Dipotšišo tše Tšwago go Babadi
Dipotšišo tše Tšwago go Babadi
Na Josefa, mohlanka yo a botegago wa Jehofa, o ile a diriša senwelo se se kgethegilego sa silifera go dupa ka sona, ka ge go bonagala go bolelwa bjalo go Genesi 44:5?
Ga go na lebaka la go dumela gore Josefa ge e le gabotse o be a tsenetše mohuta le ge e le ofe wa bodupe.
Beibele e utolla kwešišo ya kgonthe ya Josefa tabeng ya go dirišwa ga maleatlana bakeng sa go tseba dilo tšeo di tlago go direga. Pejana, ge a be a kgopelwa go tlhatholla ditoro tša Farao, Josefa o ile a bolela leboelela gore ke Modimo feela yo a ka kgonago go ‘tsebatša’ tšeo di tlago go direga. Ka baka leo, Farao ka noši o ile a thoma go dumela gore Modimo yoo Josefa a bego a mo rapela—Modimo wa therešo, e sego matla a bonoge—o dirile gore Josefa a tsebe ditaba ka botlalo mabapi le dilo tšeo di tlago go direga. (Genesi 41:16, 25, 28, 32, 39) Molaong wo o neilwego Moše ka morago, Jehofa o ile a iletša go dirišwa ga maleatlana goba bodupe, ka gona a tiišetša gore ke Yena a nnoši yo a ka bolelago e sa le pele mabapi le tšeo di tlago go direga.—Doiteronomio 18:10-12.
Ka gona, ke ka baka la’ng Josefa ka mohlanka wa gagwe a ile a bolela gore o dirišitše senwelo sa silifera go “dupa ka sôna”? * (Genesi 44:5) Re swanetše go ela hloko maemo ao mantšu a a boletšwego go ona.
Ka baka la tlala e kgolo kudu, barwarrago Josefa ba be ba tlile Egipita go tlo hwetša dijo. Nywageng ya pejana, bona barwarre ba ba Josefa ba be ba mo rekišitše gore e be lekgoba. Ga bjale, ka ge ba se sa mo tseba, ba ile ba kgopela thušo ya morwarrago bona, yo e bego e šetše e le molaodi wa dijo wa Egipita. Josefa ga se a ka a itsebiša go bona. Go e na le moo, o ile a phetha ka go ba leka. Ka mo go swanetšego, Josefa o be a nyaka go tseba ge e ba ba itshotše e le ka kgonthe. Le gona, o be a nyaka go tseba gore ba be ba rata morwarrago bona Benjamini go fihla bokgoleng bofe le tatago bona Jakobo yo a bego a tloga a rata Benjamini. Ka gona, Josefa o ile a kgetha go diriša leano.—Genesi 41:55–44:3.
Josefa o ile a laela yo mongwe wa bahlanka ba gagwe gore a tlatše mekotla ya barwarragwe ka dijo, a bušetše tšhelete mokotleng wa yo mongwe le yo mongwe wa bona, gomme a tsenye senwelo sa Josefa sa silifera ka mokotleng wa Benjamini. Go tše ka moka, Josefa o be a bapala karolo ya gagwe bjalo ka molaodi wa nageng ya boheitene. O ile a ikgakanya, a fetoša ditiro tša gagwe le leleme la gagwe ka go dumelelana le seo se bego se ka dirwa ke molaodi yo bjalo, go etša ge go be go tla ba bjalo mahlong a barwarragwe bao ba sa gononego selo.
Ge Josefa a be a botšološiša barwarragwe, o ile a tšwela pele ka leano la gagwe, a ba botšiša gore: “A xa Le tsebe xore monna e a etšaxo nna ó dupa ditaba?” (Genesi 44:15) Ka gona, senwelo seo go molaleng gore e be e le karolo ya leano la gagwe. Josefa ga se a ka a dupa ka senwelo go etša ge Benjamini a se a ka a utswa senwelo seo.
[Mongwalo wa ka tlase]
^ ser. 5 Ge e hlalosa mokgwa wo wa mehleng ya bogologolo, The Holy Bible, With an Explanatory and Critical Commentary, yeo e ngwadilwego lefsa ke F. C. Cook, e hlalosa gore: “Mokgwa wo o be o dirišwa mohlomongwe ka go lahlela gauta, silifera goba mabenyabje ka meetseng, gomme ka morago ga moo gwa hlahlobja ponagalo ya tšona; goba mohlomongwe ka go fo lebelela ka meetseng go etša ge o lebelela ka seiponeng.” Mohlalosi wa Beibele e lego Christopher Wordsworth o re: “Ka dinako tše dingwe senwelo se be se tlatšwa ka meetse, gomme karabo e be e newa go dirišwa meriti yeo e bego e tšweletšwa ke letšatši ka meetseng ao a lego ka senwelong.”