lefase ka batho bao ba lokilego, bao ba bego ba tla rapela Mmopi. (Genesi 1:28) Morongwa yo o bone gore go be go e-na le kgonagalo ya gore a ka hlompšha le go lebelelwa e le yo bohlokwa. A tutuetšwa ke megabaru, o ile a duma seo ka mo go swanetšego e bego e le sa Mmopi a nnoši—go rapelwa ke batho. Go e na le go lwantšha kganyogo e bjalo e sa swanelago, morwa yo wa Modimo wa moya o ile a godiša kganyogo yeo go fihlela e tswala maaka gomme ya feleletša ka borabele. Ela hloko seo a se dirilego.

Morongwa yo wa lerabele o dirišitše noga go bolela le Efa mosadi wa pele. Noga e ile ya botšiša  Efa ya re: “Afá Modimo ó boletše a re: Dihlare tšohle tša thšemo yé Le se kê la di ja?” Ge Efa a be a bolela seo Modimo a se laetšego le kotlo ya go se kwe taelo yeo, noga e ile ya re: “Le ka se kê la hwa lehu. Xe e le Modimo, yêna ó tseba xore mohla Lè se jaxo [sehlare se se lego gare ga tšhemo] mahlô a lena a tlo buduloxa la ba byalo ka Modimo, la tseba botse le bobe.” (Genesi 3:1-5) Ge e le gabotse, o be a bolela gore Modimo o boditše Adama le Efa maaka. Ka go ja seenywa sa sehlare seo, go thwe Efa o be a tla swana le Modimo, a ba le tshwanelo ya go dira phetho mabapi le se sebotse le se sebe. Ao e be e le maaka a mathomo ao a kilego a bolelwa. Go a bolela go dirile gore morongwa yoo e be mothomeletši. Le gona o ile a fetoga moganetši wa Modimo. Ka gona Beibele e bolela ka lenaba le la Modimo e le “nôxa e kxolo . . . yôna ye ba rexo ké Diabolo le Sathane.”—Kutollo 12:9.

“Le Phakxamê”

Maaka ao Diabolo a a boditšego Efa a ile a atlega kamoo a bego a rulagantše ka gona. Beibele e re: “Byale mosadi a bôna sehlare seo è le se se bose xe se ka lewa, sè ratêxa xe se lebêlêlwa, sè kxanyoxêxa ka xe se hlalefiša; a bá a fula dienywa tša sôna, a ja, a neêla le monna wa xaxwe e a bexo a na yêna; le yêna a ja.” (Genesi 3:6) Efa o ile a kgolwa Sathane gomme a se kwe Modimo. O ile a kgona go dira gore Adama le yena a robe molao wa Modimo. Ka baka leo, Diabolo o ile a atlega tabeng ya go dira gore banyalani ba ba pele ba batho ba rabele go Modimo. Ga e sa le go tloga ka nako yeo, Sathane o bile le tutuetšo e sa bonagalego medirong ya batho. Pakane ya gagwe ke efe? O nyaka gore batho ba se ke ba rapela Modimo wa therešo gomme ba rapele yena. (Mateo 4:8, 9) Ka baka leo, Mangwalo a lemoša ka lebaka le le kwagalago gore: “Le phafoxê le phakxamê, xobane Diabolo lenaba la lena ó Le dikoloxa bo-ka tau e bôpaxo; ó nyaka yo a kaxo mo metša.”—1 Petro 5:8.

Ruri Beibele e bontšha gabotse kudu gore Diabolo ke motho wa kgonthe wa moya—morongwa yo a ilego a goboga le yo kotsi! Mogato wa pele wo o nyakegago tabeng ya go dula re phafogile ke go lemoga gore ruri o gona. Eupša go dula re phafogile le go phakgama go akaretša mo gontši. Le gona go bohlokwa gore re se ke ra hlokomologa “maanô” a Sathane le mekgwa ya gagwe ya go aroša batho. (2 Ba-Korinthe 2:11) O diriša maano afe? Le gona re ka ema bjang re tiile malebana le ona?

Diabolo o Ikhola ka Senyakwa sa Motho sa Tlhago

Diabolo o be a dutše a bogetše batho go tloga mola ba bopšago. O tseba tsela yeo motho a bopilwego ka yona—dinyakwa tša gagwe, dilo tšeo a di ratago le tšeo a di kganyogago. Sathane o tseba gabotse gore motho o bopilwe a e-na le senyakwa sa moya, gomme Diabolo ka mahlajana o ikhola ka senyakwa se. Bjang? Ka go ruta batho maaka a bodumedi. (Johane 8:44) Dithuto tše dintši tša bodumedi mabapi le Modimo di a thulana e bile di a gakantšha. O nagana gore dilo tše di phethagatša morero wa mang? Dithuto tše di thulanago ga se ka moka e ka bago tša therešo. Ka gona, na ga se therešo gore dithuto tše dintši tša bodumedi di hlamilwe ka go lebanya ke Sathane le gona o di dirišetša go fapoša batho? Ge e le gabotse, Beibele e bolela ka yena e le “modimo wa lefase lé,” yo a foufaditšego menagano ya batho.—2 Ba-Korinthe 4:4.

Go tseba therešo ka Modimo go re šireletša malebana le bofora bja bodumedi. Beibele e swantšha therešo ya Lentšu la Modimo le lepanta leo mohlabani wa mehleng ya bogologolo a bego a le bofa bakeng sa go šireletša matheka. (Ba-Efeso 6:14) Ge e ba o monya tsebo ya Beibele gomme o phela ka go dumelelana le molaetša wa yona, go le bjalo ka ge eka o e bofile  bjalo ka lepanta, Lentšu la Modimo le tla go šireletša e le gore o se arošwe ke maaka le bofora bja bodumedi.

Go sekamela ga motho dilong tša moya go dirile gore a fetleke dilo tše di sa tsebjego. Se se mo dirile gore a be kotsing ya go wela go o mongwe wa melaba ya Sathane ya bofora. E le go ikhola ka kganyogo ya batho ya go rata go tseba mabapi le selo seo se sa tlwaelegago le seo se sa tsebjego, Sathane o šomišitše mekgwa ya go dirišana le meoya bakeng sa go laola batho. Go fo swana le ge motsomi a diriša segoketši bakeng sa go gogela selo seo a nyakago go se tanya, Sathane o diriša mekgwa e bjalo ka bodupe, bolepi bja dinaledi, go fefeanya, boloi, go laola ka methalo ya diatla le maleatlana bakeng sa go gogela le go tanya batho lefaseng.—Lefitiko 19:31; Psalme 119:110.

O ka itšhireletša bjang gore o se ke wa wela molabeng wa go dirišana le meoya? Doiteronomio 18:10-12 e re: “Xo wêna xo se kê xwa hwetšwa e a išaxo morwa wa xaxwe xoba morwedi wa xaxwe mollong, le e a diraxo tša bonoxê le tša maphalô, le e a upaxo ka meupô le boloi. Xo se kê xwa hwetšwa wa malôpô le e a botšišaxo badimo, le xe e le sedupê, le e a nyakaxo selô bahung. Ka xobane ba ba diraxo tše byalo, Morêna ó bôna e le makxapa; xomme xe Morêna Modimo wa lena a ba raka xe Le fihla, ké ka ’baka la bohlôla byoo.”

Keletšo ya Mangwalo ke e lebanyago: O se ke wa dirišana le meoya. Go thwe’ng ge e ba o be o dutše o tšea karolo medirong e mengwe ya go dirišana le meoya gomme ga bjale o nyaka go e tlogela? O ka latela mohlala wa Bakriste ba pele ba motseng wa Efeso. Beibele e re ge ba be ba amogela “lentšu la Morena,” “ba bantši ba ba bexo ba dirile tša bonoxê kxalê, ba kxobokanya dipuku tša mohuta woo, ba di fiša pepeneneng.” Dipuku tšeo di be di bitša kudu. Di be di lekana ditsekana tše 50 000 tša silifera. (Ditiro 19:19, 20) Lega go le bjalo, Bakriste ba kua Efeso ga se ba ka ba dika-dika go di fiša.

Sathane o Ikhola ka Mafokodi a Batho

Morongwa yo a phethagetšego o fetogile Sathane Diabolo ka gobane o ile a ineela kganyogong ya go nyaka go ikgodiša. Le gona o ile a tsošetša Efa kganyogo ya boikgogomošo le ya boithati ya go nyaka go swana le Modimo. Lehono, Sathane o laola batho ba bantši ka go ba tsošetša maikwelo a boikgogomošo. Ka mohlala, ba bangwe ba nagana gore mmala wa bona wa letlalo, morafo wa bona goba setšhaba di kaone go feta tša ba bangwe. Ruri se se fapana le seo Beibele e se rutago! (Ditiro 10:34, 35) Beibele e bolela gabotse gore: “[Modimo] ké Yêna a dirilexo xore meloko ka moka ya batho e tšwê mading a o tee.”—Ditiro 17:26.

Boikokobetšo ke tšhireletšo e šomago malebana le boikgogomošo bjo Sathane a nyakago gore re be le bjona. Beibele e re kgothaletša gore ‘re se ke ra inagana kudu go feta ka mo go swanetšego.’ (Ba-Roma 12:3) E re: “Modimo ó lwa le baikxodiši; ba xo ikokobetša ó ba sétša ka dikxauxêlô.” (Jakobo 4:6) Tsela e nngwe e kgonthišeditšwego bakeng sa go lwantšha maiteko  a Sathane ke go bontšha boikokobetšo le dika tše dingwe tšeo di amogelwago ke Modimo bophelong bja gago.

Diabolo o bile o fišegela go ikhola ka mafokodi a batho a go ineela dikganyogong tša nama tše di sa swanelago. Jehofa Modimo o be a rerile gore batho ba thabele bophelo. Ge dikganyogo di kgotsofatšwa ka go dumelelana le ditekanyetšo tša thato ya Modimo, mafelelo e ba lethabo la kgonthe. Eupša Sathane o leka batho gore ba kgotsofatše dikganyogo tša bona ka ditsela tše di gobogilego. (1 Ba-Korinthe 6:9, 10) Go kaone kudu go dula o tsepamišitše monagano wa gago dilong tše di hlwekilego le tše di lego bolo. (Ba-Filipi 4:8) Se se tla go thuša gore o laole dikgopolo tša gago le maikwelo ka go tia.

Tšwela Pele o Ganetša Diabolo

Na o ka atlega tabeng ya go ganetša Diabolo? Ee, o ka atlega. Beibele e re kgonthišetša gore: “Le lwê le Diabolo, ’me ó tlo Le thšaba.” (Jakobo 4:7) Gaešita le ge o ganetša Sathane, a ka se ke a nyema moko di sa tloga fase gomme a kgaotša go go bakela mathata a oketšegilego ge o dutše o monya tsebo ka Modimo. Ge e le gabotse, Diabolo o tla leka gape ‘ka lebaka le lengwe.’ (Luka 4:13) Lega go le bjalo, ga se wa swanela go boifa Diabolo. Ge o tšwela pele o e-lwa le yena, a ka se ke a kgona go go fapoša go Modimo wa therešo.

Lega go le bjalo, go ganetša Diabolo go nyaka gore re tsebe gore ke mang le gore o fapoša batho bjang gotee le go tseba megato e šireletšago yeo re ka e gatago malebana le maano a gagwe. Mothopo o tee feela o nepagetšego wa tsebo yeo ke Lentšu la Modimo e lego Beibele. Ka gona tia boikemišetšong bja gago bja go ithuta Mangwalo ao a buduletšwego, gomme o diriše seo a go rutago sona bophelong bja gago. Dihlatse tša Jehofa tikologong ya geno di tla thabela go go thuša ka ntle le tefo ka thuto e bjalo ka nako yeo e go loketšego. Hle o se ke wa dika-dika go ikgokaganya le tšona goba go ngwalela bagatiši ba makasine wo.

Ge o dutše o ithuta Beibele, o swanetše go lemoga gore Sathane a ka diriša kganetšo goba tlaišo go go dira gore o kgaotše go ithuta therešo e tšwago Lentšung la Modimo. Ba bangwe ba bao o ba ratago ba ka go galefela ka gobane o ithuta Beibele. Se se ka direga ka gobane ga ba tsebe ditherešo tše dibotse tšeo di hwetšwago go yona. Ba bangwe ba ka go kwera. Eupša na ruri go ineela dikgateletšong tše bjalo go tla thabiša Modimo? Diabolo o nyaka go go nyamiša gore o kgaotše go ithuta ka Modimo wa therešo. O tla ba o direla’ng ge o tlogela Sathane gore a fenye? (Mateo 10:34-39) Ga o mo kolote selo. O kolota Jehofa bophelo bja gago ka bobjona. Ka gona, ikemišetše go lwa le Diabolo gomme ‘o thabiše pelo ya Jehofa.’—Diema 27:11.

[Seswantšho go letlakala 6]

Bao e ilego ya ba Bakriste ba ile ba fiša dipuku tša bona tšeo di lego mabapi le go dirišana le meoya

[Seswantšho go letlakala 7]

Dira phetho e tiilego ya gore o ithute Beibele