Lehu—Therešo e Boifišago!

RADIHISTORI wa mo-Brithania Arnold Toynbee o ngwadile gore: “Go tloga nakong ya ge motho a belegwa, go dula go na le kgonagalo ya ka mehla ya gore motho a ka hwa ka nako le ge e le efe.” O tlaleleditše ka gore: “Gomme kgonagalo ye ka mo go sa phemegego e tla direga.” Ruri lehu le re tlišetša manyami ge le hlasela setho sa lapa seo se rategago goba mogwera wa paale!

Lehu le ile la dula e le therešo e boifišago bathong ka nywaga-kete. Ge motho yo re mo ratago a e-hwa re aparelwa ke maikwelo a go itlhoboga. Manyami a wela batho bohle. Ga a hlaole motho. “Manyami a re dira bana—a hlokofatša bohle go sa šetšwe maemo a bona a thuto. Bao ba hlalefilego kudu ga ba na tharollo.” Ke kamoo go ngwadilego mongwadi wa ditaodišo wa lekgolong la bo-19 la nywaga. Re ba bjalo ka bana ba banyenyane—go se seo re kago se dira, re palelwa ke go fetoša boemo. Gaešita le lehumo goba matla di ka se kgone go fetoša boemo. Ba bohlale le ba tlhaologanyo ba hloka tharollo. Bao ba tiilego ba a lla, go fo swana le ge bao ba fokolago ba lla.

Kgoši Dafida wa bogologolo o ile a welwa ke manyami a bjalo ge morwa wa gagwe Abesalomo a e-hwa. Ka morago ga ge e kwele ka lehu la gagwe, kgoši e ile ya lla ya ba ya goelela ka gore: “Abesalomo ngwan’a-ke! Abesalomo ngwan’a-ke! A xo ka bè xo hwile nna ’bakeng sa xaxo! Joo Abesalomo ngwan’a-ke! Ngwan’a-ke joo!” (2 Samuele 18:33) Kgoši e matla yeo e ilego ya fenya manaba a matla, e ile ya hloka seo e ka se dirago ya duma ge nkabe e bile yona e bolawago ke ‘lenaba la mafelelo e lego lehu’ legatong la morwa wa yona.—1 Bakorinthe 15:26.

Na go na le pheko ya lehu? Ge e ba e le gona, go na le kholofelo efe bakeng sa bahu? Na re tla ka ra tsoga re bone baratiwa ba rena gape? Sehlogo se se latelago se na le dikarabo tša dipotšišo tše.