Ba Thabišitše Dipelo tša Batswadi ba Bona
Ba Thabišitše Dipelo tša Batswadi ba Bona
“NGWAN’A-KA! Xe pelo y’axo e hlalefa, le nna pelo ya-ka e tlo thaba.” (Diema 23:15) Ee, batswadi ba Bakriste ba a thaba ge bana ba bona ba hwetša bohlale bjo bo tšwago go Modimo. Ka Mokibelo, September 10, 2005, sehlopha sa batho ba 6 859 ba tšwago ditšhabeng tše di fapa-fapanego se be se le gona ge go aloga sehlopha sa bo-119 sa Sekolo sa Beibele sa Watchtower sa Gilead. Dipelo tša bohle di be di thabile, kudu-kudu tša batswadi ba dialoga tše 56.
David Walker, yo e bilego setho sa lapa la Bethele ya United States ka nako e telele, o ile a thoma lenaneo ka thapelo e tšwago pelong. Ke moka modula-setulo e lego David Splane, yo e lego setho sa Sehlopha se Bušago sa Dihlatse tša Jehofa, o ile a thoma lenaneo la go aloga ka go botša bo-tate le bo-mma bao gore: “Le swanetše go retwa e le ruri. Dika tšeo le di rutilego barwa le barwedi ba lena di ba tutueleditše gore ba tsenele tirelo ya boromiwa.” Batswadi bao ba ka ba ba be ba tshwenyegile kudu ka ge barwa le barwedi ba bona ba be ba tla tloga ba e-ya dikabelong tša bona tša dinageng tša kgole. Lega go le bjalo, Ngwanabo Rena Splane o ile a ba kgonthišetša gore: “Le se ke la tshwenyega ka bana ba lena. Jehofa a ka kgona go ba hlokomela go feta kamoo lena le bego le ka ba hlokomela ka gona.” Ke moka a re: “Naganang ka dilo tše dibotse tšeo barwa le barwedi ba lena ba tlago go di fihlelela. Batho bao ba tlaišegago ba tla hwetša khomotšo ya kgonthe ka lekga la mathomo maphelong a bona.”
Kamoo le ka Tšwelago Pele le Tlišetša ba Bangwe Lethabo
Modula-setulo o ile a rola diboledi tše nne. Sa pele e be e le Ralph Walls yo e lego setho sa Komiti ya Lekala ya United States yo a ilego a bolela ka sehlogo se se rego, “Dulang le Butše Mahlo.” O ile a gatelela gore bofofu bja moya bo kotsi kudu go feta bofofu bja nama. Phuthego ya lekgolong la pele la nywaga ya Laoditsea e ile ya foufala moyeng. Bakriste ba phuthego yeo bao ba bego ba foufetše ba ile ba thušwa, eupša ka mehla go kaone kudu go phema bofofu bjo bo bjalo ka go dula re butše mahlo a rena a moya. (Kutollo 3:14-18) Seboledi se itše: “Dulang le butše mahlo, gomme le lebelele banna ba ikarabelago go etša kamoo Jehofa a ba lebelelago ka gona.” Dialoga ga se tša swanela go tshwenyega ka mo go feteletšego ge e ba go e-na le mathata ka phuthegong. Morena Jesu Kriste o tseba dilo tše bjalo ka moka. O tla kgonthišetša gore ditaba di rarollwa ka nako e swanetšego.
Se se latelago, Samuel Herd yo e lego setho sa Sehlopha se Bušago, o ile a araba potšišo e rego, “Na le Itokišitše?” Go etša ge mosepedi a tšea diaparo tšeo a di nyakago, le dialoga di swanetše gore ka mehla di apare dika tša motho yo mofsa. Di swanetše go ba le kwelobohloko ya Jesu. Ge molephera a be a mmotša gore: “Xe O ka rata, O ka kxôna xo mphodiša,” Jesu o ile a re: “Ke rata fao; fôla!” (Mareka 1:40-42) Ke moka seboledi se ile sa re: “Ge e ba ruri le nyaka go thuša batho, le tla hwetša tsela ya go dira bjalo.” Ba-Filipi 2:3 e botša Bakriste gore ba tsebe gore ‘ba bangwe ba a ba phala.’ Ngwanabo Rena Herd o itše: “Go ikokobetša go bohlokwa kudu go feta go ba le tsebo. Bao le gahlanago le bona bodireding bja lena le bana babo lena le dikgaetšedi ka phuthegong ba tla holwa ke tsebo ya lena ge feela le ikokobeditše.” O phethile ka go bolela gore ge e ba dialoga di tšwela pele di apara lerato la Bokriste, gona di ikemišeditše go ya dikabelong tša tšona, di kgonthišegile gore di tla atlega.—Ba-Kolose 3:14.
Mark Noumair, e lego yo mongwe wa bahlahli ba Gilead, o ile a tsoša maikwelo a go fagahla ka sehlogo sa polelo ya gagwe se se rego, “Na le tla Tšwela Pele le e Kgomaretše?” Mo ge go bolelwa ka “e” go šupša go tebogo ya rena bakeng sa botho bja Jehofa. Psalme 103:2 e re: “Môya wa-ka, rêta Morêna! O se lebalê tše di botse tše a Xo diretšexo tšohle.” Ba-Isiraele ba ile ba ipontšha ba sa leboge manna ao a bego a ba phediša, ba a bitša “boxôbê byó bo sa horišexo.” (Numeri 21:5) Ge nako e be e dutše e e-ya, manna a ile a tšwela pele a ba hola, eupša ba ile ba se sa hlwa ba a leboga. Mohlahli o itše: “Ge le ka lebala dilo tšeo Jehofa a di dirilego gomme la dumelela tirelo ya lena nageng e šele gore e be setlwaedi, seo se tla kgoma tsela yeo ka yona le lebelelago modiro woo Jehofa a le neilego wona.” Psalme 103:4 e bolela gore Jehofa o “xo apeša botho.” Dialoga di tla thabela botho bja Modimo bjo lerato diphuthegong tša tšona tše difsa.
Mohlahli yo mongwe wa Gilead e lego Lawrence Bowen, o boletše ka sehlogo se se rego, “Na di tla le Tlela?” O boletše gore ditho tša sehlopha sa bo-119 sa Gilead di itlwaeditše ka thata gore e be baromiwa ba atlegago. Eupša ga bjale, di swanetše go kgomarela Jehofa le modiro woo a di neilego wona. Go Kutollo 14:1-4, ba 144 000 ba hlaloswa e le “ba ba latêlaxo Kwana mo e yaxo.” Bohle bao ba lego sehlopheng seo ba kgomarela Jehofa le Morwa wa gagwe ka potego e sa kwanantšhego go sa šetšwe diteko tšeo ba lebeletšanago le tšona, gomme ba fihlelela dipakane tša bona. Seboledi se itše: “Go sa šetšwe seo se ka diregago, le rena re kgomarela Jehofa le modiro woo a re neilego wona ka go bontšha potego e sa kwanantšhego.” Ka go dira bjalo, dialoga di tla hwetša gore ditšhegofatšo tša Jehofa di a di “tlêla.”—Doiteronomio 28:2.
Ba Tšweletša Dienywa Tirelong ya Bona
Mafelo-bekeng a mangwe le a mangwe nakong ya thuto, barutwana ba be ba tšea karolo bodireding bja tšhemo. Ge Wallace Liverance e lego mongwadiši wa sekolo, a be a bolela le bona lenaneong, go ile gwa bonagala gore ba be ba atlega. Ba be ba bolela ditaba tše dibotse bonyenyane ka maleme a lesome gomme ba thoma dithuto tše mmalwa tša Beibele. Banyalani ba bangwe sehlopheng se sa Gilead ba ile ba thoma thuto ya Beibele le monna wa mo-China. Ka morago ga go boela ka makga a mabedi, ba ile ba mmotšiša kamoo a ikwago ka gona ka go tseba Jehofa. O ile a bula Beibele ya gagwe gomme a ba kgopela gore ba bale Johane 17:3. O be a ikwa gore o tseleng e išago bophelong.
Ke moka Anthony Morris, e lego setho sa Sehlopha se Bušago, o ile a boledišana le bana babo rena ba bararo bao ba hlankelago e le ditho tša Dikomiti tša Makala tša Côte d’Ivoire, Dominican Republic le Ecuador. Bana ba babo rena ba ile ba kgonthišetša dialoga gore Dikomiti tša Makala di lebeletše pele go fihleng ga tšona gomme di tla di thuša go itlwaelanya le dikabelo tša tšona.
Se se latelago, Leonard Pearson yo e lego setho sa lapa la Bethele ya United States, o ile a bolela le ditho tše tharo tša Komiti ya Lekala tše di tšwago Democratic Republic of the Congo, Papua New Guinea le Uganda. Bana ba babo rena ba ile ba kgothaletša dialoga gore di tšee karolo ka mo go feletšego bodireding bja tšhemo. Banyalani ba bangwe bao e lego baromiwa ba feditšego nywaga ya ka godimo ga e 21 ba le Congo ba thušitše batho ba 60 gore ba ineele gomme ba kolobetšwe. Banyalani bao ga bjale ba swara dithuto tše 30 tša Beibele, gomme barutwana ba bona ba 22 ba ba gona dibokeng tša phuthego. Ka ge go e-na le puno e kaalo ya moya, ga bjale ke nako e botse kudu ya go hlankela e le baromiwa.
Go Nea Bohlatse ka Moya wa go Akgofa
Gerrit Lösch, e lego setho sa Sehlopha se Bušago, o ile a nea polelo ya go phetha. Sehlogo sa gagwe se be se re, “Go Bolela ka Modimo le go Nea Bohlatse ka Jesu Letšatšing la Morena.” Mantšu “bohlatse,” “dihlatse” le “go nea bohlatse” a tšwelela ka makga a 19 ka pukung ya Kutollo. Ka gona, Jehofa o tloga a bolela ka go lebanya mabapi le modiro woo a nyakago gore batho ba gagwe ba o dire. Re swanetše go nea bohlatse bjo bo bjalo neng? Nakong ya “letšatši la Morêna.” (Kutollo ) Letšatši leo le thomile ka 1914, gomme le tšwela pele le mehleng ya rena, go fihlela nakong e tlago. Go ya ka 1:9, 10Kutollo 14:6, 7 modiro wa go bolela ka Modimo o thekgwa ke barongwa. Kutollo 22:17 e bontšha gore boikarabelo bja go hlahla modiro wa go nea bohlatse ka Kriste bo neilwe mašaledi a Bakriste ba tloditšwego. Eupša ka moka ga rena re swanetše go holwa ke tokelo yeo gona bjale. Go temana 20, Jesu o begilwe a bolela gore: “Ke tla tloxa kè e-tla!” Ngwanabo Rena Lösch o ile a kgothaletša bohle bao ba bego ba le gona gore: “Botšang batho le re, ‘[E-tlang le] tšeê meetse a bophelô à fo fiwa fêla.’ Jesu o tla tloga a e-tla. Na re itokišitše?”
Fred Rusk yo a ilego a hlankela e le mohlahli wa Sekolo sa Gilead ka nywaga e 11, o ile a phetha lenaneo ka thapelo ya go leboga Jehofa yeo e ilego ya kgoma dipelo tša bohle bao ba bego ba le gona. E be e le phetho e swanetšego ya letšatši leo e bilego nako ya lethabo le legolo.
[Lepokisi go letlakala 13]
DIPALO-PALO TŠA SEHLOPHA
Palo ya dinaga tše di emetšwego: 10
Palo ya dinaga tšeo ba abetšwego go tšona: 25
Palo ya barutwana: 56
Palo-gare ya nywaga: 32,5
Palo-gare ya nywaga therešong: 16,4
Palo-gare ya nywaga bodireding bja nako e tletšego: 12,1
[Seswantšho go letlakala 15]
Sehlopha se se Alogago sa bo-119 sa Sekolo sa Beibele sa Watchtower sa Gilead
Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga go le letshadi go ya go le letona mothalading o mongwe le o mongwe.
(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.