Go Thuša Batho ba Ma-China Kua Mexico

“BANNA ba lesome ba mebolêlô ya mehuta-huta ba tlo swara monna wa Mo-Juda ka kobô, ba re: A nkê re yê le lena, ka xobane re kwile xore Modimo ó na le lena.” (Sakaria 8:23) Lehono, boporofeta bjo bjo bobotse bo a phethagatšwa lefaseng ka moka. Batho “ba mebolêlô ya mehuta-huta” ba kgomarela ba-Isiraele ba moya e le gore ba rapele Jehofa Modimo. Dihlatse tša Jehofa di kgahlegela kudu phethagatšo ya boporofeta bjo. Bontši bja tšona bo ithuta leleme le lengwe e le gore bo kgone go tšea karolo modirong wa lefase ka bophara wa boboledi.

Dihlatse tša Jehofa tša kua Mexico le tšona di dira se se swanago. Go akanyetšwa gore batho ba go bolela se-China bao ba dulago Mexico ke ba 30 000. Ka 2003, ba 15 ba bona ba bile gona Segopotšong sa lehu la Kriste seo se bego se swaretšwe Mexico City. Ka gona Dihlatse tša kua Mexico di ile tša lemoga kgonagalo ya kgolo ya moya tšhemong ya ma-China. E le gore go be le bagoeledi ba oketšegilego bao ba tlago go bolela le batho ba ba ma-China, go ile gwa hlongwa lenaneo la thuto la dikgwedi tše tharo bakeng sa go ruta Dihlatse tša ma-Mexico dithero tše bonolo ka se-China sa Mandarin. Lenaneo leo la thuto le tsenetšwe ke palo-moka ya Dihlatse tše 25. Ge lenaneo leo le fela, mohlankedi wa ma-Mandarin a kua Mexico City o ile a ba gona nakong ya go aloga, e le ge a bontšha tsela yeo ka yona klase yeo e ilego ya kgoma setšhaba sa ma-China. Mokgatlo wa ma-China wa lefelong leo o ile wa fa diithuti tše pedi thušo ya tša ditšhelete gore di tšwele ka ntle go yo kaonefatša se-China sa tšona.

Thuto yeo ya leleme e be e akaretša go tlwaetša diithuti go le bolela. Ka morago ga go ithuta dipolelwana tša motheo, diithuti di ile tša thoma le semeetseng go dira boboledi ka se-China lefelong la tša kgwebo la Mexico City. Diithuti tšeo tše mafolofolo di ile tša thoma dithuto tša Beibele tše 21. Poroutšha ya se-China ya Ke Eng Seo Modimo a se Nyakago go Rena? yeo e ngwadilwego ka ditlhaka tša se-Roma, tšeo di bitšwago Pinyin, e ile ya thuša kudu.

Na Dihlatse tše di bego di sa tšwa go thoma go ithuta se-China di be di swara bjang dithuto tša Beibele? Mathomong, di be di kgona feela gore, “Qing Du [Hle bala]” gomme tša šupa serapa ke moka tša šupa potšišo. Ka morago ga ge motho a badile serapa gotee le go araba potšišo ka se-China, di be di re, “Shei shei [Re a leboga]” le gore, “Hen Hao [O dirile gabotse kudu].”

E nngwe ya dithuto tše bjalo e ile ya thongwa le mosadi yo e bego e le Mokriste ka leina. Ka morago ga thuto ya boraro, hlatse e ile ya ipotšiša ge e ba mosadi yoo a be a tloga a kwešiša tsebišo yeo. Ke moka Hlatse e ile ya sepela le ngwanabo rena yo a bolelago se-China. Ge a  botšiša mosadi gore na o na le dipotšišo, mosadi yoo o ile a botšiša ka gore: “Na ke swanetše go kgona go rutha gore ke kolobetšwe?”

Ka nako e sa fetšego pelo, go ile gwa hlongwa Thuto ya Puku ya Phuthego e nago le batho ba ka bago ba 9 bao ba bolelago se-China gotee le Dihlatse tše 23 tša ma-Mexico tša gona moo. Gare ga bao ba bego ba e-ba gona go be go e-na le ngaka ya mo-China, yeo e bego e amogetše dimakasine tša Sepaniši tša Morokami le Phafoga! go tšwa go yo mongwe wa balwetši ba yona. Ka ge e be e sa kgone go bala Sepaniši, e be e-na le motho yo a bego a fetolela mafoko a sego kae. E ile ya re go lemoga gore dimakasine di be di bolela ka Beibele, ya botšiša ge e ba molwetši yoo a ka e tlela le dimakasine tša se-China. Ka thušo ya ofisi ya lekala ya Dihlatse tša Jehofa ya Mexico, o ile a di hwetša gomme gwa dirwa ditokišetšo tša gore hlatse yeo e bego e bolela se-China e etele ngaka yeo. Mmago ngaka yeo yo a bego a dula China o be a e-na le Beibele gomme ngaka yeo e be e thabela go e bala. Ge e be e dira phetho ya go ya Mexico, mmago yona o ile a e botša gore e se ke ya lesa go bala Beibele. Ka gona e be e dula e rapelela gore go be le motho yo a bego a ka e thuša go ithuta mo go oketšegilego ka Modimo wa Beibele. E goeleditše ka gore: “Modimo o kwele thapelo ya-ka!”

Thutong ya puku go be go e-tla le lapa la ma-China leo le bego le hirile madulo ga mosadi wa mo-Mexico yo a bego a ithuta Beibele le Dihlatse tša Jehofa. Gaešita le ge lapa leo la ma-China le be le kwešiša Sepaniši ganyenyane feela, le be le kgona go dula bakeng sa dipoledišano tša Beibele. Ge nako e dutše e e-ya, lapa leo le ile la botšiša Hlatse yeo e bego e le swarela thuto ge e ba e e-na le dikgatišo tša se-China. Kapejana le ile la swarelwa thuto ya Beibele ka se-China. Ka nako e sa fetšego pelo, ba lapa leo ba ile ba hlalosa kganyogo ya bona ya go bolela bathong ba gabo bona le ya go neela maphelo a bona go Jehofa.

Ke therešo gore go thata go ithuta se-China. Lega go le bjalo, bjalo ka ge go bonwe diphihlelong tšeo go boletšwego ka tšona ka mo godimo, ka thušo ya Jehofa batho ba maleme a fapa-fapanego, go akaretša le ma-China, ba ithuta lentšu la Modimo kua Mexico gotee le dinageng tše dingwe.

[Seswantšho go letlakala 17]

Klase ya se-China kua Mexico City

[Seswantšho go letlakala 18]

Hlatse ya mo-Mexico e swere thuto ya Beibele ka se-China

[Seswantšho go letlakala 18]

Bodiredi bja ntlo le ntlo ka se-China, Mexico City