Dithuto tša Kriste di Dirišwa Kae Lehono?

BATHO ba bantši ba lebelela Jesu Kriste e le yo mongwe wa batho ba phagamego kudu ba kilego ba phela. Ba bantši ba mo tšea e le motho yo a phagamego kudu. Mongwadi wa Leisemane e lego Melvyn Bragg o ngwala gore dithuto tša Jesu di bile le tutuetšo e kgolo maphelong a batho—“ka ditsela tše di sa lemogegego bathong ba lokilego le ba botho gotee le ka go thuša batho ka ditsela tše dintši”—nywageng e nyakilego go ba e dikete tše pedi.

Go Thwe’ng ka Bokriste?

Go thwe’ng ka Bokriste? Bokriste bo hlaloswa e le “e nngwe ya ditšwelopele tše dikgolo tša moya bathong.” Pono e nngwe e ile ya hlaloswa ke David Kelso wa Yunibesithi ya Glasgow ya Caledonia kua Scotland. O ngwadile gore: “Histori ya bjona ya nywaga e dikete tše pedi e tletše ka dilo tšeo di ka se bapišwego le selo tšeo di fihleletšwego go tša bokgabo, thuta-boagi, filosofi, mmino le go tša leago.”

Lega go le bjalo, ba bangwe ba bantši ba lebelela dilo ka tsela e fapanego. Ga ba na bothata le Bokriste bjalo ka ge bo hlaloswa ke pukuntšu e nngwe ka gore: “Bodumedi bjo bo theilwe dithutong tša Jesu Kriste le tumelong ya gore ke morwa wa Modimo.” (Collins Cobuild) Go e na le moo, ba no ba ba tshwenywa ke boitshwaro bja dihlopha le mekgatlo ya bodumedi yeo e ipolelago gore e emela Bokriste.

Ka mohlala, radifilosofi wa Mojeremane wa lekgolong la bo-19 la nywaga e lego Friedrich Nietzsche o hlalositše Bokriste go ya ka tlhaloso ya bobedi e le “patso e ka se tsogego e tlogile bathong.” O ngwadile gore ke “bjona mothopo o mogolo wa tshenyo le modu wa tlhakatlhakano, . . . gomme bo diriša maano le ga e le afe a kotsi, a bohwirihwiri, a utegilego le ao a gobatšago e le gore bo fihlelele pakane ya bjona.” Ke therešo gore Nietzsche o be a na le pono e feteletšego eupša palo e oketšegilego ya batho ba nago le pono e leka-lekanego e  dirile phetho e swanago. Ka baka la’ng? Ka gobane go theoša le nywaga-kgolo boitshwaro bja bao ba ipolelago gore ke Bakriste bo ile bja swawa ke go aparela ga “go senyega ga boitshwaro, bosenyi bjo bo tšhošago le maroga” go e na le go swawa ke dika tša Jesu Kriste.

Na Kriste o sa Dutše a E-na le Bakriste?

Ka gona, ke mo go kwagalago go botšiša gore: “Na Kriste o sa dutše a e-na le Bakriste?” Ba bangwe ba ka araba le semeetseng ka gore: “O tloga a e-na le bona! Na ga a ka a holofetša balatedi ba gagwe gore o tla ba le bona “xo fihla bofelong bya lefase”? (Mateo 28:20, Beibele ya Sepedi) Ee, Jesu o boletše seo. Eupša na o be a e-ra gore o tla ba le yo mongwe le yo mongwe yo a ipolelago gore ke molatedi wa gagwe, go sa šetšwe boitshwaro bja motho yoo?

Gopola gore baetapele ba bangwe ba bodumedi ba mehleng ya Jesu ba be ba nagana gore Modimo o be a tloga a e-na le bona. Bjalo ka ge Modimo a be a kgethile Isiraele bakeng sa tema e kgethegilego, baetapele ba bangwe ba bodumedi ba be ba nagana gore Modimo o be a ka se tsoge a ba lahlile—go sa šetšwe seo ba bego ba se dira. (Mika 3:11) Lega go le bjalo, ba feleleditše ba feteletše ka go gana ga bona melao ya Modimo le ditekanyetšo tša gagwe. Ka baka leo, Jesu Kriste o ile a ba botša ka go lebanya gore: “Bonang! Le tlogeletšwe ntlo ya lena.” (Mateo 23:38) Tshepedišo ka moka ya bodumedi e ile ya se sa amogelwa ke Modimo. O ile a e hlanogela gomme a dumelela madira a Roma go senya motse-mošate wa yona, e lego Jerusalema gotee le tempele ya yona ka 70 C.E.

Na go ka direga seo se swanago ka Bokriste? Anke re eleng hloko dilo tše di nyakegago tšeo Jesu a tlaleleditšego ka tšona kholofetšong ya gagwe ya go ba le balatedi ba gagwe go fihla “bofelong bya lefase.”

 [Diswantšho go letlakala 2, 3]

Dithuto tša Jesu Kriste di na le tutuetšo e kgolo bathong ba dimilione lefaseng ka bophara