Kamoo Botse bo Tlago go Fenya Bobe

Kgoši Dafida e be e le monna wa go loka. O be a rata Modimo kudu, a rata toka e bile a rata batho ba maemo a tlasana. Lega go le bjalo, yona kgoši ye ya go loka e ile ya dira bootswa le mosadi wa yo mongwe wa banna ba yona ba botegago. Le gona, ka morago ga gore Dafida a tsebe gore o imišitše mosadi yoo, e lego Batseba, o ile a rulaganyetša gore monna wa gagwe a bolawe. Ke moka a nyala Batseba e le ge a leka go bipa dibe tša gagwe.—2 Samuele 11:1-27.

GO MOLALENG gore batho ba na le bokgoni bjo bogolo bja go dira botse. Eupša, ke ka baka la’ng ba ikarabela ka ditiro tše dintši tše mpe? Beibele e hlaola mabaka a mmalwa a motheo. Le gona, e utolla kamoo Modimo ka Kriste Jesu a tlago go fediša bobe gatee ya ba moka.

Go Sekamela Bobeng

Kgoši Dafida ka noši o ile a šupa sebaki se sengwe sa ditiro tše mpe. Ka morago ga ge dibe tša gagwe di pepentšhitšwe, o ile a ipona molato ka mo go feletšego ka baka la ditiro tša gagwe. Ke moka o ile a itshola ka go ngwala gore: “O a tseba, ke belexwe kè le wa molato; xomme mmê ó nkamoxetše kè le wa dibe.” (Psalme 51:5) E be e se morero wa Modimo gore bo-mma ba belege bana bao ba tlago go dira dibe. Lega go le bjalo, ge Efa le Adama ba be ba kgetha go rabela malebana le Modimo, ba ile ba lahlegelwa ke bokgoni bja go belega bana bao ba se nago sebe. (Ba-Roma 5:12) Ge moloko wa batho bao ba sa phethagalago o dutše o ata, go ile gwa ba molaleng gore “diakanyô tša pelo ya motho [ke] tše mpe xo tloxa byaneng bya xaxwe.”—Genesi 8:21.

Ge e ba go sekamela sebeng mo go bjalo go sa laolwe, go ka feleletša ka “bohlôtlôlô. [Le] xo hlankêla medimo, le boloi, le thlôyanô, le dintwa, le pefêlô, le boxale, le dithsêlê, le boxarexare.  [Le] moná” le mekgwa e mengwe e kotsi yeo Beibele e e hlalosago e le “medirô ya nama.” (Ba-Galatia 5:19-21) Kgoši Dafida o ile a ineela bofokoding bja nama gomme a dira bootswa, bjoo bo ilego bja feleletša ka ntwa. (2 Samuele 12:1-12) A ka ba a ile a lwantšha go sekamela ga gagwe boitshwarong bjo bo gobogilego. Go e na le moo, ka go hlagolela kganyogo ya gagwe go Batseba, Dafida o ile a latela mokgwa woo morutiwa Jakobo ka morago a ilego a o hlalosa ka gore: “Mang le mang e a lekwaxo, ó xokwa à xôxwa ke tumô ya xaxwe. ’Me tumô xe e amere, e tswala sebe; sebe sôna xe se phethexile, se tswala lehu.”—Jakobo 1:14, 15.

Go bolawa ga batho ka bontši, go kata le go hulwa ga dilo mo go boletšwego sehlogong se se fetilego ke mehlala e feteletšego ya seo se diregago ge batho ba dumelela dikganyogo tše mpe gore di laole ditiro tša bona.

Bobe ka Dinako tše Dingwe bo Bakwa ke go se Tsebe

Phihlelo ya moapostola Paulo e gatelela lebaka le lengwe leo ka lona batho ba dirago dilo tše mpe. Nakong ya ge a be a e-hwa, Paulo o be a tumile ka go ba monna yo a lokilego le yo lerato. O ile a thuša bana babo le dikgaetšedi ba Bakriste ka ntle le boithati. (1 Ba-Thesalonika 2:7-9) Lega go le bjalo, mathomong a bophelo bja gagwe, ge a be a tsebja e le Saulo, o be “à rata xo thšošetša le xo bolaya” batho ba sehlopha se. (Ditiro 9:1, 2) Ke ka baka la’ng Paulo a ile a dumelelana le ditiro tše mpe tšeo di bego di dirwa go Bakriste ba pele e bile a tšea karolo go tšona? O re: “Dilô tšeo ke di dirile kè sa tsebe.” (1 Timotheo 1:13) Ee, Paulo pele o be a “fišexetšwe Modimo; fêla, [a] hlôka temoxô.”—Ba-Roma 10:2.

Go etša Paulo, batho ba bantši ba botegago ba tšea karolo ditirong tše mpe ka gobane ba se na tsebo e nepagetšego ya thato ya Modimo. Ka mohlala, Jesu o lemošitše balatedi ba gagwe gore: “Xo tlo bá xwa tla lebaka la xe motho à Le bolaya a tl’o xo re ké xôna xe a dirêla Modimo.” (Johane 16:2) Dihlatse tša Jehofa tša mehleng yeno di bona therešo ya mantšu a Jesu. Dinageng tše dintši, di ile tša tlaišwa gaešita le go bolawa ke batho bao ba ipolelago gore ba hlankela Modimo. Go molaleng gore go fišegela thoko ka tsela e bjalo ga go thabiše Modimo wa therešo.—1 Ba-Thesalonika 1:6.

Mothomi wa Bobe

Jesu o ile a hlalosa lebaka le legolo leo ka lona bobe bo lego gona. Ge a bolela le baetapele ba bodumedi bao ba bego ba ikemišeditše go mmolaya, o itše: “Tata-weno yo le tšwaxo xo yêna ké Diabolo; ’me Le phêxêlla xo dira medirô ya yêna tata-weno eo. Ké yêna senokwane xo tloxa mathomong.” (Johane 8:44) E be e le Sathane yoo ka baka la mabaka a boithati a ilego a goketša Adama le Efa gore ba rabele malebana le Modimo. Borabele bjoo bo ile bja baka sebe—ka morago bja baka lehu—go batho bohle.

Tshekamelo ya Sathane ya go rata go bolaya e ile ya pepentšhwa tseleng yeo a ilego a swara Jobo ka yona. Ge Jehofa a be a mo dumelela gore a leke potego ya Jobo, Sathane o be a sa kgotsofatšwa ke go dira gore Jobo a lahlegelwe ke dilo tša gagwe. O ile a ba a bolaya bana ba Jobo ba lesome. (Jobo 1:9-19) Nywaga-someng e sa tšwago go feta, batho ba ile ba lebeletšana le go ata mo gogolo ga bobe ka baka la go se  phethagale le go se tsebe ga batho gotee le ka baka la go tsena-tsenana ga Sathane kutšwanyana le ditaba tša batho. Beibele e bolela gore Diabolo o ile a “lahlêlwa lefaseng, le Barongwa ba [gagwe] ba lahlwa le [yena].” Boporofeta bjo bo swanago bo boletše ka mo go nepagetšego e sa le pele gore go rakwa ga Sathane go be go tla tšweletša ‘madimabe a sa kago a bonwa le ka mohla lefaseng.’ Le ge Sathane a ka se gapeletše batho gore ba dire dilo tše mpe, ke setsebi tabeng ya go “[timetša] lefase ka moka la batho.”—Kutollo 12:9, 12.

Go Fediša Bothata bja go Sekamela Bobeng

Ge e ba bobe bo swanetše go fedišetšwa ruri lekokong la batho, bothata bja batho bja tlhago bja go sekamela bobeng, go hloka ga bona tsebo e nepagetšego le tutuetšo ya Sathane di swanetše go fedišwa. Sa pele, bothata bja batho bja tlhago bja go sekamela bobeng bo ka fedišwa bjang dipelong tša bona?

Ga go na ngaka le ge e le efe yeo e lego motho goba sehlare le ge e le sefe seo se dirilwego ke batho seo se ka kgonago go dira modiro woo. Lega go le bjalo, Jehofa Modimo o lokišeleditše sehlare sa go fodiša sebe sa leabela le go se phethagale bakeng sa bohle bao ba ikemišeditšego go se amogela. Moapostola Johane o ngwadile gore: “Madi a Jesu Kriste . . . a re hlatswa dibe tšohle.” (1 Johane 1:7) Ge motho yo a phethagetšego e lego Jesu a be a gafa bophelo bja gagwe ka go rata, o ile “a ipeleša dibe tša rena, a di nametša kwateng ka mmele wa xaxwe, xore re tloxêlanê le tšôna, re phelêlê xo loka.” (1 Petro 2:24) Lehu la Jesu la sehlabelo le be le tla fediša ditla-morago tša tiro ya Adama e mpe. Paulo o bolela gore Kriste Jesu o ile a ba “selefá sa xo lefêla bohlê.” (1 Timotheo 2:6) Ee, lehu la Kriste le buletše batho ka moka tsela ya gore ba boele phethegong yeo Adama a e lahlilego.

Lega go le bjalo, o ka botšiša gore, ‘Ge e ba go hwa ga Jesu nywageng e 2 000 e fetilego go dirile gore batho ba kgone go boela ba phethagale, ke ka baka la’ng bobe le lehu di sa dutše di le gona?’ Go hwetša karabo ya potšišo yeo go ka re thuša go fediša sebaki sa bobedi sa bobe—go se tsebe ga batho merero ya Modimo.

Botse bo Matlafatšwa ke Tsebo e Nepagetšego

Go ba le tsebo e nepagetšego mabapi le seo Jehofa le Jesu ba se dirago gona bjale bakeng sa go fediša bobe go ka thibela motho yo a botegago gore a se amogele ditiro tše mpe a sa lemoge, goba se sebe le go feta, a fetoga yo ge e le gabotse a lwago “le Modimo.” (Ditiro 5:38, 39) Jehofa Modimo o ikemišeditše go hlokomologa dibe tša nakong e fetilego tšeo re di dirilego re sa tsebe. Ge moapostola Paulo a be a bolela a le kua Athene o itše: “Modimo ó hlokomoloxile mabaka a xo se tsebe; xomme mehleng yeno ó laêla batho bohle thokô tšohle, ó re ba boê. Ka xobane ó beile ’tšatši a tl’o xo ahlola lefase ka lôna ka tokô. Moahlodi ké Monna yo a mmeilexo, a bulêla batho bohle tsela ya tumêlô xe a Mo tsoša bahung.”—Ditiro 17:30, 31.

Paulo o be a tseba go tšwa phihlelong ya gagwe gore Jesu o tsošitšwe bahung, ka gobane Jesu yo a tsošitšwego ka boyena o boletše le Paulo gomme a mo thibela gore a se yo tlaiša Bakriste ba pele. (Ditiro 9:3-7) Ka morago ga ge Paulo a amogetše tsebo e nepagetšego ya merero ya Modimo, o ile a fetoga gomme a ba motho yo a lokilego go tšwa pelong e le ge a ekiša Kriste. (1 Ba-Korinthe 11:1; Ba-Kolose 3:9, 10) Go oketša moo, Paulo ka phišego o ile a bolela “ditaba tše tše dibotse tša mmušo.” (Mateo 24:14, NW) Nywageng e nyakilego go ba e 2 000 ka morago ga lehu la Jesu le go tsošwa ga gagwe, Kriste o be a kgethile batho ba itšego ba swanago le Paulo, gore ba tle ba buše le yena Mmušong wa gagwe.—Kutollo 5:9, 10.

Go theoša le ngwaga-kgolo o fetilego go fihla le lehono, Dihlatse tša Jehofa di phethagaditše thomo ya Jesu ka phišego, e rego: “Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:19, 20) Bao ba arabelago molaetšeng wo ba na le tebelelo  ya go phela ka mo go sa felego lefaseng ka tlase ga mmušo wa Kriste wa legodimong. Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Go thuša motho gore a be le tsebo ye ke selo se sebotse kudu seo motho yo mongwe a ka se direlago yo mongwe.

Bao ba amogelago ditaba tše tše dibotse tša Mmušo ba bontšha dika tše bjalo ka “leratô, le lethabô, le moláô; [le] xo se fêle pelo, le botho, le bonôlô, le pôtêxô le bolêta, le boithswarô,” go sa šetšwe bobe ka moka bjo bo ba dikologilego. (Ba-Galatia 5:22, 23) Ka ge ba ekiša Jesu, ga ba “[lefetše] motho bobe ka bobe.” (Ba-Roma 12:17) E le motho ka o tee ka o tee, ba katanela ‘go tšwela pele ba fenya bobe ka botse.’—Ba-Roma 12:21; Mateo 5:44.

Phenyo ya Mafelelo ya go Fenya Bobe

Batho ka bobona ba ka se tsoge ba kgonne go fenya mothekgi yo mogolo wa bobe e lego Sathane Diabolo. Lega go le bjalo, kgaufsinyane Jehofa o tla diriša Jesu go pšhatla hlogo ya Sathane. (Genesi 3:15; Ba-Roma 16:20) Jehofa o tla laela Kriste Jesu gape gore a ‘pšhatle le go fediša’ ditshepedišo ka moka tša bopolitiki, tšeo bontši bja tšona di bakilego bobe bjo bokaakaa go theoša le histori. (Daniele 2:44; Mmoledi 8:9) Letšatšing le le tlago la kahlolo, bohle bao “ba sa kwexo Ebangedi ya Mong wa rena Jesu Kriste, . . . kôtlô e tl’o xo ba wêla ké thsenyêxô ye e sa felexo.”—2 Ba-Thesalonika 1:8, 9; Tsefanya 1:14-18.

Gatee-tee ka morago ga ge Sathane le bao ba mo thekgago ba fedišitšwe, Jesu a le legodimong o tla thuša baphologi gore ba tsošološe lefase gore le be maemong a lona a mathomo. Le gona, Kriste o tla tsoša bohle bao ba swanelwago ke go newa sebaka sa go phela lefaseng leo le tsošološitšwego. (Luka 23:32, 39-43; Johane 5:26-29) Ka go dira bjalo, o tla lokiša tše dingwe tša ditla-morago tša bobe tšeo di bego di tlaiša batho.

Jehofa a ka se ke a gapeletša batho gore ba kwe ditaba tše dibotse tša mabapi le Jesu. Lega go le bjalo, o nea batho sebaka sa go ba le tsebo e lebišago bophelong. Ke gabohlokwa gore le wena o diriše sebaka se gabotse gona bjale! (Tsefanya 2:2, 3) Ge e ba o dira bjalo, o tla ithuta tsela ya go lebeletšana le bobe le ge e le bofe bjoo bo go šulafaletšago bophelo. O tla bona gape kamoo Kriste a tlago go etelela pele phenyong ya mafelelo ya go fenya bobe.—Kutollo 19:11-16; 20:1-3, 10; 21:3, 4.

[Seswantšho go letlakala 5]

Saulo o ile a dumelelana le ditiro tše mpe ka gobane o be a se na tsebo e nepagetšego

[Seswantšho go letlakala 7]

Go thuša motho gore a be le tsebo e nepagetšego ka Modimo ke selo se sebotse kudu seo motho yo mongwe a ka se direlago yo mongwe