Haramagedone—Na ke Bofelo bjo Kotsi bja Lefase?
Haramagedone—Na ke Bofelo bjo Kotsi bja Lefase?
HARAMAGEDONE! Na lentšu le le dira gore o nagane ka go bolawa ga batho ka bontši goba go fsa ga legohle? Letšatši le letšatši go bolelwa kudu ka mantšu a mmalwa a Beibele go akaretša le “Haramagedone.” Lentšu le le be le dirišwa gohle bakeng sa go hlalosa dilo tše di sa kgahlišego tšeo di tlago go diragalela batho. Intaseteri ya tša boithabišo e dirile gore batho ba nagane ka ditiragalo tše di tšhošago tšeo di tswalanago le go tla ga “Haramagedone.” Batho ga ba kwešiše lentšu le e bile ba na le dikgopolo tše di fošagetšego ka lona. Le ge go e-na le dikgopolo tše dintši mabapi le seo se bolelwago ke lentšu le, bontši bja tšona ga di dumelelane le seo Beibele—mothopo wa lentšu le—e se rutago ka Haramagedone.
Ka ge Beibele e tswalanya Haramagedone le “bofelo bja lefase,” na o be o ka se dumele gore ke gabohlokwa go ba le kwešišo e nepagetšego mabapi le seo ruri se bolelwago ke lentšu le? (Mateo 24:3, King James Version) Le gona, na e be e ka se be mo go kwagalago go retologela mothopong o phagamego wa therešo, e lego Lentšu la Modimo, bakeng sa go hwetša dikarabo mabapi le gore Haramagedone ke’ng le gore e tla bolela’ng go wena le lapa la gago?
Go seka-seka dilo ka tsela e bjalo go tla hlatsela gore Haramagedone e ka se tliše mafelelo a kotsi, eupša e tla tšweletša mathomo a dilo tše di thabišago bakeng sa batho bao ba ratago go phela le go atlega lefaseng le lefsa la go loka. O tla hwetša kwešišo e nepagetšego mabapi le therešo ye ya bohlokwa ya Mangwalo, ge o dutše o ela hloko taba yeo e ahla-ahlwago sehlogong se se latelago ya mabapi le seo ruri se bolelwago ke lentšu Haramagedone.
[Lepokisi/Seswantšho go letlakala 3]
O NAGANA GORE HARAMAGEDONE KE’NG?
• Go bolawa ga batho ka tsela e sehlogo ka pomo ya nuclear
• Go senywa ga tikologo
• Go thulana ga lefase le makoko a legodimong
• Go fediša ga Modimo batho ba kgopo