Dira Gore go Naganišiša e be mo go Thabišago

BATHONG ba bangwe kgopolo ya go naganišiša e ka ba e boifišago. Ba ka lebelela go naganišiša e le modiro o thata o tsomago go tsepamiša kgopolo mo go tseneletšego. Ba bjalo ba ka ba ba ikwa ba le molato ge ba hlokomologa go naganišiša, kudu-kudu ge ba bala ka bohlokwa bja gona. (Ba-Filipi 4:8) Lega go le bjalo, go naganišiša ka setu ditherešo tšeo re ithutilego tšona ka Jehofa, dika tša gagwe tše dibotse, dilo tše di makatšago tšeo a di dirilego, dilo tšeo a di nyakago gotee le morero wa gagwe o kgahlišago e ka ba tsela e bile e swanetše go ba tsela e thabišago kudu ya go diriša nako ya rena. Ka baka la’ng?

Jehofa Modimo ke Mmuši yo a Phagamego wa legohle e bile o swaregile ka go phethagatša morero wa gagwe o mogolo. (Johane 5:17) Lega go le bjalo, o itshwenya ka go hlokomela dikgopolo tšeo di naganwago ka setu tša morapedi yo mongwe le yo mongwe. Mopsalme Dafida o be a tseba se gomme o ile a ngwala ka tlase ga pudulelo ya Modimo gore: “Morêna, O a nthlaoloxanya, O a ntseba. O ntseba xe ke dula, le xe ke tsoxa; O ntemoxa tša pelong, [o le] kxolê.”—Psalme 139:1, 2.

Mathomong, motho yo mongwe a ka lebelela mantšu ao a mopsalme ka tsela e fošagetšego. A ka nea mabaka ka gore: ‘Gaešita le ge Modimo a le “kxolê,” o lemoga dilo tše mpe ka moka tšeo ke di naganago.’ Ke therešo gore go lemoga seo go ka re hola ka tsela e itšego. Go ka re thuša go lwantšha dikgopolo tše fošagetšego gomme ge e ba re e-na le dikgopolo tše bjalo, re botše Modimo ka tšona, re kgodišegile gore o tla re lebalela motheong wa tumelo ya rena sehlabelong sa Jesu sa topollo. (1 Johane 1:8, 9; 2:1, 2) Lega go le bjalo, ka nako e swanago, re swanetše go gopola gore Jehofa o hlahloba barapedi ba gagwe ka tsela e nepagetšego. O re ela hloko ge ka tebogo re nagana ka yena.

O ka botšiša gore: “Na ruri Jehofa o lemoga dikgopolo ka moka tše dibotse tša barapedi ba gagwe ba dimilione?” O tloga a dira sona seo. Jesu o ile a gatelela go re kgahlegela ga Jehofa ge a be a bolela gore Jehofa o šetša gaešita le dithaga tše dinyenyane gomme a oketša ka gore: “Le feta dithaxa tše ntši.” (Luka 12:6, 7) Dithaga ga di kgone go nagana ka Jehofa. Ka gona ge e ba a di šetša, ke mo go kwagalago gakaakang gore le rena o swanetše go ba a re kgahlegela gotee le go thabišwa ke dikgopolo tša go bontšha go boifa Modimo tša yo mongwe le yo mongwe wa rena! Ee, ka go swana le Dafida, re ka rapela ka kgodišego gore: “A nkê O kxahlwê-hlê ke . . . dikeleletšô tšé tša pelo ya-ka, Wêna Morêna Lentswê la-ka, Wêna Monamoledi wa-ka.”—Psalme 19:14.

Bohlatse bjo bo oketšegilego bja gore Jehofa o tloga a kgahlegela go naganišiša ga barapedi ba gagwe ba botegago bo hwetšwa mantšung a buduletšwego a moporofeta Maleaki. Ge a bolela mabapi le mehla ya rena, o boletše e sa le pele gore: “Ba-šia-Modimo, xe bôná ba boledišana, Morêna ó a theetša, ó a di kwa; ’me ba ba mmoifaxo ba ngwaletšwe puku ya kxopotšô pel’a xaxwe, ya ba sa lebalexo ’ina l’axwe.” (Maleaki 3:16, mongwalo o sekamego ke wa rena.) Go ikgopotša gore Jehofa o a “theetša” ge re nagana ka yena ruri go ka re thuša go thabela go naganišiša ka Modimo. Ka gona, anke re boeletšeng mantšu a mopsalme yo a ngwadilego gore: “Ke êlêlwa ditirô tša xaxo ka moka; ke akanya tše Wêna O di dirilexo.”—Psalme 77:12.