“Khutlo-tharo e Phepolo e Bolela’ng?”

MOHLANKA wa mmušo yo a šomago lefapheng la tša toko kua Seoul, Repabliking ya Korea, o ngwadile gore: “Matšatši a sego kae a fetilego, ke amogetše kopi ya Morokami go tšwa go yo mongwe wa Dihlatse tša Jehofa.” O tšwetše pele ka gore: “Ge ke be ke e bala, ke ile ka ithuta ditherešo tše itšego tša mabapi le go tlaišwa ga Dihlatse tša Jehofa ka tlase ga pušo ya Nazi le ya Bokomanisi. Eupša ke na le potšišo. Seswantšho sa ka ntle se bontšha Dihlatse tša Jehofa di e-na le khutlo-tharo e phepolo e lebeletšego fase diaparong tša tšona ka go la ntsogošo. Khutlo-tharo e phepolo e bolela’ng?”

Kua Jeremane ka tlase ga pušo ya ma-Nazi, Dihlatse tša Jehofa di ile tša gana go bolela gore phološo e tšwa go Hitler gomme tša boloka boema-gare ditabeng tša dipolitiki le tša bohlabani. Ka gona ma-Nazi a ile a di tlaiša ga sehlogo, a golega Dihlatse tše ka bago tše 12 000 tša dula dikgolegong le dikampeng tša tlhokofatšo ka nako e sa lekanego ka botelele. Tše e ka bago tše 2 000 di ile tša hwa, mola tše makgolo tša palo yeo di ile tša bolawa.

Khutlo-tharo e phepolo yeo e bego e le diaparong tša tšona tša kgolegong e be e swantšhetša’ng? Puku Anatomy of the SS State e hlalosa ka gore: “Dihlopha tše di fapa-fapanego tša bagolegwa kua dikampeng [tša Nazi] di be di e-na le maswao a kgethegilego ao a di hlaolago. Mokgwa o swanago wa go swaya wo o bilego gona pele ga ntwa o be o dirišwa ka go rokelela khutlo-tharo ya lešelana yunifomong ya mogolegwa yo mongwe le yo mongwe, mmala wa yona o e-ya ka gore ke mogolegwa wa sehlopha sefe: bakeng sa bao ba golegetšwego dipolitiki, ke o mohwibidu; bakeng sa Dihlatse tša Jehofa, o mophepolo; bakeng sa majela-thoko, o moso; bakeng sa disenyi, o motala; bakeng sa basodoma, o mopinki; bakeng sa ba dinaga di šele, o motala-lerata. E le go tlaleletša khutlo-tharong ya mmala o itšego, bagolegwa ba ba-Juda ba be ba apešwa khutlo-tharo e serolwana yeo e rokeletšwego godimo ga khutlo-tharo yela ya mmala ka tsela yeo di bego di bonagala bjalo ka Naletšana ya David ya sebopego sa khutlo-tshela.”

Moprofesara John K. Roth o ngwadile ka pukung ya gagwe ya Holocaust Politics gore: “Ge e ba boitshwaro bjo e bo swantšhetšago bo ka gopolwa, gona khutlo-tharo e phepolo e be e ka ba tšhireletšo mathateng nakong e tlago, e lego tšhireletšo yeo khutlo-tharo ya yona e šupago thwii tlhokomelo ya rena le boikemišetšo bja rena botseng bja gore batho ba bantši ba swanelwa ke go hlompšha.” Dihlatse tša Jehofa di tšweleditše bidio yeo e thopago sefoka ya Jehovah’s Witnesses Stand Firm Against Nazi Assault. Ke ka baka la’ng o sa kgopele yo mongwe wa Dihlatse tša Jehofa gore a go hweletše bidio ye?