Maikhutšo a Keresemose le a Ngwaga o Mofsa—Na a tla Kgotsofatša Dikganyogo tša Gago?

“Peter [yo Mogolo] o ile a laela gore go swarwe seboka se se kgethegilego sa bodumedi sa Ngwaga o Mofsa dikerekeng ka moka ka January 1. Go oketša moo, o ile a laela gore makala a kgahlišago a mohlaka-motala a dirišetšwe go kgabiša dikosene ka gare ga nywako, gomme o ile a laela gore badudi ka moka ba Moscow ba ‘bontšhe gore ba thabile ka go lakaletšana’ Ngwaga o Mofsa ka go goeletšana.”—Peter the Great—His Life and World.

KE’NG seo o se fagahletšego maikhutšong a Keresemose le a Ngwaga o Mofsa? Ke nako e telele ya maikhutšo. Batswadi le bana ba ka no ba ba le maikhutšong ka nako ye, gomme e ka bonagala e le sebaka se sebotse sa gore malapa a fetše nako a le gotee. Keresemose ke letšatši leo ka setšo go dumelwago gore ke la go tswalwa ga Kriste. Batho ba bangwe ba nyaka go hlompha Kriste nakong ye ya ngwaga ka ge ba nagana gore ke yena karolo e bohlokwa kudu ya nako ye. Mohlomongwe le wena o nagana bjalo.

Go sa šetšwe gore ke nako ya go hlompha Kriste, go thabela go ba le lapa, goba bobedi bja tšona, banna ba dimilione, basadi le bana lefaseng ka bophara ba letela nako ye ka tetelo-kgolo. Go thwe’ng ka lenyaga? Na e tla ba nako e kgethegilego gakaalo go ba lapa, le gona na e kgethegile go Modimo? Ge e ba ba lapa ba tla be ba bokane, na dikganyogo tša gago di tla kgotsofatšwa, goba na o tla nyama?

Batho ba bantši bao ba lebeletšego pele karolong ya borapedi ba lemoga gore Keresemose le Ngwaga o Mofsa gantši ga di ketekwe ka moya wa Kriste. Go e na le moo, nako ya maikhutšo e fo ba nako ya go amogela dimpho, lebaka la go dira moletlo wo o ka akaretšago boitshwaro bjo bo hlomphollago Kriste, goba lebaka le legolo la go bokana gotee gape ga ba lapa. Ka dinako tše dintši, pokano e bjalo e senywa ke setho setee goba tše dintši tšeo di ipolaišago dijo le dino gotee le go tsoga ga dingangišano tšeo gantši kudu di feleletšago ka bošoro bja ka gae. O ka ba o ile wa bona seo, goba se ka ba se ile sa go diragalela.

Ge e ba go le bjalo, o ka bona eka ga gwa ba le phetogo e kaalo go tloga nakong ya Mmušiši wa mo-Russia e lego Peter yo Mogolo, yo go boletšwego ka yena kua mathomong. Ka baka la go belaetšwa ke tshekamelo ya batho ya gona bjale, ba bantši ba duma eka nako ya maikhutšo ya keresemose le ya ngwaga o mofsa e ka ba nako ya go naganišiša kudu ka bodumedi le go ba gotee ga lapa ka tsela e agago. Ba bangwe ba bile ba šoma ka mafolofolo gore go tle go be le phetogo, ba hloma maswao a bjalo ka a rego, Jesu ke mmaki wa sehla se. Eupša na go ka ba le phetogo? Le gona na se ruri se tla tumiša Kriste? Na go na le mabaka a gore go be le pono e fapanego mabapi le maikhutšo a keresemose le a ngwaga o mofsa?

Gore re hwetše dikarabo tše di kgotsofatšago, anke re lebelele boemo ka kgopolo ya batho ba setšhaba setee bao ba swanetšego go ba le lebaka le le kgethegilego la go bontšha tebogo nakong ye ya ngwaga.