Pheko e Nnoši ya Lehu!

MONNA yo a bitšwago Latsaro le dikgaetšedi tša gagwe, e lego Mareta le Maria, ba be ba dula Bethania, motse woo o lego mo e ka bago dikhilomithara tše tharo ka ntle ga Jerusalema. Ka letšatši le lengwe ge mogwera wa bona Jesu a sepetše, Latsaro o ile a babja o šoro. Dikgaetšedi tša gagwe di be di tshwenyegile kudu ka yena. Ka gona di ile tša romela Jesu molaetša. Ka morago ga go kwa molaetša, Jesu o ile a ya go bona Latsaro. Ge a le tseleng, Jesu o ile a botša barutiwa ba gagwe gore o ya go tsoša Latsaro borokong. Mathomong barutiwa ba ile ba se mo kwešiše, eupša Jesu a ba hlalosetša ka gore: “Latsaro o hwile.”—Johane 11:1-14.

Ge a fihla lebitleng la Latsaro, sa pele Jesu o ile a laela gore go tlošwe lefsika leo le tswaletšego lebitla. Ka morago ga go rapela ka go hlaboša, o ile a laela gore: “Latsaro, tšwaa!” Gomme Latsaro a tšwa. Monna yo a bego a na le matšatši a mane a hwile o be a tsošitšwe.—Johane 11:38-44.

Pego ya mabapi le Latsaro e bontšha gore tsogo ke pheko e kgonthišeditšwego ya lehu. Eupša na mohlolo wa go bušetšwa ga Latsaro bophelong o diregile e le ka kgonthe? Beibele e o bontšha e le tiragalo ya kgonthe. Bala pego ya seo go Johane 11:1-44 gomme o tla bona gore taba ye e tloga e le ya kgonthe. Na o ka gana gore mohlolo wo o ile wa direga? Go dira bjalo go ka dira gore o belaele gore mehlolo yeo e begilwego ka Beibeleng e tloga e diregile e le ka kgonthe, go akaretšwa le wa go tsošwa ga Jesu Kriste. Beibele e re, bjale “ge e ba Kriste a se a tsošwa, gona tumelo ya lena ke e se nago mohola.” (1 Bakorinthe 15:17) Tsogo ke thuto ya motheo ya Mangwalo. (Baheberu 6:1, 2) Lega go le bjalo, ke’ng seo se bolelwago ke lentšu “tsogo”?

Ke’ng Seo se Bolelwago ke “Tsogo”?

Lentšu “tsogo” le tšwelela ka makga a fetago 40 ka Mangwalong a Bakriste a Segerika. Le fetoletšwe go tšwa lentšung la Segerika leo ka go lebanya le bolelago “go emelela gape.” Polelwana e swanago le yeo ya Seheberu e bolela “go tsošwa ga bahu.” Ka morago ga ge motho a hwile, ke’ng seo se tsošwago? E ka se be mmele woo o bolago gomme wa boela leroleng la lefase. Seo se tsošwago ga se mmele o hwilego eupša ke motho yo a hwilego. Ka gona, tsogo e akaretša go tsošološwa ga mokgwa wa go phela wa motho—dika tša semelo sa gagwe, histori ya bophelo bja gagwe le dilo ka moka tšeo di bopago semelo sa gagwe.

Jehofa Modimo, yo a nago le mogopolo o phethagetšego, ga a palelwe ke go gopola mekgwa ya bophelo ya bao ba hwilego. (Jesaya 40:26) Ka ge e le Mothomi wa bophelo, Jehofa a ka bušetša ga bonolo motho yo a swanago bophelong ka mmele o bopilwego lefsa. (Psalme 36:9) Go feta moo, Beibele e bolela gore Jehofa o “hloloxetšwe”—e lego tumo e tseneletšego le kganyogo—go tsoša bahu. (Jobo 14:14, 15) Ruri re ka thabela gore Jehofa ga a kgone feela go bušetša motho bophelong eupša gape o kganyoga go dira bjalo!

Jesu Kriste le yena o kgatha tema e kgolo kudu go tsošeng bahu. Nakwana ka morago ga ge a na le ngwaga a thomile bodiredi bja gagwe, Jesu o itše: “Go etša ge Tate a tsoša bahu gomme a ba phediša, Morwa le yena o phediša bao a ratago go ba phediša.” (Johane 5:21) Na phihlelo ya Latsaro ga e bontšhe gore Jesu Kriste o na le matla gotee le kganyogo ya go tsoša bahu?

Go thwe’ng ka kgopolo ya gore selo tsoko ka go rena se tšwela pele se phela ka morago ga ge re hwile? Thuto ya tsogo le kgopolo ya go se hwe ga moya wa motho goba matla a bophelo ge e le gabotse di tloga di thulana. Ge e ba go  e-na le selo tsoko ka go rena seo se phologago lehu, go nyakega ga tsogo ke ga eng? Kgaetšedi ya Latsaro e lego Mareta o be a sa dumele gore ka morago ga ge Latsaro a hwile, o ile a tšwela pele a phela lefelong la moya. O be a dumela tsogong. Ge Jesu a mo kgonthišetša gore: “Kgaetšedi ya gago o tla tsoga,” Mareta o ile a bolela gore: “Ke tseba gore o tla tsoga tsogong letšatšing la mafelelo.” (Johane 11:23, 24) Le gona ge a bušeditšwe bophelong, Latsaro ga se a ka a bolela diphihlelo le ge e le dife tša bophelo bja ka morago ga lehu. O be a hwile. Beibele e re: “Xo bahu xa xo se se tsebyaxo.” “Kwa bo-dula-bahu [lebitla le le tlwaelegilego la batho] mo O yaxo xôna, xa xo na modirô, xa xo na kxopolô, xa xo tsebô le bohlale.”—Mmoledi 9:5, 10.

Ka gona, go ya ka Beibele, pheko e nnoši ya lehu ke tsogo. Eupša go batho ba bantši bao ba hwilego, ke bomang bao ba tlogo tsošwa le gona kae?

Ke Bomang Bao ba Tlogo Tsošwa?

Jesu o boletše gore: “Nako e a tla yeo ka yona bohle bao ba lego mabitleng a kgopotšo ba tlago go kwa lentšu la [Jesu] gomme ba tšwa.” (Johane 5:28, 29) Go ya ka kholofetšo ye, bao ba lego ka mabitleng a kgopotšo—bao ba lego ka kgopolong ya Jehofa—ba tla tsošwa. Ka gona, potšišo ke gore, Bathong ka moka bao ba hwilego, ke bomang bao ge e le gabotse ba lego ka kgopolong ya Modimo ba letetšego tsogo?

Puku ya Beibele ya Baheberu kgaolo 11 e lokeletša maina a banna le basadi bao ba hlanketšego Modimo ka go botega. Bona gotee le bahlanka bao ba botegago ka go se kwanantšhe ba Modimo bao ba hwilego mehleng yeno ba tla ba gare ga bao ba tsošitšwego. Go thwe’ng ka batho bao ba paletšwego ke go phela ka ditekanyetšo tša Modimo tša go loka, mohlomongwe ka baka la go hloka tsebo? Na le bona ba ka kgopolong ya Modimo? Ee, bontši bja bona bo gona, ka gobane Beibele e holofetša gore: “Go tla ba le tsogo ya ba lokilego gotee le ba sa lokago.”—Ditiro 24:15.

Lega go le bjalo, ga se bahu ka moka ba tlogo tsošwa. Beibele e re: “Ge re tlwaela go dira sebe ka boomo ka morago ga ge re  hweditše tsebo e nepagetšego ya therešo, gona ga go sa na sehlabelo se sengwe bakeng sa dibe, eupša go na le tebelelo e nngwe e boifišago ya kahlolo.” (Baheberu 10:26, 27) Ba bangwe ba dirile dibe tšeo di sa lebalelwego. Bona ga ba Hadese (lebitla la batho leo le tlwaelegilego) eupša ba Gehenna, lefelo la seswantšhetšo la phedišo ya sa ruri. (Mateo 23:33) Lega go le bjalo, re swanetše go ba šedi gore re se ahlole gore ke mang yo a tlogo tsošwa le gore ke mang yo a ka se tsošwego. Kahlolo ye ke ya Modimo. O tseba gore ke mang yo a lego Hadese le gore ke mang yo a lego Gehenna. Rena, re dira gabotse ge re phela maphelo a rena go ya ka thato ya Modimo.

Ke Bomang Bao ba Tlogo Tsošetšwa Legodimong?

Tsogo e makatšago kudu e bile ya Jesu Kriste. O ile a “bolawa nameng, eupša a phedišwa moyeng.” (1 Petro 3:18) Ga go motho le ge e le ofe yo a kilego a tsošwa ka mokgwa woo pele. Jesu ka boyena o boletše gore: “Ga go motho yo a kilego a rotogela legodimong ge e se yo a theogilego a e-tšwa legodimong, e lego Morwa wa motho.” (Johane 3:13) Ka kgonthe, Morwa wa motho ke wa mathomo yo a tsošitšwego e le motho wa moya. (Ditiro 26:23) Le gona go be go tla ba le ba bangwe. Mangwalo a re: “Yo mongwe le yo mongwe boemong bja gagwe: thakangwaga ke Kriste, ka morago ga moo ya ba bao e lego ba Kriste nakong ya go ba gona ga gagwe.”—1 Bakorinthe 15:23.

Sehlopha se senyenyane sa batho—“bao e lego ba Kriste”—se tla tsošetšwa go phela legodimong ka morero o kgethegilego. (Baroma 6:5) Ba tla buša le Kriste e le “dikgoši godimo ga lefase.” (Kutollo 5:9, 10) Go feta moo, ba tla hlankela bjalo ka baperisita ka kgopolo ya gore ba tla tšea karolo go tlošeng ditla-morago tša sebe seo batho ba se abetšego go motho wa pele, Adama. (Baroma 5:12) Bao ba bušago le Kriste e le dikgoši le baperisita ke ba 144 000. (Kutollo 14:1, 3) Ba tsošwa ka mmele wa mohuta mang? Beibele e re: “[Ka] mmele wa moya.” Se se tla dira gore ba kgone go phela legodimong.—1 Bakorinthe 15:35, 38, 42-45.

Tsogo ya legodimong e tla ba gona neng? Bakorinthe ba Pele 15:23 e araba ka gore: “Nakong ya go ba gona ga [Kriste].” Ditiragalo tša lefase ga e sa le go tloga ka 1914 di bontšha gabotse gore bobedi go ba gona ga Kriste le “bofelo bja tshepedišo ya dilo” di thomile ka wona ngwaga woo. (Mateo 24:3-7) Ka gona ke mo go kwagalago go phetha ka gore go tsogela ga Bakriste bao ba botegago legodimong go šetše go thomile, gaešita le ge e le therešo gore batho ga ba go bone. Se se tla ra gore baapostola le Bakriste ba pele ba tsošeditšwe go phela legodimong. Go thwe’ng ka Bakriste ba lehono bao ba nago le kholofelo e kgonthišeditšwego yeo ba e filwego ke Modimo ya go buša le Kriste legodimong? Ba tsošwa ka “go ponya ga leihlo,” goba gatee-tee ge ba se no hwa. (1 Bakorinthe 15:52) Ka ge tsogo ye ya sehlopha se senyenyane e e-tla pele ga ya batho ba bantši kudu bao ba tlago go tsošetšwa lefaseng, e bitšwa “tsogo ya pele.”—Bafilipi 3:11; Kutollo 20:6.

Ke Bomang Bao ba Tlogo Tsošetšwa Lefaseng?

Go ya ka Mangwalo, bontši bja bahu bo tla tsošetšwa go phela lefaseng. (Psalme 37:29; Mateo 6:10) Ge a hlalosa pono ya gagwe yeo e kgahlišago ya bao ba tsošitšwego, moapostola Johane o ngwadile gore: “Lewatle la ntšha bahu ba lego go lona, lehu le Hadese tša ntšha bahu ba lego go tšona, gomme ba ahlolwa yo mongwe le yo mongwe go ya ka mediro ya bona. Lehu le Hadese tša lahlelwa letsheng la mollo. Se se bolela lehu la bobedi, letsha la mollo.” (Kutollo 20:11-14) Bao ba lego Hadese goba Sheole—e lego lebitla leo le tlwaelegilego la batho—ba ka kgopolong ya Jehofa. Yo mongwe le yo mongwe wa bona o tla lokollwa ditlemong tša lehu. (Psalme 16:10; Ditiro 2:31) Ke moka yo mongwe le yo mongwe o tla ahlolwa go ya ka seo a se dirago ka morago ga ge a tsošitšwe. Ke eng seo se tlago go direga ka lehu  le Hadese? Di tlo lahlelwa “letsheng la mollo.” Se se ra gore lehu leo batho ba le abetšego go Adama le ka se hlwe le sa ba tshwenya.

E fo nagana ka tebelelo e thabišago kudu yeo kholofetšo ya tsogo e e bulelago bao ba lahlegetšwego ke baratiwa ba bona ka lehu! Mohlologadi wa Naini o swanetše go ba a ile a thabišwa kudu ke ge Jesu a tsošitše morwa a nnoši wa gagwe! (Luka 7:11-17) Le gona Beibele e bolela mabapi le batswadi ba ngwanenyana wa nywaga e 12 yoo Jesu a mo tsošitšego ka gore: “Gatee-tee ba thaba wa go se kgone go itshwara.” (Mareka 5:21-24, 35-42; Luka 8:40-42, 49-56) Lefaseng le lefsa la Modimo leo le holofeditšwego, re tla thabela go amogela baratiwa ba rena gape.

Go tseba therešo ka tsogo go ka ba le mafelelo afe go rena gona bjale? The World Book Encyclopedia e re: “Batho ba bantši ba boifa lehu e bile ba leka go phema go nagana ka lona.” Ka baka la’ng? Ka gobane batho ba bantši ga ba kwešiše lehu—selo seo se sa tsebjego e bile se swanetšego go boifša. Go tseba therešo ka boemo bja bahu gotee le go ba le kholofelo ya tsogo go ka re fa sebete ge re lebeletšana le “lehu . . . lenaba la mafelelo.” (1 Bakorinthe 15:26) Tsebo ye gape e dira gore go be bonolo go kgotlelela bohloko bjoo re bo kwago ge re lahlegelwa ke mogwera wa kgaufsi goba re lahlegelwa ke wa leloko ka lehu.

Tsogo ya lefaseng e tlo thoma neng? Lefase lehono le tletše ka bošoro, dintwa, tšhollo ya madi le tšhilafalo. Ge bahu ba be ba ka tsošetšwa lefaseng le le bjalo, ka ntle le pelaelo lethabo le be le tla ba gona ka lebakanyana. Lega go le bjalo, Mmopi o holofeditše gore kgaufsinyane o tla fediša lefase la gona bjale leo le laolwago ke Sathane. (Diema 2:21, 22; Daniele 2:44; 1 Johane 5:19) Morero wa Modimo ka lefase o kgaufsi le go phethagala. Ka gona, lefaseng le lefsa le nago le khutšo leo le dirilwego ke Modimo, batho ba dimilione tše dikete bao ba robetšego lehung ba tla tsoga.

[Seswantšho go letlakala 7]

Bahu ba bantši ba tlo tsošetšwa go phela mo lefaseng