Lentšu la Jehofa le a Phela

Dintlha tše Kgolo go tšwa Pukung ya Jobo

MOPATRIAREKA Jobo o dula nageng ya Utsi, yeo ga bjale e lego kua Arabia. Bontši bja Baisiraele ba dula Egipita ka nako ye. Gaešita le ge Jobo ka boyena e se Moisiraele, ke morapedi wa Jehofa Modimo. Beibele e bolela mabapi le yena gore: “Xa xo motho e a swanaxo le yêna ka bothakxa le xo loka, le ka xo boifa Modimo, le ka xo ila bobe.” (Jobo 1:8) Ye e swanetše go ba e le nako ya magareng ga mehla ya bahlanka ba Jehofa ba babedi bao e lego mehlala e mebotse kudu—Morwa wa Jakobo e lego Josefa le moporofeta Moše.

Mohlomongwe Moše, yo go naganwago gore ke yena a ngwadilego puku ya Jobo, o ithutile ka Jobo ge a be a feditše nywaga e 40 a le Midiani, yeo e lego kgaufsi le naga ya Utsi. Moše a ka ba a kwele ka nywaga ya mafelelo ya Jobo ge Baisiraele ba be ba le kgaufsi le Utsi, go ya bofelong bja leeto la bona la nywaga e 40 lešokeng. * Phihlelo ya Jobo e ngwadilwe gabotse kudu moo pego ye e bitšwago puku ye e ngwadilwego ka bokgwari bjo bogolo. Lega go le bjalo, se sengwe gape ke gore e araba dipotšišo tše bjalo ka gore: Ke ka baka la’ng batho bao ba lokilego ba tlaišega? Ke ka baka la’ng Jehofa a dumelela bokgopo? Na batho bao ba sa phethagalago ba ka dula ba botegela Modimo? E le karolo ya Lentšu la Modimo le le buduletšwego, molaetša wa puku ya Jobo o a phela e bile o na le matla gaešita le lehono.—Baheberu 4:12.

‘ANKE KE ROGE LETŠATŠI LA-KA LA MATSWALO’

(Jobo 1:1–3:26)

Ka letšatši le lengwe, Sathane o ile a belaela potego ya Jobo go Modimo. Jehofa o amogela pelaelo ye gomme o dumelela Sathane gore a tlaiše Jobo. Eupša Jobo a gana go “roga Modimo.”—Jobo 2:9, NW.

Bagwera ba Jobo ba bararo ba a fihla gore ‘ba tle go mo homotša.’ (Jobo 2:11) Ba dula le yena ba itše tuu go fihlela Jobo a thoma go bolela gore: “Ke roxa ’tšatši lela la xo tswalwa xa-ka.” (Jobo 3:3) O duma ge nkabe a bile bjalo ka “maseanyana a xo se bônê seedi,” goba ao a belegwago a hwile.—Jobo 3:11, 16.

Dipotšišo tša Mangwalo di a Arabja:

1:4—Na bana ba Jobo ba be ba keteka matšatši a matswalo? Aowa, ba be ba sa a keteke. Lentšu la leleme la setlogo bakeng sa “letšatši” le bakeng sa “letšatši la matswalo” a a fapana, gomme le lengwe le le lengwe le bolela selo se itšego. (Genesi 40:20) Go Jobo 1:4, go dirišwa lentšu ‘letšatši,’ leo le bontšhago tekanyo ya nako ya ge letšatši le hlaba le ge le sobela. Go bonagala barwa ba Jobo ba šupago ba be ba e-ba le pokano ya lapa ya matšatši a šupago gatee ka ngwaga. Ge ba be ba dutše ba šiedišana ka go swara pokano ye, morwa yo mongwe le yo mongwe e be e e-ba morulaganyi wa monyanya wo o bego o swarelwa ntlong ya gagwe ka ‘letšatši leo a ipeetšego lona.’

1:6; 2:1—Ke bomang bao ba bego ba dumeletšwe go ema pele ga Jehofa? Magareng ga bao ba ilego ba ema pele ga Jehofa e be e le Morwa wa Modimo yo a tswetšego a nnoši e lego Lentšu; barongwa bao ba botegago; le ‘barwa ba Modimo’ ba barongwa bao ba sa kwego, go akaretša le Sathane Diabolo. (Johane 1:1, 18) Sathane le batemona ba gagwe ga se ba ka ba rakwa legodimong go ba go fihla nakwana ka morago ga go hlongwa ga Mmušo wa Modimo ka 1914. (Kutollo 12:1-12) Ka go ba dumelela  gore ba eme pele ga gagwe, Jehofa o ile a botša dibopiwa ka moka tša moya pelaelo ya Sathane le dikgang tšeo e ilego ya di tsoša.

1:7; 2:2—Na Jehofa o ile a bolela le Sathane ka go lebanya? Beibele ga e nee ditaba ka botlalo mabapi le kamoo Jehofa a boledišanago le dibopiwa tša moya ka gona. Lega go le bjalo, moporofeta Mika o bile le pono yeo go yona a bonego morongwa a boledišana le Jehofa ka go lebanya. (1 Dikxoši 22:14, 19-23) Ka gona, go be go tla ba molaleng gore Jehofa o boletše le Sathane ba lebantše difahlego.

1:21—Jobo o be a ka ‘boela mmeleng wa mmagwe’ ka tsela efe? Ka ge Jehofa Modimo a bopile motho ka “lerole la mmu,” lentšu “mmê” mo le dirišwa ka tsela ya seswantšhetšo go bontšha lefase.—Genesi 2:7.

2:9—Ke ka baka la’ng mosadi wa Jobo a ile a botša monna wa gagwe gore a roge Modimo gomme a hwe? Mosadi wa Jobo o be a lahlegetšwe ke dilo tše di swanago le tšeo di bego di lahlegetše monna wa gagwe. O swanetše go ba a ile a kwa bohloko kudu ge monna wa gagwe yo a bego a phetše gabotse a swarwa ke bolwetši bjo šoro bjo bo nyemišago moko. O be a hwetšwe ke bana ba gagwe bao ba rategago. A ka ba a ile a nyamišwa ke dilo tše ka moka moo a ilego a lahlegelwa ke pono ya mabapi le selo seo e tlogago e le sa bohlokwa—tswalano ya bona le Modimo.

Seo re Ithutago Sona:

1:8-11; 2:3-5. Go etša ge go bontšhitšwe boemong bja Jobo, ka ntle le go gata mogato o swanetšego le go diriša polelo e hlwekilego, go botega go nyaka gore re be le maikemišetšo a mabotse a go hlankela Jehofa.

1:21, 22. Ka go dula re botegela Jehofa ka tlase ga maemo a kgahlišago le ao a nyamišago, re ka hlatsela gore Sathane ke wa maaka.—Diema 27:11.

2:9, 10. Ka go swana le Jobo, re swanetše go dula re tiile tumelong gaešita le ge ditho tša malapa a gabo rena di sa tšeele godimo dilo tša moya tšeo re di phegelelago goba di re gateletša gore re kwanantšhe goba re tlogele tumelo ya rena.

2:13. Bagwera ba Jobo ga se ba ka ba bolela selo se se homotšago mabapi le Modimo le dikholofetšo tša gagwe ka gobane e be e se batho ba moya.

“KE TLO HWA KÈ SEŠO KA RE: KE MOLATO”

(Jobo 4:1–31:40)

Ntlha ya motheo yeo bagwera ba bararo ba Jobo ba e bolelago dipolelong tša bona ke ya gore Jobo o swanetše go ba a dirile selo se sebe kudu moo a swanelwago ke go amogela kotlo e bjalo e šoro go tšwa go Modimo. Elifase o di goga pele. Bilidada o latela Elifase, a diriša mantšu a hlabago. Tsofara yena o e nametša thaba mola e hlotša.

Jobo ga a amogele go nea mabaka ka tsela e fošagetšego ga baeng ba gagwe. Ka ge a sa kgone go kwešiša lebaka leo ka lona Modimo a dumeletšego gore a tlaišege, o tshwenyega kudu mabapi le go itokafatša. Lega go le bjalo, Jobo o rata Modimo gomme o re: “Ke kxolê le xo Le dumêla; ke tlo hwa kè sešo ka re: Ke molato.”—Jobo 27:5.

Dipotšišo tša Mangwalo di a Arabja:

7:1; 14:14—Ke’ng seo se bolelwago ke polelwana ‘mošomo wa kgapeletšo’ goba ‘tirelo ya kgapeletšo’? Jobo o be a gateletšegile o šoro mo a ilego a nagana gore bophelo bo thata, e bile bo swana le mošomo wa kgapeletšo. (Jobo 10:17, mongwalo wa tlase wa NW) Ka ge nako yeo motho a e fetšago a le Sheole—go tloga nakong ya go hwa ga motho go fihla nakong ya ge a tsošwa—go se na kamoo a ka e tšhabelago ka gona, Jobo o ile a e swantšha le tirelo ya kgapeletšo.

7:9, 10; 10:21; 16:22—Na mantšu a a bontšha gore Jobo o be a sa dumele tsogong? Tše ke ditlhaloso tša mabapi le seo se tlago go diragalela Jobo kgaufsinyane. Ka gona, o be a e-ra go re’ng? Go na le kgonagalo ya gore o be a bolela gore ge a be a ka hwa, o be a ka se bonwe le ke o tee wa dithaka tša gagwe. Go ya ka pono ya tšona, o be a ka se boele ntlong ya gagwe goba go tšwela pele a hlompšha go ba go fihla ka nako ya Modimo yeo e beilwego. Le gona Jobo a ka ba a be a e-ra gore ga go na motho yo a ka boago Sheole ka boyena. Taba ya gore Jobo o be a dumela tsogong e bontšhwa gabotse go Jobo 14:13-15.

 10:10—Ke bjang Jehofa a ilego a ‘tšholla Jobo boka mafsi gomme a mo themiša boka mafsi ge a kgahla’? Wo ke mokgwa wa go reta tsela yeo Jobo a ilego a bopša ka yona ka popelong ya mmagwe.

19:20—Jobo o be a e-ra go re’ng ka polelwana e rego “se se nthšaletšexo ké [“letlalo la,” NW] mênô”? Ka go bolela gore o šaletšwe ke letlalo la selo seo go bonagalago se se na letlalo, Jobo o swanetše go ba a be a bolela gore ga a šalelwa ke selo.

Seo re Ithutago Sona:

4:7, 8; 8:5, 6; 11:13-15. Ga se ra swanela go akgofela go nagana gore motho yo a gateletšegilego o buna seo a se bjetšego e bile ga a amogelwe ke Modimo.

4:18, 19; 22:2, 3. Keletšo ya rena e swanetše go thewa Lentšung la Modimo, e sego dikgopolong tša rena.—2 Timotheo 3:16.

10:1. Go galefa go ile gwa foufatša Jobo mo a sa kago a ela hloko mabaka a mangwe ao a ka bago a ile a dira gore a tlaišege. Ga se ra swanela go galefa ge re tlaišega, kudu-kudu ka ge re kwešiša gabotse dikgang tšeo di akaretšwago.

14:7, 13-15; 19:25; 33:24. Tekong le ge e le efe yeo Sathane a ka re tlišetšago yona, re ka matlafatšwa ke kholofelo ya tsogo.

16:5; 19:2. Mantšu a rena a swanetše go kgothatša ba bangwe le go ba matlafatša, e sego go ba galefiša.—Diema 18:21.

22:5-7. Keletšo yeo e newago motheong wa ditatofatšo tšeo di se nago bohlatse bjo bo kwagalago ga e na mohola e bile e a senya.

27:2; 30:20, 21. E le gore motho a botege, ga go nyakege gore e be yo a phethagetšego. Jobo ka phošo o ile a bea Modimo molato.

27:5. Ke Jobo feela yo a bego a ka dira phetho ya gore a se sa botega ka gobane potego e ithekgile ka lerato leo motho a nago le lona go Modimo. Ka gona re swanetše go hlagolela lerato le matla go Jehofa.

28:1-28. Motho o tseba moo mahumo a lefase a lego gona. Ge a dutše a a tsoma, bokgoni bja gagwe bo mo iša ditseleng tše di lego ka tlase ga mobu moo le nonyana yeo e bonago dilo tša kgole e sa kgonego go bona gona. Lega go le bjalo, re ka hwetša bohlale bjo bo tšwago go Modimo ge re Mmoifa.

29:12-15. Re swanetše gore ka go rata re bontšhe botho bjo lerato go bao ba bo nyakago.

31:1, 9-28. Jobo o re beetše mohlala ka gobane o ile a phema go bapala ka lerato, bootswa, go hloka toka le go swara ba bangwe ka tsela e se nago kgaugelo, go rata dilo tše di bonagalago le go rapela medimo ya diswantšho.

“KE A ITHSÔLA KÈ LE LEROLE LE MOLÔRA”

(Jobo 32:1–42:17)

Go na le lesogana le bitšwago Elihu leo le bego le emetše kua thoko le theeditše ka go se fele pelo ge go be go tšerwe kgang ye. Ga bjale le thoma go bolela ka sebete. Le phošolla Jobo le batlaiši ba gagwe ba bararo.

Ge Elihu a se na go fetša go bolela, Jehofa o araba a le ledimong. Ga a hlalose lebaka la go tlaišega ga Jobo. Lega go le bjalo, ka go botšiša dipotšišo ka go latelana, yo Matla ohle o dira gore Jobo a lemoge matla a Gagwe a makatšago le bohlale bja Gagwe bjo bogolo. Jobo o dumela gore o boletše a sa hlaologanye gomme o re: “Ke a inyatša, ke a ithsôla kè le lerole le molôra.” (Jobo 42:6) Ge diteko tša Jobo di fela, go botega ga gagwe go a putswa.

Dipotšišo tša Mangwalo di a Arabja:

32:1-3—Elihu o fihlile neng? Ka ge Elihu a kwele dipolelo ka moka, o swanetše go ba a be a dutše mo a bego a ka kgona go kwa ka nakwana pele ga ge Jobo a ka bolela, ka go rialo Jobo a dira gore bagwera ba gagwe ba bararo bao ba bego ba homotše ka matšatši a šupago ba bolele.—Jobo 3:1, 2.

34:7—Jobo o be a swana bjang le monna wa  go “hupa maroxa bo-ka meetse”? Ge a be a gateletšegile, Jobo o be a sekametše tabeng ya go tšea gore dipolelo tša baeng ba gagwe ba bararo tša lenyatšo di be di lebišitšwe go yena, mola ge e le gabotse di be di lebišitšwe go Modimo. (Jobo 42:7) Ka gona, o be a monya dikwero go swana le motho yo a nwago meetse ka lethabo.

Seo re Ithutago Sona:

32:8, 9. Go gola ga motho ga go bolele gore o bohlale. Go nyakega gore a kwešiše Lentšu la Modimo le tlhahlo ya moya wa gagwe.

34:36. Potego e hlatselwa ke gore ka tsela e itšego re ‘lekwe go ya go ile.’

35:2. Elihu o ile a theetša ka kelohloko gomme a lemoga ka nepo kgang ya kgonthe pele ga ge a ka thoma go bolela. (Jobo 10:7; 16:7; 34:5) Pele ga ge bagolo ba Bakriste ba ka nea keletšo, ba swanetše go theetša ka kelohloko, ba hwetše dintlha gomme ba kwešiše ditaba tše dingwe tše di akaretšwago.—Diema 18:13.

37:14; 38:1–39:30. Go naganišiša ka mediro e kgahlišago ya Jehofa—diponagatšo tša matla a gagwe le bohlale—go a re kokobetša gomme go re thuša go bona gore go kgethagatšwa ga bogoši bja gagwe go bohlokwa kudu go feta dikgahlego le ge e le dife tša rena.—Mateo 6:9, 10.

40:1-4. Ge re sekametše tabeng ya go belaela ka yo Matla ohle, re swanetše go “swara molomo ka seatla.”

40:15–41:34. Ruri Behemothe (kubu) le Leviathane (kwena) di na le matla! E le gore re kgotlelele tirelong ya Modimo, le rena re nyaka matla go tšwa go Mmopi wa dibata tše tše matla, yo a re neago matla.—Bafilipi 4:13.

42:1-6. Go kwa lentšu la Jehofa le go gopotšwa ka ponagatšo ya matla a gagwe go ile gwa thuša Jobo go “bôna Modimo,” goba go bona therešo ka yena. (Jobo 19:26) Se se ile sa mo fetoša kgopolo. Ge re phošollwa go dirišwa Mangwalo, re swanetše go fagahlela go lemoga phošo ya rena gomme re dire diphetogo.

Hlagolela “Kgotlelelo ya Jobo”

Puku ya Jobo e bontšha gabotse gore Modimo ga a ikarabele ka tlaišego ya batho. Sathane ke yena a ikarabelago. Go dumelela ga Modimo bokgopo lefaseng go re nea sebaka sa go bontšha gore re eme kae mabapi le kgang ya bogoši bja Jehofa le ya potego ya rena.

Ka go swana le Jobo, bohle bao ba ratago Jehofa ba tla lekwa. Pego ya Jobo e re nea kholofelo ya gore re ka kgotlelela. E re gopotša gore mathata a rena a ka se be gona ka mo go sa felego. Pego ya Jakobo 5:11 e re: “Le kwele ka kgotlelelo ya Jobo gomme le bone pheletšo ye Jehofa a e neilego.” Jehofa o ile a putsa Jobo ka baka la go ba mmotegi. (Jobo 42:10-17) Ruri re na le kholofelo e kgolo—bophelo bjo bo sa felego Paradeiseng mo lefaseng! Ka go swana le Jobo, anke re ikemišetšeng go dula re botega.—Baheberu 11:6.

[Mongwalo wa ka tlase]

[Diswantšho go letlakala 16]

Re ka ithuta’ng ‘kgotlelelong ya Jobo’?