Dipotšišo tše Tšwago go Babadi

Ke dikotsi dife tše tharo tšeo Jesu a bego a lemoša malebana le tšona go Mateo 5:22?

Thutong ya gagwe ya Thabeng, Jesu Kriste o lemošitše balatedi ba gagwe ka gore: “Ke re go lena yo mongwe le yo mongwe yo a tšwelago pele a galefetše ngwanabo o tla seka kgorong ya toka; eupša mang le mang yo a bitšago ngwanabo ka lentšu le le sa bolelegego la lenyatšo o tla seka Kgorong e Phagamego; mola mang le mang yo a rego, ‘Wena lešilo-towe la monyatšegi!’ a tla lebanwa ke Gehenna ya mollo.”—Mateo 5:22.

Jesu o dirišitše dilo tše di tlwaelegilego go ba-Juda—kgoro ya toka, Kgoro e Phagamego le Gehenna ya mollo—gore a ba bontšhe bogolo bja dikotlo tša dibe tšeo di tšwelago pele di gola.

Sa pele, Jesu o boletše gore motho yo mongwe le yo mongwe yo a tšwelago pele a galefetše ngwanabo o tla seka ‘kgorong ya toka,’ e lego kgoro ya lefelong leo. Go ya ka setšo, dikgoro tše di be di hlongwa metseng ge banna bao ba dulago moo ba be ba lekana 120 goba go feta. (Mateo 10:17; Mareka 13:9) Baahlodi ba kgorong e bjalo ba be ba e-na le matla a go ahlola, gaešita le melatong ya polao. (Doiteronomio 16:18; 19:12; 21:1, 2) Ka gona, Jesu o be a bontšha gore motho yo a bolokago sekgopi sa bonaba malebana le ngwanabo o dira sebe se segolo.

Se se latelago, Jesu o boletše gore motho yo a “bitšago ngwanabo ka lentšu le le sa bolelegego la lenyatšo o tla seka Kgorong e Phagamego.” Lentšu la Segerika la rha·kaʹ (mongwalo wa tlase NW) leo le fetoletšwego e le “lentšu le le sa bolelegego la lenyatšo” le bolela “go se be le selo” goba “hlogo e tletšego meetse.” Go ya ka The New Thayer’s Greek-English Lexicon of the New Testament, lentšu leo e be e le “polelwana yeo e bego e dirišwa ke ba-Juda mehleng ya Kriste bakeng sa go kgalemela batho.” Ka baka leo, Jesu o be a lemoša malebana le bogolo bja go bontšha lehloyo go ngwanabo rena ka tsela ya lenyatšo la go kwera. Jesu ge e le gabotse o be a bolela gore motho yo a dirišago lentšu le bjalo a ka se ahlolwe ke lekgotla la lefelong leo feela, eupša o be a tla ahlolwa gape ke Kgoro e Phagamego, lekgotla ka moka la Sanhedrine—sehlopha sa boahlodi kua Jerusalema seo se bego se bopša ke baperisita bao ba phagamego le banna ba bagolo ba 70 gotee le bamangwalo.—Mareka 15:1.

Mafelelong, Jesu o hlalositše gore ge motho a bolela le yo mongwe a re, “Wena lešilo-towe la monyatšegi!” o be a tla swanelwa ke Gehenna ya mollo. Lentšu “Gehenna” le tšwa lentšung la Seheberu la geh hin·nomʹ, leo le rago gore “moedi wa Hinomo,” wo o bego o le ka bodikela le ka borwa bja Jerusalema ya bogologolo. Mehleng ya Jesu, moedi wo e be e le lefelo la go fišetša ditšhila, go akaretša le ditopo tša disenyi tše šoro tšeo di bego di lebelelwa di sa swanelwe ke go bolokwa ka tlhompho. Ka baka leo, lentšu “Gehenna” e be e le pontšho e swanetšego ya phedišo ya sa ruri.

Bjale, polelwana e rego “lešilo-towe la monyatšegi” e be e bontšha’ng? Lentšu leo le dirišitšwego mo le be le kwagala le swana le polelwana ya Seheberu yeo e bolelago gore “motho wa lerabele,” goba “motho wa go se laolege.” Le bontšha motho yo a se nago mohola boitshwarong, e lego mohlanogi le lerabele malebana le Modimo. Ka baka leo, motho yo a bolelago ka ngwanabo gore ke ‘lešilo la monyatšegi’ go swana le ge a re ngwanabo o swanetše go ahlolwa ka kahlolo e swanago le ya motho yo a rabelago go Modimo, e lego phedišo ya sa ruri. Go ya ka pono ya Modimo, motho yo a ahlolago motho yo mongwe ka tsela e bjalo, yena ka boyena a ka ahlolwa ka tsela e bjalo e šoro—phedišo ya sa ruri.—Doiteronomio 19:17-19.

Ka baka leo, Jesu o be a bea tekanyetšo e phagamego bakeng sa balatedi ba gagwe go feta yeo e hwetšwago ka melaong ya motheo e lego ka Molaong wa Moše. Gaešita le ge batho ba be ba dumela gore mmolai o tla “seka kgorong ya toka,” Jesu o ile a tšwela pele a hlalosa se sengwe. O rutile balatedi ba gagwe gore ba swanetše go phema gaešita le go boloka lehloyo la bonaba malebana le bana babo bona.—Mateo 5:21, 22.