Sepela le Modimo, Gomme o Bune tše Dibotse
Sepela le Modimo, Gomme o Bune tše Dibotse
“Ba byetše phefô, ba buna ledimo.”—HOSEA 8:7.
1. Re ka sepela bjang le Jehofa?
LEETO la go sepela go phatša tikologong e kotsi e be e tla ba le le šireletšegilego ge e ba mosepediši yo a nago le phihlelo a be a ka eta pele. E be e tla ba gabohlale go sepela le mosepediši yo bjalo go e na le go sepela re le noši. Ka ditsela tše dingwe, se se swantšhetša boemo bjoo re lego go bjona. Jehofa ka tsela ya seswantšhetšo, o ikemišeditše go re hlahla go phatša leganata le legolo la lefase le lebe la gona bjale. Re ba bohlale ge re sepela le yena go e na le go leka go hlahla dikgato tša rena. Re ka sepela bjang le Modimo? Ka go latela tlhahlo yeo a e neago ka Lentšung la gagwe.
2. Go tla ahla-ahlwa’ng sehlogong se?
2 Sehlogo se se fetilego se ahla-ahlile terama ya seswantšhetšo yeo e hwetšwago go Hosea dikgaolo 1 go ya go 5. Go etša ge re bone, terama yeo e na le dithuto tšeo di ka re thušago go sepela le Modimo. Bjale, anke re ahla-ahleng tše dingwe tša dintlha tše dikgolo tša dikgaolo 6 go ya go 9. E tla ba mo go holago go thoma ka kakaretšo ya dikgaolo tše tše nne.
Kakaretšo e Kopana
3. Hlalosa ka boripana seo se huperwego ke Hosea dikgaolo 6 go ya go 9.
3 Jehofa o ile a roma Hosea gore a yo porofeta ka mo go kgethegilego mmušong wa ka leboa wa meloko e lesome wa Isiraele. Setšhaba seo, se gape se bego se reeletšwe ka Efuraimi e lego moloko wa sona o mogolo, se be se hlanogetše Modimo. Hosea dikgaolo 6 go ya go 9 e bontšha gore batho ba be ba ipontšha ba sa botege ka go senya kgwerano ya Jehofa le go dira bobe. (Hosea 6:7) Ba ile ba tsena bogwereng bjo kotsi le lefase go e na le go boela go Jehofa. Ka ge ba be ba tšwela pele ba bjala se sebe, ba be ba tla buna se sebe. Ka mantšu a mangwe, kahlolo e šoro e be e le kgaufsi. Eupša boporofeta bja Hosea bo hupere gape le molaetša o thabišago. Batho ba ile ba kgonthišetšwa gore ba be ba ka kgona go boela go Jehofa gomme ba gaugelwa ge e ba ba be ba itshola go tšwa pelong.
4. Ke dithuto dife tše di šomago tše di tšwago boporofeteng bja Hosea tšeo re tlago go di ahla-ahla?
4 Go tšwa dikgaolong tše tše nne tša boporofeta bja Hosea, re ka hwetša tlhahlo e oketšegilego yeo e tlago go re thuša go sepela le Modimo. Anke re eleng hloko dithuto tše nne tše di šomago: (1) Go itshola ga kgonthe go bonagatšwa ka mediro, e sego ka mantšu feela; (2) dihlabelo di nnoši ga di kgahliše Modimo; (3) Jehofa o kwa bohloko ge barapedi ba gagwe ba mo furalela; le (4) e le gore re bune tše dibotse, re swanetše go bjala tše dibotse.
Kamoo Boitsholo bja Kgonthe bo Bonagatšwago ka Gona
5. Hlalosa kgwekgwe ya seo se bolelwago go Hosea 6:1-3.
5 Boporofeta bja Hosea bo re ruta mo gontši ka boitsholo le kgaugelo. Go Hosea 6:1-3 re bala gore: “Tlang re boêleng xo Morêna! Ké Yêna a re xarolantšexo; ’me ké Yêna a tl’o xo re fodiša. Ké Yêna a re xobaditšexo; ’me ké Yêna a tl’o xo re fapa. Xo tlo re xò feta matšatši a mabedi, a re phediša; ka la boraro ó tlo re emiša, xore re phelê pele xa xaxwe. A re phafoxeng re phêxêlêlê xo mo tseba, Yêna Morêna; xo tleng xa xaxwe ó etša mahuba ma-tla-ka-nakô. Ó tlo re tlêla bo-ka pula, byalo ka thseola xe e kolobiša naxa.”
6-8. Ke’ng se se bego se fošagetše ka boitsholo bja ba-Isiraele?
6 Ke mang a boletšego mantšu ao a begilwego ditemaneng tše? Ba bangwe ba bolela gore mantšu a a boletšwe ke ba-Isiraele ba sa botegego e bile ba bolela gore batho ba sa kwego ba be ba itira eka ba a itshola gomme ba diriša kgaugelo ya Modimo gampe. Lega go le bjalo, ba bangwe ba bolela gore a boletšwe ke moporofeta Hosea, e le ge a kgopela batho gore ba boele go Jehofa. Go sa šetšwe gore mantšu a a boletšwe ke mang, potšišo ya bohlokwa ke gore, Na batho ba mmušong wa meloko e lesome wa Isiraele ka moka ba ile ba boela go Jehofa, gomme ba bontšha boitsholo bja kgonthe? Karabo ke aowa. A diriša Hosea, Jehofa o re: “Hee Efuraimi! Nka Xo dira bya’ng? Hee Juda! Nka Xo dira bya’ng? Xobane leratô la xaxo le byalo ka mouwane xe xo e-sa, le etša phoka e tloxaxo xe le hlaba.” (Hosea 6:4) Bjoo e be e le bohlatse bjo bo kwešago bohloko gakaakang bja boemo bjo bo fokolago bja moya bja batho ba Modimo! Botho bjo lerato, goba lerato le le sa kwanantšhego, bo be bo nyaka bo nyameletše—go swana le mouwane wa mesong wo o nyamelelago ka pela ge letšatši le hlaba. Le ge batho ba be ba itira eka ba a itshola, Jehofa ga se ka a hwetša lebaka la go ba gaugela. Bothata e be e le’ng?
7 Go itshola ga ba-Isiraele go be go sa tšwe pelong e le ka kgonthe. Hosea 7:14 e bolela mabapi le go se kgahlegele ga Jehofa batho ba gagwe ge e re: “Xe ba mpitša, xa di tšwe pelong; ba xôlôla bà le dilaong.” Temana 16 e oketša ka gore: “Ba a boa-boa; fêla, xa ba boe bà leba xodimo”—se se bolelago gore, “[ga ba lebe] mohuteng o phagamego wa borapedi.” (Mongwalo wa ka tlase wa NW) Batho ba be ba sa nyake go boela borapeding bjo bo phagamego bja Jehofa gomme ba dira diphetogo tšeo di bego di nyakega e le gore ba tsošološe tswalano ya bona le yena. Ee, ge e le gabotse ba be ba sa nyake go sepela le Modimo.
8 Go be go e-na le bothata bjo bongwe ka boitsholo bja ba-Isiraele. Batho ba be ba tšwela pele ba dira dibe—ge e le gabotse, ba be ba dira dibe tša mehuta-huta, go akaretša le boradia, polao, go utswa, go rapela medimo ya diswantšho le go dira dikgwerano tše di sa bontšhego bohlale le ditšhaba tše dingwe. Go Hosea 7:4, batho ba ba swantšhwa le “sebešô,” goba onto ya go paka, mohlomongwe ka baka la dikganyogo tše di fošagetšego tšeo di bego di tuka ka gare ga bona. Ka baka la boemo bjo bjalo bjo bo fokolago bja moya, na batho ba ba be ba swanelwa ke kgaugelo? Ga go bjalo le gatee! Hosea o botša batho ba marabele gore Jehofa ‘a ka se lebale molato wa bona’ le gore “ó tlo lefetša dibe tša bôná.” (Hosea 9:9) Ba ka se gaugelwe!
9. Mantšu a Hosea a re ruta’ng ka boitsholo le kgaugelo?
9 Ge re dutše re bala mantšu a Hosea, re ithuta’ng ka boitsholo le kgaugelo? Mohlala wa temošo wa ba-Isiraele ba se nago tumelo o re ruta gore, ge e ba re nyaka go holwa ke kgaugelo ya Jehofa, re swanetše go itshola go tšwa pelong. Boitsholo bjo bjalo bo bonagatšwa bjang? Jehofa ga a forwe ke megokgo goba mantšu feela. Boitsholo bja kgonthe bo bonagatšwa ka mediro. E le gore mofoši a hwetše kgaugelo, o swanetše go tlogela ka mo go feletšego tsela ya gagwe ya sebe gomme a dumelelanye bophelo bja gagwe le ditekanyetšo tše di phagamego tša borapedi bjo bo phagamego bja Jehofa.
Dihlabelo di Nnoši ga di Kgahliše Modimo
10, 11. Go etša ge go bontšhitšwe boemong bja ba-Isiraele, ke ka baka la’ng dihlabelo di nnoši di sa kgahliše Jehofa?
10 Ga bjale a re ahla-ahleng thuto ya bobedi yeo e ka re thušago gore re sepele le Jehofa. Ke ya gore: Dihlabelo di nnoši ga di kgahliše Modimo. Hosea 6:6 e re: “Se se kaxo nkxahla [nna Jehofa] ké leratô, xa se didimo; xo tseba Modimo xo nkxahla xo fetiša sehlabêlô.” Ela hloko gore Jehofa o kgahlišwa ke botho bjo lerato, goba lerato le le sa kwanantšhego—e lego seka sa pelo—le go mo tseba. Eupša mohlomongwe o ipotšiša gore: ‘Ke ka baka la’ng temana ye e re Jehofa ga a kgahlišwe ke “didimo” le “sehlabêlô”? Na tšeo di be di sa nyakege Molaong wa Moše?’
11 Didimo le dihlabelo di be di nyakega Molaong, eupša batho bao ba bego ba phela nakong ya Hosea ba be ba e-na le bothata bjo bogolo. Go molaleng gore go be go e-na le ba-Isiraele bao ba bego ba dira dihlabelo tše bjalo tša go ithola kgwara e le go bontšha boineelo bja bomponeng. Ka nako e swanago, batho ba be ba tšwela pele ba dira dibe. Ka go dira dibe, ba bontšhitše gore dipelo tša bona di be di se na lerato le le sa kwanantšhego. Le gona, ba bontšhitše gore ba ganne tsebo ya go tseba Modimo, ka gobane ba be ba sa phele ka go dumelelana le yona. Ge e ba batho ba be ba se na boemo bjo bo swanetšego bja pelo e bile ba sa phegelele tsela e swanetšego ya bophelo, dihlabelo tša bona di be di hola’ng? Dihlabelo tša bona di be di kgopiša Jehofa Modimo.
12. Hosea 6:6 e hupere temošo efe bakeng sa batho bao ba phelago lehono?
12 Mantšu a Hosea a rwele temošo bakeng sa ba bantši bao ba tsenago kereke lehono. Ba direla Modimo dihlabelo ka go dira mediro ya bodumedi. Lega go le bjalo, borapedi bja bona bo na le tutuetšo e nyenyane e holago boitshwarong bja bona bja letšatši le letšatši, ge e ba e le gona. Na batho ba bjalo ba thabiša Modimo e le ka kgonthe ge e ba dipelo tša bona di sa ba tutueletše go hwetša tsebo e nepagetšego ka yena le go diriša tsebo yeo ka go tlogela mekgwa e mebe? A go se ke gwa ba le yo a naganago gore mediro ya bodumedi e nnoši e kgahliša Modimo. Jehofa ga a kgahlišwe ke batho bao ba nyakago gore a ba amogele eupša ba diriša borapedi bjo bo sa rego selo go e na le go phela e le ka kgonthe ka go dumelelana le Lentšu la gagwe.—2 Timotheo 3:5.
13. Ke dihlabelo tša mohuta mang tšeo re di neago, eupša re swanetše go dula re gopola’ng mabapi le bohlokwa bja tšona?
13 Ka ge re le Bakriste ba therešo, re dula re gopola gore dihlabelo di nnoši ga di kgahliše Modimo. Ke therešo gore ga re nee Jehofa dihlabelo tša diphoofolo. Lega go le bjalo, re ‘ipega go Modimo ka sedimo sa theto, e lego sona seenywa sa melomo ye e ipolelago ka leina la gagwe.’ (Ba-Hebere 13:15) Ke gabohlokwa gore re se ke ra swana le ba-Isiraele ba badiradibe ba mehleng ya Hosea, e le ge re nagana gore re ka bipa bobe bja rena ka go direla Modimo dihlabelo tše bjalo tša borapedi. Ela hloko mohlala wa mofsa yo mongwe yo a bego a kopanela boitshwarong bjo bo gobogilego bja botona le botshadi ka sephiring. Ka morago o ile a dumela ka gore: “Ke ile ka oketša bodiredi bja-ka bja tšhemo, ke nagana gore ka go dira bjalo ke tla bipa bobe bjoo ka tsela e itšego.” Seo se swana le se ba-Isiraele ba dinganga ba ilego ba leka go se dira. Lega go le bjalo, dihlabelo tša rena tša theto di amogelwa ke Jehofa ge feela di sepedišana le tutuetšo e swanetšego ya pelo le boitshwaro bjo bo Mo kgahlišago.
Jehofa o kwa Bohloko ge Barapedi ba Gagwe ba mo Furalela
14. Boporofeta bja Hosea bo utolla’ng mabapi le maikwelo a Modimo?
14 Thuto ya boraro yeo re ithutago yona go Hosea dikgaolo 6 go ya go 9 e mabapi le kamoo Jehofa a ikwago ka gona ge barapedi ba gagwe ba mo furalela. Modimo o na le maikwelo a matla le a lerato. O thabela bao ba itsholelago dibe tša bona e bile o ba kwela bohloko. Lega go le bjalo, ge batho ba gagwe ba sa itshole, o gata mogato ka go tia. Ka ge Modimo a kgomega e le ka kgonthe ka boemo bja rena bjo bobotse bja bophelo, o a thaba ge re sepela le yena ka potego. Psalme 149:4 e re: “Morêna ó kxahlwa ke sethšaba s’axwe.” Lega go le bjalo, Jehofa o ikwa bjang ge bahlanka ba gagwe ba sa botege?
15. Go ya ka Hosea 6:7, ba-Isiraele ba bangwe ba be ba dira dilo ka tsela efe?
15 Ge Jehofa a bolela ka ba-Isiraele ba sa botegego o re: “Ba senya kxwêranô ka mokxwa wa batho, xe ba nthlanoxêla.” (Hosea 6:7) Lentšu la Sehebere leo le fetoletšwego e le ‘hlanogela’ gape le bolela gore “ba dira tša bofora, (ba dira) ka go se botege.” Go Maleaki 2:10-16, lentšu le le swanago la Sehebere le dirišwa go hlalosa boitshwaro bja go se botege bja ba-Isiraele bao ba bego ba sa botegele balekane ba bona ba lenyalo. Mabapi le go dirišwa ga polelwana ye go Hosea 6:7, puku e nngwe ya ditšhupetšo e bolela gore ke “tshwantšhišo ya lenyalo yeo e bontšhago dika tša motho tswalanong yeo . . . Motho o swanetše go itharollela boemo bjo bjoo go bjona lerato le sentšwego.”
16, 17. (a) Ba-Isiraele ba ile ba gata mogato bjang tabeng ya kgwerano yeo Modimo a bego a e dirile le bona e le setšhaba? (b) Re swanetše go gopola’ng mabapi le ditiro tša rena?
16 Jehofa o be a lebelela Isiraele e le mosadi wa gagwe wa seswantšhetšo ka baka la kgwerano ya gagwe le setšhaba se. Ka gona ge batho ba gagwe ba be ba tshela ditekanyetšo tša kgwerano yeo, go be go le bjalo ka ge eka ba dira bootswa. Modimo o be a swana le monna yo a botegago, eupša batho ba gagwe ba ile ba mo tlogela!
17 Go thwe’ng ka rena? Modimo o na le taba ya ge e ba re sepela le yena goba go se bjalo. Re swanetše go gopola gore “Modimo ké Yêna leratô” le gore ditiro tša rena di a mo kgoma. (1 Johane 4:16) Ge e ba re phegelela tsela e fošagetšego, re ka kweša Jehofa bohloko gomme ka kgonthe re tla mo nyamiša. Go dula re gopola se go ka re thuša kudu gore re se ineele ditekong.
Kamoo re ka Bunago tše Dibotse
18, 19. Ke molao ofe wa motheo wo re o hwetšago go Hosea 8:7, gomme molao woo wa motheo o ile wa ipontšha e le wa therešo bjang go ba-Isiraele?
18 A re eleng hloko thuto ya bone boporofeteng bja Hosea—kamoo re ka bunago tše dibotse. Mabapi le ba-Isiraele gotee le bošilo le go se be le mohola ga tsela ya bona ya go hloka tumelo, Hosea o ngwadile gore: “Ba byetše phefô, ba buna ledimo.” (Hosea 8:7) Mo re hwetša molao wa motheo woo re swanetšego go o gopola o rego: Go na le tswalano e lebanyago magareng ga seo re se dirago ga bjale le seo se re diragalelago ka morago. Molao wo wa motheo o ile wa ipontšha e le wa therešo bjang tabeng ya ba-Isiraele ba sa botegego?
19 Ka go tšwela pele ba dira dibe, ba-Isiraele bao ba be ba bjala tše mpe. Na ba be ba tla kgona go tšwela pele ba dira bjalo ka ntle le go buna ditla-morago tša seo? Therešo ke gore ba be ba ka se phonyokge kahlolo e šoro. Hosea 8:13 e re: “[Jehofa] xa a sa lebala makxôpô a bôná. Ó tlo lefetša dibe tša bôná.” Le gona go Hosea 9:17, re bala gore: “Modimo wa-ka ó a ba lahla, xobane ba xana xo mo kwa; byale e tlo ba batimedi xare xa dithšaba.” Jehofa o be a tla lefetša ba-Isiraele ka baka la dibe tša bona. Ka ge ba be ba bjetše tše mpe, ba be ba tla buna tše mpe. Kahlolo ya Modimo malebana le bona e phethilwe ka 740 B.C.E., ge ba-Asiria ba menola mmušo wa meloko e lesome wa Isiraele gomme ba iša badudi ba wona bothopša.
20. Phihlelo ya ba-Isiraele e re ruta’ng?
20 Phihlelo ya ba-Isiraele bao e re ruta therešo e lego molaleng ya gore: Re buna seo re se bjalago. Lentšu la Modimo le re lemoša ka gore: “Le se kê la timêla; Modimo xa a kwêrwe. Se motho a se byalaxo, ké sôna se a tl’o xo se buna.” (Ba-Galatia 6:7) Ge e ba re bjala tše mpe, re tla buna tše mpe. Ka mohlala, bao ba tšwelago pele ba itshwara ka tsela e gobogilego bophelong ba tla buna ditla-morago tše bohloko. Go tla ba le ditla-morago tše di sa thabišego go mofoši yo a sa itsholego.
21. Re ka buna bjang tše dibotse?
21 Ka gona, re ka buna bjang tše dibotse? Re ka araba potšišo yeo re diriša seswantšho se bonolo. Ge e ba molemi a nyaka go buna korong, na o be a ka bjala lehea? Ga go bjalo le gatee! O swanetše go bjala seo a nyakago go se buna. Ka mo go swanago, ge e ba re nyaka go buna tše dibotse, re swanetše go bjala tše dibotse. Na o nyaka go tšwela pele o buna tše dibotse—bophelo bjo bo kgotsofatšago mo nakong ye le tebelelo ya bophelo bjo bo sa felego lefaseng le lefsa la Modimo? Ge e ba go le bjalo, o swanetše go tšwela pele o bjala tše dibotse ka go sepela le Modimo le go phela ka go dumelelana le ditekanyetšo tša gagwe tša go loka.
22. Ke dithuto dife tšeo re ithutilego tšona go Hosea dikgaolo 6 go ya go 9?
22 Go Hosea dikgaolo 6 go ya go 9, re ithutile dithuto tše nne tšeo di ka re thušago go sepela le Modimo: (1) Boitsholo bja kgonthe bo bonagatšwa ka mediro; (2) dihlabelo di nnoši ga di kgahliše Modimo; (3) Jehofa o kwa bohloko ge barapedi ba gagwe ba mo furalela; le (4) e le gore re bune tše dibotse, re swanetše go bjala tše dibotse. Dikgaolo tše hlano tša mafelelo tša puku ye ya Beibele di ka re thuša bjang go sepela le Modimo?
O tla Araba Bjang?
• Boitsholo bja kgonthe bo bonagatšwa bjang?
• Ke ka baka la’ng dihlabelo di nnoši di sa kgahliše Tatago rena wa legodimong?
• Modimo o ikwa bjang ge barapedi ba gagwe ba mo furalela?
• Re swanetše go bjala’ng ge e ba re nyaka go buna tše dibotse?
[Dipotšišo tša Thuto]
[Seswantšho go letlakala 23]
Lerato la Isiraele le le botegago le ile la nyamelela go etša mouwane wa mesong
[Seswantšho go letlakala 23]
Dikganyogo tša Isiraele tše mpe di be di tuka go etša sebešo
[Seswantšho go letlakala 24]
Ke ka baka la’ng Jehofa a ile a gana dihlabelo tša batho ba gagwe?
[Diswantšho go letlakala 25]
E le gore re bune tše dibotse, re swanetše go bjala tše dibotse