Le se ke la Šuthela Diabolo Sebaka

“Le se kê la šuthêla Diabolo sebaka.”—BA-EFESO 4:27.

1. Ke ka baka la’ng batho ba bantši ba ile ba belaela go ba gona ga Diabolo?

KA NYWAGA-KGOLO e mentši, batho ba bantši ba be ba nagana gore Diabolo ke sebopiwa se se nago le manaka, sa maoto a dihlakwana seo se aperego bohwibidu gomme se swere foroko e kgolo bakeng sa go lahlela batho ba kgopo ka mollong wa dihele. Beibele ga e thekge kgopolo yeo. Lega go le bjalo, ga go pelaelo gore dikgopolo tše di bjalo tše di fošagetšego di dirile gore batho ba dimilione ba belaele go ba gona ga Diabolo goba ba nagane gore leina le le dirišwa feela bakeng sa go swantšhetša bobe.

2. Go na le ditherešo dife tše dingwe tša Mangwalo tša mabapi le Diabolo?

² Beibele e re nea bohlatse bja kgonthe le bjo bo kwagalago bja gore Diabolo o gona. Jesu Kriste o mmone tikologong ya moya ya legodimong e bile o ile a bolela le yena lefaseng. (Jobo 1:6; Mateo 4:4-11) Gaešita le ge Mangwalo a sa re botše leina la mathomo la sebopiwa se sa moya, a mmitša Diabolo (yeo e bolelago “Mothomeletši”) ka gobane o ile a thomeletša Modimo. O bitšwa gape gore ke Sathane (yeo e bolelago “Moganetši”), ka ge a ganetša Jehofa. Go bolelwa ka Sathane Diabolo e le “noga ya kgale,” mohlomongwe ka gobane a ile a diriša noga bakeng sa go fora Efa. (Kutollo 12:9, NW; 1 Timotheo 2:14) Le gona, o tsebja e le “yo kgopo.”—Mateo 6:13, NW. *

3. Re tla ahla-ahla potšišo efe?

³ Ka ge re le bahlanka ba Jehofa, ga re nyake go swana le Sathane e lego lenaba le legolo la Modimo a nnoši wa therešo. Ka gona, re swanetše go kwa keletšo ya moapostola Paulo e rego: “Le se kê la šuthêla Diabolo sebaka.” (Ba-Efeso 4:27) Ka mo go kgethegilego, ke maano afe a mangwe a Sathane ao re sa swanelago go a ekiša?

Le se ke la Ekiša Mothomeletši yo Mogolo

4. “Yo kgopo” o ile a thomeletša Modimo bjang?

⁴ “Yo kgopo” o swanelwa ke go bitšwa Diabolo, ka gobane ke mothomeletši. Go thomeletša ke go bolela taba ya maaka, e mpe le e senyago motho yo mongwe leina. Modimo o laetše Adama gore: “Sehlare sa xo tseba botse le bobe sôna O se kê wa se ja; ka xobane mohla ò tl’o xo se ja O tlo hwa lehu.” (Genesi 2:17) Efa o be a tsebišitšwe ka se, eupša Diabolo o ile a bolela le yena a diriša noga, a re: “Le ka se kê la hwa lehu. Xe e le Modimo, yêna ó tseba xore mohla Lè se jaxo mahlô a lena a tlo buduloxa la ba byalo ka Modimo, la tseba botse le bobe.” (Genesi 3:4, 5) Ruri o ile a thomeletša Jehofa Modimo ka maaka a matala!

5. Ke ka baka la’ng Dioterefe a be a swanetše go sekišwa ka baka la go thomeletša?

⁵ Ba-Isiraele ba be ba laetšwe gore: “O se kê wa ba moneanyi mo sethšabeng sa xeno.” (Lefitiko 19:16) Moapostola Johane o boletše mabapi le mothomeletši wa mehleng ya gagwe gore:  “Phuthêxô ke e ngwaletše lengwalô; fêla Dioterefe, e a rataxo xo ba moxolo wa bôná, xa a re amoxele. Xe ke e-tla ké mo ke tl’o xo mo xopotša medirô ye a e diraxo ka xo re phara ka dipolêlô tše mpe.” (3 Johane 9, 10) Dioterefe o be a thomeletša Johane gomme o be a swanetše go sekišwa ka baka la seo. Ke Mokriste ofe yo a botegago yo a ka nyakago go swana le Dioterefe gomme a ekiša Sathane, mothomeletši yo mogolo?

6, 7. Ke ka baka la’ng re swanetše go phema go thomeletša motho le ge e le ofe?

⁶ Gantši bahlanka ba Jehofa ba a thomeletšwa le go pharwa ka ditatofatšo tša maaka. “Baperisita ba baxolo le ba-mangwalô, bôná ba êma ba mmexa [Jesu] bà befetšwe.” (Luka 23:10) Paulo o ile a thomeletšwa ka maaka ke Moperisita yo a Phagamego Anania le ba bangwe. (Ditiro 24:1-8) Le gona, Beibele e bolela ka Sathane e le “mmexi wa bana ba bô-rena e a bexo a ba bexa pele xa Modimo mosexare le bošexo.” (Kutollo 12:10) Bakriste ba tloditšwego bao ba lego lefaseng mehleng ye ya bofelo ke bona bana babo rena bao ba bego ba begwa goba ba thomeletšwa ka maaka.

⁷ Ga go na Mokriste yo a ka nyakago go thomeletša motho yo mongwe goba go mo phara ka ditatofatšo tša maaka. Lega go le bjalo, seo se be se ka direga ge e ba re be re sa tsebe ditaba ka botlalo pele ga ge re ka nea bohlatse kgahlanong le motho yo mongwe. Ka tlase ga Molao wa Moše, go nea bohlatse bja maaka ka boomo go be go ka feleletša ka go bolawa ga motho yo a bo neago. (Ekisodo 20:16; Doiteronomio 19:15-19) Go oketša moo, dilo tšeo Jehofa a di hloilego di akaretša “hlatsi-phori kxêba-maaká.” (Diema 6:16-19) Ka gona, ruri re swanetše go phema go ekiša mothomeletši yo mogolo le molatofatši wa maaka.

Phemang Ditsela tša Mmolai wa Mathomo

8. Ke ka tsela efe Diabolo e lego “mmolai wa batho go tloga mathomong”?

⁸ Diabolo ke mmolai. Jesu o itše: “Yena yoo e bile mmolai wa batho go tloga mathomong.” (Johane 8:44, NW) Ka tiro ya gagwe ya mathomo ya go leka go dira gore Adama le Efa ba furalele Modimo, Sathane e bile mmolai. O bakile lehu go banyalani ba pele gotee le baneng ba bona. (Ba-Roma 5:12) Ela hloko gore tiro ye e dirilwe ke motho, e sego tshwantšhetšo feela ya bobe.

9. Go etša ge go bontšhitšwe go 1 Johane 3:15, ke bjang re ka bago babolai?

⁹ O mongwe wa Melao e Lesome yeo e neilwego ba-Isiraele o re: “O se kê wa bolaya.” (Doiteronomio 5:17) Ge moapostola Petro a be a ngwalela Bakriste o itše: “Mo xo lena xo se kê xwa ba le e a hlokofatšwaxo è le mmolai.” (1 Petro 4:15) Ka gona, re le bahlanka ba Jehofa, re ka se ke ra bolaya. Lega go le bjalo, re tla ba molato pele ga Modimo ge e ba re be re ka hloya Mokriste-gotee le rena gomme ra kganyoga eka a ka hwa. Moapostola Johane o ngwadile gore: “Mang le mang e a hloilexo ngwan’abô ké mmolai, xomme Le a tseba, xa xo mmolai e a naxo le bophelô byo bo sa felexo byo bo kaxo dula è le bya xaxwe.” (1 Johane 3:15) Ba-Isiraele ba be ba laetšwe gore: “O se kê wa hlôya ngwan’eno pelong ya xaxo.” (Lefitiko 19:17) Eka re ka akgofela go rarolla bothata le ge e le bofe bjo bo tsogago magareng ga rena le modumedi-gotee le rena, e le gore mmolai Sathane a se ke a senya botee bja rena bja Bokriste.—Luka 17:3, 4.

Emang le Tiile Kgahlanong le Moaketši yo Mogolo

10, 11. Re swanetše go dira’ng e le gore re eme re tiile kgahlanong le moaketši yo mogolo, Sathane?

¹⁰ Diabolo ke moaketši. Jesu o itše: “Xe a bolêla maaká, ó bolêla tša xaxwe; xobane ké yêna moaketši le rra-xo-moaketši.” (Johane 8:44) Sathane o forile Efa, mola Jesu a tlile lefaseng go tlo hlatsela therešo. (Johane 18:37) Ge e ba re nyaka go ema re tiile kgahlanong le Diabolo bjalo ka balatedi ba Kriste, re ka se ke ra bolela maaka ra ba ra diriša bofora. Re swanetše gore re ‘botšane therešo.’ (Sakaria 8:16; Ba-Efeso 4:25) “Morêna Modimo-mmotexi” o šegofatša feela Dihlatse tša gagwe tše di botegago. Ba kgopo ga ba na tshwanelo ya go ba baemedi ba gagwe.—Psalme 31:5; 50:16; Jesaya 43:10.

¹¹ Ge e ba re rata gore moyeng re tšwele pele  re lokologile maakeng a Sathane, re tla kgomarela Bokriste, e lego “tsela ya therešô.” (2 Petro 2:2; Johane 8:32) Dithuto tša Bokriste di bopša ke “therešo ya ditaba tše dibotse.” (Ba-Galatia 2:5, 14, NW) Go phološwa ga rena go tloga go ithekgile ka go ‘swara ga rena ka tsela ya therešo’—go e kgomarela le go ema ka go tia kgahlanong le “rra-xo-moaketši.”—3 Johane 3, 4, 8.

Ganetšang Mohlanogi yo Mogolo

12, 13. Re swanetše go swara bahlanogi bjang?

¹² Sebopiwa sa moya seo se ilego sa fetoga Diabolo se kile sa ba therešong. Eupša, Jesu o itše: “Ga se a ka a ema a tiile therešong, gobane therešo ga e gona go yena.” (Johane 8:44, NW) Mohlanogi yo yo mogolo o phegeletše tsela e sa kgaotšego ya go ganetša “Modimo-mmotexi.” Bakriste ba bangwe ba lekgolong la pele la nywaga ba ile ba wela ‘molabeng wa Diabolo,’ mohlomongwe ka baka la gore o ile a ba aroša goba a ba fapoša therešong. Ka gona, Paulo o ile a kgothaletša modirišani-gotee le yena e lego Timotheo gore a ba laye ka boleta e le gore ba boele ba phele gabotse moyeng gomme ba lokologe molabeng wa Sathane. (2 Timotheo 2:23-26) Ke therešo gore go kaone kudu go kgomarela ka go tia therešong le gore le ka mohla re se tanywe ke dikgopolo tša bohlanogi.

¹³ Ka baka la go theetša Diabolo le go se ganetše maaka a gagwe, batho ba pele ba babedi ba ile ba fetoga bahlanogi. Ka gona, na re swanetše go theetša bahlanogi, go bala dipuku tša bona goba go hlahloba mekero ya bona ya Web go Internet? Ge e ba re rata Modimo le therešo, re ka se ke ra dira bjalo. Ga se ra swanela go dumelela bahlanogi gore ba tsene ka magaeng a rena goba gaešita le go ba dumediša, ka gobane ditiro tše di bjalo di ka re dira gore re ‘tšee karolo medirong ya bona e mebe.’ (2 Johane 9-11) Anke le ka mohla re se ke ra ineela maanong a Diabolo a bohwirihwiri ka go lahla “tsela ya therešo” ya Bokriste gomme ra latela barutiši ba maaka bao ba kganyogago go “tšweletša dikgopolo tše di gobatšago” le go leka go ‘re aroša ka dipolelo tše di kgopamišitšwego ka bokgwari.’—2 Petro 2:1-3, Byington.

14, 15. Ke temošo efe yeo Paulo a ilego a e nea bagolo ba Efeso le modirišani-gotee le yena e lego Timotheo?

¹⁴ Paulo o boditše bagolo ba Bakriste ba Efeso gore: “Itoteng-xê; Le lôtôlê le mohlape ka moka wo Môya o mokxêthwa o Le xafetšexo wôna, la ba badiši ba wôna, xore Le dišê phuthêxô ya Modimo, ye a inyaketšexo yôna ka madi a xaxwe Yêna Mong. Xobane nna ke tseba xore mohla kè sepetše, Le tlo tlêlwa ke diphiri tše di jaxo batho, tše di sa sétšexo mohlape. Le mo xo lena beng xo tlo tsoxa banna, ba ba tl’o xo bolêla ditaba tše šele, xore ba xôxê barutiwa ba tloxê le bôná.” (Ditiro 20:28-30) Ge nako e dutše e e-ya, bahlanogi ba ba bjalo ba ile ba tšwelela gomme ba “bolêla ditaba tše šele.”

¹⁵ Mo e nyakilego go ba ka 65 C.E., moapostola o ile a kgothaletša Timotheo go “ratha Lentšu la therešô à sa kxopamiše.” Paulo o ngwadile gore: “Ilá tša metlaê ye e sa holexo selô; xobane di a xolêla di tloxêlanye motho le borapedi. Xobane thutô ya ba ba byalo e phêra bo-ka lephêra. Ba bangwê ba bôná ké Himeneo le Fileto; Ba aroxile therešô, ba re: Xo tsoxa xa bahu xo šetše xo direxile. Ba r’yalo ba phekxola  tumêlô ya ba bangwê.” Bohlanogi bo be bo thomile! Paulo o okeditše ka gore: “Xe e le mothêô wo o tiilexo wa Modimo wôna o eme.”—2 Timotheo 2:15-19.

16. Go sa šetšwe maano a bohwirihwiri a mohlanogi yo mogolo, ke ka baka la’ng re sa dutše re botegela Modimo le Lentšu la gagwe?

¹⁶ Gantši Sathane o be a diriša bahlanogi e le ge a leka go senya borapedi bja therešo—eupša a palelwa. Mo e nyakilego go ba ka ngwaga wa 1868, Charles Taze Russell o ile a thoma go hlahloba ka šedi dithuto tšeo di bego di dutše di amogelwa ka nako e telele tša dikereke tša Bojakane gomme a hwetša Mangwalo a hlathollwa ka tsela e fošagetšego. Russell le batsomi ba bangwe ba sego kae ba therešo ba ile ba hloma klase ya thuto ya Beibele kua Pittsburgh, Pennsylvania, U.S.A. Mo e nyakilego go ba nywaga e 140 ga e sa le go tloga ka nako yeo, bahlanka ba Jehofa ba godile tsebong gomme ba rata Modimo le Lentšu la gagwe. Go sa šetšwe maano a bohwirihwiri a mohlanogi yo mogolo, go phakgama moyeng ga sehlopha sa molaki yo a botegago le yo bohlale go ile gwa thuša Bakriste ba ba therešo gore ba dule ba botegela Jehofa le Lentšu la gagwe.—Mateo 24:45.

Le ka Mohla le se ke la Dumelela Mmuši wa Lefase le a le Dira Selo

17-19. Lefase leo le lego matleng a Diabolo ke’ng, gomme ke ka baka la’ng re sa swanela go le rata?

¹⁷ Tsela e nngwe yeo ka yona Sathane a lekago go re tanya ke ka go re tutueletša gore re rate lefase le—lekoko la batho ba sa lokago bao ba arogilego go Modimo. Jesu o biditše Diabolo gore ke “mmuši wa lefase” gomme a re: “Xa a na se a tl’o xo ntira sôna.” (Johane 14:30) Anke le ka mohla re se ke ra dumelela Sathane a re dira selo! Ka kgonthe, re lemoga gore ‘lefase ka moka le rapaletše matleng a yoo yo mobe.’ (1 Johane 5:19) Ke ka baka leo Diabolo a ilego a kgona go holofetša Jesu “mebušô ka moka ya lefase” ge e ba a be a ka dira tiro e tee feela ya bohlanogi—selo seo Morwa wa Modimo a ilego a se gana ka go tia. (Mateo 4:8-10) Lefase leo le bušwago ke Sathane le hloile balatedi ba Kriste. (Johane 15:18-21) Ga go makatše ge moapostola Johane a ile a re lemoša gore re se ke ra rata lefase!

 ¹⁸ Johane o ngwadile gore: “Le se kê la rata lefase le tše lefaseng; xe motho a rata lefase, leratô la Tata wešo xa le xôna mo xo Yêna. Xobane tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng. Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:15-17) Ga se ra swanela go rata lefase, ka gobane tsela ya lona ya bophelo e ipiletša go nama ya sebe gomme e ganetšana ka mo go feletšego le ditekanyetšo tša Jehofa Modimo.

¹⁹ Go thwe’ng ge e ba go rata lefase go le gona ka dipelong tša rena? Ge e ba go le bjalo anke re rapelele thušo ya Modimo e le gore re fenye lerato leo le dikganyogo tša nama tšeo di tswalanago le lona. (Ba-Galatia 5:16-21) Ka kgonthe re tla katanela go ipoloka “xore lefase le se [re] thšilafatšê” ge e ba re dula re gopola gore “meôya ya bobe” ke “balaola-mafase” ba sa bonagalego bao ba bušago lekoko la batho ba sa lokago.—Jakobo 1:27; Ba-Efeso 6:11, 12; 2 Ba-Korinthe 4:4.

20. Ke ka baka la’ng go ka bolelwa gore ‘ga re ba lefase’?

²⁰ Jesu o boletše mabapi le barutiwa ba gagwe gore: “Bôná xa se ba lefase, byalo ka Nna kè se wa lefase.” (Johane 17:16) Bakriste ba tloditšwego le badirišani-gotee le bona bao ba ineetšego ba katanela go dula ba hlwekile boitshwarong le moyeng, gomme ba ikarotše lefaseng le. (Johane 15:19; 17:14; Jakobo 4:4) Lefase le leo le sa lokago le re hloile ka gobane re dula re ikarotše go lona e bile re le ‘bagoeledi ba toko.’ (2 Petro 2:5) Ke therešo gore re phela gare ga lekoko la batho bao ba akaretšago diotswa, dihlotlolo, bahlakodi, barapedi ba medimo ya diswantšho, mahodu, ba maaka le matagwa. (1 Ba-Korinthe 5:9-11; 6:9-11; Kutollo 21:8) Eupša ga re heme “môya wa lefase,” ka gobane ga re laolwe ke tutuetšo ye e matla ya sebe.—1 Ba-Korinthe 2:12.

Le se ke la Šuthela Diabolo Sebaka

21, 22. Re ka diriša bjang keletšo ya Paulo e begilwego go Ba-Efeso 4:26, 27?

²¹ Go e na le go tutuetšwa ke “môya wa lefase,” re hlahlwa ke moya wa Modimo, woo o tšweletšago dika tše bjalo ka lerato le boitshwaro. (Ba-Galatia 5:22, 23) Dika tše di re thuša gore re lebeletšane ka katlego le Diabolo ge a hlasela tumelo ya rena. O nyaka gore re ‘selekege re be re senye,’ eupša moya wa Modimo o re thuša gore re ‘lese go galefa re be re ile lehloyo.’ (Psalme 37:8) Ke therešo gore ka dinako tše dingwe re ka galefa ka mabaka a kwagalago, eupša Paulo o re eletša ka gore: “Xe Le xalefa Le se kê la senya; a letšatši le se dikêlê Lè sa xalefile. ’Me Le se kê la šuthêla Diabolo sebaka.”—Ba-Efeso 4:26, 27.

²² Kgalefo ya rena e ka feleletša ka sebe ge e ba re dula re galefile. Go ba boemong bjo bo bjalo go nea Diabolo sebaka sa go kgothaletša dintwa ka phuthegong goba go re tutueletša gore re dire ditiro tše mpe. Ka baka leo, re swanetše go akgofela go rarolla diphapano tša rena le ba bangwe ka tsela yeo e amogelwago ke Modimo. (Lefitiko 19:17, 18; Mateo 5:23, 24; 18:15, 16) Ka gona, anke re hlahlwe ke moya wa Modimo, re bontšhe boitshwaro gomme re se ke ra dumelela gaešita le go galefa ka mabaka a kwagalago gore go mpefale go be go fetoge bonaba, bošoro le lehloyo.

23. Ke dipotšišo dife tšeo re tlago go di ahla-hla sehlogong se se latelago?

²³ Re ahla-ahlile dika tše itšego tša Diabolo tšeo re sa swanelago go di ekiša. Eupša babadi ba bangwe ba ka ipotšiša gore: Na re swanetše go boifa Sathane? Ke ka baka la’ng a kgothaletša batho gore ba tlaiše Bakriste? Le gona re ka phema bjang go foraforetšwa ke Diabolo?

[Mongwalo wa ka tlase]

Karabo ya Gago ke Efe?

• Ke ka baka la’ng re sa swanela go thomeletša motho le ge e le ofe?

• Ka go dumelelana le 1 Johane 3:15, re ka phema bjang go ba babolai?

• Re swanetše go lebelela bahlanogi bjang, gomme ka baka la’ng?

• Ke ka baka la’ng re sa swanela go rata lefase?

[Dipotšišo tša Thuto]

[Seswantšho go letlakala 23]

Le ka mohla re ka se ke ra dumelela Diabolo go fediša botee bja rena bja Bokriste

[Diswantšho go letlakala 24]

Ke ka baka la’ng Johane a ile a kgothaletša gore re se rate lefase?