Katlego Ya Kgonthe Lefaseng le Lefsa la Modimo

DAVID, * e lego monna wa Mokriste e bile e le tate, o ile a hudugela United States e le ge a holofela gore o dira selo seo se nepagetšego. Gaešita le ge a se a ka a thabišwa ke go tlogela mosadi wa gagwe le bana, o be a ikwa a kgodišegile gore o be a ka dira gore ba phele bophelo bjo bokaone ge feela a ka ba le tšhelete e oketšegilego. Ka gona o ile a ya go ba leloko bao ba bego ba mmiditše kua New York gomme go se go ye kae a hwetša mošomo gona fao.

Lega go le bjalo, ge dikgwedi di dutše di feta, kgodišego ya David ya bokamoso e ile ya thoma go hwelela. O be a se sa na le nako bakeng sa dilo tša moya. Lebakeng le lengwe, go ile gwa šala ganyenyane gore a lahlegelwe ke tumelo go Modimo. O ile a naganišiša kudu ka boemo bja gagwe ka morago ga ge a wetše tekong ya boitshwaro bjo bo sa swanelago. Go phegelela ga gagwe katlego ya dilo tše di bonagalago go be go mo fapoša ganyenyane-ganyenyane dilong ka moka tšeo a bego a di lebelela e le tša bohlokwa. O ile a swanelwa ke go dira se sengwe.

Ka go swana le David, ngwaga le ngwaga ba bantši ba huduga dinageng tša gabo bona tšeo di diilago, ba hutša go kaonefatša maemo a bona a tša boiphedišo. Lega go le bjalo, gantši  kudu ba feleletša ka boemo bjo bo sa kgahlišego bja moya. Ba bangwe ba ile ba ipotšiša gore, ‘Na Mokriste a ka kgona go phegelela mahumo a ba a ruela Modimong?’ Bangwadi ba tumilego le baruti ba re go a kgonega. Eupša bjalo ka ge David le ba bangwe ba ile ba ithuta, go thata go hwetša se sengwe ntle le go lahlegelwa ke se sengwe.— Luka 18:24.

Tšhelete ga se e Mpe

Ke therešo gore tšhelete e dirilwe ke batho. Bjalo ka dilo tše dingwe gape tše dintši tše di dirilwego, tšhelete ka boyona ga se e mpe goba e fošagetšego. Ka kgonthe, e fo ba selo seo go ananywago ka sona. Ka gona, ge e ba e dirišwa gabotse, e ka ba e holago. Ka mohlala, Beibele e bolela gore “tšhelete le yona ke tšhireletšo,” kudu-kudu mathateng ao a tswalanago le bodiidi. (Mmoledi 7:12, PK) Go bonala ba bangwe “tšhelete e ba tlišetša tšohle.”— Mmoledi 10:19, PK.

Beibele e lwa le bobodu gomme e kgothaletša go šoma ka thata. Re swanetše go hlokomela malapa a rena gomme ge e ba go na le bonyenyane bjo bo šalago, re na ‘le tše re kago abela mohloki.’ (Ba-Efeso 4:28; 1 Timotheo 5:8) Go feta moo, Beibele e re kgothaletša go thabela tšeo re nago le tšona go e na le go kgothaletša gore re itime dilo. Re botšwa gore re ‘tšee kabelo ya rena’ le go thabela dienywa tša mediro ya rena. (Mmoledi 5:17-19) Ge e le gabotse, ka Beibeleng go na le mehlala e mmalwa ya banna le basadi ba botegago bao ba bego ba humile.

Banna ba Botegago Bao ba Bego ba Humile

Mohlanka wa Modimo yo a botegago, e lego Aborahama, o ile a ba le diruiwa tše dintši le mehlape e mentši, boati bja silifera le gauta, gotee le bahlanka ba bantši kudu moo e lego gore ba be ba balwa ka makgolo. (Genesi 12:5; 13:2, 6, 7) Jobo wa moloki le yena o be a humile kudu—ka diruiwa, ka bahlanka, ka gauta le ka silifera. (Jobo 1:3; 42:11, 12) Banna ba ba be ba humile gaešita le go ya ka tekanyo ya lehono, eupša gape ba be ba ruetše Modimong.

Moapostola Paulo o bitša Aborahama “tata xo bohle ba ba dumêlaxo.” Aborahama o be a sa timane goba a se a kgomarela ka mo go feteletšego go seo a bego a e-na le sona. (Ba-Roma 4:11; Genesi 13:9; 18:1-8) Ka mo go swanago, Modimo ka boyena o hlalositše Jobo e le wa “bothakxa le xo loka.” (Jobo 1:8) O be a dula a le komana-madula-a-bapile go thuša badiidi gotee le bao ba tlaišegago. (Jobo 29:12-16) Aborahama le Jobo ba be ba bota Modimo go e na le go bota mahumo a bona.—Genesi 14:22-24; Jobo 1:21, 22; Ba-Roma 4:9-12.

Mohlala o mongwe ke kgoši Salomo. E le mojabohwa wa setulo sa Modimo sa bogoši kua Jerusalema, Salomo ga se a ka a šegofatšwa feela ka bohlale bjo bo tšwago go Modimo eupša gape o ile a šegofatšwa ka mahumo a mantši le letago. (1 Dikxoši 3:4-14) O ile a botega nakong e ntši ya bophelo bja gagwe. Lega go le bjalo,  nywageng ya mafelelo ya bophelo bja gagwe, “pelo ya [Salomo] ya se kê ya hlwa e êma le Morêna ka botlalô.” (1 Dikxoši 11:1-8) Ge e le gabotse, phihlelo ya gagwe e nyamišago e bontšha melaba e mengwe e tlwaelegilego ya katlego ya dilo tše di bonagalago. Ela hloko e sego kae.

Melaba ya Katlego ya Dilo tše di Bonagalago

Kotsi e kgolo kudu ke ya go rata tšhelete le seo e ka se rekago. Lehumo le dira gore ba bangwe ba be le kganyogo e sa kgotsofatšegego. Pejana Salomo o ile a lemoga mokgwa wo go ba bangwe. O ngwadile gore: “E a rataxo mahumô xa a hore ka ôna; mo-lla-boati xa a holexe selô. Le tšôna ké lefêla.” (Mmoledi 5:9) Ka morago Jesu le Paulo ba ile ba lemoša Bakriste mabapi le lerato le leo le forago.

Ge tšhelete e e-ba selo seo re tlogago re se rata go e na le go fo ba selo seo se re thušago go hwetša dilo, re ba kotsing ya go lekega gabonolo boitshwarong le ge e le bofe, go akaretšwa go bolela maaka, bohodu le boradia. Judase Isikariote, e lego yo mongwe wa baapostola ba Jesu, o ile a eka mong wa gagwe ka ditsekana tše 30 feela tša silifera. (Mareka 14:11; Johane 12:6) Ba bangwe ba ile ba ba ba dira gore tšhelete e tšeele Modimo legato e le ge lerato leo le šetše le tseneletše. Ka gona Bakriste ba swanelwa ke go dula ba katanela go botega mabapi le morero wa bona wa kgonthe wa go tsoma tšhelete e oketšegilego.—Ba-Hebere 13:5.

Go phegelela mahumo gape go tšweletša dikotsi tšeo di sa lemogegego. Sa pele, go huma le dinala go dira gore motho e be moipoti. Jesu o ile a akaretša se ge a be a bolela ka “bofora bya lehumô.” (Mateo 13:22) Ka mo go swanago, mongwadi wa Beibele e lego Jakobo o lemošitše Bakriste gore ba se lebale Modimo gaešita le ge ba loga maano a tša kgwebo. (Jakobo 4:13-16) Bjale ka ge tšhelete e re fa tekanyo e itšego ya kgotsofalo, bakeng sa bao ba nago le yona, go na le kotsi e dulago e le gona ya gore ba bote tšhelete ya bona go e na le go bota Modimo.—Diema 30:7-9; Ditiro 8:18-24.

Sa bobedi, bjale ka ge David yoo go boletšwego ka yena pejana a ile a lemoga, go phegelela mahumo gantši go fetša nako e ntši kudu ya motho gotee le matla a gagwe moo e lego gore go mo aroša dilong tša moya ganyenyane-ganyenyane. (Luka 12:13-21) Le gona, bahumi ba dula ba e-na le kgoketšo ya go diriša seo ba nago le sona, kudu bakeng sa maipshino goba dilo tša motho ka noši.

Na go wa ga Salomo moyeng go fihla bokgoleng bjo itšego go ka ba go ile gwa bakwa ke go dumelela ga gagwe bophelo bja manobonobo bo mo senya kgopolo? (Luka 21:34) O be a tseba gore Modimo o ganetša ka go lebanya go nyalana le batho ba ditšhaba dišele. Lega go le bjalo, o ile a feleletša ka go tlatša ngwako ka dikete tša basadi bašele. (Doiteronomio 7:3) Ge a phegelela go thabiša basadi ba gagwe bašele, o ile a dira tokišetšo ya go tswakanya madumedi bakeng sa go ba hola. Bjale ka ge go lemogilwe pejana, ganyenyane-ganyenyane pelo ya Salomo e ile ya arošwa go Jehofa.

Ge e le gabotse, mehlala ye e bontšha therešo ya keletšo ya Jesu e rego: “Le ka se kxône xo dirêla Modimo, ’me la dirêla le Mamôna.” (Mateo 6:24) Ka gona, Mokriste a ka lebeletšana bjang ka katlego le mathata a tša boiphedišo ao ba bantši ba lebeletšanego le ona gona bjale? Sa bohlokwa le go feta, go na le kholofelo efe mabapi le bophelo bjo bokaone nakong e tlago?

Katlego ya Kgonthe Nakong e Tlago

Go fapana le mopatriareka Aborahama le mopatriareka Jobo gotee le setšhaba sa Isiraele, balatedi ba Jesu ba laetšwe gore ba “dirê dithšaba ka moka barutiwa.” (Mateo 28:19, 20) Go phethagatša taelo yeo go nyaka nako gotee le maiteko ao gape a bego a ka dirišwa dilong tša lefase. Ka gona, senotlelo sa katlego ke go dira seo Jesu a itšego re se dire: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.”—Mateo 6:33.

Ka morago ga go nyaka go lahlegelwa ke lapa la gagwe le ke boemo bja gagwe bja moya, mafelelong David o ile a kgona go bušetša bophelo bja gagwe sekeng. Bjalo ka ge Jesu a holofeditše, dilo di ile tša thoma go sepelela David gabotse ka morago ga gore a thome go dira gore thuto ya Beibele, thapelo le bodiredi e be dilo  tša pele bophelong bja gagwe. Ganyenyane-ganyenyane tswalano ya gagwe le mosadi wa gagwe gotee le bana e ile ya boela sekeng. O ile a boelwa ke lethabo la gagwe gotee le kgotsofalo. O sa dutše a šoma ka thata. Ga se a ka a tloga bodiiding go ya bohuming. Lega go le bjalo, o ithutile dithuto tša bohlokwa kudu go tšwa phihlelong ya gagwe e kwešago bohloko.

David o ile a ipotšiša ge e ba e bile gabohlale go hudugela United States, gomme o phethile ka gore a ka se tsoge a dumeletše tšhelete gape gore e laole diphetho tša gagwe. Gona bjale o tseba gore dilo tša bohlokwa kudu bophelong—lapa le lerato, bagwera ba babotse gotee le tswalano le Modimo—di ka se rekwe ka tšhelete. (Diema 17:17; 24:27; Jesaya 55:1, 2) Ka kgonthe, go botega boitshwarong go feta kgole mahumo a dilo tšeo di bonagalago. (Diema 19:1; 22:1) David gotee le lapa la gagwe ba ikemišeditše go dira gore dilo tša pele e be tša pele.—Ba-Filipi 1:10.

Maiteko a batho a go leka go aga setšhaba seo se atlegilego e le ka kgonthe e bile e le seo se itshwerego gabotse a paletšwe gantši. Lega go le bjalo, Modimo o holofeditše gore Mmušo wa gagwe o tla dira gore go be le motlalo wa dilo tše di bonagalago gotee le wa dilo tša moya tšeo re tlogago re di nyaka gore re phele gabotse. (Psalme 72:16; Jesaya 65:21-23) Jesu o rutile gore katlego ya kgonthe e tswalwa ke boemo bja rena bja moya. (Mateo 5:3) Ka gona go sa šetšwe gore re humile goba re a diila, tsela e phalago tšohle yeo ka yona yo mongwe le yo mongwe wa rena a ka itokišeletšago lefase le lefsa la Modimo la nakong e tlago ke ka go etiša dilo tša moya pele. (1 Timotheo 6:17-19) Lefase leo e tla ba la batho bao ba atlegilego e le ka kgonthe ka dilo tše di bonagalago le tša moya.

[Mongwalo wa ka tlase]

[Diswantšho go letlakala 5]

Jobo o be a botile Modimo, e sego mahumo a gagwe

[Diswantšho go letlakala 7]

Dilo tša bohlokwa kudu bophelong di ka se rekwe ka tšhelete