Batswadi—Beelang Bana ba Lena Mohlala o Mobotse

“DITSEBI tša tša monagano di ka kgaotša nyakišišo ya tšona ya nywaga e lekgolo ya go nyaka tsela e di phalago tšohle ya go godiša bana—e sego ka gobane di e hweditše eupša ka gobane e se gona.” Seo se boletšwe ke makasine wa Time tlhahlobong ya wona ya puku yeo e lego mabapi le kgodišo ya bana. Puku e ganetša ka gore bana gantši ba kwa dithaka tša bona go feta batswadi ba bona.

Ga go yo a ka ganago gore kgateletšo ya dithaka ke moya o matla kudu wo go swanetšego go lebeletšanwa le wona. (Diema 13:20; 1 Bakorinthe 15:33) Mongwadi wa dikuranta William Brown o boletše gore: “Ge e ba go e-na le Modimo le ge e le ofe o tee wa lefase wa bafsa, yoo ke Modimo wa go rata go swana. . . . Bafsa ba tšhaba kudu go ba bao ba sa swanego le dithaka tša bona.” Ge batswadi ba palelwa ke go dira gore bophelo ka gae bo be borutho le go ba bjo bo kgahlišago goba ba sa fetše nako e lekanego le bana ba bona—e lego maemo ao ka bobedi a tlwaelegilego lefaseng le la lehono la leema-ema—ge e le gabotse ba dumelela tutuetšo ya dithaka e senya bana ba bona.

Go feta moo, mo “mehleng [ye] ya bofelo,” lapa le hlasetšwe ka gobane go etša ge Beibele e boletše e sa le pele, batho ba swaregile kudu ka tšhelete, maipshino le dikgahlego tša boithati. Ka gona, na re swanetše go makatšwa ke go bona bana e e-ba ba go se “kwe batswadi, ba go se leboge, ba go se botege, ba ba se nago maikwelo a borutho a tlhago”?—2 Timotheo 3:1-3.

Polelwana “maikwelo a borutho a tlhago,” bjalo ka ge e dirišwa ka Beibeleng, e hlalosa lerato la ka lapeng. Lerato le ke tlemo ya tlhago yeo e tutueletšago batswadi go hlokomela bana ba bona le go dira gore bana ba kgomarele batswadi ba bona. Eupša ge batswadi ba hloka maikwelo a borutho a tlhago, bana ba tla nyaka thekgo yeo bathong ba bangwe—ka mo go tlwaelegilego ba tla ya dithakeng tša bona, tšeo go bonalago ba tla amogela ditekanyetšo le mekgwa ya tšona. Lega go le bjalo, boemo bjo gantši bo ka phengwa ge e ba batswadi ba dumelela melao ya motheo ya Beibele e laola bophelo bja bona bja lapa.—Diema 3:5, 6.

Lapa ke Thulaganyo ya Modimo

Ka morago ga go kopanya Adama le Efa bjalo ka monna le mosadi, Modimo o ile a ba nea taelo ye: “Tswalang Le atê, tlalang lefase.” Ka morago ga moo, lapa—e lego tate, mma gotee le bana—le ile la ba gona. (Genesi 1:28; 5:3, 4; Baefeso 3:14, 15) E le gore Jehofa a thuše batho go godiša bana ba bona, o ile a dira gore dibopego tše itšego tša motheo tša botswadi e be tša tlhago. Lega go le bjalo, ka go fapana le diphoofolo, batho ba nyaka thušo e oketšegilego, ka gona Jehofa o ba file tlhahlo e ngwadilwego. E akaretša tlhahlo ditabeng tša boitshwaro le tša dilo tša moya gotee le tabeng ya go laya bana ka mo go swanetšego.—Diema 4:1-4.

Ge a bolela le bo-tate ka mo go kgethegilego, Modimo o re: “Mantšu a ke Xo laetšaxo lehono a a dulê a le pelong ya xaxo. O a tiišetšê bana ba  xaxo; O bolêle ôna O dutše ngwakong wa xaxo, le xe O le tseleng xe O y’o rôbala le xe O tsoxa.” (Doiteronomio 6:6, 7; Diema 1:8, 9) Ela hloko gore batswadi ba be ba swanelwa ke go dira gore molao wa Modimo o be dipelong tša bona pele. Ke ka baka la’ng se e be e le sa bohlokwa? Ka gobane thuto yeo e tlogago e tutuetša batho ba bangwe ga se ya molomo feela eupša e tšwa pelong. Batswadi ba tla fihlelela dipelo tša bana ba bona ge feela ba ruta go tšwa pelong. Batswadi ba bjalo gape ba tla ba mohlala o mobotse baneng ba bona, bao ba ka lemogago ka pela ge e ba batswadi ba sa dire dilo go tšwa pelong.—Baroma 2:21.

Batswadi ba Bakriste ba botšwa gore ba rute bana ba bona “tlwaetšo le tayo le tlhahlo le keletšo ya Morena” go tloga boseeng. (Baefeso 6:4 The Amplified Bible; 2 Timotheo 3:15) Go tloga boseeng? Ee! Mma yo mongwe o ngwadile gore: “Ka dinako tše dingwe rena batswadi re tšeela bana ba rena fase. Re tšeela bokgoni bja bona fase. Bokgoni bjona ba na le bjona. Rena batswadi re swanetše go bo diriša.” Ee, bana ba rata go ithuta gomme ge ba rutwa ke batswadi bao ba boifago Modimo, ba bile ba tla ithuta go ba le lerato. Bana ba bjalo ba tla ikwa ba šireletšegile e bile ba lotegile ka gare ga mellwane yeo ba e beetšwego. Ka gona, batswadi bao ba atlegilego ba katanela go ba bagwera ba lerato, bafetiši ba babotse ba melaetša le barutiši bao ba sa felego pelo eupša e le ba tiilego, ba dira gore go be le boemo bjo bo swanetšego bjoo bana ba bona ba tlago go atlega go bjona. *

Šireletša Bana ba Gago

Hlogo ya sekolo yeo e tshwenyegilego ya kua Jeremane e ngwadile lengwalong leo le yago go batswadi gore: “Re rata go kgothaletša lena batswadi ba ba rategago go katanela go tsenya letsogo kudu kgodišong ya bana ba lena, gomme le se ke la tlogelela seo ge e le gabotse e lego boikarabelo bja lena bja go bopša ga dimelo tša bona go thelebišene goba setarata.”

Go tlogelela ngwana wa gago go thelebišene goba setarata ge e le gabotse ke go dumelela moya wa lefase o tutuetša kgodišo ya ngwana. (Baefeso 2:1, 2) Moya wo wa lefase ka go ganetšana ka go lebanya le moya wa Modimo, o rwala dipeu tša dikgopolo tša ‘lefase, tša bophoofolo le tša botemona’ go swana le phefo e matla gomme wa di tšhollela ka monaganong le ka pelong ya ngwana. (Jakobo 3:15) Ganyenyane-ganyenyane dikgopolo tše tša go swana le mefoka di senya pelo ya ngwana. Jesu o swantšhitše mafelelo a seo se bjetšwego ka pelong ka gore: “Motho yo bolo o tšweletša dilo tše dibotse go tšwa lehumong le lebotse la pelo ya gagwe, eupša motho yo kgopo o tšweletša seo se lego kgopo go tšwa lehumong la gagwe le lebe; gobane molomo wa gagwe o bolela se se tletšego pelong.” (Luka 6:45) Ka gona, Beibele e re lemoša ka gore: “Mo xo tšohle di dišwaxo, diša pelo y’axo; xobane bophelô bo hlaxa xo yôna.”—Diema 4:23.

Ke therešo gore bana ke bana gomme ba bangwe ba na le tshekamelo ya go ba le manganga gaešita le go ba hlogo-thata. (Genesi 8:21) Ke’ng seo batswadi ba ka se dirago? Beibele e re: “Bošilo xe bo xwêrana le pelo ya mošemanyana, bo rakwa ke kxati ya thsôlô.” (Diema 22:15) Ba bangwe ba lebelela se e le tshwaro e mpe yeo e fetilwego ke nako. Ge e le gabotse, Beibele e lwa le bošoro gotee le tshwaro e mpe ya mohuta le ge e le ofe. Le ge “kxati” ka dinako tše dingwe e le ya kgonthe, e emela taolo ya batswadi yeo e dirišwago ka go tia eupša e le ka lerato le ka mo go  swanetšego, ka baka la go tshwenyega ka katlego ya bana ba bona ya ka mo go sa felego.—Baheberu 12:7-11.

Ithabiše le Bana ba Gago

Yo mongwe le yo mongwe o a tseba gore bana ba nyaka go bapala le go itapološa e le gore ba gole gabotse. Batswadi ba bohlale ba diriša dibaka tšeo di bulegago go tiiša tswalano ya bona le bana ba bona ka go ithabiša le bona nakong e nngwe le e nngwe ge go kgonega. Ka gona, ga se feela gore batswadi ba tla thuša bana ba bona go kgetha boitapološo bjo bo nepagetšego eupša gape ba ka bontšha bana gore ba thabela gakaakang go ba le bona.

Tate yo mongwe wa Hlatse o re gantši o be a bapala kgwele le morwa’gwe ge a boa mošomong. Mma yo mongwe o gopola gore bana ba gagwe ba be ba rata dipapadi tša legoro la morabaraba (board games). Morwedi yo a godilego o gopola gore lapa labo le be le thabela go ragela dipaesekele gotee. Bana ba ka moka ba godile gona bjale, eupša lerato la bona la go rata batswadi ba bona—le la go rata Jehofa—e sa dutše e le le matla gomme le tšwela pele le e-ba matla le go feta.

Ka kgonthe, batswadi bao ba bontšhago ka dipolelo le ka mediro gore ba rata bana ba bona le gore ba nyaka go ba le bona, ba ba le tutuetšo e matla ya bophelo ka moka go bona. Ka mohlala, dialoga tše dintši tša sehlopha se sengwe sa Sekolo sa Beibele sa Watchtower sa Gilead di ile tša anega gore kganyogo ya tšona ya go tsenela bodiredi bja nako e tletšego ke mafelelo a mohlala le tlhohleletšo tša batswadi ba tšona. A bohwa bjo bo kgahlišago gakaakang bakeng sa bana, le gona e bile tšhegofatšo e kaakang go batswadi! Ke therešo gore ga se bana ka moka bao ba kago go tsenela tirelo ya nako e tletšego ge ba gola, eupša ka moka ga bona ba tla holwa ke batswadi ba boifago Modimo bao ba fetogago bagwera ba bona ba kgaufsi le mehlala e mebotse, gomme ba tla godiša batswadi bao.—Diema 22:6; Baefeso 6:2, 3.

Batswadi Bao ba se Nago Balekane ba ka Atlega

Bana ba bantši ba golela ka malapeng a motswadi o tee lehono. Gaešita le ge se se tlaleletša tlhohlong ya go godiša bana, katlego e ka fihlelelwa. Batswadi ba se nago balekane ba ka kgothatšwa ke mohlala wa Beibele wa Yunise, e lego Mokriste wa Mojuda wa lekgolong la pele la nywaga. Bjalo ka ge a be a nyetšwe ke motho yo e sego modumedi, Yunise ka ntle le pelaelo o be a sa thekgwe ke monna wa gagwe dilong tša moya. Lega go le bjalo, e bile mohlala tabeng ya go ruta Timotheo. Tutuetšo ya gagwe e botse go Timotheo ya go tloga boseeng, gotee le ya Loisa, makgolo wa Timotheo, e ipontšhitše e le e matla go feta tutuetšo le ge e le efe e mpe yeo e ka bago e ile ya tšwelela dithakeng tša Timotheo.—Ditiro 16:1, 2; 2 Timotheo 1:5; 3:15.

Lehono bafsa ba bantši bao ba gotšego ba e-na le motswadi yo a sa dumelego goba ba goletše ka lapeng la motswadi o tee ba bonagatša dika tše dibotse tšeo Timotheo yo monyenyane a bego a e-na le tšona. Ka mohlala, Ryan, yo ga bjale a nago le nywaga e 22 e bile e le modiredi wa nako e tletšego, o goletše ka lapeng la motswadi o tee yena gotee le mogolo’agwe le kgaetšedi’agwe. Tatago bona e be e le lekgoba la bjala gomme  o ile a lahla lapa ge Ryan a e-na le nywaga e mene. Ryan o ile a elelwa ka gore: “Mma o be a tloga a tsoma gore lapa lešo le tšwele pele le hlankela Jehofa gomme o ile a dira sona seo ka pelo ya gagwe ka moka.”

Ryan o itše: “Seo ke se tsebago ke gore, mma o be a kgonthiša gore rena bana re hwetša tutuetšo e nepagetšego ya dithaka. Le ka mohla o be a sa re dumelele go gwerana le bao Beibele e rego ke bagwera ba babe, e ka ba ka phuthegong goba ka ntle ga phuthego. Gape o ile a tiišetša ka go rena pono e nepagetšego ka thuto ya sekolong.” Gaešita le ge mmago Ryan gantši e be e le motho yo a dulago a swaregile e bile a boa mošomong a lapile, se ga se sa ka sa mo thibela go kgahlegela bana ba gagwe ka lerato. Ryan o itše: “O be a dula a nyaka go ba le rena le go bolela le rena. E be e le morutiši yo a sa felego pelo eupša a tiile, a dira ka gohle go kgonthišetša gore re ba le thuto ya legae ya Beibele ka mehla. Ge go tliwa melaong ya motheo ya Beibele, ‘go kwanantšha’ go be go tloga go se ka kgopolong ya gagwe.”

Ge Ryan a gopola tša bjaneng o lemoga gore motho yo e bilego tutuetšo e matla kudu bophelong bja gagwe le bja bagolo’agwe, e be e le motswadi yo a bego a tloga a rata Modimo gotee le go rata bana ba gagwe. Ka gona lena batswadi ba Bakriste—ba lego lenyalong goba ba bahlologadi, ba nago le molekane yo a dumelago goba go se bjalo—le se ke la bea fase ka baka la go nyama goba ka baka la poela-morago ya nakwana ge le dutše le katanela go ruta bana ba lena. Ka dinako tše dingwe, bana ba bangwe bjalo ka morwa wa lehlaswa, ba ka tlogela therešo. Eupša ge ba bona gore lefase le tloga le se na selo e bile le sehlogo, ba ka boa. Ee, “moloki wa tsela e boló, bana ba xaxwe ba šala è le ba mahlatse.”—Diema 20:7; 23:24, 25; Luka 15:11-24.

[Mongwalo wa ka tlase]

[Lepokisi/Diswantšho go letlakala 11]

BATSWADI BA JESU—BA KGETHILWE KE MODIMO

Ge Jehofa a be a romela Morwa wa gagwe gore a belegwe e le motho, o ile a kgetha batswadi ba Jesu ka kelohloko. Se se kgahlišago ke gore o kgethile balekane ba maemo a tlase, bao ba sekametšego dilong tša moya bao ba sa kago ba lema Jesu eupša ba ilego ba mo ruta Lentšu la Modimo le kamoo go lego bohlokwa ka gona go šoma ka thata gotee le go ba le boikarabelo. (Diema 29:21; Dillo tša Jeremia 3:27) Josefa o ile a ruta Jesu mošomo wa go betla gomme ga go pelaelo gore bobedi Josefa le Maria ba ile ba kgopela Jesu, yo e lego leitšibolo, go ba thuša go hlokomela bana ba bona ba bangwe, bao bonyenyane e bego e le ba tshela ka palo.—Mareka 6:3.

O ka nagana ka lapa la Josefa le šoma gotee ka nako ya Paseka e le ge le lokišeletša leeto la lona la ngwaga le ngwaga la go ya Jerusalema—leeto la go ya le go boa la dikhilomithara tše 200 leo le tšewago ntle le dinamelwa tša mehleng yeno. Ka ntle le pelaelo, lapa la batho ba senyane goba go feta moo le be le tla swanela go ba le thulaganyo e botse go ka tšea leeto le bjalo le letelele. (Luka 2:39, 41) Go sa šetšwe ditlhohlo, ga go pelaelo gore Josefa le Maria ba be ba tšeela dinako tšeo godimo, mohlomongwe ba bile ba diriša dibaka tšeo go ruta bana ba bona ka ditiragalo tša nakong e fetilego tša Beibele.

Ge a be a dutše a gola, Jesu o ile a “tšwela pele a ikokobeleditše” batswadi ba gagwe, ka mehla a “gatela pele bohlaleng le go goleng mmeleng le ka go kgahla Modimo le batho.” (Luka 2:51, 52) Ee, Josefa le Maria ba ile ba ipontšha ba swanelwa ke go botwa ke Jehofa. A mehlala e mebotse gakaakang go batswadi lehono!—Psalme 127:3.