Go Tsoma Toko go tla re Šireletša

“Sa pele Le tsomê . . . tokô ya [Modimo].”—MATEO 6:33.

1, 2. Ke phetho efe yeo Mokriste wa mofsa a ilego a e tšea, le gona ke ka baka la’ng a ile a tšea phetho e bjalo?

MOSADI yo mofsa wa Mokriste kua Asia o be a šoma e le mongwaledi ofising ya mmušo. O be a botega, a fihla mošomong ka nako e bile a sa tšwafe. Lega go le bjalo, ka ge mošomo wa gagwe e be e le wa nakwana, o ile wa swanelwa ke go lekolwa. Moetapele mošomong o ile a botša mosadi yo yo mofsa gore o tla dira gore e be mošomi wa ka mehla gaešita le go mo nea maemo a phagamego ge feela mosadi yo a ka ba le ditswalano tše di gobogilego le yena. Mosadi yo o ile a gana nnang, gaešita le ge se se be se bolela gore o tla lahlegelwa ke mošomo wa gagwe.

² Na mosadi yoo yo mofsa wa Mokriste e be e le lešilo? Aowa, o ile a latela mantšu a Jesu ka kelohloko a rego: “Sa pele Le tsomê . . . tokô ya [Modimo].” (Mateo 6:33) Go yena, go latela melao ya motheo ya go loka go be go le bohlokwa kudu go feta go hwetša mehola e itšego ka go ba le boitshwaro bjo bo gobogilego bja tša botona le botshadi.—1 Ba-Korinthe 6:18.

Bohlokwa bja Toko

3. Toko ke’ng?

³ “Tokô” e na le kgopolo ya go kgomarela melao ya motheo ya boitshwaro. Ka Beibeleng, mantšu a Segerika le Sehebere a na le kgopolo ya “go botega.” Ga se taba ya go ipona o le moloki, e lego go ikahlola ka go dumelelana le ditekanyetšo tša gago ka noši. (Luka 16:15) Ke go botega ka go dumelelana le ditekanyetšo tša Jehofa. Ke toko ya Modimo.—Ba-Roma 1:17; 3:21.

4. Ke ka baka la’ng go le bohlokwa gore Mokriste e be yo a lokilego?

⁴ Ke ka baka la’ng toko goba go loka go le bohlokwa? Ka gobane Jehofa, e lego “Modimo wa xo loka,” o amogela batho ba gagwe ge ba dira tše di lokilego. (Psalme 4:1; Diema 2:20-22; Habakuku 1:13) Motho le ge e le ofe yo a dirago dilo tše di sa lokago a ka se be le tswalano ya kgaufsi le yena. (Diema 15:8) Ke ka baka leo moapostola Paulo a kgothaleditšego Timotheo gore: “Thšaba dikxanyoxô tša bosoxana. Phêxêlêla tokô” gotee le dika tše dingwe tša bohlokwa kudu. (2 Timotheo 2:22) Le gona, ke lona lebaka leo ka lona Paulo a akareditšego “se-phêma-sefêxa sa tokô” ge a be a lokeletša dikarolo tše di fapa-fapanego tša ditlhamo tša rena tša moya.—Ba-Efeso 6:14.

5. Ke bjang dibopiwa tše di sa phethagalago di ka tsomago toko?

⁵ Ee, ga go na motho yo a lokilego ka mo go feletšego. Batho bohle ba abetše sebe go Adama, gomme bohle ke badiradibe, e lego batho bao ba sa lokago go tloga bjaneng. Lega go le bjalo, Jesu o itše re swanetše go tsoma toko goba go loka. Seo se kgonega bjang? Se kgonega ka kgopolo ya gore Jesu o gafile bophelo bja gagwe bjo bo phethagetšego e le topollo bakeng sa rena, gomme ge e ba re bontšha tumelo sehlabelong seo, Jehofa o ikemišeditše go re lebalela dibe. (Mateo 20:28; Johane 3:16; Ba-Roma 5:8, 9, 12, 18) Motheong woo, ge re dutše re ithuta ka ditekanyetšo tša Jehofa tša go loka gomme re dira sohle seo re ka se kgonago bakeng sa go di kwa—re rapelela thušo ya go fenya mafokodi a rena—gona Jehofa o amogela borapedi bja rena. (Psalme 1:6; Ba-Roma 7:19-25; Kutollo 7:9, 14) Seo ruri se a kgothatša!

Go Loka Lefaseng Leo le sa Lokago

6. Ke bjang lefase e bego e le lefelo le kotsi go Bakriste ba pele?

⁶ Ge barutiwa ba Jesu ba be ba amogela thomo ya go ba dihlatse tša gagwe “xo fihla maxomong a lefase,” ba ile ba lebeletšana le boemo  bjo thata. (Ditiro 1:8) Tšhemo ka moka yeo ba bego ba abetšwe yona e be e “rapaletše matleng a yo mobe,” e lego Sathane. (1 Johane 5:19, NW) Lefase le be le feteditšwe moya o mobe wo a kgothaletšago batho go ba le wona, gomme Bakriste ba be ba tla ba kotsing ya go o hema. (Ba-Efeso 2:2) Lefase go bona e be e le lefelo le kotsi. Ke feela ka go tsoma pele toko ya Modimo moo ba bego ba ka kgona go kgotlelela gomme ba kgomarela potego ya bona. Ba bantši ba ile ba kgotlelela, eupša ba mmalwa ba ile ba arošwa “mmileng wa tokô.”—Diema 12:28; 2 Timotheo 4:10.

7. Ke boikarabelo bofe bjo bo nyakago gore Mokriste a lwantšhe ditutuetšo tše di gobogilego?

⁷ Na lefase ke lefelo le le šireletšegilego go Bakriste lehono? Le gatee! Le gobogile le go feta kamoo le bego le le ka gona lekgolong la pele la nywaga. Go oketša moo, Sathane o lahletšwe lefaseng gomme o lwa ntwa e šoro malebana le Bakriste ba tloditšwego, e lego “ba bexo ba šaletše, è le ba peu ya [mosadi], ba ba xomaretšexo melaô ya Modimo, ba ba naxo le bohlatse bya Jesu Kriste.” (Kutollo 12:12, 17) Le gona Sathane o hlasela motho le ge e le ofe yo a thekgago “peu” yeo. Lega go le bjalo, Bakriste ga ba na botšhabelo mo lefaseng. Gaešita le ge e se karolo ya lona, ba swanetše go phela go lona. (Johane 17:15, 16) Le gona ba swanetše go dira boboledi go lona bakeng sa go tsoma batho bao ba sekametšego go lokeng gomme ba ba rute go ba barutiwa ba Kriste. (Mateo 24:14; 28:19, 20) Ka baka leo, ka ge Bakriste ba ka se pheme ditutuetšo tše di gobogilego tša lefase le ka mo go feletšego, ba swanetše go di lwantšha. Anke re ahla-ahleng tše nne tša ditutuetšo tše bjalo.

Molaba wa Boitshwaro bjo bo Gobogilego

8. Ke ka baka la’ng ba-Isiraele ba ile ba thoma go hlankela medimo ya ba-Moaba?

⁸ Go ya bofelong bja leeto la bona la nywaga e 40 lešokeng, ba-Isiraele ba bantši kudu ba ile ba aroga tseleng ya go loka. Ba ile ba bona Jehofa a ba phološa ka ditsela tše dintši, gomme go se go ye kae ba be ba tla tsena Nageng ya Kholofetšo. Lega go le bjalo, ka nako yeo ya bohlokwa kudu, ba ile ba thoma go hlankela medimo ya ba-Moaba. Ka baka la’ng? Ba ile ba ineela ‘kganyogong ya nama.’ (1 Johane 2:16) Pego e re: “Sethšaba se thomile xo dira boôtswa le basadi ba Moaba.”—Numeri 25:1.

9, 10. Ke boemo bofe lehono bjo bo dirago gore go dula re gopola tutuetšo e senyago ya dikganyogo tše di fošagetšego tša nama e be gabohlokwa?

⁹ Tiragalo yeo e bontšha tsela yeo ka yona dikganyogo tše mpe tša nama di ka senyago bao ba sego šedi. Re swanetše go ithuta go yona, kudu-kudu ka gobane boitshwaro bjo bo gobogilego bo thomile go lebelelwa ka kakaretšo e le tsela ya bophelo e amogelegago. (1 Ba-Korinthe 10:6, 8) Pego e tšwago United States e re: “Pele ga 1970, go dula gotee ga batho bao ba sa nyalanago e be e le go roba molao dinageng ka moka tša Amerika. Gona bjale ke setlwaedi. Balekane bao ba fetago seripa-gare bao ba nyalanago ka lekga la pele ba kile ba dula gotee pele ba ka nyalana.” Seo le boitshwaro bjo bo swanago bjo bo gobogilego ga di direge nageng e tee feela. Di direga lefaseng ka bophara, gomme ka manyami, Bakriste ba bangwe ba latetše mokgwa wo—gaešita le go lahlegelwa ke boemo bja bona ka phuthegong ya Bokriste.—1 Ba-Korinthe 5:11.

¹⁰ Go oketša moo, phatlalatšo e fošagetšego  yeo e kgothaletšago boitshwaro bjo bo gobogilego e bonagala e hwetšwa gohle. Difilimi le mananeo a thelebišene a bontšha gore go tloga go amogelega gore bafsa ba be le dikopano tša botona le botshadi pele ga lenyalo. Ditswalano tša bosodoma di bontšhwa e le tše di tlwaelegilego. Le gona tše dintši di bontšha mokgwa wa go ba le dikopano tša botona le botshadi di sa šie. Go oketša moo, diswantšho tše di bontšhago dikopano tša botona le botshadi di hwetšagala gabonolo go Internet. Ka mohlala, mongwadi yo mongwe wa kuranta o begile gore morwa wa gagwe wa nywaga e šupago o fihlile gae a e-tšwa sekolong gomme ka lethabo a botša tatagwe gore mogwera wa gagwe wa sekolong o hweditše mokero go Internet wo o bontšhago basadi bao ba ponokago ba e-ba le dikopano tša botona le botshadi. Tate yo o be a tšhogile, eupša ke bana ba bakae bao ba ilego ba fihla mekerong e bjalo ka ntle le go botša batswadi ba bona? Le gona, ke batswadi ba bakae bao ba tsebago seo se lego ka gare ga dipapadi tša bidio tšeo bana ba bona ba di bapalago? Dipapadi tše dintši tše di tumilego di akaretša boitshwaro bjo bo gobogilego bjo bo selekišago, gotee le botemona le bošoro.

11. Lapa le ka šireletšwa bjang boitshwarong bjo bo gobogilego bja lefase?

¹¹ Lapa le ka lwantšha bjang selo se bjalo se se nyatšegago seo go thwego ke boithabišo? Ka go tsoma toko ya Modimo pele, e lego go gana go akaretšwa boitshwarong le ge e le bofe bjo bo gobogilego. (2 Ba-Korinthe 6:14; Ba-Efeso 5:3) Batswadi bao ka mo go swanetšego ba hlahlago mediro ya bana ba bona gomme ba ba ruta go rata Jehofa le melao ya gagwe ya go loka, ba ba matlafaletša gore ba pheme diswantšho tše di kgothaletšago bootswa, dipapadi tša bidio tša diswantšho tše di kgothaletšago bootswa, difilimi tše di gobogilego le diteko tše dingwe tše di sa lokago.—Doiteronomio 6:4-9. *

Kotsi ya Kgateletšo ya Batho Setšhabeng

12. Ke bothata bofe bjo bo ilego bja tsoga lekgolong la pele la nywaga?

¹² Ge Paulo a be a le Lisitara kua Asia Minor, o ile a fodiša motho ka tsela ya mohlolo. Pego e re: “Mašaba xe a bôna se Paulo a se dirilexo, ba hlatloša mantšu ba bolêla ka Se-Likaonia ba re: Badimo ba itirile batho ba foloxêla xo rena! Baranaba ba re ké yêna Jupitere, Paulo ba re ké yêna Merekurio, ka xe e le yêna mmoledi wa ditaba.” (Ditiro 14:11, 12) Ka morago, lešaba lona leo le ile la nyaka go bolaya Paulo le Baranaba. (Ditiro 14:19) Go molaleng gore batho bao ba be ba tutuetšwa gabonolo ke kgateletšo ya batho setšhabeng. Go bonagala eka ge ba bangwe go tšwa tikologong yeo ba be ba e-ba Bakriste, ga se ba ka ba lahla tshekamelo ya bona ya ditumela-khwele. Lengwalong la gagwe le le yago go Bakriste ba kua Kolose, Paulo o lemošitše malebana le go “dirêla Barongwa.”—Ba-Kolose 2:18.

13. E mengwe ya metlwae yeo Mokriste a swanetšego go e phema ke efe, le gona a ka hwetša bjang matla a go dira bjalo?

¹³ Lehono, Bakriste ba therešo le bona ba swanetše  go phema mekgwa e tumilego yeo e amogelwago ye e theilwego dikgopolong tša bodumedi bja maaka tšeo di robago melao ya motheo ya Bokriste. Ka mohlala, ditirelo tše dintši tšeo di tlwaelegilego dinageng tše dingwe mabapi le matswalo le lehu di theilwe maakeng a gore re na le moya wo o phologago lehu. (Mmoledi 9:5, 10) Go na le dinaga tšeo go tšona e lego motlwae gore banenyana ba ripše karolo ya setho sa bosadi. * Wo ke mokgwa o sa nyakegego o sehlogo le wo o sa dumelelanego le tlhokomelo e lerato yeo batswadi ba Bakriste ba swanetšego go e nea bana ba bona. (Doiteronomio 6:6, 7; Ba-Efeso 6:4) Bakriste ba ka lwantšha bjang dikgateletšo tša batho setšhabeng le go phema mekgwa e bjalo? Ka go bota Jehofa ka mo go feletšego. (Psalme 31:6) Modimo yo a lokilego o tla matlafatša le go hlokomela bao ba mmotšago go tšwa pelong gore: “O ’thšabêlô sa-ka, ’me O sebô sa-ka; O Modimo wa-ka yo ke mmotilexo.”—Psalme 91:2; Diema 29:25.

Le se ke la Lebala Jehofa

14. Ke temošo efe yeo Jehofa a ilego a e nea ba-Isiraele nakwana pele ga ge ba ka tsena Nageng ya Kholofetšo?

¹⁴ Nakwana pele ga ge ba-Isiraele ba ka tsena Nageng ya Kholofetšo, Jehofa o ile a ba lemoša gore ba se ke ba mo lebala. O itše: “O itôtê xore O se lebalê Morêna Modimo wa xaxo, wa lesa xo hlôkômêla ditaêlô tša xaxwe, le melaô ya xaxwe, ye nna ke Xo laodišetšaxo lehono E se re xe O ja Ò hora, Ò axa nywakô e mebotse wa dula xo yôna, xe dikxomo tša xaxo le dihufsane tša xaxo di ata, xe O huma disilifêra le dixauta, xe xo kôkôtlêla tše e lexo tša xaxo, ya ba xôna pelo ya xaxo e ikxoxomošaxo, wa lebala Morêna Modimo wa xaxo.”—Doiteronomio 8:11-14.

15. Ke’ng se re ka se dirago go kgonthišetša gore ga re lebale Jehofa?

¹⁵ Na selo se swanago se ka direga lehono? Ee, ge e ba re etiša pele dilo tše di fošagetšego. Lega go le bjalo, ge e ba re tsoma toko ya Modimo pele, borapedi bjo bo sekilego e tla ba selo sa bohlokwa kudu maphelong a rena. Go etša ge Paulo a re kgothaleditše, re tla ‘reka nako e swanetšego’ gomme ra lemoga gore ke nako ya go dula re phakgame bodireding bja rena. (Ba-Kolose 4:5, bapiša le NW; 2 Timotheo 4:2.) Lega go le bjalo, ge e ba boiketlo goba go hwetša ditsela tša go ithabiša go le bohlokwa kudu go rena go feta go ba gona dibokeng le tirelong ya tšhemo, re ka lebala Jehofa ka kgopolo ya go mmea boemong bja bobedi maphelong a rena. Paulo o boletše gore mehleng ya bofelo, batho e be e tla ba “ba xo iphsina ba lahlile Modimo.” (2 Timotheo 3:4) Bao ruri e lego Bakriste ba itlhahloba ka mehla go kgonthišetša gore ga ba tutuetšwe ke tsela e bjalo ya go nagana.—2 Ba-Korinthe 13:5.

Phafogelang Moya wa go Itaola

16. Ke moya ofe o fošagetšego wo o ilego wa bonagatšwa ke Efa le ba bangwe mehleng ya Paulo?

¹⁶ Kua Edene, Sathane o ile a kgona go tsoša kganyogo ya boithati ya go rata boitaolo go Efa. Efa o be a nyaka go itirela diphetho mabapi le se se lokilego le se se fošagetšego. (Genesi 3:1-6) Lekgolong la pele la nywaga, ba bangwe phuthegong ya Korinthe ba be ba e-na le moya o bjalo wa boitaolo. Ba be ba nagana gore ba tseba gakaone go feta Paulo, gomme o ile a ba gegea ka go ba bitša baapostola ba maipei.—2 Ba-Korinthe 11:3-5; 1 Timotheo 6:3-5.

17. Re ka phema bjang go ba le moya wa boitaolo?

 ¹⁷ Lefaseng lehono, batho ba bantši ke “baipuši, baikxanthši,” gomme Bakriste ba bangwe ba tutueditšwe ke tsela e bjalo ya go nagana. Ba bangwe gape e ile ya ba baganetši ba therešo. (2 Timotheo 3:4; Ba-Filipi 3:18) Ge go tliwa borapeding bjo bo sekilego, go bohlokwa gore re lebelele go Jehofa bakeng sa tlhahlo gomme re dirišane le “molaki e a bôtêxaxo yo bohlale” le bagolo ba phuthego. Yeo ke tsela ya go tsoma toko, le gona e re šireletša malebana le go ba le moya wa boitaolo. (Mateo 24:45-47; Psalme 25:9, 10; Jesaya 30:21) Phuthego ya batlotšwa ke “kôkwanê le mothêô wa therešô.” Jehofa o e lokišeleditše bakeng sa go re šireletša le go re hlahla. (1 Timotheo 3:15) Go lemoga karolo ya yona e bohlokwa go tla re thuša gore re se ke ra ‘dira dilo ka kgang’ ge re dutše re ikokobeletša thato ya Jehofa ya go loka.—Ba-Filipi 2:2-4; Diema 3:4-6.

Ekišang Jesu

18. Re kgothaletšwa go ekiša Jesu ka ditsela dife?

¹⁸ Beibele e bolela ka Jesu ka tsela ya boporofeta gore: “O rata xôna xo loka; O hloile bokxôpô.” (Psalme 45:7; Ba-Hebere 1:9) A boemo bjo bobotse gakaakang bja kgopolo bjo bo swanetšego go ekišwa! (1 Ba-Korinthe 11:1) Jesu o be a sa fo tseba ditekanyetšo tša Jehofa tša go loka; o be a di rata. Ka gona ge Sathane a be a mo leka kua lešokeng, Jesu ka go se dika-dike o ile a gana ka go tia go fapošwa ‘mmileng wa toko.’—Diema 8:20; Mateo 4:3-11.

19, 20. Mafelelo a mabotse a go tsoma toko ke afe?

¹⁹ Ke therešo gore dikganyogo tše di sa lokago tša nama e ka ba tše matla. (Ba-Roma 7:19, 20) Lega go le bjalo, ge e ba re lebelela toko e le ya bohlokwa, se se tla re matlafatša gore re kgone go lebeletšana le bobe. (Psalme 119:165) Go rata toko ka mo go tseneletšego go tla re šireletša ge re lebeletšane le seo se fošagetšego. (Diema 4:4-6) Gopola gore nako le nako ge re ineela tekong, re dira gore Sathane a fenye. Ruri go tla ba kaone kudu ge re ka lwa le yena gomme ra dira gore Jehofa e be yena a fenyago!—Diema 27:11; Jakobo 4:7, 8.

²⁰ Ka ge Bakriste ba therešo ba tsoma toko, ke bao “ba tletšexo ’kenyô tša tokô ka Jesu Kriste, tše Modimo a tl’o xo rêtwa a tumišwa ka tšôna.” (Ba-Filipi 1:10, 11) Ba apara “motho e mofsa, e a bopetšwexo xo etša Modimo xo lokeng le kxethexong ya makxonthe.” (Ba-Efeso 4:24) Ke batho ba Jehofa gomme ba phelela go mo hlankela, ga ba phelele go ithabiša. (Ba-Roma 14:8; 1 Petro 4:2) Seo ke se se laolago dikgopolo le ditiro tša bona. Ruri ba thabiša pelo ya Tatago bona wa legodimong!—Diema 23:24.

[Mengwalo ya ka tlase]

Na o ka Hlalosa?

• Ke ka baka la’ng go le bohlokwa go tsoma toko?

• Mokriste yo a sa phethagalago a ka tsoma toko bjang?

• Ke dilo dife lefaseng tšeo Mokriste a swanetšego go di phema?

• Go tsoma toko go re šireletša bjang?

[Dipotšišo tša Thuto]

[Seswantšho go letlakala 26]

Lefase e be e le lefelo le kotsi go balatedi ba Jesu

[Seswantšho go letlakala 27]

Bana bao ba rutwago go rata Jehofa ba tla matlafatšwa gore ba pheme boitshwaro bjo bo gobogilego

[Seswantšho go letlakala 28]

Ba-Isiraele ba bangwe ba ile ba lebala Jehofa ka morago ga ge ba be ba thomile go atlega kua Nageng ya Kholofetšo

[Seswantšho go letlakala 29]

Bakriste ka go swana le Jesu ba hloile go se loke