Go ba Badiredi Bao ba Gatelago Pele le Bao ba Feto-fetogago le Maemo
Go ba Badiredi Bao ba Gatelago Pele le Bao ba Feto-fetogago le Maemo
“Bohle ba nkhweditše kè le wa bôná, è le xore mo xo fêla ke bê le ba ke ba ruaxo.”—1 BA-KORINTHE 9:22.
1, 2. (a) Moapostola Paulo e be e le modiredi yo a atlegago ka ditsela dife? (b) Paulo o hlalositše bjang tsela yeo a bego a lebelela kabelo ya gagwe ka yona?
O BE a dula ka boiketlo le dirutegi le balogi ba ditente. O be a kgona go kgodiša bahlomphegi ba Roma le batho ba Firigia bao ba sa rutegago. Mangwalo a gagwe e be e le a tutuetšago go ba-Gerika bao ba nago le dikgopolo tše di bulegilego le go ba-Juda bao ba ganetšago. Bohlale bja gagwe bo be bo sa ganetšege go fo swana le ge tsela yeo a bego a tutuetša maikwelo ka yona e be e le e matla. O ile a leka go hwetša moo a dumelelanago gona le batho ka moka e le gore a ka kgona go dira gore ba bangwe ba dumele Kriste.—Ditiro 20:21.
2 Monna yo e be e le moapostola Paulo, yo ka ntle le pelaelo e bego e le modiredi yo a atlegago le yo a gatelago pele. (1 Timotheo 1:12) O amogetše taelo e tšwago go Jesu ya go “iša ’ina [la Kriste] xo bantlê, le xo maxoši, le xo Ba-lsiraele.” (Ditiro 9:15) O be a lebelela kabelo ye bjang? O tsebaditše gore: “Bohle ba nkhweditše kè le wa bôná, è le xore mo xo fêla ke bê le ba ke ba ruaxo. Tšé ka moka ke di dira ka ’baka la Ebangedi, xore le nna ke bê wa xabô-bao e lexo ba yôna.” (1 Ba-Korinthe 9:19-23) Ke’ng seo re ka ithutago sona mohlaleng wa Paulo se se ka re thušago gore re be bao ba atlegago modirong wa rena wa boboledi le wa go ruta?
Monna yo a Fetogilego o Lebeletšane le Tlhohlo ka Katlego
3. Pele ga ge Paulo a ka sokologa, o be a ikwa bjang ka Bakriste?
3 Na ka mehla Paulo e be e dutše e le motho yo a kgotlelelago, yo a naganelago, yo a swanelago kabelo yeo a e amogetšego? Ruri ga go bjalo! Go fišegela bodumedi ka tsela e fošagetšego go be go dirile gore Saulo (ka ge Paulo a be a tsebja bjalo pele) e be motlaiši yo šoro wa balatedi ba Kriste. E le lesogana, o ile a dumelela gore Stefano a bolawe. Ka morago ga moo, Paulo ka go hloka kgaugelo o ile a hlomarela Bakriste. (Ditiro 7:58; 8:1, 3; 1 Timotheo 1:13) O ile a tšwela pele a “thšošetša le xo bolaya barutiwa ba Morêna.” Ka ge a be a sa kgotsofatšwe ke go hlomarela badumedi ba kua Jerusalema feela, o ile a thoma lesolo la go bontšha lehloyo la gagwe go fihlela ka leboa la Damaseko.—Ditiro 9:1, 2.
4. Paulo o be a swanetše go dira phetogo efe e le gore a phethagatše kabelo ya gagwe?
4 Selo seo se dirilego gore Paulo a hloye Bokriste e ka ba e be e le kgodišego ya gore bodumedi bjo bjo bofsa bo be bo tla senya bo-Juda ka go bo tswakanya le dikgopolo tše di sa rategego tša bao e sego ba-Juda. Le gona, Paulo e be e kile ya ba “mofarisei,” e lego leina leo ka bolona le bolelago gore “yo a fapanego.” (Ditiro 23:6) Nagana kamoo Paulo a swanetšego go ba a ile a makala ka gona ge a e-kwa gore Modimo o mo kgethile gore—bathong ka moka—a bolele le ba-Ntle ka Kriste! (Ditiro 22:14, 15; 26:16-18) Ee, Bafarisei ba be ba gana gaešita le go ja le batho bao ba bego ba ba lebelela e le badiradibe! (Luka 7:36-39) Go molaleng gore go be go nyakega gore a leke ka matla go fetoša pono ya gagwe le go dira gore e dumelelane le thato ya Modimo ya gore batho ba mehuta yohle ba swanetše go phološwa.—Ba-Galatia 1:13-17.
5. Re ka ekiša Paulo bjang bodireding bja rena?
5 Re ka swanelwa ke go dira se se swanago. Ge re dutše re kopana le batho ba bantši bao ba tšwago ditšhabeng tše dingwe le malemeng a fapa-fapanego, re swanetše go dira boiteko bjo bo lemogegago bakeng sa go hlahloba tsela yeo re lebelelago dilo ka yona gomme re tloše go beba sefahlego le ge e le gofe mo re ka bago re e-na le gona. (Ba-Efeso 4:22-24) Go sa šetšwe gore re lemoga seo goba go se bjalo, re tutuetšwa ke tsela yeo re godišitšwego ka yona le yeo re rutilwego ka yona. Se se ka re dira gore re be le dipono le mekgwa ya go beba sefahlego yeo e sa fetogego le maemo. Re swanetše go fenya maikwelo a bjalo ge e ba re nyaka go atlega tabeng ya go hwetša batho bao ba swanago le dinku le go ba thuša. (Ba-Roma 15:7) Ke seo Paulo a se dirilego. O ile a amogela tlhohlo ya go katološa bodiredi bja gagwe. A tutuetšwa ke lerato, o ile a hlagolela bokgoni bja go ruta bjo bo swanelwago ke go ekišwa. Ee, go hlahloba bodiredi bja “moapostola wa ba-ntlê” go bontšha gore e be e le yo a elago hloko, yo a feto-fetogago le maemo le yo bohlale ge a dira boboledi le ge a ruta. *—Ba-Roma 11:13.
Modiredi yo a Gatelago Pele o Modirong
6. Ke bjang Paulo a bego a tseba ditumelo le ditlogo tša batheetši ba gagwe, gona ka mafelelo afe?
6 Paulo o be a tseba ditumelo le ditlogo tša batheetši ba gagwe. Ge a be a boledišana le Kgoši Agaripa wa II, Paulo o ile a lemoga gore kgoši ye ke “matsebe-tsebe wa mekxwa ka moka ya Ba-Juda le dikxang tša bôná.” Ke moka Paulo ka bokgoni o ile a diriša go tseba ga gagwe ditumelo tša Agaripa gomme a boledišana le yena ka ditaba tšeo Agaripa a bego a di kwešiša gabotse. Go nea mabaka ga Paulo ka tsela e kwagalago le e kgodišago go be go le matla mo Agaripa a boletšego gore: “O kxaufsi le xo mphenya, ka ba mokriste.”—Ditiro 26:2, 3, 27, 28.
7. Paulo o ile a bontšha bjang go feto-fetoga le maemo ge a be a boledišana le lešaba kua Lisitara?
7 Le gona, Paulo o be a feto-fetoga le maemo. Ela hloko gore o ile a diriša tsela e fapanego ge a be a boledišana le lešaba la kua motseng wa Lisitara gore le se rapele yena le Baranaba bjalo ka medimo. Go boletšwe gore batho ba, bao ba bego ba bolela se-Likaonia, ba be ba le gare ga batho bao ba sa rutegago e bile e le baagi bao ba nago le ditumela-khwele tše dintši. Go ya ka Ditiro 14:14-18, Paulo o boletše ka tlholo le dilo tše dintši tša tlhago tšeo ba bego ba di thabela e le bohlatse bja bogolo bja Modimo wa therešo. Seo a bego a se bolela se be se kwagala, gomme go bonagala se ile sa ‘dira gore mašaba a se ke a direla Paulo le Baranaba didimo.’
8. Paulo o ile a bontšha bjang gore o feto-fetoga le maemo go sa šetšwe go galefa ga gagwe ka dinako tše dingwe?
Ditiro 23:1-5) Kua Athene, mathomong o ile “a ja pelo xe a bôna motse ò tletše medimo ya diswanthšô.” Lega go le bjalo, polelong ya gagwe Mmotong wa kua Mars, Paulo ga se a ka a bontšha go ferekana mo go bjalo. Go e na le moo, o ile a boledišana le ba-Athene lekgotleng la bona, a šupa dilong tšeo a dumelelanago le bona ka tšona ka go bolela ka aletare ya bona ya “MODIMO WA XO SE TSEBYE” gomme a tsopola se sengwe sa direti tša bona.—Ditiro 17:16-28.
8 Ke therešo gore Paulo o be a sa phethagala gomme ka dinako tše dingwe o be a galefišwa ke dilo tše itšego. Ka mohlala, tiragalong e nngwe ge a be a hlaselwa ka tsela ya lenyatšo le e se nago toka, o ile a omanya mo-Juda yo a bitšwago Anania. Eupša ge Paulo a be a botšwa gore o kgopišitše moperisita yo mogolo a sa lemoge, o ile a kgopela tshwarelo ka yona nako yeo. (9. Paulo o ile a bontšha bohlale bjang ge a be a boledišana le batheetši ba fapa-fapanego?
9 Ge a be a boledišana le batheetši ba fapa-fapanego, Paulo o bontšhitše tsela e bohlale ya go thoma ditaba. O be a ela hloko setšo le tikologo yeo e bego e tutuetša menagano ya batheetši ba gagwe. Ge a be a ngwalela Bakriste ba kua Roma, o be a tseba gabotse gore ba be ba dula motseng-mošate wa mmušo o matla wo o bego o buša ka nako yeo. Ntlha e kgolo ya lengwalo leo Paulo a le ngwaletšego Bakriste ba kua Roma e be e le gore matla a senyago a sebe sa Adama a fenywa ke matla a Kriste a lopollago. O boletše le Bakriste ba Roma le batho bao ba lego kgaufsi le bona ka leleme leo le bego le tla ipiletša dipelong tša bona.—Ba-Roma 1:4; 5:14, 15.
10, 11. Paulo o ile a dira bjang gore dipapišo tša gagwe di swanele batheetši ba gagwe? (Bona gape le mongwalo wa tlase.)
10 Paulo o be a dira’ng ge a be a nyaka go hlalosetša batheetši ba gagwe ditherešo tša Beibele tše di tseneletšego? Moapostola yo o be a e-na le bokgoni bja go diriša dipapišo tše di tlwaelegilego le tše di kwagalago e le gore ditaba tše di raraganego tša moya di kwešišege gabonolo. Ka mohlala, Paulo o be a tseba gore batho ba kua Roma ba be ba tlwaelane le mokgwa wa go dira batho makgoba wo o bego o dirišwa Mmušong wa Roma ka moka. Ge e le gabotse, mohlomongwe batho ba bantši bao a bego a ba ngwalela e be e le makgoba. Ka baka leo, Paulo o dirišitše bokgoba e le papišo ya go thekga mabaka a gagwe a matla tabeng ya kgetho ya motho ya go ineela sebeng goba go lokeng.—Ba-Roma 6:16-20.
11 Puku e nngwe ya ditšhupetšo e bolela gore: “Go ba-Roma, mong wa lekgoba o be a ka le lokolla ka mo go feletšego, goba lekgoba le be le ka reka bolokologi bja lona ka go lefa mong wa lona. Le be le ka lokollwa gape ge e ba mong wa lona a be a ka le neela go modimo.” Lekgoba le le lokolotšwego le be le ka tšwela pele le šomela mong wa lona bakeng sa mogolo wa beke le beke. Go bonagala Paulo a be a šupa mokgweng wo ge a be a ngwala ka kgetho ya batho ya mabapi le mong yo ba nyakago go mo kwa—sebe goba toka. Bakriste kua Roma ba be ba lokolotšwe sebeng gomme ga bjale e be e le batho ba Modimo. Ba be ba lokologile gore ba ka hlankela Modimo, lega go le bjalo ba be ba sa dutše ba ka kgetha go hlankela sebe—mong wa bona wa nakong e fetilego—ge e ba ba be ba rata go dira bjalo. Papišo yeo e bonolo le e tlwaelegilego e be e tla tutueletša Bakriste bao ba Roma go ipotšiša gore, “Mong wa-ka yo ke mo hlankelago ke mang?” *
Go Ithuta Mohlaleng wa Paulo
12, 13. (a) Ke boiteko bofe bjo bo nyakegago lehono bakeng sa go fihlelela dipelo tša batheetši ba rena bao ba fapanego? (b) Ke’ng seo o hweditšego e le se se atlegago ge o dira boboledi bathong ba ditlogo tše di fapa-fapanego?
12 Ka go swana le Paulo, re swanetše go ba bao ba elago hloko, bao ba feto-fetogago le maemo le ba
bohlale gore re fihlelele dipelo tša batheetši ba rena ba maleme ao a fapa-fapanego. E le gore re thuše batheetši ba rena go kwešiša ditaba tše dibotse, re rata go dira se se fetago go fo ya go bona, ra ba botša molaetša wo re o lokišeditšego goba go tlogela dipuku tše dingwe tša Beibele. Re katanela go tseba dinyakwa tša bona le dilo tšeo ba kgomegilego ka tšona, dilo tšeo ba di ratago le tšeo ba sa di ratego, gotee le dilo tšeo ba di boifago le taba ya go beba sefahlego. Gaešita le ge se se nyaka go naganišišwa le go šoma ka thata, bagoeledi ba Mmušo lefaseng ka bophara ba dira bjalo ka mafolofolo. Ka mohlala, ofisi ya lekala ya Dihlatse tša Jehofa kua Hungary e bega gore: “Bana babo rena ba hlompha metlwae le tsela ya go phela ya batho ba ditšhaba tše dingwe gomme ga ba letela gore batho ba ba amogele metlwae ya lefelong leo.” Dihlatse mafelong a mangwe di katanela go dira se se swanago.13 Nageng e nngwe kua Bohlabela bja Kgole, batho ba bantši ba kgomegile ka boemo bjo bobotse bja tša maphelo, go tlwaetša bana le thuto. Bagoeledi ba mmušo gona moo ba leka go gatelela ditaba tše go e na le go boledišana le batho ka ditaba tše bjalo ka go phuhlama ga maemo a lefase ka moka goba go raragana ga mathata a setšhaba. Ka mo go swanago, bagoeledi ba toropo e kgolo ya kua United States ba lemogile gore batho ba tikologong e nngwe yeo ba dirago boboledi go yona ba kgomegile ka ditaba tše bjalo ka kgobogo, sephethephethe sa dikoloi le bosenyi. Dihlatse di a atlega go dirišeng dihlogo tše bakeng sa go thoma dipoledišano tša Beibele. Barutiši ba Beibele bao ba atlegago ba kgonthišetša gore go sa šetšwe sehlogo seo ba se kgethago, ba dula ba e-na le pono e nepagetšego e bile e le bao ba kgothatšago, ba gatelela mohola o šomago wa go diriša melao ya motheo ya Beibele gona bjale le ditebelelo tše di kgahlišago tša bokamoso tšeo Modimo a di neago.—Jesaya 48:17, 18; 52:7.
14. Hlalosa ditsela tšeo ka tšona re ka feto-fetogago le maemo ge re boledišana le batho ba nago le dinyakwa gotee le maemo a sa swanego.
14 Le gona go a hola go feto-fetoša tsela yeo re boledišanago le batho ka yona bodireding, ka ge batho ba e-na le ditšo tše di fapanego kudu, thuto le ditlogo tša bodumedi. Tsela yeo re boledišanago le batho bao ba dumelago go Mmopi eupša ba sa dumele Beibele e tla fapana le yeo re e dirišago ge re bolela le bao ba dumelago gore Modimo ga a gona. Thero ya rena go motho yo a naganago gore dipuku ka moka tša bodumedi ke phatlalatšo ya maaka e tla fapana le yeo re tla e dirišago go motho yo a amogelago seo Beibele e se rutago. Le gona go feto-fetoga le maemo go a nyakega ge re boledišana le batho ba lego maemong a fapanego kudu a thuto. Barutiši bao ba nago le bokgoni ba tla diriša go nea mabaka le dipapišo tše di swanelago boemo bjo ba lebeletšanego le bjona.—1 Johane 5:20.
Thušo Bakeng sa Badiredi ba Bafsa
15, 16. Ke ka baka la’ng go nyakega gore go tlwaetšwe badiredi ba bafsa?
15 Paulo o be a sa kgomega ka go kaonefatša mekgwa ya gagwe feela ya go ruta. O be a bona go nyakega gore a tlwaetše le go hlama bao e bego e sa le ba banyenyane, ba bjalo ka Timotheo le Tito, gore e be badiredi bao ba atlegago. (2 Timotheo 2:2; 3:10, 14; Tito 1:4) Ka mo go swanago, go na le senyakwa se se akgofilego lehono sa gore re nee le go hwetša tlwaetšo.
16 Ka 1914, go be go e-na le mo e nyakilego go ba palo ya bagoeledi ba Mmušo ba 5 000 lefaseng ka bophara; lehono, batho ba bafsa ba 5 000 ba kolobetšwa beke le beke! (Jesaya 54:2, 3; Ditiro 11:21) Ge bao ba sa tšwago go thoma go kopanela ba e-tla dibokeng tša Bokriste gomme ba kganyoga go tšea karolo bodireding, ba nyaka tlwaetšo le tlhahlo. (Ba-Galatia 6:6) Go bohlokwa gore re diriše mekgwa ya Mong wa rena, Jesu, ge re ruta le go tlwaetša barutiwa. *
17, 18. Re ka thuša bjang bao ba sa tšwago go thoma go ya bodireding gore ba be le sebete?
17 Jesu ga se a re go hwetša lešaba gomme a botša baapostola ba gagwe gore ba thome go bolela. O ile a thoma ka go gatelela go nyakega ga modiro wa boboledi gomme a ba kgothaletša gore ba rapelele bodiredi bja bona. Ke moka o ile a dira ditokišetšo tše tharo tša motheo: motho yo go sepelwago le yena, tšhemo e šongwago le molaetša wo o bolelwago. (Mateo 9:35-38; 10:5-7; Mareka 6:7; Luka 9:2, 6) Re ka dira se se swanago. Go sa šetšwe gore re thuša ngwana wa rena, morutwana yo a sa tšwago go thoma go kopanela goba motho yo a feditšego nako e itšego a sa tšee karolo modirong wa boboledi, re swanetše go dira boiteko bja go ba tlwaetša ka tsela ye.
18 Bao ba sa tšwago go thoma go kopanela ba nyaka thušo e kgolo e le gore ba be le sebete sa go bolela molaetša wa Mmušo. Na o ka ba thuša go lokišetša le go itlwaetša thero e bonolo le e ipiletšago? Tšhemong, dira gore ba ithute mohlaleng wa gago ge o dutše o tsena malapeng a mmalwa a mathomo. O ka latela mohlala wa Gideoni, yo a boditšego bahlabani-gotee le yena gore: “Le lebêlêlê nna; Le dirê se nna ke tl’o xo se dira.” (Baahlodi 7:17) Ke moka nea yo a sa tšwago go thoma sebaka sa go tšea karolo. Reta ka borutho bao ba sa tšwago go thoma bakeng sa maiteko a bona, gomme o ba nee ditšhišinyo tše kopana bakeng sa go kaonefatša ge go swanetše.
19. O ikemišeditše’ng ge o dutše o katanela go phethagatša bodiredi bja gago ka botlalo?
19 E le gore re ‘phethe bodiredi bja rena ka botlalo,’ re ikemišeditše go ba bao ba feto-fetogago kudu tseleng yeo re boledišanago le batho ka yona, gomme re nyaka go tlwaetša badiredi ba bafsa gore ba dire se se swanago. Ge re ela hloko bohlokwa bja morero wa rena—go fetišetša ba bangwe tsebo ka Modimo yeo e išago phološong—re kgodišegile gore go nyakega boiteko ka moka e le gore ‘re be tšohle go batho ba mehuta yohle, gore ka ditsela tšohle re ka phološa ba bangwe.’—2 Timotheo 4:5; 1 Ba-Korinthe 9:22.
[Mengwalo ya ka tlase]
^ ser. 5 Bakeng sa mehlala ya dika tše bjalo bodireding bja Paulo, bona Ditiro 13:9, 16-42; 17:2-4; 18:1-4; 19:11-20; 20:34; Ba-Roma 10:11-15; 2 Ba-Korinthe 6:11-13.
^ ser. 11 Ka mo go swanago, ge a hlalosa tswalano e mpsha yeo e lego gona magareng ga Modimo le “bana” ba gagwe bao ba tloditšwego ka moya, Paulo o dirišitše polelwana e lego molaong yeo e tlwaelegilego kudu go babadi ba dipuku tša gagwe Mmušong wa Roma. (Ba-Roma 8:14-17) Puku ya St. Paul at Rome e re: “Go amogela ditumelo tše itšego e be e le mokgwa wa Roma, gomme go be go tswalanywa kgaufsi kudu le dikgopolo tša Roma tša lapa.”
^ ser. 16 Gona bjale go na le lenaneo leo le bitšwago, Babulamadibogo ba Thuša ba Bangwe, diphuthegong ka moka tša Dihlatse tša Jehofa. Lenaneo le le diriša diphihlelo le tlwaetšo ya badiredi ba nako e tletšego tabeng ya go thuša bagoeledi bao ba se nago phihlelo.
Na o a Gopola?
• Re ka ekiša Paulo ka ditsela dife bodireding bja rena?
• Ke diphetogo dife tšeo go bonagalago di nyakega tseleng yeo re naganago ka yona?
• Ke bjang re ka bolokago molaetša wa rena e le o holago?
• Ke’ng seo badiredi bao ba sa tšwago go thoma go ya bodireding ba se nyakago bakeng sa go hlagolela sebete?
[Dipotšišo tša Thuto]
[Ntlhakgolo go letlakala 29]
Moapostola Paulo e be e le yo a elago hloko, yo a feto-fetogago le maemo le yo bohlale ge a be a dira boboledi le ge a ruta
[Ntlhakgolo go letlakala 31]
Jesu o dirile ditokišetšo tše tharo tša motheo bakeng sa barutiwa ba gagwe: motho yo go sepelwago le yena, tšhemo e šongwago le molaetša o bolelwago
[Diswantšho go letlakala 28]
Paulo o ile a atlega tabeng ya go fihlelela batheetši ba fapa-fapanego ka go ba yo a feto-fetogago le maemo
[Seswantšho go letlakala 30]
Badiredi bao ba atlegago ba ela hloko setšo sa batheetši ba bona
[Seswantšho go letlakala 31]
Badiredi bao ba gatelago pele ba thuša bao ba sa tšwago go thoma gore ba lokišeletše bodiredi