Na o Swana le Sehlare sa Lagani Auna?

MOTSANENG o lego ka ntle ga Port Moresby, kua Papua New Guinea, badiredi ba babedi ba be ba boa gae ba e-tšwa modirong wa bona wa boboledi. Ge ba dutše ba sepela, ba ile ba bona sehlare se sebotse. Mokgalabje o ile a re: “Bona, sehlare sa lagani auna!” Ge a retologela go lesogana, o ile a tšwela pele ka gore: “Leina leo le bolela gore ‘sehlare sa ngwaga le ngwaga.’ Ka go fapana le dihlare tše dingwe tše dintši tša melatšatšing, ngwaga le ngwaga se hlohlorega matlakala gomme sa bonagala eka se hwile. Lega go le bjalo, ge dipula di e-na, se a tsoga, sa tšweletša matšoba, gomme sa bonagatša botse bja sona gape.”

Re ka ithuta thuto go tšwa sehlareng se sa lagani auna, goba royal poinciana, ka ge ka tlwaelo se tsebja bjalo. Go ya ka ditsebi tše dingwe, se lebelelwa se le gare ga dihlare tše hlano tše dibotse ka go fetišiša tša go tšweletša matšoba lefaseng. Le ge se hlohlorega matšoba le matlakala sehleng seo dipula di sa nego, sehlare se se boloka meetse. Medu ya sona e tiile gomme e ka naba go dikologa mafsika ao a lego ka tlase-tlase ga mobu. Ka wona mokgwa wo, se kgona go tia ge go tšutla diphefo tše matla. Ka boripana, se kgona go tšwela pele se phela ka go itlwaelanya le maemo a thata.

Re ka ikhwetša re le maemong ao a re lekago tumelo. Ke’ng seo se tlago go re thuša go kgotlelela? Go etša sehlare sa lagani auna, re ka nwa le go boloka meetse ao a neago bophelo a Lentšu la Modimo. Le gona, re swanetše go itshwarelela ka go tia ‘lefsikeng la rena,’ e lego Jehofa, gotee le mokgatlong wa gagwe. (2 Samuele 22:3) Ka kgonthe, sehlare sa lagani auna ke kgopotšo e kgahlišago ya gore gaešita le ditikologong tše thata, re ka kgomarela boemo bja rena bjo bobotse le bjo bo tiilego bja moya ge e ba re diriša ka botlalo ditokišetšo tšeo Jehofa a re neago tšona. Ka go dira bjalo, re tla ‘rua tšeo a di holofeditšego,’ go akaretša le kholofetšo ya bophelo bjo bo sa felego.—Ba-Hebere 6:12; Kutollo 21:4.