Phihlelo

Jehofa o Nthušitše Gore ke mo Hwetše

KA GE GO ANEGA FLORENCE CLARK

Ke be ke swere letsogo la monna wa-ka yo a babjago la go hwa. Bjalo ka ge ke le mo-Anglican, ke ile ka rapela Modimo gore monna wa-ka a ke a fole, le gona ka holofetša gore ge e ba a ka se hwe, ke tla tsoma Modimo go fihlela ke mo hwetša. Ke moka ke tla ba wa gagwe.

KE NNA Florence ngwana wa Chulung. Ke belegwe ka September 18, 1937, motseng wa badudi ba setlogo ba Australia ba Oombulgurri, karolong e lego lekatana ya ka Bodikela bja Australia ya Kimberley Plateau.

Ke sa gopola gabotse matšatši a lethabo a go se tshwenyege ka selo a bjaneng bja-ka. Ditherong tša kereke, ke ithutile dilo tše sego kae tša motheo ka Modimo le Beibele, eupša ke mma yo a nthutilego melao ya motheo ya Bokriste. O be a mpalela Beibele ka mehla, ka gona go tloga bjaneng bja-ka ke ile ka hlagolela lerato la dilo tša moya. Le gona ke be ke kgahlwa ke yo mongwe wa bo-mmane’a-ka yo e bego e le moromiwa wa kereke yeo a bego a e tsena. Ka pelong ya-ka ke be ke tseba gore ke rata go latela mohlala wa gagwe.

Motse wa gešo, wo pele o bego o tsebja e le Forrest River Mission, o be o e-na le sekolo seo se thomago ka grade 1 go fihla ka grade 5. Mesong e mengwe le e mengwe ke be ke tsena sekolo diiri tše pedi feela. Se se be se bolela gore ke be ke sa hwetše thuto e lekanego, e lego taba yeo e bego e tshwenya tate. O be a nyaka gore bana ba gagwe ba rutege, ka gona o ile a phetha ka go tloga Oombulgurri gomme a re hudušetša toropong ya Wyndham. Go nna letšatši leo re tlogilego ka lona e bile la manyami, eupša kua Wyndham ke ile ka kgona go tsena sekolo ka mehla nywageng e mene e latetšego, go tloga ka  1949 go ya go 1952. Ke leboga kudu ge tate a nthušitše gore ke kgone go tsena sekolo.

Mma o be a šomela ngaka ya moo, gomme ge ke tlogela sekolo ke e-na le nywaga e 15, ngaka yeo e ile ya nnea mošomo wa booki sepetleleng sa Wyndham. Ke ile ka o amogela ka lethabo, ka ge ka nako yeo go be go le thata go hwetša mošomo.

Ka morago ga nywaga e itšego ke ile ka kopana le Alec, e lego lekgowa leo modiro wa lona e bego e le go diša. Re ile ra nyalana ka 1964 toropong ya Derby, moo ke bego ke tsena Kereke ya Anglican ka mehla. Ka letšatši le lengwe Dihlatse tša Jehofa di ile tša nketela. Ke ile ka di botša gore ke be ke tloga ke sa nyake go boledišana le tšona le gona ka di kgopela gore di se sa boa. Lega go le bjalo, selo seo di se boletšego se ile sa goga kgahlego ya-ka—Modimo ka boyena o na le leina, gomme leina leo ke Jehofa.

“Na o ka Palelwa ke go Ithapelela?”

Ka 1965 bophelo bo ile bja thoma go thatafa. Monna wa-ka o ile a hlagelwa ke dikotsi tše tharo tše šoro—tše pedi ka pere ya gagwe le e tee ka koloi ya gagwe. Ka mahlatse, o ile a fola dikgobalong tše ka moka gomme a boela mošomong. Lega go le bjalo, nakwana ka morago ga moo o ile a hlagelwa ke kotsi e nngwe gape ka pere ya gagwe. Lebakeng le, o ile a gobala kudu hlogong. Ge ke fihla sepetlele, ngaka e ile ya mpotša gore monna wa-ka o be a tlo hwa. Ke ile ka felelwa ke matla. Mooki o ile a kgopela moruti wa kgaufsi gore a tle go mpona, eupša o ile a re: “Ke tla tla gosasa. E sego lehono!”

Ke ile ka botša moitlami wa mosadi gore ke be ke nyaka gore moruti a nthekge a be a rapele le nna. O ile a re: “Bothata bja gago ke eng? Na o ka palelwa ke go ithapelela?” Ka gona, ke ile ka thoma go rapela dihlwa-dieme tša kereke gore di thuše—eupša go be go se thušo. Monna wa-ka o be a le boemong bjo bo hlobaetšago. Ke ile ka ipotšiša gore, ‘Ge e ba monna wa-ka a ka hwa, ke tlo phela bjang?’ Le gona, ke be ke tshwenyegile ka bana ba-ka ba bararo—Christine, Nanette le Geoffrey. Ba tlo phela bophelo bja mohuta mang ba se na tate? Se se thabišago ke gore monna wa-ka o ile a hlaphogelwa ka morago ga matšatši a mararo gomme a lokollwa ka December 6, 1966.

Le ge monna wa-ka ka lehlakoreng le lengwe a be a fodile wa go wiša pelo, o be a gobetše bjoko. O be a lahlegetšwe ke mogopolo ganyenyane gomme ga bjale a fetogile sefela-pelwana le ntwa-dumela. O be a e-na le bothata bja go kgotlelela bana le gona o be a galefa kudu ge ba ka se dire dilo bjalo ka batho ba bagolo. Go be go le boima go mo hlokomela. Ke be ke swanetše go mo direla dilo tšohle. Le gona, ke ile ka ba ka mo ruta go bala le go ngwala. Morwalo wa go mo hlokomela, mola ke dutše ke šoma mešongwana ya-ka ya ka mo gae, o ile wa nkimela gomme ka šarakana monagano. Nywaga e šupa ka morago ga kotsi ya monna wa-ka, re ile ra kwana gore re kgaogane lebakanyana e le gore ke kgone go boela sekeng.

Ke ile ka tšea bana gomme ra leba borwa toropong ya Perth. Pele ga ge re ka tloga, moratho wa-ka o be a thomile go ithuta Beibele le Dihlatse tša Jehofa tša Kununurra, torotswana ya ka Bodikela bja Australia. O ile a mpontšha seswantšho seo se bontšhago kholofetšo ya Beibele ya paradeise mo lefaseng ka pukung ya Therešo ye Išago Bophelong bjo bo sa Felego. * Go tšwa ka pukung ye, o ile a mpontšha gore Modimo o na le leina, Jehofa, gomme seo se ile sa nkgahla. Ka ge ke sa ka ka botšwa ka ditaba tše ka kerekeng ye ke bego ke e tsena, ke ile ka dira phetho ya go leletša Dihlatse tša Jehofa mogala ka pela-pela ge ke fihla Perth.

Lega go le bjalo, ke be ke dika-dika go ikopanya le tšona. Ke moka bošegong bjo bongwe motho o ile a kokota mojako. Morwa wa-ka o ile a ya go bula gomme a tla go nna a kitima a re, “Mma, batho bale o itšego o tlo ba leletša mogala ba tlile.” Ke be ke maketše gomme ka re: “Ba botše gore ga ke gona!” Eupša o ile a araba ka gore: “Mma, o a tseba gore ga se ka swanela go bolela maaka.” Ka phošollo yeo ke ile ka ya mojako. Ge ke dumediša baeng, ke ile ka lemoga gore difahlegong ba be ba bonala ba tlabegile.  Ba be ba tlile go bona modudi yo mongwe yo a bego a hudugile. Ke ile ka ba kgopela gore ba tsene ka ntlong gomme ka ba hlasela ka dipotšišo tšeo ba ilego ba nnea dikarabo tša go kgotsofatša tšeo di tšwago ka Beibeleng.

Bekeng e latetšego ke ile ka thoma go ithuta Beibele ka mehla le Dihlatse, re šomiša puku ya Therešo ye Išago Bophelong bjo bo sa Felego. Thuto yeo e ile ya tsošološa lerato la-ka dilong tša moya. Dibeke tše pedi ka morago ke ile ka ya Segopotšong sa lehu la Jesu Kriste. Ke ile ka thoma go ya dibokeng Sontaga se sengwe le se sengwe, gomme go se go ye kae ke be ke e-ya le dibokeng tša gare ga beke. Le gona ke ile ka thoma go boledišana le ba bangwe ka seo ke bego ke ithuta sona. Ke ile ka lemoga gore go thuša ba bangwe go ithuta ditherešo tša Beibele go be go kaonefatša mogopolo wa-ka gotee le maikwelo. Ka morago ga dikgwedi tše tshela ke ile ka kolobetšwa kopanong ya selete ya Perth.

Ge ke dutše ke gola moyeng, ke ile ka thoma go kwešiša pono ya Jehofa ka go kgethega ga lenyalo, go akaretša le molao wa motheo wa Beibele o hwetšwago go 1 Ba-Korinthe 7:13, wo o rego: “Le mosadi e a naxo le monna e a sa dumelexo, xe a rata xo dula le monna eo, a se kê a mo hlala.” Lengwalo le le ile la ntutueletša go boela go Alec.

Go Boela Derby

Ke fihlile Derby ka June 21, 1979 ka morago ga go kgaogana le monna wa-ka ka nywaga e fetago e mehlano. Go ba gona, ke be ke e-na le dipelaelo tša gore o tla itshwara bjang ge ke boile. Go fapana le seo ke bego ke se nagana, o be a thabetše gore ke boile, le ge a bontšhitše go nyamišwa ke ge ke le yo mongwe wa Dihlatse tša Jehofa. Kapejana o ile a šišinya gore ke ye kerekeng ya gagwe, yeo ke bego ke e tsena pele ke tloga Perth. Ke ile ka hlalosa gore nka se kgone go dira seo. Ke be ke leka ka mešego-fela go hlompha bohlogo bja gagwe, le gona ke ile ka dira sohle se nka se kgonago bjalo ka mosadi wa Mokriste. Ke ile ka leka go boledišana le yena ka Jehofa le ka dikholofetšo tša Gagwe tše di nago le bokamoso bjo bo kgahlišago, eupša o be a sa bontšhe kgahlego.

Lega go le bjalo, mafelelong Alec ga se a amogela feela tsela ya-ka e mpsha ya bophelo eupša gape o ile a thoma go nnea tšhelete ya gore ke kgone go ya dikopanong gotee le dibokeng tša gare ga beke. Ke ile ka leboga kudu ge a be a reka koloi—selo sa bohlokwa karolong ye e lego lekatana ya Australia—gore ke e diriše bodireding bja Bokriste. Bana babo rena le dikgaetšedi, go akaretša le molebeledi wa tikologo, gantši ba be ba robala legaeng la rena. Se se ile sa thuša Alec go tsebana le Dihlatse tše di fapa-fapanego, le gona o be a bonala a thabela bogwera bja tšona.

Ke Ile ka Ikwa Bjalo ka Hesekiele

Ke be ke thabela diketelo tša bana babo rena le dikgaetšedi, eupša ke be ke lebane le tlhohlo. Ke be ke le modudi a nnoši wa Hlatse motseng wa gešo wa Derby. Phuthego ya kgaufsi e be e le Broome, monabo wa dikhilomithara tše 220. Ka gona ke ile ka phetha ka gore ke dire sohle se nka se kgonago go phatlalatša ditaba tše dibotse. Ke ile ka dira dithulaganyo ka thušo ya Jehofa gomme ka thoma go nea bohlatse ka ntlo le ntlo. Ke ile ka hwetša modiro wo o le boima, eupša ke be ke ikgopotša mantšu a moapostola Paulo a rego: “Ke kxôna tšohle ka Eo a mphaxo matla.”—Ba-Filipi 4:13.

Baruti ba lefelong leo ba be ba sa thabele modiro wa-ka, kudu-kudu ge ke nea bohlatse gare ga ma-Aborigine a gešo. Ba ile ba leka go ntšhošetša le go thibela modiro wa-ka wa boboledi. Kganetšo ya bona e ile ya ntlhohleletša gore ke tšwele pele ke tiišetše, le gona ka mehla ke be ke rapela Jehofa gore a nthuše. Gantši ke be ke gopola mantšu a matlafatšago ao a ilego a botšwa Hesekiele a rego: “Fêla, le sa xaxo sefahloxô ke  se thatafatša byalo ka tša bôná, le ya xaxo phatla ke e thatafatša ya etša tša bôná. Le ya xaxo phatla ke e nea bothata bya talama le bya lexakabyê. O se ba boifê, O se thšoxê difahloxô tša bôná.”—Hesekiele 3:8, 9.

Banna ba babedi ba kereke ba be ba fela ba e-tla go nna ka makga a mmalwa ge ke be ke reka dilo mabenkeleng. Ba be ba leka go kgahliša bareki ba bangwe ka nna, ba ntlhabela mašata e bile ba nkwera. Ke be ke ba hlokomologa. Ka lekga le lengwe, ge ke be ke boela go motho yo a bontšhitšego kgahlego, moruti wa kereke ya mo motseng o ile a tla go ntatofatša ka gore ga ke dumele Jesu. O ile a ubula Beibele ka letsogong la-ka, a e šikinyetša mahlong a-ka gomme a e bušetša ka letsogong la-ka a galefile. Ke mo lebeletše ka mahlong, ke ile ka tsopola Johane 3:16 ke le bonolo eupša ka sebete, gomme ka mmotša ka kgodišego gore ke tloga ke dumela go Jesu. O be a makaditšwe ke karabo ya-ka ya sebete gomme o ile a sepela ntle le go ntšha lentšu.

Ke be ke thabela go boledišana le ma-Aborigine a lego karolong ya Derby. Moruti wa moo o ile a leka go nthibela go etela batho ba motseng o mongwe o itšego, eupša o ile a hudušwa. Ka lebaka leo, ke ile ka kgona go ba išetša molaetša wa Beibele. Ka mehla ke be ke nyaka go ba moromiwa bjalo ka mmane, gomme ga bjale ke be ke dira modiro wa boromiwa, ke thuša batho ba bangwe go ithuta Lentšu la Modimo. Batho ba bantši ba ma-Aborigine ba be ba arabela gabotse modirong wa-ka wa boboledi, ka gona ke ile ka thoma dithuto tše mmalwa tša Beibele.

Go Lemoga Senyakwa Sa-ka sa Moya

Ka nywaga e mehlano, ke be ke le Hlatse ya Jehofa e nnoši motseng wa Derby. Ke ile ka hwetša go le boima go dula ke tiile moyeng ntle le gore ke matlafatšwe ke go bokana ka mehla le barapedi-gotee le nna. Lebakeng le lengwe, ke  be ke nyamile gomme ke ile ka tšwa ka koloi gore ke hlabje ke moya. Ge ke boa gae thapama ge šwahlane e swara, ke ile ka hwetša kgaetšedi yo mongwe le bana ba gagwe ba šupa ba le moo ba nkemetše. Ba be ba tlišitše sesola sa-ka sa dipuku go tšwa phuthegong yeo e lego kgole ya Broome. Go tloga lebakeng leo go ya pele, kgaetšedi yena yoo e lego Betty Butterfield, o ile a dira ditokišetšo tša go tla Derby go tlo fetša mafelo-beke le nna gatee ka kgwedi. Re be re e-ya bodireding re le gotee gomme ka morago re ithuta Morokami re le gotee ka lapeng la-ka. Go mmušetša dinao, ke be ke e-ya Broome gatee ka kgwedi.

Bana babo rena ba Broome ba be ba thuša kudu le gona mabakeng a mangwe ba be ba kgona go tšea leeto le letelele la go tla Derby go tlo nthuša tirelong ya tšhemo. Ba ile ba kgothaletša bana babo rena le dikgaetšedi ba tšwago metseng e mengwe bao ba bego ba tla feta Derby gore ba fete ba ntlhola gomme ba ye le nna bodireding. Le gona bafeti bao ba be ba ntlišetša dikhasete tša dipolelo tša phatlalatša. Ba bangwe ba be ba swara thuto ya Morokami le nna. Diketelo tšeo tša lebakanyana di be di mmatlafatša kudu.

Thušo e Kgolo e Tseleng

Ka nywaga e mmalwa, ke be ke hwetša thekgo e oketšegilego ge Arthur le Mary Willis, banyalani bao ba rotšego modiro ba tšwago karolong ya ka borwa ya Australia Bodikela, ba be ba e-tla go nthuša ka kgwedi e tee sehleng sa seruthwane ka nywaga e meraro ya go latelana. Ngwanabo rena Willis o be a swara bontši bja diboka le gona o be a etelela pele bodireding bja tšhemo. Re be re e-ya re le ka moka dikarolong tšeo di lego kgole tša Kimberley Plateau, re yo dira boboledi merakeng ya dikgomo metseng ye yeo e lego lekatana. Nako le nako ge Ngwanabo rena le Kgaetšedi Willis ba sepela, ke be ke ikwa ke lahlegetšwe.

Go ya bofelong bja 1983 ke ile ka amogela ditaba tše dibotse mafelelong, tša gore lapa le lengwe—Danny le Denise Sturgeon le barwa ba bona ba bane—le be le hudugela Derby. Ka morago ga ge ba gorogile, re ile ra kgona go swara diboka tša beke le beke ka mehla le go ya bodireding bja tšhemo re le gotee. Go ile gwa hlongwa phuthego ka 2001. Lehono, Derby e na le phuthego e tiilego ya bagoeledi ba mmušo ba 24, bagolo ba babedi le mohlanka o tee wa bodiredi bao ba re hlokomelago moyeng. Mabakeng a mangwe re kgona go ba 30 dibokeng.

Ge ke lebelela morago nywageng e fetilego, pelo ya-ka e tlala lethabo ge ke bona kamoo Jehofa a nthušitšego go mo hlankela. Le ge e le gore monna wa-ka ga bjale ga se a ntlatša bodumeding, o tšwelapele a nthekga ka ditsela tše ntši. Ditho tše hlano tša lapa la-ka ke Dihlatse tše di kolobeditšwego—barwedi ba-ka ba babedi, ditlogolo tša-ka tše pedi, le morwedi wa moratho wa-ka. Go tlaleletša moo, ba bangwe ba leloko ba ithuta Beibele le batho ba Jehofa.

Ke tloga ke leboga kudu ge Jehofa a nthušitše gore ke mo hwetše. Ke ikemišeditše go ba wa gagwe ka mo go sa felego.—Psalme 65:2.

[Mongwalo wa ka tlase]

[Mmapa/Diswantšho go letlakala 15]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

AUSTRALIA

Wyndham

Kimberley Plateau

Derby

Broome

Perth

[Methopo]

Kangaroo and lyrebird: Lydekker; koala: Meyers

[Seswantšho go letlakala 14]

Ke šoma bjalo ka mooki bookelong bja Wyndham, 1953

[Seswantšho go letlakala 15]

Phuthego ya Derby, 2005