“Goelela Khunologo go Mathopša”

MATHOMONG a bodiredi bja gagwe, Jesu o ile a bolela gore karolo ya thomo ya gagwe e be e le “go goelela khunologo go mathopša.” (Luka 4:18, NW) Ba latela mohlala wa Morena wa bona, Bakriste ba therešo ba bolela ditaba tše dibotse tša Mmušo go “batho bohle,” go ba hunolla bothopšeng bja moya gotee le go ba thuša go kaonefatša maphelo a bona.—1 Timotheo 2:4.

Lehono, modiro wo o akaretša go dira boboledi go mathopša a kgonthe—batho bao ba golegetšwego melato e fapa-fapanego ya bosenyi gomme e le bao ba thabelago khunologo ya moya. Thabela pego ye yeo e kgothatšago ya mabapi le boboledi bja Dihlatse tša Jehofa dikgolegong tša kua Ukraine gotee le tša dinageng tše dingwe kua Yuropa.

Ba Tlogela go Lemalela Dihlare-tagi Gomme ba Fetoga Bakriste

Nywageng e 38 ya bophelo bja Serhii, * e 20 ya yona o e feditše a le kgolegong. O ile a ba a feleletša sekolo kgolegong. O re: “Nywageng e fetilego, ke ile ka golegelwa polao gomme ke sa šaletšwe ke nywaga e itšego. Ke ile ka itshwara bjalo ka mogateledi kgolegong gomme bagolegwa ba bangwe ba be ba ntšhaba.” Na se se ile sa mo dira gore a ikwe a lokologile? Aowa. Serhii o ile a ba lekgoba la dihlare-tagi, dino-tagi le motšoko ka nywaga e mentši.

Ke moka mogolegwa-gotee le yena o ile a abelana therešo ya Beibele le yena. E ile ya ba bjalo ka seetša lefsifsing. Ka dikgwedi tše sego kae, o ile a itokolla dilong tšeo a bego a di lemaletše, a ba mogoeledi wa ditaba tše dibotse gomme a kolobetšwa. Ga bjale Serhii o phela a swaregile ka boboledi kua kgolegong gomme o hlankela e le modiredi wa nako e tletšego wa Jehofa. O ile a thuša bagolegwa ba šupago go fetoša mekgwa ya bona gomme ba ba bana babo ba moya. Ba tshela ba bona ba ile ba lokollwa, eupša Serhii yena o sa le kgolegong. Se ga se mo nyamiše ka gobane o thabišwa ke gore o kgona go thuša ba bangwe go hwetša khunologo bothopšeng bja moya.—Ditiro 20:35.

Yo mongwe wa barutwana ba Serhii kua kgolegong e be e le Victor, yo a kilego a lemalela dihlare-tagi gotee le go gweba ka tšona. Ge Victor a se no lokollwa kgolegong, o ile a tšwela pele a gola moyeng gomme mafelelong a ba sealoga  Sekolong sa Tlwaetšo ya Bodiredi sa kua Ukraine. Ga bjale o hlankela e le modiredi wa mmulamadibogo yo a kgethegilego kua Moldova. Victor o re: “Ke ile ka thoma go kgoga ke e-na le nywaga e 8, ka diriša dino-tagi gampe ke e-na le nywaga e 12 gomme ka thoma go diriša dihlare-tagi ke e-na le nywaga e 14. Ke ile ka nyaka go fetoša bophelo bja-ka eupša maiteko a-ka ka moka a palelwa. Ke moka ka 1995, ge nna le mosadi wa-ka re be re sa rulaganyetša go tlogelana le bagwera ba-ka ba babe, motho yo a nago le bogafsi bjo bo mo tutueletšago go bolaya o ile a hlaba mosadi wa-ka ka thipa go fihlela a e-hwa. Ke ile ka šulafalelwa o šoro. Mosadi wa-ka o gokae gona bjale? Go direga’ng ge motho a e-hwa?’ Ke ile ka tšwela pele ke botšiša dipotšišo tše eupša ke sa hwetše dikarabo. Ke ile ka diriša dihlare-tagi tše dintši kudu bakeng sa go ikhomotša. Ke ile ka golegelwa go gweba ka dihlare-tagi gomme ka ahlolelwa nywaga e mehlano kgolegong. Gona moo kgolegong, Serhii o ile a nthuša go hwetša dikarabo. Ke ile ka leka go tlogela dihlare-tagi ka makga a mantši eupša ke gona bjale feela moo ke ilego ka kgona go di tlogela ka thušo ya Beibele. Ruri Lentšu la Modimo ke le matla!”—Ba-Hebere 4:12.

Disenyi tše Šoro di a Fetoga

Vasyl ga se a ka a diriša dihlare-tagi eupša ga a ka a phonyokga bothopša. O hlalosa gore: “Seo ke bego ke se lemaletše ke kickboxing (go lwa ka matswele le go raga). Ke ile ka itlwaeletša go itia batho ka ntle le go šia matetelo.” Vasyl o be a diriša boitshwaro bja gagwe bjo bošoro go utswetša batho. “Ke ile ka golegwa gararo, e lego seo se ilego sa dira gore mosadi wa-ka a ntlhale. Nywageng e mehlano ya mafelelo, ke ile ka tlwaelana le dikgatišo tša Dihlatse tša Jehofa. Se se ile sa ntutueletša go ithuta Beibele, eupša ke be ke sa dira seo ke bego ke tloga ke se rata—go lwa dintwa tše di sego tša beelwa melao.

“Lega go le bjalo, ka morago ga go bala Beibele ka dikgwedi tše tshela, go na le selo seo se ilego sa fetoga go nna. Go thopa sefoka ntweng go be go sa hlwe go nkgotsofatša go swana le pele. Ka gona ke ile ka thoma go hlahloba bophelo bja-ka ka thušo ya Jesaya 2:4 gomme ka lemoga gore ge e ba ke sa fetoše tsela ya-ka ya go nagana, nka fetša bophelo bja-ka ka moka ke le kgolegong. Ka gona ke ile ka lahla diaparo tša-ka ka moka tša ntwa gomme ka thoma go lokiša semelo sa-ka. Go be go se bonolo, eupša ganyenyane-ganyenyane go naganišiša le go rapela go ile gwa nthuša go tlogela mekgwa ya-ka e mebe. Ka dinako tše dingwe, ke be ke llela Jehofa gore a mphe matla gore ke kgone go tlogela ditemalelo tša-ka. Ke ile ka atlega mafelelong.

 “Ge ke se no lokollwa kgolegong, ke ile ka boelana le lapa la-ka. Ga bjale ke šoma moepong wa malahla. Se se mpha nako e lekanego ya go kopanela bodireding le mosadi wa-ka gotee le ya go phetha boikarabelo bja-ka bja ka phuthegong.”

Mykola le bagwera ba gagwe ba ile ba hula dipanka tše mmalwa kua Ukraine. Se se ile sa feleletša ka gore a ahlolelwe nywaga e lesome kgolegong. Pele a ka golegwa, o be a ile a ya kerekeng gatee feela—bakeng sa go lokišeletša go hula kereke yeo. Dilo ga se tša ka tša sepela gabotse, eupša ketelo yeo e ile ya dira gore Mykola a dumele gore Beibele e swanetše go ba e tletše ka dikanegelo tšeo di lešago bodutu tša mabapi le baruti ba Orthodox, dikerese gotee le matšatši a bodumedi a maikhutšo. O re: “Ga ke tsebe gore ge e le gabotse ke eng seo se ilego sa ntira gore ke thome go bala Beibele, eupša ke ile ka dira bjalo. Ke makaditšwe ke go lemoga gore e be e se ka mokgwa wo ke bego ke e nagana! O ile a kgopela thuto ya Beibele gomme a kolobetšwa ka 1999. Ruri ge o mmona ga bjale, o ka se kgolwe gore mohlanka yo yo a ikokobeditšego wa bodiredi o kile a ba mohudi yo šoro wa dipanka yo a bego a itlhama!

Vladimir o be a ahloletšwe lehu. Ge a be a sa letetše go bolawa, o ile a rapela Modimo gomme a holofetša gore o tla mo hlankela ge a ka se bolawe. Ge a sa letile, molao o ile wa fetošwa gomme kotlo ya gagwe ya lehu e ile ya tšeelwa legato ke go dula kgolegong bophelo ka moka. Vladimir o ile a thoma go nyaka bodumedi bja therešo e le gore a phethagatše kholofetšo ya gagwe. O ile a ingwadiša bakeng sa thuto yeo e swarwago ka go ngwalelana gomme a hwetša diploma go tšwa kerekeng ya Adventist, eupša o be a sa kgotsofala.

Lega go le bjalo, ge Vladimir a se no bala dimakasine tša Morokami le Phafoga! bokgobapukung bja kgolego, o ile a ngwalela ofisi ya lekala ya Dihlatse tša Jehofa ya kua Ukraine, a kgopela go etelwa. Ge bana babo rena ba gona moo ba be ba mo etela, o be a šetše a ipona e le Hlatse e bile a dira boboledi ka kgolegong. O ile a thušwa go swanelegela go ba mogoeledi wa Mmušo. Ka thušo ya dingwalwa tše, Vladimir gotee le ba bangwe ba šupago gona fao kgolegong ba letetše go kolobetšwa. Eupša ba na le bothata. Ka ge bagolegwa bao ba ahloletšwego bophelo ka moka kgolegong ba bewa ka diphapošing tša kgolego go ya ka ditumelo tša bona, Vladimir le bao a dulago le bona ke ba tumelo e tee. Bjale ba tla dira boboledi go mang? Ba abelana ditaba tše dibotse le baleti ba kgolegong gotee le ka go ngwalela batho mangwalo.

Nazar o ile a hudugela Repabliking ya Czechoslovakia, e lego moo a ilego a kopana le sehlopha sa mahodu, a e-tšwa Ukraine. Se se ile sa mo dira gore a ye kgolegong nywaga e meraro le seripa. Ge a le kgolegong, o ile a arabela diketelong tša Dihlatse tša Jehofa tšeo di tšwago toropong ya Karlovy Vary, a ithuta therešo gomme a boela sekeng. Ge yo mongwe wa bahlapetši a bona se, o ile a botša bagolegwa-gotee le Nazar gore: “Ge e ba ka moka ga lena le be le ka swana le mo-Ukraine yola, ke be nka feleletša ke hweditše mošomo o mongwe.” Yo mongwe o ile a re: “Dihlatse tše tša Jehofa ke ditsebi e le ka kgonthe. Motho o tla kgolegong e le sesenyi; a tšwa e le yo a hlomphegago.” Gona bjale Nazar o boetše gae. O ile a ithuta mošomo wa go betla a ba a nyala, gomme yena le mosadi wa gagwe ba bodireding bja nako e tletšego. O leboga gakaakang diketelo tša Dihlatse tša kgolegong!

Go Tsebja Semmušo

Ga se bagolegwa feela bao ba lebogago modiro wo Dihlatse tša Jehofa di o dirago. Miroslaw Kowalski, e lego mmoleledi wa e nngwe ya dikgolego tša kua Poland, o itše: “Re leboga diketelo tša tšona kudu. Bagolegwa ba bangwe ba na le ditlogo tšeo di nyamišago. Mohlomongwe ba ile ba se swarwe gabotse. . . . Thušo [ya Dihlatse] ke e bohlokwa kudu ka gobane ga re na bašomi bao ba lekanego gotee le barutiši.”

Mohlapetši wa kgolego e nngwe ya kua Poland o ile a ngwalela ofisi ya lekala, a kgopela gore Dihlatse di oketše modiro wa tšona kgolegong yeo a šomago go yona. Ka baka la’ng? O hlalositše gore: “Mohlomongwe go etela ga baemedi ba Watchtower kgafetša-kgafetša go ka thuša bagolegwa go ba le dika tše di kgahlišago setšhabeng, gomme gwa fediša bošoro bjo ba nago le bjona.”

Kuranta ya Ukraine e ile ya bega ka mogolegwa yo a bego a gateletšegile yo a ilego a leka go ipolaya yoo ka morago a ilego a thušwa ke Dihlatse tša Jehofa. Pego yeo e re: “Gona bjale monna yo o gare o fola maikwelong. O latela tshepedišo ya kgolegong e bile ke mohlala go bagolegwa ba bangwe.”

 Go Holega le ka Ntle ga Kgolego

Mehola ya modiro wo Dihlatse tša Jehofa di o dirago ga e felele ka kgolegong feela. E tšwela pele ka morago ga ge bagolegwa ba lokolotšwe. Bakriste ba babedi, e lego Brigitte le Renate, ba be ba dutše ba thuša batho ka mokgwa wo ka nywaga e itšego. Kuranta ya kua Jeremane e bitšwago Main-Echo Aschaffenburg, e bega ka bona gore: “Ba hlokomela bagolegwa dikgwedi tše tharo go ya go tše hlano ka morago ga ge ba se no lokollwa, ba ba kgothaletša go hwetša morero bophelong. . . . Ba be ba dutše ba tsebja semmušo e le baithapi ba go lekola bagolegwa bao ba begago kgolegong ka mehla. . . . Gape ba na le tirišano e agago le e kgahlišago le bašomi ba kgolegong.” Batho ba bantši ba ile ba neela maphelo a bona go Jehofa ka baka la thušo ya mohuta wo.

Le bahlankedi ba kgolego ba holwa ke modiro wo wa thuto ya Beibele wa Dihlatse tša Jehofa. Ka mohlala, Roman e be e le molaodi yo mogolo wa mašole gape e le setsebi sa tša monagano sa kgolego ya kua Ukraine. Ge Dihlatse di be di etetše legaeng la gagwe, o ile a amogela thuto ya Beibele. Ke moka o ile a lemoga gore Dihlatse di be di sa dumelelwe go bonana le bagolegwa ba moo a bego a šoma gona. Ka gona o ile a kgopela mohlapetši tumelelo ya go šomiša Beibele mošomong wa gagwe le bagolegwa. O ile a dumelelwa go dira seo gomme gwa thabela bagolegwa ba ka bago ba lesome. Ka mehla Roman o be a abelana le bagolegwa tsebo ya gagwe ya Beibele yeo e bego e gola, gomme maiteko a gagwe a ile a ba le mafelelo a mabotse. Ka morago ga ge ba lokolotšwe, ba bangwe ba bona ba ile ba tšwela pele ba gola gomme ba ba Bakriste ba kolobeditšwego. Ka go bona matla a Lentšu la Modimo, Roman o ile a tšeela thuto ya gagwe ya Beibele godimo kudu. O ile a tlogela tša bohlabani gomme a tšwela pele thutong ya gagwe ya Beibele. Gona bjale o tšea karolo modirong wa boboledi gotee le yo e kilego ya ba mogolegwa.

Mogolegwa yo mongwe o ngwadile gore: “Mo re phela ka Beibele, dikgatišo tša Beibele gotee le ka thuto ya Beibele.” Mantšu a a bontšha gabotse go nyakega ga dikgatišo tša Beibele dikgolegong tše dingwe. Phuthego e nngwe ya kua Ukraine e bega mabapi le modiro wa go ruta ka Beibele kgolegong ya gona moo gore: “Balaodi ba leboga dikgatišo tšeo re ba fago tšona. Re ba fa dikopi tše 60 tša kgatišo e nngwe le e nngwe ya Morokami le Phafoga!” Phuthego e nngwe e ngwala gore: “Re hlokomela kgolego e nago le makgobapuku a 20 a manyenyane. Re išitše dikgatišo tša rena tše dikgolo bokgobapukung bjo bongwe le bjo bongwe. Dikgatišo tše di ile tša tlala mapokisi a 20.” Kgolegong e nngwe, bahlokomedi ba boloka faele ya dimakasine tša rena bokgobapukung e le gore bagolegwa ba ka holwa ke kgatišo e nngwe le e nngwe.

Ofisi ya lekala ya kua Ukraine e ile ya hloma Lefapha la tša Dikgolego ka 2002. Go fihla ga bjale, lefapha le kgonne go fihlelela dikgolego tše ka bago tše 120 gomme la abela diphuthego go di hlokomela. Kgweding e nngwe le e nngwe go amogelwa mangwalo a ka bago a 50 ao a tšwago go bagolegwa, bontši bja bona ba kgopela dikgatišo goba ba kgopela thuto ya Beibele. Lekala le ba romela dipuku, dimakasine gotee le diporoutšha go ba go fihla bana babo rena ba gona moo ba ikopanya le bona.

Moapostola Paulo o ngwaletše Bakriste-gotee le yena gore: “Xopolang ba ba xolexilwexo.” (Ba-Hebere 13:3) O be a bolela ka bao ba bego ba golegilwe ka baka la tumelo ya bona. Lehono, Dihlatse tša Jehofa di dula di gopola bao ba golegilwego, di ba etela dikgolegong gomme di “goelela khunologo go mathopša.”—Luka 4:18, NW.

[Mongwalo wa ka tlase]

[Seswantšho go letlakala 9]

Leboto la kgolego L’viv, Ukraine

[Seswantšho go letlakala 10]

Vasyl a e-na le mosadi wa gagwe, Iryna

[Seswantšho go letlakala 10]

Mykola

[Seswantšho go letlakala 10]

Victor