Ditoropo tše di Lego Lekatana tša Bolivia di kwa Ditaba tše Dibotse

RE KGOBOKANE khwiting ya noka re le batho ba ka bago ba 20, gomme ka phagahlo re lebeletše pele leetong la letšatši ka moka la go ya dinaga-magaeng tše di lego kua noka e tšwelelago gona. Re botlaseng bja Andes, moo noka ya Beni e fihlago melaleng e megolo yeo e lego molapong wa Amazon. Ke lefelo la botse bjo bo sa tlwaelegago.

Lega go le bjalo, ga re baeti ba basepedi. Ba bangwe ba rena re dula mo; bontši bja rena bo tšwa dinageng tša kgole go tla go dula mo Rurrenabaque, e lego torotswana e botsana e nago le mehlare ya matšoba, nywako e ruletšwego ka bjang le ditsela tšeo go tšona go fetago feela thuthuthu ya thekisi ka dinako tše itšego. Ke ka baka la’ng re tšea leeto le?

Seo se diregago mo ke seo se diregago dikarolong tše dingwe tše dintši tša Bolivia. Dihlatse tša Jehofa tše di tšwago ditoropong tše dikgolo le dinageng tše dingwe di iša ditaba tše dibotse tša Mmušo wa Modimo ditorotswaneng.—Mateo 24:14.

Bolivia e bogareng bja Amerika Borwa. Naga ye ke e kgolo moo e lego gore naga ya Fora e tsena gabedi ka go yona, eupša e na le badudi ba ka tlasana go ba Fora ka 10 lekgolong. Bontši bja batho ba Bolivia bo dula ditoropong tše dikgolo le tše dinyenyane tša meepong tšeo di lego mebotong e megolo kudu goba mafelong a tša temo a lego ka meeding. Lega go le bjalo, dinaga-tlaseng tša molatšatšing, ditoropo di arogantšwe ke dithokgwa tša diphariri.

Ka bo-1950 le bo-1960, baromiwa ba sebete, ba bjalo ka Betty Jackson, Elsie Meynberg, Pamela Mosely le Charlotte Tomaschafsky, ba ile ba etelela  pele modiro ditoropong tše dintši tše di lego lekatana. Ba rutile batho ba bantši bao ba botegago therešo ya Beibele gape ba thuša le go hloma diphuthego tše dinyenyane. Ka bo-1980 le bo-1990, Dihlatse tša Jehofa di ile tša oketšega ka makga a tshelelago, kudu-kudu ditoropong tše dikgolo. Gona bjale go na le diphuthego tikologong e nngwe le e nngwe. Diphuthego tše o ka di hwetša dileteng tše di humilego, tšeo go tšona batho ba šomago meagong e metelele ya diofisi, ba dulago ka nywakong e megolo e mebotse e bile ba rekago dilo mabenkeleng. Eupša gape go na le diphuthego ditikologong tše di lego lekatana, moo batho ba dulago ka nywakong ya mobu, ba rekago dilo mebarakeng yeo e lego molaleng le go apara diaparo tša segagabo bona tša mebalabala. Lega go le bjalo, ke’ng seo se ka dirwago go thuša batho ba oketšegilego ba dulago mafelong ao a lego lekatana gore ba tle ba tsebe Jehofa?

Go Gafa Boiketlo bja Bophelo bja Ditoropong

Nywaga-someng e mebedi e sa tšwago go feta, go bile le mohudugo o mogolo wa batho ba tšwago ditorotswaneng tša meepong ya Bolivia le dinaga-magaeng ba e-ya go dula ditoropong tše dikgolo. Go huduga ga batho—go tšwa ditoropong go ya dinaga-magaeng—ke selo se sa tlwaelegago. Dinaga-magaeng tše dintši go na le mogala o tee feela gape mohlagase o ba gona diiri tše sego kae feela ka letšatši. Dihlatse tšeo di dulago ditorotswaneng tše di ka bona badumedi-gotee le tšona feela dikopanong tše bago gona ngwageng gomme go ya go tšona go ka ba go bitša tšhelete e ntši, go le kotsi e bile go lapiša. Dikolo tša gona di nea thuto ya motheo feela. Ka gona, ke’ng seo se hlohleletšago Dihlatse tša Jehofa tše dintši go huduga ditoropong tše dikgolo go ya dinaga-magaeng tše?

Luis o boletše, e sego kgale, gore: “Ke ile ka ba le sebaka sa go tšwetša pele thuto kua toropong e kgolo ya La Paz. Eupša batswadi ba-ka ba be ba dula ba bontšha gore modiro wa go dira barutiwa ke modiro o kgahlišago kudu. Ka gona ke ile ka ithuta go se nene ka mekgwa ya go aga. Nakong ya maikhutšo kua Rurrenabaque, ke ile ka lemoga go tsoma ga batho go theetša ditaba tše dibotse. Ge ke bona gore bana babo rena ba be ba le mmalwa gakaakang fao, ke ile ka no kwa ke nyaka go tlo thuša. Gona bjale ke swara dithuto tša legae tša Beibele tše 12. Ka mohlala, ke ithuta le lesogana le mosadi wa lona bao ba nago le bana ba bane. Lesogana le le be le e-nwa kudu le go petšha eupša le tlogetše tšeo ka moka gomme le thomile go botša bagwera ba lona ka seo le ithutago sona ka Jehofa. Le lokišetša thuto ka mehla. Ge le swanelwa ke go se be gona matšatši a mararo goba a mane le ile go rema dikota sethokgweng, ga le thabe ka gobane le sa nyake go lahlegelwa ke selo. Ge ke ba bona ka moka dibokeng tša Bokriste, ke bona gore go ikgafa ga-ka ka go tla fa e tloga e se ga lefeela.”

Juana ke motswadi yo a se nago molekane. O bolela gore: “Ke be ke šoma bjalo ka  mohlokomedi wa legae kua La Paz. Ge morwa wa-ka a sa le yo monyenyane, ke ile ka tsenela tirelo ya nako e tletšego gona moo toropong e kgolo. Ge ke be ke etetše Rurrenabaque, ke ile ka bona gore nka fihlelela mo gontši ka go hudugela gona. Ka gona re ile ra tla gomme ka hwetša mošomo wa go ba mohlokomedi wa legae. Mathomong, go be go le thata go kgotlelela phišo ya gona le dikhunkhwane. Eupša gona bjale re na le nywaga e šupago re le mo. Ke kgona go swara dithuto tše dintši tša Beibele beke e nngwe le e nngwe gomme bontši bja barutwana bo bontšha tebogo ka go tla dibokeng.” Juana le morwa’gwe ba gare ga bao ba sesago ka sekepe ba lebile moo noka e tšwelelago gona. Le wena o ka tla wa sepela le rena.

Leeto la go ya Moo Noka e Tšwelelago Gona

Entšine ya sekepe e dumela godimo ge re lebile molatswaneng o mosesane. Sehlopha sa mapapagai se a lla, e le ge se ganana le go ba gona ga rena. Meetse a nago le leraga ao a tšwago dithabeng a tšokotša sekepe sa rena ge mootledi wa sekepe a phatša moela ka bokgoni. Mesong ke ge re goroga motseng o monyenyane wa magaeng. Ra kopana le molebeledi wa Phuthego ya Rurrenabaque gona moo gomme a re bontšha moo re swanetšego go dira boboledi gona.

Badudi ba dinaga-magaeng ba re amogela gabotse, e ka ba ka tlase ga moriti wa mohlare goba ka ngwakong o agilwego ka dikota tša mo-bamboo woo o ruletšwego ka matlakala a mopalema. Go se go ye kae ra kopana le banyalani ba bafsa ba swaregile ka go gamola moba ka segamodi seo se dirilwego ka dikota. Matute a gona a tšhelwa ka sebjaneng sa koporo. Ka morago ga moo, ba tlo bediša matute ao go fihlela e e-ba kgotla-o-mone e ntsho yeo ba kago e rekiša toropong. Ba re re tsene ka ngwakong wa bona gomme ba re botšiša dipotšišo tše dintši ka Beibele.

Re tšwela pele re lebile moo noka e tšwelelago gona, re bolela dinaga-magaeng tše dingwe le tše dingwe. Ba bantši ba thabišwa ke go kwa seo Beibele e se bolelago mabapi le go fedišwa ga bolwetši le lehu. (Jesaya 25:8; 33:24) Motsaneng wo wa magaeng, moo tlhokomelo ya tša kalafo e hlaelelago kudu, malapa a mantši a bile le phihlelo e nyamišago ya go hwelwa ke ngwana. Go iphediša ka go lema le go rea dihlapi go thata e bile go kotsi. Lega go le bjalo, ba bantši ba hwetša kholofetšo ya Modimo yeo e lego go Psalme 72 ya mabapi le mmušo wo o tlago go fediša bodiidi e le e kgahlišago kudu. Go sa dutše go le bjalo, na o nagana gore batho ba thabelago bao ba dulago mafelong a bjalo a lego lekatana ba ka tloga ba dira maiteko a go ba gona dibokeng tša Bokriste? Potšišo yeo e ile ya tshwenya Eric le Vicky, bao e lego badiredi ba  nako e tletšego kua Santa Rosa, yeo o ka tšeago diiri tše tharo ka koloi go fihla gona go tloga molapong wa Amazon.

Na Bao ba Thabelago ba tla tla?

Eric le Vicky ba tlile Bolivia ba e-tšwa California, U.S.A., nywageng e 12 e fetilego. Molebeledi wa mosepedi o ile a šišinya gore ba hudugele Santa Rosa. Vicky o re: “Go no ba le megala e mebedi feela toropong gomme ga go na le ka kgokagano ya Internet. Go na le diphoofolo tše dintši tša lešoka. Gantši re bona dikwena, dimpšhe le dinoga tše dikgolo ge re etela dinageng tše di lego lekatana ka dithuthuthu tša rena. Lega go le bjalo, seo se kgahlišago kudu go feta diphoofolo ke batho. Re ithuta Beibele le ba ga Vaca, e lego banyalani ba bafsa bao ba nago le bana ba bane ba banyenyane. Ba dula mo e ka bago dikhilomithara tše 26 go tloga toropong. Monna wa gona e be e le setagwa, eupša o fetogile gona bjale. Bekeng e nngwe le e nngwe o tla le lapa la gagwe ka moka gotee le kgaetšedi’agwe yo monyenyane Holong ya Mmušo. O nametša mosadi wa gagwe le morwedi’agwe kherianeng ya paesekele ya gagwe e kgolo. Ngwana wa nywaga e senyane o nametša kgaetšedi’agwe yo monyenyane paesekeleng e nngwe gomme wa nywaga e seswai yena a ithagelela. Go ba tšea diiri tše tharo gore ba fihle.” Lapa le rata Jehofa e le ka kgonthe gomme le dira maiteko le ge e le afe gore le dire bogwera le phuthego.

Ka dikgwedi tše 18 feela, batho ba bararo ba be ba šetše ba swanelegetše kolobetšo gomme ba e ka bago ba 25 ba e-tla Holong e mpsha ya Mmušo kua Santa Rosa. Gaešita le ge batho ba bantši ba nyaka go ithuta Beibele, ba bantši ba na le mapheko a magolo ao ba swanetšego go lebeletšana le ona e le gore ba hlankele Jehofa.

Tlhohlo ya go Ngwadiša Manyalo ka Molao

Marina le Osni, baromiwa bao ba hlankelago toropong e lego lekatana yeo e lego kgaufsi le mollwane wa Bolivia le Brazil, ba hlalosa gore batho ba bantši mo ga ba tšee lenyalo e le tlemo ya sa ruri. Ba dula le batho ba fapa-fapanego bao ba sego ba nyalana le bona. Osni o re: “Ke bothata bjoo bo thibelago kgolo ya moya. Ge batho ba nyaka go ba Bakriste ba therešo, seo ke mogato o raraganego le o bitšago tšhelete e ntši. Ba bangwe ba swanelwa ke go lokiša ditswalano tša bona tša nakong e fetilego ke moka ba nyalane ka molao. Lega go le bjalo, ka go lemoga gore go ngwadiša lenyalo ka tsela e swanetšego ke senyakwa sa Mangwalo, ba bangwe ba šomile ka thata e le ka kgonthe gore ba hwetše tšhelete e nyakegago bakeng sa go lefa ditshenyagalelo tša mmušo.”—Baroma 13:1, 2; Baheberu 13:4.

Marina o anega phihlelo ya Norberto. “O ile a phela le basadi ba mmalwa pele a dula le mosadi yo a bego a paka dinkgwa. O be a fetwa ke Norberto ka nywaga e ka bago e 35 e bile a na le ngwana yoo Norberto a ilego a mo amogela. Ge mošemanyana a dutše a gola, Norberto o be a nyaka go mmela mohlala o mobotse. Ka gona ge Hlatse e etela lepakeng, e ithapela go swara thuto ya legae ya Beibele le batho, Norberto o ile a e amogela, gaešita le ge a be a sa kgone go bala le go ngwala e bile a šetše a e-na le nywaga e fetago 70. Ge Norberto le molekane’agwe ba se no ithuta seo Jehofa a se nyakago, ba ile ba nyalana ka molao gomme ka morago ga moo ba kolobetšwa. Mošemanyana o feleleditše ka go ba mofsa yo a nago le boikarabelo wa Mokriste—sona seo tatagwe yo e sego wa madi a bego a duma se direga. Norberto o ithutile go bala gomme o šetše a kile a nea dipolelo dibokeng tša phuthego. Ke modiredi yo mafolofolo wa ditaba tše dibotse go sa šetšwe go fokola ga gagwe ka baka la nywaga ya gagwe.”

Go Matlafatšwa ke Moya wa Jehofa

Jesu o boditše balatedi ba gagwe ba pele gore: “Le tla amogela matla ge moya o mokgethwa o fihla godimo ga lena, gomme le tla ba dihlatse tša-ka . . . go fihla karolong ya kgole ya lefase.” (Ditiro 1:8) Ruri ke mo go kgothatšago go bona moya wa Modimo o tutueletša banna le basadi ba Bakriste  go hudugela dikarolong tša kgole! Ka mohlala, ka 2004 Bakriste ba mafolofolo ba ka bago ba 30 ba ile ba amogela kabelo ya nakwana ya go šoma bjalo ka babulamadibogo ba kgethegilego mafelong ao a lego lekatana. Ba tšeela godimo mohlala wa batho ba 180 ba tšwago dinageng tše dingwe bao ba tlilego Bolivia go hlankela bjalo ka babulamadibogo, balebeledi ba basepedi, baithapi ba Bethele goba baromiwa. Bagoeledi ba 17 000 ba Mmušo kua Bolivia ba swara dithuto tše 22 000 tša magae tša Beibele le batho bao ba thabelago.

Go lemoga gore ba hlahlwa ke moya wa Jehofa go tlišetša bana ba babo rena lethabo le legolo. Ka mohlala, Robert le Kathy ba ile ba amogela kabelo ya go ba baromiwa kua Camiri. Bjale ka ge e le gare ga meboto e apešitšwego ke bjang kgaufsi le noka, Camiri e ile ya fo dula e le toropo e lego lekatana. Robert o re: “Go bonala re fihlile ka nako e botse. Ka nywaga e mebedi, batho ba ka bago ba 40 ba bile bagoeledi ba ditaba tše dibotse.”

Mopetšhi wa Setagwa o a Theetša

Batho ba bantši ba toropong ba kgahlwa ke diphetogo tšeo di dirwago ke bao ba ithutago Beibele. Ka mohlala, ka letšatši le lengwe nywageng e mene e fetilego, monna wa setagwa yo a bitšwago Ariel o be a robetše malaong a swerwe ke papalase. Gaešita le ge go petšha ga gagwe go be go mo dira gore e be yo a tsebjago, o be a belaetšwa ke thaba ya gagwe ya dikoloto, lenyalo le nago le mathata le barwedi ba gagwe ba sa hlokomelwego. Dipelaelo tša gagwe di ile tša tsenwa gare ke Dihlatse tša Jehofa di le modirong wa ntlo le ntlo. Ariel o ile a theetša ka kelohloko ge ngwanabo rena a hlalosa Mangwalo. Go se go ye kae ke ge Ariel a le malaong gape a bala mabapi le bophelo bjo bo thabišago bja lapa, Paradeise le go hlankela Modimo. Ka morago o ile a amogela thuto ya Beibele.

Nakong ya ge baromiwa ba goroga Camiri, mosadi wa Ariel, e lego Arminda, le yena o be a ithuta—eupša a sa fišege gakaalo. O boletše gore: “Nka dira le ga e le eng go mo tlogediša bjala. Eupša ke nagana gore go ka se thuše selo. Ke mohlobogwa.” Lega go le bjalo, thuto ya Beibele e be e kgahliša go feta ka moo a bego a naganne ka gona. Ka ngwaga feela, o be a šetše a kolobeditšwe e bile a nea ba lapa la gagwe bohlatse. Go se go ye kae, ba leloko la gagwe ba mmala ba ile ba neela maphelo a bona go Jehofa.

Ge e le Ariel, yena o be a sa lwa le go tlogela bjala, go kgoga le go petšha. Go fetoga ga maemo go ile gwa fihla ge a laletša bagwera ga gagwe ka moka go ba gona Segopotšong sa lehu la Jesu. O be a phethile ka gore: “Ke tla fediša bogwera le bao ba sa tlego. Ke tla ithuta Beibele le bao ba tlago.” O ile a thoma dithuto tše tharo tša Beibele ka mokgwa woo. Gaešita le pele Ariel a e-ba setho sa phuthego, o be a ithuta Beibele le wa leloko yoo a tšwetšego pele gabotse gomme a kolobetšwa le Ariel ka letšatši letee. Arminda o re: “Go be go le bjalo ka ge eka Ariel yola ga a sa le gona.”

Robert o bega gore: “Mafelelong, ditho tše 24 tša lapa le di be di e-ya dibokeng ka mehla. Ba lesome ba kolobeditšwe gomme ba bangwe ba seswai ke bagoeledi ba sa kolobetšwago. Batho ba bangwe bao ba bego ba šeditše boitshwaro bja bona bjo bo fetogilego le bona ba thomile go ithuta Beibele gomme ba tla dibokeng tša phuthego. Bao ba bago gona dibokeng ba oketšegile go tloga go ba 100 go ya go ba 190. Nna le Kathy re swara dithuto tša Beibele tše ka bago tše 30 gomme ka moka ga tšona di tla dibokeng. Re thabela go ba ga rena mo.”

Seo se diregago ditoropong tše di lego lekatana tša Bolivia e fo ba e le karolwana ya modiro wa lefase ka bophara wa kgoboketšo woo go boletšwego ka wona e sa le pele go Kutollo kgaolo 7, yeo e bolelago ka kgoboketšo ya bao ba tlago go phologa masetlapelo a magolo yeo e dirwago “letšatšing la Morena.” (Kutollo 1:10; 7:9-14) Le ka mohla batho ba dimilione ba tšwago ditšhabeng ka moka ga ba ka ba ba batee borapeding bja Modimo wa therešo historing ya batho. A bohlatse bjo bo thabišago gakaakang bja gore phethagalo ya dikholofetšo tša Modimo e kgaufsi!

[Seswantšho go letlakala 9]

Betty Jackson

[Seswantšho go letlakala 9]

Pamela Mosely

[Seswantšho go letlakala 9]

Elsie Meynberg

[Seswantšho go letlakala 9]

Charlotte Tomaschafsky, kgojana ka go le letona

[Seswantšho go letlakala 10]

Eric le Vicky ba tlile go hlankela moo go nago le tlhokagalo ya bagoeledi ba Mmušo ba oketšegilego

[Diswantšho go letlakala 10]

Lapa la ga Vaca le sepela ka dipaesekela diiri tše tharo go ya dibokeng Holong ya Mmušo bekeng e nngwe le e nngwe

[Seswantšho go letlakala 11]

Badudi ba dinaga-magaeng tša kgaufsi le noka ya Beni ba tloga ba theetša ditaba tše dibotse

[Seswantšho go letlakala 12]

Robert le Kathy ba hlankela bjalo ka baromiwa kua Camiri