“Ka Kxonthe Lentšu la xo tla Lebakeng la Xôna, ké Lôna le le Botse”
“Ka Kxonthe Lentšu la xo tla Lebakeng la Xôna, ké Lôna le le Botse”
LETŠATŠING ka moka la kopano ya Dihlatse tša Jehofa, Kim o ile a dira ka gohle gore a theetše le go ngwala dintlha ge a be a dutše a leka go dira gore morwedi wa gagwe wa nywaga e mebedi le seripa a kgosele. Mafelelong a lenaneo, kgaetšedi wa Mokriste yo a bego a dutše kgaufsi le Kim o ile a ya go yena gomme a mo reta go tšwa pelong bakeng sa tsela yeo ka yona yena le monna wa gagwe ba ilego ba hlokomela morwedi wa bona nakong ya lenaneo. Theto yeo e ile ya kgoma Kim kudu moo e lego gore le gona bjale, nywaga ka morago, o re: “Ge ke lapile kudu dibokeng, ke gopola seo kgaetšedi yola a ilego a se bolela. Mantšu a gagwe a botho a sa dutše a nkgothaletša go tšwela pele ke tlwaetša morwedi wa rena.” Ka kgonthe, mantšu ao a bolelwago ka nako e swanetšego a ka kgothatša motho. Beibele e re: “Ka kxonthe lentšu la xo tla lebakeng la xôna, ké lôna le le botse.”—Diema 15:23.
Lega go le bjalo, go ka ba thata go ba bangwe ba rena go reta batho ba bangwe. Ka dinako tše dingwe, go lemoga mafokodi a rena go ka dira gore go be thata go dira bjalo. Mokriste yo mongwe o re: “Nna ke bona go le bjalo ka ge eka ke eme mohlabeng. Ge ke tšwela pele ke reta batho ba bangwe, ke moo ke ikwago eka ke a nwelela.” Dika tše bjalo ka go ba le dihlong, go se ikholofele goba go tšhoga go se kwešišwe le tšona di ka dira gore go be thata go reta ba bangwe. Go tlaleletša moo, ge e ba re gotše re retwa ka sewelo goba re sa retwe le gatee, re ka hwetša go le thata go reta batho ba bangwe.
Lega go le bjalo, go tseba gore theto e ka kgoma gabotse yo a retago le yo a retwago go ka re šušumeletša go leka ka gohle go reta ba bangwe ka nako e swanetšego. (Diema 3:27) Ka gona, ke mehola efe e tlišwago ke go dira bjalo? Anke re eleng hloko e mengwe ka boripana.
Mehola ya Kgonthe
Theto e swanetšego e ka aga go ikholofela ga yo a retwago. Mohumagadi wa Mokriste yo a bitšwago Elaine o re: “Ge batho ba ntheta ke bona gore ba a nkholofela le gore ba a mpota.” Ee, go reta motho yo a se nago boikholofelo go ka mo nea sebete sa go lebeletšana le mapheko gomme a feleletše ka go hwetša lethabo. Bafsa kudu-kudu ke bona ba holwago ke theto e ba swanetšego. Mofsa yo mongwe yo a lego mahlalagading yo a dumelago gore o nyamišwa ke dikgopolo tša gagwe tše fošagetšego o re: “Ke dula ke leka ka gohle gore ke thabiše Jehofa, eupša ka dinako tše dingwe ke kwa eka selo le ge e le sefe seo ke se dirago ga se a lekana. Ge motho a ntheta, ke thaba kudu.” Ka kgonthe seema sa Beibele se tloga se rereša ge se re: “Lentšu le bolêlwaxo lebakeng la xôna, le byalo ka matsaka a thsipi e khwibidu moxopyaneng wa thsipi-thsêhla.”—Diema 25:11.
Theto e ka tutuetša le go kgothatša motho. Modiredi yo mongwe wa nako e tletšego o re: “Theto e nkgothaletša go šoma ka thata gotee le go kaonefatša bodiredi bja-ka.” Mmago bana ba babedi o lemogile gore ge bana ba gagwe ba retwa ke ditho tše dingwe tša phuthego bakeng sa dikarabo tša bona dibokeng, ba nyaka go araba ka mo go oketšegilego. Ee, theto e ka tutueletša bafsa go dira tšwelopele bophelong bja Bokriste. Ge e le gabotse, ka moka ga rena re nyaka go kgonthišetšwa gore re tšeelwa
godimo le gore re lebelelwa re le ba bohlokwa. Lefase le leo le tletšego kgateletšego le ka re dira gore re ikwe re lapile e bile re nyamile. Mogolo wa Mokriste o re: “Ka dinako tše dingwe ge ke ikwa ke nolegile moko, theto e ba bjalo ka karabo ya dithapelo tša-ka.” Ka mo go swanago, Elaine o re: “Ka dinako tše dingwe ke kwa eka Jehofa o bontšha go nkamogela ka dipolelo tša ba bangwe.”Go retwa go ka dira gore re ikwe re amogelega. Go nea theto e tšwago pelong go bontšha go naganela gotee le go aga moya wa borutho, wa tšhireletšego le wa tebogo. Ke bohlatse bja gore re tloga re rata Bakriste-gotee le rena gotee le go ba tšeela godimo. Mma yo a bitšwago Josie o re: “Nakong e fetilego, ke ile ka swanelwa ke go kgomarela therešo ka lapeng leo le nago le madumedi a sa swanego. Ka nako yeo, go amogelwa ke batho bao ba godilego moyeng go be go matlafatša boikemišetšo bja-ka bja gore ke se ke ka lesetša.” Ka kgonthe, “re dithô seng sa rena.”—Ba-Efeso 4:25.
Go nyaka go reta ba bangwe go re thuša go bona dika tša bona tše dibotse. Re lebelela bokgoni bja ba bangwe e sego mafokodi a bona. Mogolo wa Mokriste yo a bitšwago David o re: “Go thabela seo ba bangwe ba se dirago go tla re thuša go ba reta kgafetša-kgafetša.” Go dula re gopola gore Jehofa le Morwa wa gagwe ba tloga ba reta batho bao ba sa phethagalago go tla re tutueletša gore le rena re be bao ba retago ba bangwe kudu.—Mateo 25:21-23; 1 Ba-Korinthe 4:5.
Bao e ba Swanelago
Jehofa Modimo, ka ge e le Mmopi, ke ketapele ya bao ba swanetšwego ke theto. (Kutollo ) Gaešita le ge a sa nyake gore re age boikholofelo bja gagwe goba go mo kgothatša, ge re reta Jehofa bakeng sa go ba ga gagwe yo a makatšago le bakeng sa botho bja gagwe bjo lerato, o batamela kgaufsi le rena gomme ra ba le tswalano le yena. Le gona, go reta Modimo go re thuša go ba le pono e swanetšego le e leka-lekanego ka dilo tšeo re di fihlelelago gotee le go re dira gore re lebiše theto go Yena ge re atlega. ( 4:11Jeremia 9: 23, 24) Jehofa o nea kholofelo ya bophelo bjo bo sa felego go batho ka moka bao ba swanelegago gomme leo ke le lengwe la mabaka ao a re tutueletšago go Mo reta. (Kutollo 21:3, 4) Kgoši Dafida wa bogologolo o be a fišegela go “tumiša ’ina la Modimo” le go “mo xodiša ka xo Mo leboxa.” (Psalme 69:30) Anke le rena re beng le kganyogo yeo.
Barapedi-gotee le rena ba swanelwa ke theto e swanetšego. Ge re ba reta ka tsela e bjalo, re dira ka go dumelelana le taelo ya Modimo ya go ‘hlokomelana seng sa rena, le go išana leratong le medirong e mebotse.’ (Ba-Hebere 10:24) Moapostola Paulo e be e le mohlala tabeng ye. O ngwaletše phuthego ya kua Roma gore: “Ke thôma ka xo leboxa Modimo wa-ka ka Jesu Kriste xe ke bôna lena bohle, tumêlô ya lena xe e bolêlwa mo xo fêla lefaseng.” (Ba-Roma 1:8) Ka mo go swanago, moapostola Johane o ile a reta Mokriste-gotee le yena e lego Gayo bakeng sa mohlala wa gagwe o mobotse kudu wa ge a “swere tsela ya therešô.”—3 Johane 1-4.
Lehono, ge Mokriste-gotee le rena a bonagatša seka se se swanago le sa Kriste ka tsela e beago mohlala, a phetha kabelo e lokišeditšwego gabotse goba a nea karabo e tšwago pelong sebokeng, re na le sebaka se sebotse sa go leboga motho yo bjalo. Goba ge ngwana a leka ka thata go phetla mangwalo dibokeng tša phuthego, re ka mo reta. Elaine, yo go boletšwego ka yena pejana, o re: “Ga ra fiwa ka go swana. Ka go lemoga seo motho yo mongwe a se dirago, re bontšha go tšeela godimo dimpho tše sa swanego tša batho ba Modimo.”
Ka Lapeng
Go thwe’ng ka go leboga ditho tša malapa a rena? Go nyakega nako e ntši, boiteko le tlhokomelo e lerato go monna le mosadi gore ba hlokomele lapa la bona moyeng, maikwelong gotee le ka dilo tše di bonagalago. Ka ntle le pelaelo ba swanetše go retana gotee le go retwa ke bana ba bona. (Ba-Efeso 5:33) Ka mohlala, Lentšu la Modimo le bolela mabapi le mosadi wa sethakga gore: “Bana ba xaxwe ba êma ba re: Mma-mahlôxônôlô! Monna wa xaxwe ó a mo rêta.”—Diema 31:10, 28.
Bana le bona ba swanelwa ke theto. Ka manyami, batswadi ba bangwe ba kitimela go botša bana ba bona seo ba se nyakago go bona, eupša ke ka sewelo ba ba retago bakeng sa boiteko bjo ba bo dirago tabeng ya go ba bao ba hlomphago le bao ba kwago. (Luka 3:22) Ge bana ba retwa ba sa gola, gantši seo se dira gore ngwana a ikwe a le bohlokwa e bile a šireletšegile ka mo go oketšegilego.
Therešo ke gore go nyakega boiteko go reta ba bangwe, eupša re holega kudu ge re dira bjalo. Ge e le gabotse, ge re e-ba dithakga tša go reta bao ba swanelwago ke theto, re tla ba bao ba thabilego e le ruri.—Ditiro 20:35.
Amogela Theto Gomme o Rete ba Bangwe ka Moya o Mobotse
Lega go le bjalo, go amogela theto e ka ba teko go ba bangwe. (Diema 27:21) Ka mohlala, go ka dira gore batho bao ba nago le mokgwa wa go ikgogomoša ba ipone ba phagametše ba bangwe. (Diema 16:18) Ka gona, go nyakega go ba šedi. Moapostola Paulo o neile temošo ye yeo e šomago e rego: “Ke botša lena bohle ke re: Xo se kê xwa ba le e a ithsemaxo a fetiša moo xo mo swanetšexo. Ithsemeng ka xo ya ka kêlêlô; mang le mang a yê ka mo Modimo a mo lekanyeditšexo tumêlô.” (Ba-Roma 12:3) E le gore re thuše ba bangwe go se wele molabeng wa go itshema go fetiša tekano, e ka ba bohlale go se lebiše tlhokomelo go beng ga bona ba bohlale kudu goba ponagalong ya bona e botse. Go e na le moo, re swanetše go reta ba bangwe bakeng sa mediro ya bona e mebotse.
Ge theto e newa le go amogelwa ka moya o mobotse, e ka re hola. Re ka tutueletšega go lemoga gore re kolota Jehofa bakeng sa selo le ge e le sefe se sebotse seo re ilego ra se dira. Theto gape e ka re kgothaletša go tšwela pele re itshwere gabotse.
Theto ya kgonthe le e swanetšego ke mpho yeo ka moka ga rena re ka e neago. Ge e ba re reta motho ka go bontšha go naganela, a ka kgomega kudu go feta kamoo re ka naganago.
[Lepokisi/Seswantšho go letlakala 18]
Lengwalo Leo le Ilego la Kgoma Pelo ya Gagwe
Molebeledi yo mongwe wa mosepedi o sa gopola gabotse nako yeo ka yona yena le mosadi wa gagwe ba ilego ba boela mo ba bego ba dula gona ka morago ga go fetša letšatši leo le tonyago kudu la marega bodireding. O re: “Mosadi wa-ka o be a tsenwe ke phefo e bile a nolegile moko, gomme o ile a mpotša gore o be a ikwa gore a ka se sa kgona go tšwela pele. O itše: ‘Go tla ba kaone kudu gakaakang ge re ka hlankela ka nako e tletšego gotee le phuthego, re dula felo gotee le go swara dithuto tša rena tša Beibele.’ Ke ile ka diega go dira phetho le ge e le efe, ka re re tla fetša beke gomme re bone gore o tla ikwa bjang ge beke e fela. Ge e ba a be a sa nyaka go kgaotša, ke be ke tla hlompha maikwelo a gagwe. Ka lona letšatši leo, re ile ra feta posong gomme ra hwetša lengwalo leo a bego a le ngwaletšwe ke ofisi ya lekala. Lengwalo le be le rwele theto e borutho bakeng sa maiteko ao a bego a a dira tirelong ya tšhemo gotee le kgotlelelo ya gagwe, le go bontšha kamoo go ka bago thata ka gona go robala malaong a sa swanego bekeng e nngwe le e nngwe. Theto yeo e ile ya mo kgoma kudu moo e lego gore ga se a ka a bolela gape ka go tlogela modiro wa bosepedi. Ge e le gabotse, gantši o be a nkgothaletša go tšwela pele ge ke be ke nagana go kgaotša.” Banyalani ba ba bile modirong wa bosepedi ka nywaga e nyakilego go ba e 40.
[Seswantšho go letlakala 17]
Ke mang yo a swanelwago ke theto phuthegong ya geno?
[Seswantšho go letlakala 19]
Bana ba gola gabotse ge ba newa tlhokomelo e lerato le theto