Ekišang go se Fele Pelo ga Jehofa

“Morêna xa a diexiše tše a di boletšexo a re di tlo tla, . . . sa xaxwe ké xo se Le fêlêle pelo.”—2 PETRO 3:9.

1. Ke mpho efe e sa bapišwego le selo yeo Jehofa a e holofeditšego batho?

JEHOFA o re holofeditše selo se sengwe seo go se nago motho yo a ka re holofetšago sona. Ke selo se se kgahlišago kudu le sa bohlokwa, lega go le bjalo se ka se rekwe e bile ge e le gabotse re ka se ikhweletše sona. Seo a se holofetšago ke mpho ya bophelo bjo bo sa felego—yeo go bontši bja rena e bolelago bophelo bjo bo sa felego lefaseng la paradeise. (Johane 3:16) Ruri seo e tla ba se se thabišago! Go ka se sa ba le dilo tšeo di bakago manyami a mantši gakaakaa—dintwa, bošoro, bodiidi, bosenyi, bolwetši gaešita le lehu. Batho ba tla phela khutšong e feletšego e bile ba le boteeng ka tlase ga pušo e lerato ya Mmušo wa Modimo. Re tloga re fagahletše Paradeise yeo e le ruri!—Jesaya 9:5, 6; Kutollo 21:4, 5.

2. Ke ka baka la’ng Jehofa a se a hlwa a fediša tshepedišo e kgopo ya dilo ya Sathane?

² Le gona Jehofa o fagahletše nako ya ge a tla be a dira lefase Paradeise. Go ba gona, ke morati wa toka le toko. (Psalme 33:5) Ga a thabišwe ke go bona lefase le hlokomologa goba le hloya melao ya gagwe ya motheo ya go loka, e lego lefase leo le ganago bobuši bja gagwe gomme le tlaiša batho ba gagwe. Lega go le bjalo, go na le mabaka a mabotse ao ka ona a se a hlwago a gata kgato ya go fediša tshepedišo e kgopo ya dilo ya Sathane. Mabaka ao a akaretša dikgang tša mabapi le se sebotse le se sebe gotee le bobuši bja gagwe. Ge a rarolla dikgang tše, Jehofa o bonagatša seka seo se kgahlišago kudu, e lego seka seo batho ba bantši lehono ba se nago naso—go se fele pelo.

3. (a) Lentšu la Segerika le la Sehebere leo ka Beibeleng le fetoletšwego e le “go se fele pelo” le bolela’ng? (b) Ke dipotšišo dife tšeo ga bjale re tlago go di ahla-ahla?

³ Go na le lentšu la Segerika leo ka go New World Translation le fetoletšwego ka makga a mararo e le “go se fele pelo.” Ka go lebanya le bolela “bopelotelele” gomme gantši le dirišwa e le “kgotlelelo” gomme gatee le dirišwa e le “go bontšha go se fele pelo.” Seo se bolelwago ke lentšu la Segerika le la Sehebere tabeng ya “go se fele pelo” ke taba ya kgotlelelo le go diega go galefa. Go se fele pelo ga Jehofa go re hola bjang? Re ka ithuta’ng tabeng ya go se fele pelo le kgotlelelo ya Jehofa le ya bahlanka ba gagwe bao ba botegago? Re tseba bjang gore go se fele pelo ga Jehofa go na le mellwane? Anke re boneng.

Elang Hloko go se Fele Pelo ga Jehofa

4. Moapostola Petro o ngwadile’ng mabapi le go se fele pelo ga Jehofa?

⁴ Moapostola Petro o ngwadile mabapi le go se fele pelo ga Jehofa gore: “Baratexi, taba ye nngwê ye e se kexo ya Le xaka šé: Xo Morêna nywaxa e sekete e ke ké letšatši le tee. Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:8, 9) Hle ela hloko dintlha tše pedi tše di bontšhitšwego mo tšeo di ka re thušago go kwešiša go se fele pelo ga Jehofa.

5. Tsela yeo Jehofa a lebelelago nako ka yona e kgoma bjang seo a se dirago?

⁵ Ntlha ya pele ke gore Jehofa ga a lebelele nako go swana le rena. Go Motho yo a phelago ka mo go sa felego, nywaga e sekete e lekana le letšatši le tee. Ga a šitišwe goba go šiiwa ke nako, eupša ga a diege go gata mogato. Ka ge a e-na le bohlale bjo bo sa lekanywego, Jehofa o tseba gabotse nako e swanetšego kudu ya go gata mogato bakeng sa go hola bohle bao ba  akaretšwago, gomme ka go se fele pelo o emela nako yeo gore e fihle. Lega go le bjalo, ga se ra swanela go phetha ka gore Jehofa ga a na taba le tlaišo le ge e le efe yeo bahlanka ba gagwe ba ka lebeletšanago le yona mo nakong ye. Ke Modimo wa ‘lešoko,’ e lego mohlala o phethagetšego wa lerato. (Luka 1:78; 1 Johane 4:8) O kgona go lokiša dilo ka mo go feletšego le sa ruri, go akaretša le tshenyo le ge e le efe yeo go dumelelwa mo ga tlaišego ka nakwana go ka bago go ile gwa e baka.—Psalme 37:10.

6. Ga se ra swanela go dira phetho efe ka Modimo, gona ka baka la’ng?

⁶ Ee, ga go bonolo gore motho a letele selo seo a se fagahletšego. (Diema 13:12) Ka baka leo, ge batho ba sa phethagatše dikholofetšo tša bona ka pela, ba bangwe ba ka phetha ka gore ga ba nyake go dira bjalo. Ruri e be e ka se be gabohlale go nagana ka Modimo ka tsela e bjalo! Ge e ba re fapanya go se fele pelo ga Modimo le go diega, go ka ba bonolo gore go feta ga nako go dire gore re thome go belaela le go nyama, gomme seo se re bea kotsing ya go otsela moyeng. Se sebe le go feta, re ka arošwa ke bao Petro pejana a ilego a lemoša malebana le bona—bakweri, e lego batho bao ba se nago tumelo. Ka tsela ya go kwera, batho ba bjalo ba re: “Di kae tša xe xo thwe Morêna ó tlo boa? xobane e sa le mola bô-tate bà ithôbalêla, le lehono dilô ka moka di sa dutše di swana le tša mathomong a thlôlô!”—2 Petro 3:4.

7. Go se fele pelo ga Jehofa go tswalana bjang le kganyogo ya gagwe ya gore batho ba sokologe?

⁷ Ntlha ya bobedi yeo re ithutago yona mantšung a Petro ke ya gore Jehofa ga a fele pelo ka gobane o nyaka gore bohle ba sokologe. Jehofa o tla fediša bao ka bohlogo-thata ba ganago go sokologa ditseleng tša bona tše mpe. Lega go le bjalo, Modimo ga a thabišwe ke lehu la yo kgopo. Go e na le moo, o thabela go bona batho ba sokologa, ba tlogela ditsela tša bona tše mpe gomme ba tšwela pele ba phela. (Hesekiele 33:11) Ka baka leo, ga a fele pelo gomme o dira gore ditaba tše dibotse di bolelwe lefaseng ka moka e le gore batho ba ka ba le sebaka sa go phela ka mo go sa felego.

8. Go se fele pelo ga Modimo go bonwa bjang tseleng yeo a ilego a dirišana le setšhaba sa Isiraele?

⁸ Go se fele pelo ga Modimo go bonwa gape le tseleng yeo a ilego a dirišana le setšhaba sa Isiraele ya bogologolo. Ka nywaga-kgolo e mentši, o ile a kgotlelela go se kwe ga sona. Nako le nako, o be a se kgothaletša ka baporofeta ba gagwe gore: “Lahlang ditsela tše mpe tša lena, Le hlôkômêlê ditaêlô tša-ka, le mekxwa ya-ka, le melaô ya-ka ka moka, ye ke e filexo bô-tata  weno, ye ke Le rometšexo yôna ka bahlanka ba-ka baporofeta.” Mafelelo e bile afe? Ka manyami, batho bao “ba xana xo kwa.”—2 Dikxoši 17:13, 14.

9. Go se fele pelo ga Jesu go ile gwa bonagatša bjang go se fele pelo ga Tatagwe?

⁹ Mafelelong, Jehofa o ile a romela Morwa wa gagwe, yo a ilego a kgopela ba-Juda a sa lape gore ba boelane le Modimo. Go se fele pelo ga Jesu go ile gwa bonagatša ka mo go feletšego go se fele pelo ga Tatagwe. Ka ge a be a tseba gabotse gore o kgaufsi le go bolawa, Jesu o ile a lla ka gore: “Hee Jerusalêma! Hee Jerusalêma! Wene O bolayaxo baporofeta, O thumaxo ka mafsika ba ba romilwexo xo wene! Ké xa-kae kè ratile xo phuthêla bana ba xaxo bo-ka kxoxo, xe e phuthêla bana ba yôna ka tlase xa diphêxô tša yôna; xomme Le xanne.” (Mateo 23:37) Mantšu a ao a kgomago pelo ga se a moahlodi yo a se nago kwelobohloko yo a fagahletšego go otla batho eupša ke a mogwera yo lerato yo a sa felelego batho pelo. Ka go swana le Tatagwe wa legodimong, Jesu o be a nyaka gore batho ba sokologe e le gore ba tle ba pheme kahlolo e šoro. Ba bangwe ba ile ba theetša ditemošo tša Jesu gomme ba phema kahlolo e šoro yeo e ilego ya tlela Jerusalema ka 70 C.E.—Luka 21:20-22.

10. Go se fele pelo ga Modimo go re hotše bjang?

¹⁰ Na go se fele pelo ga Modimo ga se selo se se makatšago? Go sa šetšwe kamoo batho ba tšwelago pele ba sa kwe ka gona, Jehofa o neile yo mongwe le yo mongwe wa rena gotee le batho ba bangwe ba dimilione sebaka sa gore re mo tsebe le go amogela kholofelo ya phološo. Moapostola Petro o ngwaletše Bakriste-gotee le yena gore: “Le tsebê xore se se Le phološaxo ké xo se fêle pelo xa Morêna.” (2 Petro 3:15) Na ga re leboge gore go se fele pelo ga Jehofa go butše tsela ya gore re phološwe? Na ga re rapelele gore Jehofa a tšwele pele a sa re felele pelo ge re dutše re mo hlankela letšatši le letšatši?—Mateo 6:12.

11. Go kwešiša go se fele pelo ga Jehofa go tla re tutueletša go dira’ng?

¹¹ Ge re kwešiša lebaka leo ka lona Jehofa a sa felego pelo, re thušwa gore re lete ka go se fele pelo phološo yeo a tlago go e tliša, re sa phethe ka gore o diega go phethagatša dikholofetšo tša gagwe. (Dillo tša Jeremia 3:26) Ge re dutše re tšwela pele re rapelela gore Mmušo wa Modimo o tle, re holofela gore Modimo o tseba nako e swanetšego kudu ya go araba thapelo yeo. Go oketša moo, re tutuetšwa gore re ekiše Jehofa ka go bontšha go se fele pelo ditirišanong tša rena le bana babo rena le go bao re dirago boboledi go bona. Le rena ga re rate gore go be le batho bao ba fedišwago, eupša re ka thabela go bona ba sokologa gomme ba e-ba le kholofelo e swanago le ya rena ya bophelo bjo bo sa felego.—1 Timotheo 2:3, 4.

Elang Hloko go se Fele Pelo ga Baporofeta

12, 13. Ka go dumelelana le Jakobo 5:10, moporofeta Jesaya o ile a atlega bjang tabeng ya go se fele pelo?

¹² Ka go ela hloko go se fele pelo ga Jehofa, re thušwa go tšeela seka seo godimo le go se hlagolela. Ga go bonolo gore batho bao ba sa phethagalago ba hlagolele go se fele pelo, eupša go ka hlagolelwa. Re ithuta mehlaleng ya bahlanka ba Modimo ba mehleng ya bogologolo. Morutiwa Jakobo o ngwadile gore: “Tšeang ka mohlala wa Baporofeta ba ba boletšexo ka Leina la Morêna, mohlala wa xo kxôtlêlêla le wa xo se fêle pelo.” (Jakobo 5:10) Go a homotša e bile go a kgothatša go tseba gore ba bangwe ba ile ba lebeletšana ka katlego le mathata ao le rena re lebeletšanago le ona.

¹³ Ka mohlala, moporofeta Jesaya o be a tloga a swanetše go se fele pelo kabelong ya gagwe. Jehofa o bontšhitše seo ge a be a mmotša gore: “Sepela, O bolêlê le sethšaba sé, O re: Xo kwa Le tlo kwa, ’me Le ka se hlaoloxanye; xo bôna Le tlo bôna, xomme Le ka se lemoxe. Retetša ’pelo tša sethšaba sé, ’tsêbê tša bôná di thibalê; O se foufatšê mahlô, xore ba se hlwê ba bôna ka mahlô a bôná, ’me ba se hlwê ba e-kwa ka ’tsêbê tša bôná, ba se kê ba hlaloxanya ka ’pelo tša bôná, xore ba se kê ba sokoloxa ba fodišwa.” (Jesaya 6:9, 10) Go sa šetšwe go se arabele ga batho, Jesaya o ile a tsebatša ka go se fele pelo melaetša ya temošo bonyenyane ka nywaga e 46! Ka tsela e swanago, go se fele pelo go tla re thuša go kgotlelela modirong wa rena wa go bolela ditaba tše dibotse, gaešita le ge ba bantši ba sa di amogele.

14, 15. Ke’ng se se thušitšego Jeremia gore a lebeletšane ka katlego le mathata le go nyama?

 ¹⁴ Go ba gona, ge baporofeta ba be ba dutše ba phethagatša bodiredi bja bona, ba be ba swanelwa ke go lebeletšana le se se fetago go se arabele ga batho; ba be ba tlaišwa. Jeremia o ile a tsenywa ka setokising, a golegwa “kxolexong” a ba a lahlelwa ka moleteng wa leraga. (Jeremia 20:2; 37:15; 38:6) O be a tlaišwa ke bona batho bao a bego a rata go ba thuša. Lega go le bjalo, Jeremia ga se a ka a galefa goba go itefeletša. O ile a kgotlelela ka nywaga-some a sa fele pelo.

¹⁵ Tlaišo le go kwerwa ga se tša ka tša tswalela Jeremia molomo, le rena ga di re tswalele melomo lehono. Ke therešo gore re ka ikwa re nyamile ka dinako tše dingwe. Jeremia o ile a nyama. O ngwadile gore: “Nna Lentšu la Morêna le nthlôlêla dithoxô le dikwêrô tša ka mehla. . . . [Ka] re ke Mo lebalê, ke lesê xo bola leina la xaxwe.” Go diregile’ng ka morago ga moo? Na Jeremia o ile a kgaotša go dira boboledi? O tšwetše pele ka gore: “Ke kwa mo pelong [lentšu la Modimo le] mphiša bo-ka mollô o tukaxo, [le] ntsene mašapong. Ka ipolaiša kxôtlêlêlo ka palêlwa.” (Jeremia 20:8, 9) Ela hloko gore ge a be a lebiša tlhokomelo dikwerong tša batho, o be a lahlegelwa ke lethabo. Ge a be a lebiša tlhokomelo tabeng ya go ba botse le go ba bohlokwa ga molaetša ka bowona, o be a thaba gape. Go oketša moo, Jehofa o be a e-na le Jeremia bjalo ka “Moxale yo matla,” a mo matlafaletša gore a tsebatše lentšu la Modimo ka mafolofolo le ka sebete.—Jeremia 20:11.

16. Re ka dula bjang re thabile modirong wa rena wa go bolela ditaba tše dibotse?

¹⁶ Na moporofeta Jeremia o ile a thabela modiro wa gagwe? Go tloga go le bjalo! O boditše Jehofa gore: “Mantšu a xaxo a hweditšwe ya ba dijô tša-ka; mantšu a xaxo a nkušitše pelo a nthabiša, kè e-kwa kè bitšwa ka leina l’axo, Morêna Modimo wa mašaba.” (Jeremia 15:16) Jeremia o ile a thabela tokelo ya gagwe ya go emela Modimo wa therešo le go tsebatša lentšu la gagwe. Le rena re ka thaba. Le gona go fo swana le barongwa kua legodimong, re thabišwa ke gore batho ba bantši lefaseng ka bophara ba amogela molaetša wa Mmušo, ba a sokologa, gomme ba tsena tseleng e išago bophelong bjo bo sa felego.—Luka 15:10.

“Kxôtlêlêlô ya Jobo”

17, 18. Jobo o ile a kgotlelela ka tsela efe, gomme mafelelo e bile afe?

¹⁷ Ka morago ga go bolela ka baporofeta ba mehleng ya bogologolo, morutiwa Jakobo o ngwadile gore: “Kxôtlêlêlô ya Jobo Le e kwile. Pheletšô ya Morêna Le e bone; xobane Morêna ké wa dikxauxêlô tše ntši, ké yo pelo-thlomoxi.” (Jakobo 5:11) Lentšu la Segerika leo le fetoletšwego mo e le “kxôtlêlêlô” le bolela seo se swanago le lentšu leo Jakobo a le dirišitšego temaneng ya pele ga ye la “xo se fêle pelo.” Ge seithuti se sengwe se bontšha phapano magareng ga mantšu a a mabedi, se ngwadile gore: “Ka Segerika, kgotlelelo e bolela go se fele pelo ge batho ba re tlaiša, gomme go se fele pelo go bolela go kgotlelela ka sebete dilo tšeo di re gateletšago.”

¹⁸ Jobo o ile a gateletšega kudu. O be a hloka le sente e ntsho, a lahlegetšwe ke bana ba gagwe e bile a swerwe ke bolwetši bjo bohloko kudu. O ile a ba a gana dipolelo tša maaka tša gore Jehofa  o be a mo otla. Jobo ga se a ka a ba ngwana yo a sa llego; o ile a lla ka boemo bja gagwe a ba a bontšha gore o lokile kudu go feta Modimo. (Jobo 35:2) Lega go le bjalo, ga se a ka a lahlegelwa ke tumelo, goba go se sa hlwa a botega. Ga se a ka a roga Modimo go etša ge Sathane a be a boletše gore o tla dira bjalo. (Jobo 1:11, 21) Mafelelo e bile afe? Jehofa o ile a “šexofatša Jobo ka tše di tlilexo byale; tša fetiša tša mola pele.” (Jobo 42:12) Jehofa o ile a fodiša Jobo, a mo humiša ka mo go ipoeleditšego gabedi, gomme a mo šegofatša ka bophelo bjo bo kgotsofatšago le bja lethabo gotee le bao a ba ratago. Le gona go kgotlelela ga Jobo ka potego go ile gwa mo thuša go kwešiša Jehofa ka mo go tletšego kudu.

19. Re ithuta’ng tabeng ya Jobo ya go kgotlelela ka go se fele pelo?

¹⁹ Re ithuta’ng tabeng ya Jobo ya go kgotlelela ka go se fele pelo? Ka go swana le Jobo, re ka babja goba ra lebeletšana le mathata a mangwe. Re ka no se kwešiše ka botlalo lebaka leo ka lona Jehofa a dumelelago gore re lebeletšane le tlaišo e itšego. Lega go le bjalo, re ka kgonthišega ka se: Ge e ba re dula re botega, re tla šegofatšwa. Jehofa a ka se palelwe ke go putsa bao ba mo tsomago ka phišego. (Ba-Hebere 11:6) Jesu o itše: “E a tl’o xo tiišetša xo fihla bofelong, ké yêna a tl’o xo phološwa.”—Mateo 10:22; 24:13.

‘Letšatši la Jehofa le tla tla’

20. Ke ka baka la’ng re ka kgodišega gore letšatši la Jehofa le tla tla?

²⁰ Gaešita le ge Jehofa a sa fele pelo, o lokile gomme a ka se ke a kgotlelela bokgopo ka mo go sa felego. Go se fele pelo ga gagwe go na le mellwane. Petro o ngwadile gore: “Le lefase lela la kxalê [Modimo] xa a ka a le tsebafa.” Gaešita le ge Noage le lapa la gagwe ba ile ba phološwa, lefase leo le sa ratego Modimo le ile la fedišwa ka meetse-fula. Le gona Jehofa o ile a fediša Sodoma le Gomora ka mollo gwa šala melora feela. Dikahlolo tše di bea mohlala wa “se se tl’o xo dirwa banyatši.” Re ka kgonthišega ka se: ‘Letšatši la Jehofa le tla tla.’—2 Petro 2:5, 6; 3:10.

21. Re ka bontšha go se fele pelo ga rena le kgotlelelo bjang, gomme ke taba efe yeo re tlago go e ahla-ahla sehlogong se se latelago?

²¹ Ka gona, anke re ekišeng go se fele pelo ga Jehofa ka go thuša ba bangwe gore ba sokologe e le gore ba ka phološwa. Le gona anke re ekišeng baporofeta ka go tsebatša ditaba tše dibotse ka go se fele pelo go sa šetšwe go se arabele gabotse ga bao re dirago boboledi go bona. Go oketša moo, ge e ba re kgotlelela diteko gomme re tšwela pele re botega go etša Jobo, re ka kgonthišega gore Jehofa o tla re šegofatša ka mo go humilego. Re na le mabaka a go thaba bodireding bja rena ge re lemoga kamoo Jehofa a šegofaditšego maiteko a batho ba gagwe ka mo go humilego a go bolela ditaba tše dibotse lefaseng ka moka. Re tla ahla-ahla taba ye sehlogong se se latelago.

Na o a Gopola?

• Ke ka baka la’ng Jehofa a sa fele pelo?

• Re ithuta’ng tabeng ya go se fele pelo ga baporofeta?

• Jobo o ile a bontšha kgotlelelo bjang, gomme mafelelo e bile afe?

• Re tseba bjang gore go se fele pelo ga Jehofa go na le mellwane?

[Dipotšišo tša Thuto]

[Seswantšho go letlakala 18]

Go se fele pelo ga Jesu go ile gwa bonagatša ka mo go feletšego go se fele pelo ga Tatagwe

[Diswantšho go letlakala 20]

Jehofa o ile a putsa bjang go se fele pelo ga Jeremia?

[Diswantšho go letlakala 21]

Jehofa o ile a putsa bjang kgotlelelo ya Jobo?