Phihlelo

E Bile Tlhohlo le Lethabo go Godiša Bana ba Seswai ka Ditsela tša Jehofa

KA GE GO ANEGA JOYCELYN VALENTINE

Ka ngwaga wa 1989, monna wa-ka o ile a ya go šoma nageng ya ka ntle. O be a holofeditše go romela tšhelete ya go hlokomela bana ba rena ba seswai. Eupša dibeke di ile tša feta, go se na nko e tšwago lemina. Le dikgwedi di ile tša feta ke sa kwe selo go tšwa go monna wa-ka. Ke be ke dula ke ikhomotša ka go re, ‘Ge dilo di mo sepelela gabotse o tla boa gae.’

KE ILE ka tlalelwa ka baka la go hloka tšhelete ya go hlokomela bana. Mašegong a mantši ao ke a feditšego ke hlobaela ke be ke ipotšiša ke sa kgolwe ke re: ‘Go tla bjang gore a sware lapa la gagwe ka tsela ye?’ Mafelelong ke ile ka amogela therešo e kwešago bohloko ya gore monna wa-ka o re lahlile. Le lehono ga se a boa, ka morago ga nywaga e 16 a sepetše. Ka baka leo, ke ile ka godiša bana ba-ka ka ntle le thušo ya gagwe. Seo e bile tlhohlo, eupša go bona bana ba-ka ba amogela ditsela tša Jehofa go nthabišitše kudu. Lega go le bjalo, pele ga ge ke go botša gore re phetše bjang re le lapa, anke ke go botše gore ke godišitšwe bjang.

Go Tsoma Tlhahlo ya Beibele

Ke belegwe ka 1938, sehlakahlakeng sa Caribbean sa Jamaica. Le ge tate a be a sa tsene kereke, o be a bolela gore o boifa Modimo. Gantši bošego o be a nkgopela gore ke mmalele pukung  ya Dipsalme ka Beibeleng. Ka nakwana, ke ile ka kgona go swara dipsalme tše dintši ka hlogo. Mma o be a tsena kereke ya kgaufsi, gomme mabakeng a mangwe o be a e-ya le nna moo.

Ge re le moo re ile ra botšwa gore Modimo o iša batho ba go loka legodimong gomme ba babe o ba fiša ka mo go sa felego mollong wa dihele. Gape re ile ra botšwa gore Jesu ke Modimo le gore o rata bana. Ke ile ka gakanega gomme ka tšhaba Modimo. Ke ile ka ipotšiša gore: ‘Ge e ba Modimo a re rata, ke ka baka la’ng a tlaiša batho ka mollo?’

Kgopolo ya mollo wa dihele e be e ntlhokiša boroko. Ge nako e dutše e e-ya, ke ile ka ingwadiša sekolong sa Beibele seo se thekgwago ka mašeleng ke Seventh-Day Adventist Church gomme ke tsena ka go ngwalelana le bona. Ba be ba ruta gore batho ba babe ba ka se tlaišwe ka mo go sa felego, eupša go e na le moo ba be ba tla fišwa lore-lore dikgabong tša mollo. Seo se be se kwagala kaone kudu, gomme ke ile ka thoma go ya kerekeng ya bona. Eupša ke ile ka hwetša dithuto tša bona di gakantšha, gomme seo ke bego ke ithuta sona ga se sa lokiša kwešišo ya-ka ka boitshwaro bjo bo bego bo amogelwa.

Ka nako yeo, batho ka kakaretšo ba be ba dumela gore bootswa bo fošagetše. Lega go le bjalo, nna le ba bangwe re be re dumela gore diotswa ke bao ba nago le dinyatsi tše dintši. Ka gona, batho bao ba sego ba nyalana eupša ba e-ba le kopano ya botona le botshadi seng sa bona ba be ba sa senye. (1 Ba-Korinthe 6:9, 10; Ba-Hebere 13:4) Kwešišo yeo e tlaleleditše tabeng ya gore ke be le bana ba selelago ka ntle ga lenyalo.

Go Dira Tšwelopele ya Moya

Ka 1965, Vaslyn Goodison le Ethel Chambers ba ile ba tla go dula motseng wa kgaufsi le rena wa Bath. E be e le babulamadibogo, goba badiredi ba nako e tletšego ba Dihlatse tša Jehofa, gomme ka letšatši le lengwe ba ile ba boledišana le tate. O ile a amogela taletšo ya bona ya gore a be le thuto ya legae ya Beibele. Le nna ba be ba nthuta ge ba nkhweditše ka gae mohla ba mo etetše. Le ge ke be ke gonona Dihlatse tša Jehofa, ke ile ka dira phetho ya go ithuta Beibele le bona e le gore ke ba ntšhe diphošo.

Ke ile ka botšiša dipotšišo tše dintši nakong ya thuto gomme Dihlatse di ile tša diriša Beibele go di araba ka moka. Ka thušo ya tšona ke ile ka tseba gore bahu ga ba kwe selo le gore ga ba tlaišwe diheleng. (Mmoledi 9:5, 10) Le gona ke ithutile ka kholofetšo ya go phela ka mo go sa felego Paradeiseng mo lefaseng. (Psalme 37:11, 29; Kutollo 21:3, 4) Le ge tate a ile a se sa tšwela pele go ithuta Beibele, ke ile ka thoma go kopanela le phuthego ya kgaufsi ya Dihlatse tša Jehofa. Tsela yeo diboka di bego di swarwa ka khutšo le ka thulaganyo e nthušitše go ithuta ka mo go oketšegilego ka Jehofa. Le gona ke be ke e-ya dikopanong tša selete le tša tikologo, e lego dipokano tše dikgolo tšeo di bego di rulaganywa ke Dihlatse. Go tlwaelana mo ga-ka le Beibele go bjetše kganyogo e tiilego ya go rapela Jehofa ka tsela e swanetšego. Lega go le bjalo, ke bile le lepheko.

Ka nako yeo, ke be ke dula le tatago bana ba bararo go bana ba-ka ba tshelelago gomme re se ra nyalana. Ke ile ka ithuta go tšwa ka Beibeleng gore Modimo o hloile bootswa, ka gona letswalo la-ka le ile la thoma go ntshwenya. (Diema 5:15-20; Ba-Galatia 5:19) Ge lerato la-ka la go rata therešo le gola, ke ile ka hlologela go phela ka go dumelelana le molao wa Modimo. Mafelelong ke ile ka dira phetho. Ke ile ka botša monna yoo ke bego ke dula le yena gore re swanetše go nyalana go sego bjalo segwera sa rena se tla fela. Le ge monna yoo a be a se bodumeding bja-ka, re ile ra nyalana ka molao ka di-15 tša August 1970, e lego nywaga e mehlano ka morago ga ge Dihlatse di boletše le nna la mathomo. Ka December 1970, ke ile ka bontšha boineelo bja-ka go Jehofa ka go kolobetšwa.

Ge e le mabapi le bodiredi, nka se tsoge ke lebetše letšatši leo ke thomilego go dira modiro wa boboledi ka lona. Ke be ke tšhogile gomme ke sa tsebe gore ke tla thoma bjang poledišano ya Beibele. Ge e le gabotse, ke ile ka thušwa ke ge mong wa ntlo ya pele a fediša poledišano ya rena ka pela. Lega go le bjalo, ka morago ga nakwana ke ile ka se sa tšhoga. Mafelelong a letšatši ke be  ke thabile kudu, ka ge ke boletše le batho ba mmalwa ka ditaba tša Beibele gomme ke ba tlogeletše dikgatišo tšeo di theilwego Beibeleng.

Go Boloka Lapa le Tiile Moyeng

Ka 1977 lapa la rena le be le goletše go bana ba seswai. Ke be ke ikemišeditše go dira sohle seo nka se kgonago go thuša lapa la-ka go hlankela Jehofa. (Jošua 24:15) Ka gona, ke ile ka šoma ka thata go swara thuto ya ka mehla ya Beibele le lapa la-ka. Ka dinako tše dingwe ka baka la go lapa ke be ke otsela mola ngwana yo mongwe a dutše a bala serapa ka go hlaboša, gomme ba be ba ntsoša. Eupša go lapa mmeleng ga se gwa ka gwa re šitiša go ithuta Beibele re le lapa.

Le gona ke be ke rapela gantši gotee le bana ba-ka. Ge ba gotše ka mo go lekanego ke ile ka ba ruta go rapela Jehofa ka bobona. Ke ile ka kgonthiša gore yo mongwe le yo mongwe o be a ithapelela pele a robala. Nna ke be ke rapela gotee le ngwana yo mongwe le yo mongwe yoo e bego e sa le yo monyenyane go ka ithapelela.

Monna wa-ka mathomong o be a ganetšana le taba ya gore ke ye le bana dibokeng tša phuthego. Lega go le bjalo, taba ya gore a šale a ba hlokometše mola ke le dibokeng e ile ya fokotša kganetšo. O be a rata go sepela bošego go yo etela bagwera ba gagwe, eupša taba ya gore a sepele le bana ba seswai o be a sa e kwešiše! Ka morago, o ile a thoma go nthuša go ba hlapiša le go ba apeša gore ba ye Holong ya Mmušo.

Bana ba ile ba thoma go tlwaela go ba gona dibokeng ka moka tša phuthego le go tšea karolo bodireding bja phatlalatša. Matšatšing a maikhutšo a selemo ge dikolo di tswaletšwe gantši ba be ba e-ya tirelong ya tšhemo le babulamadibogo, goba badiredi ba nako e tletšego ba ka phuthegong. Seo se thušitše bana ba-ka ba banyenyane gore ba mediše lerato la go rata phuthego le modiro wa boboledi ka dipelong tša bona.—Mateo 24:14.

Nako ya Diteko

E le gore a kaonefatše boemo bja lapa la rena bja ditšhelete, monna wa-ka o ile a thoma go šoma dinageng tša ka ntle. O be a e-ba kgole le lapa ka lebaka le letelele eupša a boa ka mehla ka morago ga nako e itšego. Eupša, ka 1989 o ile a sepela gomme a se sa boa. Bjalo ka ge ke boletše pejana, go se bonagale ga monna wa-ka go ntlogeletše tlalelo. Mašego a mantši ke be ke lla ke rapela Jehofa ka go se kgaotše bakeng sa khomotšo  le kgotlelelo, gomme ke ile ka lemoga gore o arabile dithapelo tša-ka. Mangwalo a swanago le Jesaya 54:4 le 1 Ba-Korinthe 7:15 a nthušitše go hwetša khutšo monaganong le matla a go tšwela pele ka bophelo. Le gona, bagwera le meloko ba ka phuthegong ya Bokriste ba ile ba nthekga maikwelong le nameng. Ke tloga ke leboga thušo ya Jehofa le batho ba gagwe kudu.

Re ile ra ba le diteko tše dingwe. Ka nako e nngwe morwedi wa-ka o ile a kgaolwa ka phuthegong ka baka la boitshwaro bjo e sego bja mangwalo. Bana ba-ka ka moka ke ba rata kudu, eupša potego ya-ka go Jehofa e tla pele. Nakong yeo, nna gotee le bana ba-ka re ile ra latela tlhahlo ya Beibele mabapi le tsela yeo re swanetšego go swara bao ba kgaotšwego. (1 Ba-Korinthe 5:11, 13) Batho ba bantši bao ba sa kwešišego boemo bja rena ba ile ba re sola o šoro. Lega go le bjalo, ka morago ga gore morwedi wa-ka a bušetšwe ka phuthegong monna wa gagwe o ile a mpotša gore o kgahlilwe ke tsela yeo re ilego ra emela melao ya motheo ya Beibele re tiile. Ga bjale yena le lapa la gagwe ba hlankela Jehofa ba le gotee.

Go Lebeletšana le Mathata a Ditšhelete

Ge monna wa-ka a be a re tlogela ke be ke sa gole moputso wa kgwedi le kgwedi, le gona lapa le ile la se sa hwetša thekgo ya gagwe ya mašeleng. Boemo bjo bo re rutile go tšeela godimo lehumo la moya le go kgotsofalela bophelo bjo bonolo go e na le go phegelela dilo tše di bonagalago. Ge bana ba thoma go thušana ba ile ba ratana gomme ba gomarelana. Ge ba bagolo ba thoma go šoma ba ile ba ithapela go hlokomela ba banyenyane. Morwedi wa-ka yo mogolo Marseree, o ile a thuša moratho wa gagwe Nicole, go fetša dithuto tša gagwe tša sekolo sa sekontari. Go oketša moo, ke be ke e-na le lebenkele le lenyenyane. Tšhelete e nyenyane yeo ke bego ke e hwetša e thušitše go hlokomela dinyakwa tša rena tša nama.

Jehofa ga se a ka a re tlogela. Ka letšatši le lengwe ke ile ka botša kgaetšedi wa Mokriste gore re ka se kgone go ya Kopanong ya Selete ka baka la boemo bja rena bja tša ditšhelete. O ile a araba ka gore: “Kgaetšedi Val, ge o e-kwa feela go bolelwa ka kopano, o itokiše! Jehofa o tla le direla tšohle.” Ke ile ka latela keletšo ya gagwe. Jehofa o ile a re direla tšohle, gomme o sa tšwela pele a dira bjalo. Lapa la-ka ga se la ka la foša kopano ka baka la go hloka tšhelete.

Ka 1988, Ledimo le Matla leo le bitšwago Gilbert le ile la hlasela Jamaica, gomme re ile ra tlogela magae a rena ra tšhabela lefelong leo le šireletšegilego. Ka morago ga gore ledimo le homole ka nakwana, nna le morwa wa-ka re ile ra tloga ra ya thotobolong yeo pele e bego e le legae la rena. Ge re be re epa-epa fao ke ile ka bona selo seo ke bego ke rata go se phološa. Ka moragonyana ledimo le ile la thoma go tšutla gape, eupša ke ile ka tšwela pele ke swere selo seo ke bego ke rata go se phološa. “Mma bea thelebišene fase. Na o mosadi wa Lota?” (Luka 17:31, 32) Mantšu ao a morwa wa-ka a ile a dira gore ke hlaphogelwe. Ke ile go lahla thelebišene yeo e kolobilego, ra kitimela lefelong leo le šireletšegilego.

Ga bjale ke a tšhoga ge ke gopola gore ke ile ka bea bophelo bja-ka kotsing ka baka la TV. Eupša pelo ya-ka e tlala lethabo ge ke gopola mantšu a phafošago ao a boletšwego ke morwa wa-ka letšatšing leo. Ke leboga thuto ya Beibele yeo a ithutilego yona phuthegong ya Bokriste, ka yona o ile a kgona go nthuša gore ke efoge go ikgobatša gasehlogo nameng mohlomongwe le moyeng.

Ledimo leo le be le sentše ntlo le thoto ya rena, gomme le re feditše matla. Ka morago go ile gwa tla bana babo rena ba Bakriste. Ba ile ba re nea kgothatšo ya gore re lebeletšane  le tahlegelo ya rena re botile Jehofa le go tšwela pele re le mafolofolo bodireding, le gona ba ile ba re thuša go aga ntlo ya rena lefsa. Mošomo woo wa lerato le wa boikgafo wo o dirilwego ke Dihlatse tša baithapi tša Jamaica le tše tšwago dinageng tše dingwe o ile wa re thabiša kudu.

Go Etiša Jehofa Pele

Ka morago ga gore morwedi wa-ka wa bobedi e lego Melaine a fetše dithuto tša gagwe tša sekolong, o ile a hlankela e le modiredi wa mmulamadibogo. Morago ga moo o ile a amogela taletšo ya go hlankela e le mmulamadibogo phuthegong e nngwe, e lego seo se bego se bolela gore o swanetše go tlogela mošomo wa gagwe. Le ge mošomo woo o be o dira gore a kgone go thuša ka lapeng, re ile ra holofela gore Jehofa o tla re hlokomela ge e ba yo mongwe le yo mongwe wa rena a bea mediro ya Mmušo pele. (Mateo 6:33) Ka morago, morwa wa-ka Ewan, le yena o ile a laletšwa go hlankela e le mmulamadibogo. Le ge a be a hlokomela lapa ka ditšhelete, re ile ra mo hlohleletša go amogela taletšo yeo gomme re ile ra mo lakaletša tšhegofatšo ya Jehofa. Le ka mohla ga se ka ka ka thibela bana ba-ka go oketša tirelo ya bona ya Mmušo, gomme le rena re šetšego gae ga se ra ka ra hloka dilo tša bohlokwa. Go e na le moo, lethabo la rena le ile la oketšega gomme ka dinako tše dingwe re be re kgona le go thuša bao ba nyakago thušo.

Lehono ke thabišwa kudu ke go bona bana ba-ka ba “sepela therešong.” (3 Johane 4) Morwedi wa-ka Melaine, o sepela le monna wa gagwe yo e lego molebeledi wa tikologo bodireding bja gagwe bja bosepedi. Morwedi wa-ka Andrea, le monna wa gagwe ba hlankela e le babulamadibogo ba kgethegilego, gomme o sepela le monna wa gagwe yo e lego molebeledi wa tikologo wa go thuša ge a etela diphuthego. Morwa wa-ka Ewan ke mogolo ka phuthegong, e bile yena le mosadi wa gagwe ke babulamadibogo ba kgethegilego. Morwedi wa-ka yo mongwe e lego Ava-Gay, o šoma le monna wa gagwe ofising ya lekala ya Dihlatse tša Jehofa ya Jamaica. Jennifer, Genieve le Nicole ba hlankela le banna ba bona le bana ba bona ka mafolofolo ka diphuthegong tša gabo bona. Marseree o dula le nna, gomme bobedi bja rena re kopanela Phuthegong ya Port Morant. Ditšhegofatšo tša-ka ke tše dikgolo ka baka la gore bana ba-ka ba seswai ba tšwela pele ba rapela Jehofa.

Botšofadi bo ntlišeditše mefokolo ya mmele. Ga bjale ke na le bolwetši bja rheumatoid arthritis (bolwetši bja marapo), lega go le bjalo ke sa thabela go hlankela ke le mmulamadibogo. Eupša dinakong tše di fetilego ke ile ka thoma go thatafalelwa ke go sepela motseng wo re dulago go wona wa meboto. Go be go le thata go ya bodireding. Ke ile ka leka go ragela paesekela gomme ka hwetša go phala go sepela ka maoto. Ka gona ke ile ka reka paesekela ya kgale gomme ka e diriša. Mathomong bana ba-ka ba be ba gateletšwa ke go bona mmago bona yo a swerwego ke bolwetši bja marapo a ragela paesekela. Lega go le bjalo, ba be ba thabetše go bona ke tšwela pele ke phetha boboledi ka mo pelo ya-ka e ratago.

Ke thaba kudu ge ke bona batho bao ke ithutilego le bona ba amogela therešo ya Beibele. Ke rapela Jehofa ka mehla gore a thuše lapa la-ka go tšwela pele le mmotegela dinakong tše tša bofelo le go iša ka go sa felego. Ditheto tša-ka le ditebogo ke di lebiša go Jehofa ‘Mokwi yo Mogolo wa dithapelo,’ ge a nthušitše go fenya tlhohlo ya go godiša bana ba seswai ka ditsela tša gagwe.—Psalme 65:2.

[Seswantšho go letlakala 10]

Ke e-na le bana ba-ka, balekane ba bona le ditlogolo

[Seswantšho go letlakala 12]

Ga bjale ke diriša paesekela go phethagatšeng bodiredi bja-ka