Barongwa—Kamoo ba re Kgomago ka Gona

GE MOPOROFETA Daniele a laodiša pono yeo a bilego le yona ya mabapi le lapa la Modimo la barongwa, o ile a ngwala gore: “Ba sekete ga sekete [barongwa] ba . . . direla [Modimo], gomme ba dikete tše lesome ga dikete tše lesome ba ema pele ga gagwe.” (Daniele 7:10, PK) Temana ye e bontšha morero woo ka ona Modimo a ilego a bopa barongwa. Ba bopetšwe go mo hlankela le go dula ba le komana-madula-a-bapile bakeng sa go phetha ditaelo tša gagwe.

Modimo o diriša barongwa go phetha mešomo e itšego bakeng sa batho. Re tla ahla-ahla kamoo a ba dirišago ka gona bakeng sa go matlafatša batho ba gagwe le go ba šireletša, go iša melaetša bathong gotee le go phethagatša kahlolo ya gagwe go bakgopo.

Barongwa ba a Matlafatša le go Šireletša

Ga e sa le go tloga ge dibopiwa tša moya di bona go hlolwa ga lefase le batho ba pele, di ile tša dula di bontšha kgahlego e tseneletšego bathong. Jesu Kriste pele e e-ba motho, ge a be a bolela e le motho yo bohlale ka mo go phethagetšego, o itše: “Kè kxahlwa ke bana ba batho.” (Diema 8:31) Le gona Beibele e re tsebiša gore ‘barongwa ba hlologetše go nyakurela’ ditabeng tša mabapi le Kriste gotee le bokamoso bjoo bo utolletšwego baporofeta ba Modimo.— 1 Petro 1:11,12.

Ge nako e dutše e e-ya, barongwa ba ile ba lemoga gore batho ba bantši ba be ba sa hlankele Mmopi wa bona yo lerato. Se se swanetše go ba se ile sa nyamiša barongwa ba botegago gakaakang! Ka lehlakoreng le lengwe, nako le nako ge go e-ba le modiradibe o tee yo a itsholago gomme a boela go Jehofa, ‘barongwa ba a thaba.’ (Luka 15:10) Barongwa ba kgahlegela ka mo go tseneletšego katlego ya bao ba hlankelago Modimo, gomme Jehofa o ba dirišitše kgafetša-kgafetša go matlafatša le go šireletša bahlanka ba gagwe ba botegago mo lefaseng. (Ba-Hebere 1:14) Ela hloko mehlala e mengwe.

Barongwa ba babedi ba ile ba thuša Lota wa moloki le barwedi ba gagwe go phologa tshenyego ya metse e kgopo ya Sodoma le Gomora ka go ba ntšha lefelong leo. * (Genesi 19:1, 15-26) Nywaga-kgolong e mentši ka morago, moporofeta  Daniele ga a ka a gobala, gaešita le ge a ile a lahlelwa ka moleteng wa ditau. Ka baka la’ng? O begile gore: “Modimo wa-ka ó romile Morongwa wa xaxwe a khuparetša melomo ya ditau.” (Daniele 6:23) Barongwa ba ile ba thekga Jesu mathomong a bodiredi bja gagwe bja lefaseng. (Mareka 1:13) Le gona pejana ga lehu la Jesu, morongwa o ile a bonala go yena gomme “a mo nea matla.” (Luka 22:43) Ruri thekgo yeo ya morongwa e swanetše go ba e bile tšhegofatšo go Jesu dinakong tšeo tše thata tša bophelo bja gagwe! Le gona morongwa o ile a lokolla moapostola Petro kgolegong.—Ditiro 12:6-11.

Na barongwa ba a re šireletša lehono? Ge re rapela Jehofa go ya ka Lentšu la gagwe, re a kgodišega gore barongwa ba gagwe ba matla ba sa bonagalego ba a re šireletša. Beibele e holofetša ka gore: “Morongwa wa Morêna ó xoraxorêla ba ba mmoifaxo; ó a ba namolêla.”—Psalme 34:7.

Lega go le bjalo, re swanetše go lemoga gore barongwa ge e le gabotse ba hlankela Modimo e sego batho. (Psalme 103:20, 21) Ba latela tlhahlo ya Jehofa e sego ditaelo goba dikgopelo tša batho. Ka gona, yo re swanetšego go mo kgopela thušo ke Jehofa Modimo e sego barongwa. (Mateo 26:53) Ke therešo gore ka ge re sa kgone go bona barongwa, re ka se kgone go tseba gore Modimo o ba diriša go fihla bokgoleng bofe bakeng sa go thuša batho ditabeng tše di fapa-fapanego. Eupša re a tseba gore Jehofa o ‘bonagatša matla a gagwe ka bao ba lebeletšego yena ka pelo ka moka.’ (2 Koronika 16:9; Psalme 91:11) Gape re kgodišegile gore “ó [Modimo] a re kwa xe re kxopêla se se amanaxo le thatô ya xaxwe.”—1 Johane 5:14.

Mangwalo gape a re botša gore dithapelo tša rena gotee le borapedi bja rena di swanetše go lebišwa go Modimo feela. (Ekisodo 20:3-5; Psalme 5:1, 2; Mateo 6:9) Barongwa bao ba botegago ba re kgothaletša go dira bjalo. Ka mohlala, ge moapostola Johane a be a leka go rapela morongwa, sebopiwa seo sa moya se ile sa mo kgalema ka gore: “O k’o lesê tšeo! . . . Khunamêla Modimo.”—Kutollo 19:10.

Barongwa ba Fetiša Melaetša ya Modimo

Lentšu “morongwa” le ra gore “motseta,” gomme yeo ke tsela e nngwe yeo barongwa ba hlankelago Modimo ka yona—bjalo ka batseta ba gagwe bathong. Ka mohlala, “Morongwa Gabariele [o ile] a rongwa ke Modimo a ya motseng o mongwê wa Galilea wo ba rexo ké Natsaretha.” Ka baka la’ng? Go yo botša kgarebe yeo e bitšwago Maria gore gaešita le ge e sa le kgarebe, e be e tla ima gomme e belege morwa yo a bego a tla bitšwa Jesu. (Luka 1:26-31) Gape morongwa o ile a romelwa go badiši nageng go ba tsebiša gore “Kriste Morêna” o belegwe. (Luka 2:8-11) Ka mo go swanago, barongwa ba ile ba fetišetša melaetša ya Modimo go Aborahama, Moše, Jesu le ba bangwe ba begilwego ka Beibeleng.—Genesi 18:1-5, 10; Ekisodo 3:1, 2; Luka 22:39-43.

Barongwa ba hlankela bjalo ka batseta ba Modimo bjang lehono? Ela hloko modiro woo Jesu a boletšego e sa le pele ka ona gore balatedi ba gagwe ba tla o dira pele ga bofelo bja tshepedišo ye ya dilo. O itše: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” (Mateo 24:3, 14, NW) Dihlatse tša Jehofa di fetša diiri tša ka godimo ga dimilione tše sekete ka ngwaga di bolela ditaba tše dibotse tša Mmušo wa Modimo. Eupša na o be o tseba gore barongwa le bona ba a akaretšwa modirong wo?  Moapostola Johane o ile a bolela ka pono yeo a bilego le yona gore: “Ka bôna Morongwa e mongwê . . . à swere Ebangedi ya neng le neng ya xo tsebišwa ba ba axilexo lefaseng, dithšaba tšohle le meloko yohle, le maleme ohle le merafô yohle.” (Kutollo 14:6, 7) Lengwalo le le bontšha modiro o bohlokwa kudu wo barongwa ba o direlago batho lehono.

Dihlatse tša Jehofa di bona bohlatse bja tlhahlo ya barongwa ge di dira modiro wa tšona wa boboledi bja ntlo le ntlo. Gantši di kopana le batho bao ba bego ba dutše ba rapelela gore motho a tle a ba thuše go kwešiša merero ya Modimo. Ngwaga o mongwe le o mongwe batho ba dikete ba fihlelela tsebo ya go tseba Jehofa, ka baka la tlhahlo ya barongwa le maiteko a Dihlatse. Eka o ka holwa ke modiro wo wa go phološa maphelo wo o dirwago ka tlase ga tlhahlo ya barongwa.

Barongwa ba Phethagatša Kahlolo ya Modimo

Gaešita le ge ba sa dumelelwa go ahlola batho, barongwa ga se babogedi feela. (Johane 5:22; Ba-Hebere 12:22, 23) Ba šoma e le bafediši, ba ile ba phethagatša dikahlolo tša Modimo nakong e fetilego. Ka mohlala, Modimo o ile a diriša barongwa ntweng ya gagwe malebana le ba-Egipita ba bogologolo, bao ba bego ba thopile ba-Isiraele. (Psalme 78:49) Le gona “Morongwa wa Morêna” o ile a bolaya bahlabani ba dikete tše lekgolo le nago le masome a seswai a metšo e mehlano mešašeng ya manaba a Modimo ka bošego bjo tee.—2 Dikxoši 19:35.

Le nakong e tlago, barongwa ba tlo phethagatša kahlolo e šoro ya Modimo. Jesu o tlo tla “à na le Barongwa ba xaxwe ba matla. Ba ba sa tsebexo Modimo, le ba ba sa kwexo Ebangedi . . . ó tlo ba lefetša ka dikxabo tša mollô.” (2 Ba-Thesalonika 1:7, 8) Lega go le bjalo, tshenyego yeo e tlo tlela feela bao ba sa arabelego gabotse molaetšeng wo o bolelwago lefaseng ka bophara gona bjale ka thekgo ya barongwa. Bao ba tsomago Modimo e bile ba dira ka go dumelelana le dithuto tša Mangwalo ba tla phologa.—Tsefanya 2:3.

Re ka leboga gakaakang barongwa ba botegago, bao ba phethago ditaelo tša Modimo ka mehla! Jehofa o ba dirišetša go thuša le go šireletša bahlanka ba gagwe ba botegago mo lefaseng. Se se a re homotša ka tsela e itšego ka gobane go na le dibopiwa tše kotsi tša moya tšeo di bitšwago batemona tšeo di nyakago go re kweša bohloko.

Batemona—Ke Bomang?

Nywaga-kgolong e 15 ka morago ga ge Sathane a forile Efa kua Edene, lapa la Modimo la barongwa le ile la bona gore Sathane Diabolo o be a atlega ka go aroša batho ka moka go Modimo ka ntle le ba sego kae feela ba botegago, ba bjalo  ka Abele, Henoge le Noage. (Genesi 3:1-7; Ba-Hebere 11:4, 5, 7) Ba bangwe ba barongwa le bona ba ile ba ineela go Sathane. Beibele e ba hlalosa e le meoya e gannego go kwa “mehleng ya Noaxe.” (1 Petro 3:19, 20) Go se kwe ga bona go ile gwa iponagatša bjang?

Mehleng ya Noage barongwa bao go sego gwa bolelwa palo ya bona ba marabele ba ile ba tlogela madulo a bona lapeng la Modimo la legodimong, ba theogela lefaseng, gomme ba apara mebele ya nama. Ka baka la’ng? Ba ile ba hlagolela kganyogo ya go ba le dikopano tša botona le botshadi le basadi. Se se ile sa ba lebiša go beng bo-tatago bana bao ba bitšwago ba-Nefilimi, bao ba ilego ba ba ditšitširipa tše šoro. Go oketša moo, “bokxôpô bya batho bò [be bo] xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla.” Lega go le bjalo, Jehofa Modimo ga a ka a lesetša kgobogo e bjalo ya batho e tšwela pele. O ile a tliša Meetse-fula lefaseng ka moka, ao a ilego a gogola batho ba kgopo ka moka gotee le ba-Nefilimi. Batho feela bao ba ilego ba šala ba phela ke bahlanka ba Modimo ba botegago.—Genesi 6:1-7, 17; 7:23.

Barongwa ba marabele ba ile ba phologa phedišo nakong ya Meetse-fula. Ba ile ba apola mebele ya bona ya nama gomme ba boela lefelong la moya e le dibopiwa tša moya. Ka morago ga moo, ba ile ba tsebja e le batemona. Ba ile ba ipea ka lehlakoreng la Sathane Diabolo, yoo a bitšwago “kxoši ya meôya e mebe.” (Mateo 12:24-27) Go swana le mmuši wa bona, batemona ba nyaka gore batho ba ba rapele.

Batemona ba kotsi eupša ga ra swanela go ba tšhaba. Matla a bona a lekanyeditšwe. Ge barongwa ba sa kwego ba be ba boela legodimong, ga ba ka ba amogelwa gape lapeng la Modimo la barongwa ba botegago. Go e na le moo, ba ile ba se sa hlwa ba hwetša tshedimošo le ge e le efe ya moya e tšwago go Modimo, ba fo ba le bokamoso bja lefsifsi feela. Ka kgonthe, ba ile ba lahlelwa boemong bja lefsifsi bja moya bjo bo tsebjago e le Tartarus. (2 Petro 2:4) Jehofa o ba tlemile ka “ditlêmô tša neng le neng,” e le gore ba be lefsifsing la moya. Go feta moo, ga ba sa kgona go apara mebele ya nama gona bjale.—Juda 6.

O Swanetše go Dira’ng?

Na batemona ba sa kgona go tutuetša batho? Ee, ba dira bjalo ka go diriša “dipoxo” goba “maano a boradia” a go swana le ao a dirišwago ke mmuši wa bona, Sathane Diabolo. (Ba-Efeso 6:11, 12, mongwalo wa tlase wa NW) Lega go le bjalo, re ka ema re tiile kgahlanong le batemona ge re diriša keletšo ya Lentšu la Modimo. Go oketša moo, bao ba ratago Modimo ba šireletšwa ke barongwa ba matla.

Ke gabohlokwa gakaakang gore o ithute tšeo Modimo a di nyakago tše di lego ka Mangwalong gomme o dire ka go dumelelana le seo o ithutago sona! O ka ithuta ka mo go oketšegilego ka dithuto tša Beibele ka go ikgokaganya le Dihlatse tša Jehofa tša lefelong la geno goba ka go ngwalela bagatiši ba makasine wo. Dihlatse tša Jehofa di tla thabela go ithuta Beibele le wena ntle le tefo le ka nako yeo e go loketšego.

[Mongwalo wa ka tlase]

[Lepokisi go letlakala 6]

BARONGWA—KAMOO BA RULAGANTŠWEGO KA GONA

Jehofa o rulagantše lapa la gagwe le legolo la barongwa ka tsela e latelago:

Morongwa yo a ba fetago bohle ka matla le ka taolo ke Mikaele morongwa yo mogolo, goba Jesu Kriste. (1 Ba-Thesalonika 4:16; Juda 9) Baserafi, bakerubi le barongwa ba bangwe ba ka tlase ga gagwe.

Baserafi ba na le maemo a phagamego kudu tokišetšong ya Modimo. Ba hlankela bjalo ka bahlokomedi setulong sa bogoši sa Modimo. Kabelo ya bona e akaretša go tsebatša bokgethwa bja Modimo le go boloka batho ba gagwe ba hlwekile moyeng.—Jesaya 6:1-3, 6, 7.

Bakerubi ba kgaufsi le setulo sa Modimo sa bogoši gomme ba tumiša Jehofa.—Psalme 80:1; 99:1; Hesekiele 10:1, 2.

Barongwa ba bangwe ke batseta ba Jehofa, gomme ba phetha thato ya Gagwe.

[Seswantšho go letlakala 4]

Barongwa ba ile ba phološa Lota le barwedi ba gagwe

[Seswantšho go letlakala 5]

Ge moapostola Johane a be a leka go rapela morongwa, o ile a botšwa gore: “O k’o lesê tšeo!”

[Seswantšho go letlakala 6]

Barongwa ba phethagatša thato ya Modimo

[Seswantšho go letlakala 7]

Na o holwa ke modiro wa boboledi wo o dirwago ka tlase ga tlhahlo ya barongwa?