Bohlatse bja Lerato, Tumelo le go kwa
Bohlatse bja Lerato, Tumelo le go kwa
MESONG ya May 16, 2005, go be go fodile e bile letšatši le hlabile kua Watchtower Farms, Wallkill, New York. Bjang bjo bo segilwego gabotse bo be bo phadima gomme matšoba le ona a be a phadima ka baka la pula yeo e nelego pele le hlaba. Lepidipidi le le nago le matswiana a seswai le be le thala le iketlile meetseng ao a sa bilogego kgaufsi le leriba la letangwana. Baeti ba be ba kgahlilwe ke botse bjo. Ba be ba bolelela fase, go le bjalo ka ge eka ba be ba sa nyake go senya khutšo yeo ya mesong.
Baeti e be e le Dihlatse tša Jehofa tšeo di tšwago dinageng tše 48 go dikologa lefase. Eupša ba be ba sa tlela go bona tikologo. Ba be ba kganyoga go bona seo se bego se direga ka gare ga moago o mogolo woo o agilwego ka ditena tše dikhwibidu, e lego karolo e sa tšwago go katološwa ya moago wa Bethele ya United States kua Wallkill. Ka gare ga moago woo, ba ile ba makatšwa gape ke seo ba bego ba se bona le ge go be go e-na le lešata e bile go se na boiketlo.
Baeti bao ba bego ba le lebatong la godimo leo le lego magareng ga meago e mebedi ba ile ba bogela fase go bona metšhene e raraganego. Metšhene e mehlano e megolo ya go gatiša e be e tletše lebato ka moka leo le ritetšwego ka samente leo ka bogolo le fetago mapatlelo a senyane ao go ona go bapalelwago kgwele ya maoto. Gona mo go gatišwa Dibeibele, dipuku le dimakasine. Dirolo tše dikgolo tša pampiri, tšeo e nngwe le e nngwe ya tšona e imelago dikhilograma tše 1 700, di dikologa go etša maotwana a lori yeo e lego lebelong. Rolo e nngwe le e nngwe ya pampiri ya botelele bja dikhilomithara tše 23 e tatologa go phatša ka motšheneng wa go gatiša ka metsotso e 25 feela. Ka nako yeo, motšhene wa go gatiša o ngwala ka enke le go e omiša gomme wa fodiša pampiri e le gore e ka kgona go phuthwa ya ba dimakasine tšeo di sepelago ka lebelo mapanteng ao a di sepedišago e le gore di yo tsenywa ka
mapokising gomme di romelwe diphuthegong. Metšhene e mengwe ya go gatiša e gatiša dikarolo tše di ikemetšego tša dipuku tšeo di išwago ka lebelo bobolokelong bjoo bo thomago lebatong go fihla marulelong ka botelele, go fihlela ge di e-ya moo di tlengwago gona. Dipuku tše di sepedišwa ka tsela e kgahlišago kudu yeo e laolwago ka computer.Ge baeti ba tloga lefelong la kgatišo ba ile ba yo bona moo dipuku di tlengwago gona. Mo metšhene e tlema dipuku tša letlakala le thata le Dibeibele tša deluxe ka tekanyo ya dikopi tše ka fihlago go tše 50 000 ka letšatši. Dikarolo tšeo di ikemetšego tša dipuku di beakanywa ka tsela e swanetšego, tša tlengwa gomme tša ripša gabotse ka mathoko. Ka morago ga moo go kgomaretšwa matlakala a ka ntle. Mekgobo ya dipuku tšeo di feditšwego e tsenywa ka gare ga mapokisi. Mapokisi a tswalelwa ke motšhene, a ngwalwa maina gomme a pakwa lepolankeng la go bea merwalo. Go oketša moo, motšhene woo o kgomaretšago letlakala la ka ntle le boleta la dipuku o kgoboketša le go paka dipuku tše ka fihlago go tše 100 000 ka letšatši. Motšhene wo le wona o bopša ke metšhene e mentši—metšhene e mentši ya go fehla mohlagase, metšhene ya go sepetša dipuku go di iša mafelong a mangwe, dikere, maotwana le mapanta—yeo ka moka e kitimago ka lebelo le le makatšago bakeng sa go tšweletša dipuku tšeo di theilwego Beibeleng.
Ge metšhene ya go gatiša e šoma e hlokometšwe ka kelohloko, ba bantši ba makatšwa ke thekinolotši ya mehleng yeno ge ba bona e kitima ka lebelo le legolo kudu e bile e kitima ka bokgwari. Go etša ge re tla bona, bjo le bjona ke bohlatse bjo bongwe bja lerato, tumelo le go kwa ga batho ba Modimo. Lega go le bjalo, ke ka baka la’ng metšhene ya go gatiša e ile ya hudušwa Brooklyn, New York, gomme ya išwa Wallkill?
Lebaka le legolo e be e le go nolofatša tsela ya go gatiša le ya go romela ka go bea metšhene ye lefelong le tee leo le lego magareng. Ka nywaga e mentši, dipuku di be di gatišwa le go romelwa di e-tšwa Brooklyn, gomme dimakasine di be di gatišwa le go romelwa di e-tšwa Wallkill. Go bea metšhene ye ya go gatiša lefelong le tee go be go tla fokotša bašomi gomme gwa thuša gore tšhelete ya moneelo e dirišwe gabotse. Go oketša moo, ka ge metšhene ya go gatiša yeo e bego e le kua Brooklyn e be e šetše e hlagala, metšhene e mebedi e mefsa ya go gatiša ya MAN Roland Lithoman e ile ya otarwa kua Jeremane. Metšhene ye e be e le e megolo kudu gomme e ka se lekane lefelong la kgatišo la Brooklyn.
Jehofa o Thekga Modiro
Morero wa go gatiša ka mehla e be e le go tšwetša pele ditaba tše dibotse tša Mmušo wa Modimo. Go tloga le mathomong, go be go dutše go le molaleng gore Jehofa o thekga modiro wo. Go tloga ka 1879 go fihla ka 1922, dipuku di be di gatišwa ke mafelo a tša kgwebo. Ka 1922, go ile gwa hirwa moago wa mabato a tshela wo o bego o le 18 Concord Street kua Brooklyn gomme gwa rekwa metšhene ya go gatiša dipuku. Ka nako yeo, batho ba bangwe ba be ba sa kgolwe gore bana babo rena ba ka kgona go dira modiro wo ka katlego.
Yo mongwe wa batho bao ba bego ba sa kgolwe e be e le mopresidente wa khamphani yeo e bego e gatiša bontši bja dipuku tša rena. Ge a be a etela Concord Street, o ile a re: “Le na le metšhene ya go gatiša ya maemo a godimo, eupša ga go le o tee mo lefelong le yo a tsebago go e diriša. Metšhene ye e tla ba e senyegile ka dikgwedi tše tshela feela; gomme le tla lemoga gore batho bao ba swanetšego go le gatišetša ke bao ba bego ba dutše ba le gatišetša, ka ge e le ditsebi.”
Molebeledi wa lefelo la kgatišo ka nako yeo, e lego Robert J. Martin, o itše: “Seo se be se tloga se kwagala kudu, eupša o be a phaetše Morena ka thoko; yo a bego a dutše a e-na le rena ka mehla. . . . Kapejana ka morago ga moo re be re šetše re gatiša dipuku.” Nywageng e 80 e latetšego, Dihlatse tša Jehofa di ile tša gatiša dipuku tše dibilione ka metšhene ya tšona ya go gatiša.
Ke moka ka October 5, 2002, sebokeng sa ngwaga le ngwaga sa Watch Tower Bible and Tract Society of Pennsylvania, go ile gwa tsebišwa gore Sehlopha se Bušago se dumeletše gore metšhene ya go gatiša e hudušwe lekaleng la United States gomme e išwe Wallkill. Metšhene e mebedi e mefsa ya go
gatiša e be e otarilwe, gomme e be e tla goroga ka February 2004. Bana babo rena ba be ba tla swanelwa ke go hlama le go katološa lefelo la kgatišo e le gore ka dikgwedi tše 15 le be le šetše le loketše go amogela metšhene yeo e mefsa ya go gatiša. Ke moka, motšhene o mofsa wa go tlema dipuku le metšhene ya go thuša modirong wa thomelo e be e tla fetša go tsenywa dikgweding tše senyane tše di latelago. Ba bangwe ba ka ba ba be ba sa kgolwe ge ba be ba e-kwa ka lenaneo leo dilo di bego di rulaganyeditšwe go sepetšwa ka lona—go be go bonagala eka modiro o ka se fele ka nako. Lega go le bjalo, bana babo rena ba be ba tseba gore ka thušo ya Jehofa, o be o ka fetšwa ka nako.“Moya o Thabišago wa Tirišano”
Ka ge bana babo rena ba be ba tseba gore batho ba Jehofa ba tla ithapa ka go rata, ba ile ba thoma modiro. (Psalme 110:3) E be e le o mogolo kudu gomme o nyaka bašomi ba bantši go feta bao ba bego ba le gona mafapheng a tša meago a Bethele. Go be go e-na le bana babo rena le dikgaetšedi ba 1 000 ba tšwago United States le Canada ba ba kgonago go aga bao ba ilego ba ithapela go šoma e le baithapi ba nakwana ka beke e tee go ya go dikgwedi tše tharo. Ba bangwe bao e lego bahlanka le baithapi ba tšwago dinageng tše dingwe ba ile ba laletšwa gore ba tlo tsenya letsogo modirong wo. Komiti ya tša Meago ya Tikologo le yona e ile ya thuša kudu.
Go ba bantši, go ithapela go tšea karolo modirong wo o bego o dirwa kua Wallkill go be go nyaka gore ba lefe ditšhelete tše dintši tša leeto gomme ba fetše nako e ntši ba sa ye mešomong ya bona ya boiphedišo. Lega go le bjalo, ba ile ba ikgafa ka lethabo. Go thuša baithapi ba ba bantši ka madulo le dijo go ile gwa nea ba lapa la Bethele sebaka sa go dira sohle seo ba ka se kgonago go thekga modiro wo. Ditho tša lapa la Bethele tša ka godimo ga 535 tše tšwago Brooklyn, Patterson le Wallkill di ile tša ithapela go tšea karolo modirong wo ka Mekibelo, go oketša dikabelong tša tšona tšeo di tlwaetšego go di dira gare ga beke. Thušo e kgolo yeo batho ba Modimo ba ilego ba e nea modirong wo wa bohlokwa e ile ya kgonega feela ka gobane Jehofa a be a thekga modiro.
Ba bangwe ba ile ba neela ka ditšhelete. Ka mohlala, bana babo rena ba ile ba amogela lengwalo le le tšwago go Abby wa nywaga e senyane. O ngwadile gore: “Ke thabišitšwe kudu ke modiro ka moka wo le o dirago—wa go gatiša dipuku ka moka tše di kgahlišago. Mohlomongwe nka tla go le etela kgaufsinyane. Tate o itše re tla eta ngwageng o tlago! Ke tla hloma petšhe e le gore le tsebe gore ke nna mang. Ke neela ka ditolara tše 20 bakeng sa go thuša go lefela metšhene e mefsa ya go gatiša! Ke tšhelete yeo batswadi ba-ka ba nneago yona gore ke ithekele dilo tše dinyenyane, eupša ke nyaka go le nea yona bana bešo.”
Kgaetšedi yo mongwe o ngwadile gore: “Ke kgopela gore le amogele mpho yeo ke le neago yona ya dikefa tše ke di logilego ka diatlana tše tša-ka. Ke tla rata gore dikefa tše di newe bašomi bao ba lego modirong wa go aga kua Wallkill. Puku ya mabapi le boemo bja leratadima e boletše gore marega a ngwaga wo a tla tonya kudu. Ga ke tsebe ge e ba e nepile goba e fošitše. Seo ke se tsebago ke gore modiro o mogolo wo o tlago go dirwa kua Wallkill o tla direlwa ka ntle, gomme ke nyaka go kgonthišetša gore bana bešo le dikgaetšedi ba tla ruthetša dihlogo tša bona. Ga ke na bokgoni le ge e le bofe bjoo
bana bešo ba bo nyakago, eupša ke kgona go loga, ka gona ke phethile ka gore ke diriše bokgoni bjo e le gore ke neele ka seo ke nago le sona.” Ka morwalong woo go be go e-na le dikefa tše 106 tše di logilwego!Lefelo la kgatišo le ile la fetšwa ka nako e rulagantšwego. John Larson e lego molebeledi wa lefelo la kgatišo, o itše: “Go be go e-na le moya o montši o fokago wa tirišano. Ke mang yo a bego a ka se kgolwe gore Jehofa o be a thekga modiro wo? Dilo di ile tša dirwa ka lebelo le legolo. Ke gopola ke eme ka lerageng ka May 2003 ke lebeletše bana babo rena ba epa motheo wa moago. Lebakeng la ka tlase ga ngwaga ka morago, ke be ke eme lefelong le le swanago ke lebeletše motšhene wa go gatiša o le gare o šoma.”
Lenaneo la go Neelwa ga Meago
Lenaneo la go neelwa ga lefelo le lefsa la kgatišo, gotee le meago e meraro ya bodulo, le ile la swarelwa kua Wallkill ka Mošupologo, May 16, 2005. Meago ya Bethele ya kua Patterson le Brooklyn, gotee le Bethele ya Canada, e be e kgokagantšwe ka bidio. Meagong ye ka moka, batho bao ba bilego gona lenaneong e be e le ba 6 049. Theodore Jaracz, e lego setho sa Sehlopha se Bušago sa Dihlatse tša Jehofa, o ile a ba modula-setulo gomme a nea kakaretšo e kopana ya histori ya modiro wa go gatiša. Ditho tša Komiti ya Lekala e lego John Larson le John Kikot di ile tša diriša dipoledišano le dipontšho tša bidio bakeng sa go ahla-ahla histori ya modiro wa go aga le modiro wa go gatiša kua United States. John Barr yo e lego setho sa Sehlopha se Bušago o ile a nea polelo ya go phetha, gomme a neela lefelo le lefsa la kgatišo le meago e meraro ya bodulo go Jehofa Modimo.
Bekeng yeo e latetšego, ditho tša Bethele tše di tšwago Patterson le Brooklyn di ile tša newa sebaka sa go sepela di bona meago e mefsa. Palo-moka ya bao ba etilego ka nako yeo e bile ba 5 920.
Re Lebelela Bjang Lefelo la Kgatišo?
Polelong ya go neelwa ga meago ye, Ngwanabo Rena Barr o ile a gopotša batheetši gore gaešita le ge lefelo la kgatišo le kgahliša, ga le bohlokwa ka baka la metšhene ya lona. Selo sa bohlokwa ka lona ke batho. Dipuku tšeo re di
gatišago di kgoma maphelo a batho ka mo go tseneletšego.O mongwe le o mongwe wa metšhene e mefsa ya go gatiša o ka gatiša dipampišana tše milione ka nako ya ka godingwana ga iri! Lega go le bjalo, pampišana e tee feela e ka kgoma bophelo bja motho kudu. Ka mohlala, ka 1921 sehlopha sa banna bao ba lokišago diporo sa Afrika Borwa se be se šoma seporong se setelele. Yo mongwe wa bona, e lego monna yo a bitšwago Christiaan, o ile a bona pampišana yeo e bego e le ka tlase ga seporo. E be e le e nngwe ya dipampišana tša rena. Christiaan o ile a e bala ka kgahlego e kgolo. O ile a kitima gore a yo gahlana le mokgonyana wa gagwe gomme a mmotša ka lethabo gore: “Lehono ke hweditše therešo!” Kapejana ka morago ga moo, ba ile ba ngwala e le ge ba kgopela tsebišo e oketšegilego. Lekala la Afrika Borwa le ile la ba romela dipuku tše oketšegilego tše di theilwego Beibeleng. Banna ba ba babedi ba ile ba ithuta, ba kolobetšwa gomme ba boledišana le ba bangwe ka therešo ya Beibele. Ka baka leo, ba bantši ba ile ba amogela therešo. Ge e le gabotse, mathomong a bo-1990, ditlogolo tša bona tša ka godimo ga lekgolo e be e le Dihlatse tša Jehofa—tšeo ka moka di kgonegile ka baka la go hwetša ga motho o tee pampišana ka tlase ga seporo!
Ngwanabo Rena Barr o boletše gore dipuku tšeo re di gatišago di tliša batho therešong, di ba thuša gore ba kgomarele therešo, di ba tutueletša gore ba be le phišego e kgolo e bile di tiiša borwarre. Go feta tšohle, dipuku tšeo ka moka ga rena re di abago, di tumiša Jehofa Modimo wa rena!
Jehofa o Lebelela Bjang Lefelo la Kgatišo?
Ngwanabo Rena Barr o ile a kgopela batheetši gore ba ele hloko tsela yeo ka yona Jehofa a lebelelago lefelo la kgatišo. Ke therešo gore ga a ithekga ka lona. O be a ka kgona go dira gore mafsika a bolele ditaba tše dibotse! (Luka 19:40) Go oketša moo, ga a kgahlwe ke metšhene ye ya maemo a godimo, bogolo bja yona, lebelo la yona goba bokgoni bja yona. Lebaka ke gore o bopile legohle! (Psalme 147:10, 11) Jehofa o tseba ditsela tše kaone kudu tša go gatiša dipuku, ditsela tšeo di sa kago tša hlangwa goba tša naganwa ke batho. Ka gona, ke’ng seo Jehofa a se bonago, se a se tšeelago godimo kudu? Lefelong le, selo seo a se bonago e le ka kgonthe ke dika tša batho ba gagwe—lerato la bona, tumelo le go kwa.
Go ile gwa newa papišo yeo e hlalosago seka sa lerato. Ngwanenyana o pakela batswadi ba gagwe khekhe. Go molaleng gore batswadi ba gagwe ba tla thabišwa ke seo. Ee, go sa šetšwe gore khekhe yeo e tšwa e le bjang, seo se thabišago batswadi ba ke lerato leo ngwana wa bona a le bontšhago ka tiro ya gagwe ya go nea ka seatla se se bulegilego. Ka mo go swanago, ge Jehofa a lebelela lefelo le le lefsa la kgatišo, o bona se se fetago moago le metšhene. Ge e le gabotse, o lebelela lefelo le e le leo le bontšhago gore leina la gagwe le a ratwa.—Ba-Hebere 6:10.
Go oketša moo, go etša ge Jehofa a be a lebelela areka e le pontšho ya gore Noage o na le tumelo, o lebelela lefelo le la kgatišo e le bohlatse bja kgonthe bja gore re na le tumelo. Tumelo go eng? Noage o be a e-na le tumelo ya gore seo Jehofa a se boletšego e sa le pele se tla phethagala. Re na le tumelo ya gore re phela mehleng ya bofelo, ya gore ditaba tše dibotse ke molaetša wa bohlokwa kudu woo o tsebatšwago lefaseng le ya gore ke gabohlokwa gore batho ba o kwe. Re a tseba gore molaetša wa Beibele o ka phološa maphelo.—Ba-Roma 10:13, 14.
Ga go pelaelo gore Jehofa le yena o lebelela lefelo le la kgatišo e le leo le bontšhago gore re a mo kwa. Ka ge re tseba, ke thato ya gagwe gore ditaba tše dibotse di bolelwe lefaseng ka bophara pele bofelo bo ka fihla. (Mateo 24:14) Lefelo le la kgatišo, gotee le ao a lego ditikologong tše dingwe tša lefase, le tla re thuša go phethagatša thomo yeo.
Ee, lerato, tumelo le go kwa tšeo di bontšhitšwego ka thušo ya tša ditšhelete, go aga le go dirišwa ga meago ye di bontšhitšwe gape tabeng ya go šoma ka mafolofolo ga batho ba Jehofa gohle ge ba dutše ba tšwela pele ba tsebatša therešo go bohle bao ba ikemišeditšego go theetša.
[Lepokisi/Diswantšho go letlakala 11]
GO KATOLOŠWA GA MAFELO A KGATIŠO KUA UNITED STATES
1920: Dimakasine di be di gatišwa ka motšhene wa mathomo wa go gatiša wa rotary kua 35 Myrtle Avenue, Brooklyn.
1922: Lefelo la kgatišo le ile la hudušetšwa moagong wa mabato a tshela wa kua 18 Concord Street. Ga bjale go be go šetše go gatišwa le dipuku.
1927: Lefelo la kgatišo le ile la hudušetšwa moagong wo o bego o sa tšwa go agwa kua 117 Adams Street.
1949: Lefelo la kgatišo le ile la katološwa ka mabato a senyane, gomme la feta la mathomo ka makga a mabedi.
1956: Lefelo la kgatišo la kua Adams Street le ile la katološwa gape ge go be go agwa moago o mofsa kua 77 Sands Street, gomme la feta la mathomo ka makga a mabedi.
1967: Go ile gwa agwa moago wa mabato a lesome, gomme seo sa thuša gore go be le lefelo le tee le legolo la kgatišo leo le fetago la mathomo ka makga a lesome.
1973: Go ile gwa agwa lefelo le lengwe le lenyenyane la kgatišo kua Wallkill, gomme le be le agilwe ka mo go kgethegilego bakeng sa go gatiša dimakasine.
2004: Mafelo ka moka a go gatiša, a go tlema le a go romela a kua United States a laolwa kua Wallkill.